Kò sí mò̩dàrú nínú ipò Olúbàdàn – Seyi Makinde

Fẹmi Akínṣọlá

Báakú làá dère, èèyàn ò sunwọ̀n láàyè.
Gómìnà Ìpínlẹ̀ Ọ̀yọ́ , Seyi Makinde, ti kéde ìpapòdà Olúbàdàn kejiìlélógójí ti ilẹ̀ Ìbàdàn, Kábíyèsí alá yélúwa, Ọba Dr. Moshood Lekan Balogun Alli Okunmade Kejì.

Gómìnà Mákindé kéde èyí nínú àtẹjáde kan ti ó buwọ́lù ni alẹ́ Ọjọ́bọ ọjọ́ kẹrìnlá oṣù kẹta ọdún yìí.

Àtẹ̀jáde náà ṣàlàyé wí pé Kábíyèsí darapọ̀ mọ́ àwọn baba ńlá rẹ̀ ní ìrọ̀lẹ́ Ọjọ́bọ̀ ní ilé ìwòsàn UCH ti ìlú Ìbàdàn.

Gómìnà Makinde ṣàpèjúwe Ọba Balogun gẹ́gẹ́ bí èèyàn tí iwa rẹ wu ni lórí púpọ̀.

Bákan náà ló ní Balógun ṣe iṣẹ tó lààmì-laaka ní ilẹ̀ Ìbàdàn láàrin Ọdún méjì tó lò lórí àlééfà gẹ́gẹ́ bí Olúbàdàn.

Mákindé nínú ìwé ìkẹ̀dun rẹ́, kí ìgbìmọ̀ àpapọ̀ olóyè Olúbàdàn (Olubadan-in-Council) Ìgbìmọ̀ lọ́ba lọ́ba ìpínlẹ̀ Ọ̀yọ́, àwọn ará ìlú Ìbàdàn àti ìpínlẹ̀ Ọ̀yọ́ lápapọ̀.

Nínú ọ̀rọ̀ ibanikẹdun rẹ̀, Makinde ṣàpèjúwe ìpapòdà Ọba Balogun gẹ́gẹ́ bí Ìrókò ńlá tó ṣubú.

Ó ní ìṣèjọba rẹ̀ fihàn wi pé ó ní ìrírí púpọ̀ eléyìí tí ó sì jẹ́ kó tayọ nínú àwọn Ọba tó ti jẹ ṣaájú ni ilẹ̀ Ìbàdàn.

Ó kí ìdílé Ọba Mashood Lekan Balogun kú ara fẹ́raku, tó sì gbàdúrà pé kí Ọlọrun forí jin àṣìṣe Kábíyèsí ọ̀hún.

Ọdún mọ́kànlélọ́gọ́rin ni Kábíyèsí lò láyé, kí wọ́n tó gbeṣẹ̀`.
Ẹ̀wẹ̀, a ti gbọ́ pé ìsìnkú Ọba Balogun yóò wáyé ní ìlànà ẹlẹ́sìn mùsùlùmí lónìí ọjọ́ Ẹtì.

Olúbàdàn ṣẹ̀ṣẹ̀ lo ọdún méjì lóríi àlééfà ni kí ọlọ́jọ́ tó dé.

Mọ̀lẹ́bí kan tó fi ọ̀rọ̀ tó àwọn akọ̀ròyìn létí sọ pé, ní agboolé Olúbàdàn ní Alli-Iwo, ni ìsìnkú náà yóó ti wáyé láago mẹ́rin ọ̀san.

Ọ̀pọ̀ ọmọ, ìyàwó àti ọmọ ọmọ ló gbẹ́yìn Olúbàdàn.

Ìdájọ́ ikú ló yẹ kí wọ́n máa fún àwọn ajínigbé– Rẹmi Tinubu

Fẹ́mi Akínṣọlá

Ìlú tí kò sófin, àwọn àgbà ní ẹ̀ṣẹ̀ kò sí níbẹ̀.
Obìnrin àkọ́kọ́ l’órílẹ̀-èdè Nàìjíríà, Abilékọ Olurẹmi Tinubu, ní ẹjọ́ ikú ló yẹ kí wọ́n máa dá fún gbogbo àwọn ọ̀daràn tí wọ́n bá ti jẹ̀bi ẹ̀sùn tó bá ti ní í ṣe pẹ̀lú ìjínigbé.

Ìyàwó Ààrẹ sọ̀rọ̀ yìí nígbà tó ń fi ìmọ̀lára rẹ̀ hàn lórí bi àwọn agbébọn ṣe ya bo ilé ẹ̀kọ́ alákọ̀ọ́bẹ̀rẹ̀ kan ní ìpínlẹ̀ Kaduna láàárọ̀ Ọjọ́bọ, ọjọ́ keje, oṣù yìí, ti wọ́n sì jí àwọn akẹ́kọ̀ọ́ tó tó bíi ọrinlelugba (280) pẹ̀lú àwọn olùkọ́ wọn kó lọ.
Rẹmi Tinubu ní ìgbàgbọ́ òun ni pé ẹnikẹni tó bá ti ń lọ́wọ́ nínú jíjí àwọn ọmọ kéékékèké gbé gbọdọ̀ jẹ́ aláàárẹ̀, ọ̀dájú àti ojo ènìyàn.Ó ní báwo lẹni tó gbádùn tàbí níláárí kan ṣe lè wò sùnsùn, kò sì lọ̀ọ́ ka àwọn ọmọ kéékékèké mọ́ yàrá ìkẹ́kọ̀ọ́ wọn láti jí wọn gbé lọ.

Gẹ́gẹ́ bíi ẹni tó ti fi ìgbà kan rí jẹ́ ọmọ ilé ìgbìmọ̀ aṣòfin àgbà l’Abuja, Ìyàwó Ààrẹ ní àsìkò ti tó fún àwọn aṣòfin Nàìjíríà kí wọ́n tètè ṣòfin tí yóó máa fi ìyà ńlá jẹ gbogbo ọdaràn tó bá ti jẹbi ẹsùn ìjínigbé, nítorí àwọn àgbà bọ̀, wọ́n ní: ‘má fi oko mi ṣ’ọna, ọjọ́ kan náà lèèyàn ń pinnu rẹ̀ ’.

Anthony Joshua f’ ẹ̀ṣẹ́ dá bátànì sí Fancis Ngannou lára ní Saudi Arabia.

Gbọ́láhàn Quseem

Abẹ̀sẹ́kùbíòjò ọmọ Nàíjíríà ati orílẹ̀-èdè Britain, Anthony Joshua ti ní kí Francis Ngannou gbé jẹ́ pẹlu bo ṣe f’ ẹ̀sẹ́ wó lẹ́nu nínú ìdìje tó wáyé láàrin àwọn méjèèjì lórilẹ̀-èdè Saudi Arabia.

Abala keji idije naa ni Joshua ti lu Ngannou lalubami.

Koda ninu abala kini idije naa ni o ti kọkọ fẹsẹ wo lulẹ ko to wa pari iṣẹ lara rẹ ni abala keji.

Bi ẹni mutika ni Ngannou ṣe n ta gọọ- gọọ nigba to dide nibi to wo lulẹ si ki Anthony Joshua to fi bajinatu ẹsẹ da bira si lara.

Adari idije naa ṣiju aanu wo Ngannou to si sọ pe o to gẹ.

Wọn ni lati wa awọn olutọju ilera lati ṣabẹwo si tori iya ti Joshua fi jẹ.

Mi o kẹrẹ lati koju ẹnikẹni

‘’Mo n pada lọ sinu ibuba mi lẹyin ija yi. Bi wọn ba tu mi silẹ pada mo tun maa doju ija kọ ẹni ba yọju si mi.’’

Esi ree ti Anthony Joshua fọ lẹyin idije naa gẹgẹ bi Tyson Fury to di bẹliiti WBC lagbaye mu ṣe n wo lẹgbẹ ibi ti ija naa ti waye.

Nigba ti Fury ati Ngannou koju ni oṣu Kẹwaa, o tiraka lati bori rẹ ni toripe Ngannou fẹyin rẹ lelẹ ninu idije naa.

Ami ayo kan lo fi ṣagba Ngannou.

‘’Nigba ti mo ri ija to waye laarin Ngannou ati Fury, mo ni o di dandan ki emi naa koju arakunrin Ngannou yi.Akikanju abẹṣẹkubiojo ni ko si tunmọ si pe ifidirẹmi rẹ yi buu ku rara ati rara’’

‘’Mo sọ fun pe ko ma fi iṣẹ abẹsẹkubiojo yi silẹ. Lẹnu igba to bẹrẹ, awọn ogbontarigi meji lo ti koju bayii.’’

Igba kẹẹrin ree ti Anthiny Joshua yoo jawe olubori laarin oṣu mọkanla.

Eyi si n tọka si pe bo pẹ bo ya igbadi abẹsẹkubiojo to fakọyọ lagbaye to n foju sun yoo ja mọ lọwọ laipẹ.

Olupolongo idije ere idaraya nii Eddie Hearn ti kesi Anthony Joshua latikoju ẹnikẹni to ba jawe olubori laarin Tyson Fury ati Oleksandra Usyk.

Awọn mejeeji yoo gbena woju ara wọn loṣu Kaarin ọdun yi lati mọ ẹni ti yoo gba bẹliiti.

Aaye si tun wa fun wọn lati koju pada lẹẹkan si ki ọdun yi to pari.

”Mi o ni ja laarin ọdun marun un.”Joshua fikun.

O ni ”Eddie Hearn ati awọn ikọ mi yoo maa dari eto ọjọ iwaju mi.”

Èèyàn mẹ́tà r’ẹ́wọ̀n he lórí ìbúgbàmù tó wáyé nílù Ìbàdàn.

Gbọ́láhàn Quseem.

Ilé-ẹjọ́ gíga ìjọba àpapọ̀ tó wà nílùú Ìbàdàn, ti ju arábìnrin kan àti ọkùnrin mẹ́ta sí ọgbà ẹ̀wọ̀n, fún ipa tí wọ́n kó nínú ìbúgbàmù tó wàyé nílùú Ìbàdàn nínú oṣù Kìnnì.

Ọjọ kẹrindinlogun, oṣu Kinni, ọdun 2024, ni ibugbamu nla naa waye, nibi ti awọn eeyan ti ku, ti ọpọ si tun farapa.

Oriṣiriṣi ile nlanla lo tun wo lulẹ lasiko iṣẹlẹ naa to waye ni agbegbe Bodija.

Ile-ẹṣẹ ọlọpaa gbe Ramatu Camara,ẹni ọdun mẹtadinlaadọta, Ganiu Malik, ẹni ogun ọdun, ati Abubakar Samara, to jẹ ẹni ọdun mẹrinlelọgọta, lọ si ile ẹjọ fun ẹsun lilo awọn nnkan ija to le pa ilu run, kiko awọn nkan to le fa ibugbamu pamọ, ati awọn ẹsun mi i.

Ọjọ kẹfa, oṣu Keji, ni ijọba ipinlẹ Oyo kede sita pe ọwọ ti tẹ afurasi mẹta to lọwọ ninu isẹlẹ ibugbamu to waye ni Bodija nibi ti ọpọ eeyan ti padanu ẹmi wọn.

Oludamọran si Gomina lori ọrọ eto abo, Fatai Owoseni lo kede ọrọ naa lasiko to n ba awọn akọroyin sọrọ niluu Ibadan.

Owoseni ni eeyan mẹta ni iwadi ti fihan pe wọn lọwọ ninu ibugbamu naa, ti wọn yoo si foju ba ileẹjọ lori iwadi ti awọn agbofino se.

O tẹsiwaju pe agbegbe Aderinola ni ibugbamu naa ti waye ki i se agbegbe Dejọ Oyelese.

Bakan naa lo safihan orukọ nkan to bugbamu naa, eyi to pe ni ‘Water Gel Type Based Explosive’ to si jẹ pe ina mọnamọna lo ma sokunfa ibugbamu naa.

O ni ẹrọ aworan CCTV to jẹ ti ọkan lara Ile ti ibugbamu naa kọlu lo tu asiri bi isẹlẹ naa .

Ọlọpaa to rojọ tako wọn nile ẹjọ sọ pe awọn mẹtẹẹta, ati awọn afurasi mii to ti salọ bayii, jẹbi ẹsun pe wọn ko awọn nkan abugbamu sinu ile gbigbe kan, eyi to ṣekupa iya agba ẹni ọdun marundinlaadọrin, Bolanle Badmus, ati awọn mẹtala mi i.

Adajọ ile ẹjọ naa, E.U Akpan, paṣẹ pe ki wọn o ko awọn afurasi naa si ọgba ẹwọn Agodi titi di ọjọ kọkanla, oṣu Kẹrin, ọdun 2024 ti igbẹjọ yoo tẹsiwaju.

O ni igbesẹ wọn lodi si abala kẹrindinlọgbọn, ofin Naijiria to ni i ṣe pẹlu igbesunmọmi, ati idena rẹ.

Lọ́gbà ẹ̀wọ̀n, rògbòdìyàn bẹ́ sílẹ̀  ẹgbẹ̀rún mẹ́rin ẹlẹ́wọ̀n fẹṣẹ̀ fẹ.

Gbọ́láhàn Quseem

Ìjoba orílẹ̀-èdè Haèiti ti kéde kónílégbélé oní wákàtí méjìléláàdọ́rin lẹ́yìn tí àwọn agbébọn kan yawọ ọgbà ọ̀wọ̀n Port-au Prince.

Eeyan mejila lo padanu ẹmi wọn, ti ẹlẹwọn to le ni ẹgbẹrun mẹrin si sa kuro lọgba ẹwọn naa.

Awọn olori ikọ agbebọn naa, ni awọn gbe igbesẹ yii lati fi tipatipa jẹ ki olootu ijọba orilẹ-ede naa, Ariel Henry, ẹni to wa ni oke okun, kọwe fipo rẹ silẹ.

Ikọ agbebọn naa n gbero lati gba isakoso ida ọgọrin ọgba ẹwọn Port-au-Price.

Lati ọdun 2020 ni irufẹ ikọlu yii ti n waye, to si ti ṣekupa ọpọlọpọ awọn eeyan.

Atẹjade kan ti ijọba fi lede salaye pe ọgba ẹwọn meji, ọ̀kan ni olu ilu orilẹede naa, ati ọgba ẹwọn mii to sun mọ ọ , Croix des Bouquets ni awọn agbebọn naa kọlu lopin ọsẹ to kọja.

Lara awọn to wa ni atimọle ni ọgba ẹwọn Port-au-Prince ni awọn ọmọ ikọ agbebọn to lọwọ ninu iku Aarẹ Jovenel Moise lọdun 2021.

Akọroyin AFP to ṣe abẹwo si ọgba ẹwọn Port-au-Prince ni oun ri to oku eeyan mẹwaa nilẹ, ti awọn kan si wa pẹlu apa ibọn lara.

O ni ilẹkun ọgba ẹwọn naa wa ni ṣiṣi silẹ, ti ko si daju pe ẹnikẹni wa lọgba ẹwọn naa.

Iroyin nipa rogbodiyan ọhun bẹrẹ ni Ọjọbọ ọsẹ to kọja, nigba ti Olootu ijọba orilẹede Haiti, rin irinajo lọ si Nairobi lati lọ jiroro bi wọn yoo ṣe gbe ikọ ologun Kenya wa si Haiti.

Olori ikọ agbebọn naa, Jimmy Cherizier, ẹni ti ọpọ tun mọ si Barbecue, kede pe igbesẹ naa da lori ọna lati yọ oun kuro nipo gẹgẹ bi olori.

Ileeṣẹ ọlọpaa Haiti ti ransẹ si ileeṣẹ ologun lati kun wọn lọwọ fun ipese aabo ni olu ilu, sugbọn awọn agbebọn ṣe ikọlu naa lọjọ Satide.

Ileeṣẹ iroyin Reuters salaye pe, ilẹkun ọgba ẹwọn naa wa ni sisi, ti ko si ẹsọ alabo kankan ni ayika lọjọ Aiku,

Àwọn èèyàn kan lo ayédèrú ìbuwọ́lù Buhari gbowó tùùlù ní CBN

Fẹ́mi Akínṣọlá

Ọ̀kánjúà ń dàgbà,ọgbọ́n inú rẹ̀ ń rewájú.
Ìjọba Nàìjíríà ti ta ọlọ́pàá Interpol lólobó láti bá àwọn nawọ́ gán àwọn afurasí mẹ́ta kan tí wọ́n ṣe àdàmọ̀dì òǹtẹ̀ ààrẹ àná ní Náíjíríà, Muhammadu Buhari láti fi gba owó tùùlù jáde ní akoto owó ilé ìfowópamọ́ àgbà Nàìjíríà, CBN.

Ìwé àkọránṣẹ́ kan tí ìjọba kọ sí Interpol ni wọ́n ti ní àwọn afurasí náà tún ṣe àdàmọ̀dì òǹtẹ̀ akọ̀wé ìjọba sí Ààrẹ Buhari nígbà náà, Boss Mustapha láti gba owó $6.23m ní CBN.

Àwọn afurasí náà gẹ́gẹ́ bí lẹ́tà ọ̀hún ṣe tò ó ni Odoh Ocheme, tó jẹ́ òṣìṣẹ́ CBN, Adamu Abubakar àti Imam Abubakar.

Olùwádìí pàtàkì kan tí Ààrẹ Bola Tinubu gbà láti ṣèwádìí àwọn ẹ̀sùn ìwà ìbàjẹ́ tí wọ́n fi kan gómìnà àná fún ilé ìfowópamọ́ CBN, Godwin Emefiele ló kọ lẹ́tà náà sí Interpol gba ọ́fíìsì ọ̀gá àgbà iléeṣẹ́ ọlọ́pàá Nàìjíríà.
Wọ́n ní ìwádìí fìdí rẹ̀ múlẹ̀ pé Odoh Ocheme, ẹni tó ti na pápá bora báyìí àti àwọn méjì yòókù náà gbìmọ̀ pọ̀ láti jí owó tó tó bílíọ̀nù mẹ́sàn-án náírà látara ṣiṣẹ́ ayédèrú ìwé kan èyí tí wọ́n ní Buhari ló buwọ́lu ìwé náà.

Lẹ́tà náà ṣàfihàn pé ìjọba Nàìjíríà ní àwọn ti ṣetán láti ka ẹ̀sùn mẹ́fà sáwọn ènìyàn mẹ́tẹ̀ẹ̀ta náà lọ́rùn nílé ẹjọ́ gíga ìjọba àpapọ̀ tó wà ní Abuja àmọ́ tí àwọn ènìyàn náà ti na pápá bora.

Ẹ̀wẹ̀, Adájọ́ Inyang Ekwo ti ilé ẹjọ́ gíga Abuja ti gbé àṣẹ kalẹ̀ lọ́jọ́ Kejìdínlógún oṣù Kìíní ọdún 2024 pé kí wọ́n fi òfin gbé àwọn afurasí mẹ́tẹ̀ẹ̀ta náà.

Godwin Emefiele ló ti ń kojú ìgbẹ́jọ́ ní ilé ẹjọ́ gíga ìjọba àpapọ̀ tó wà ní Maitama fẹ́sùn ṣíṣe owó ìlú báṣubàṣu èyí tí ìjọba àpapọ̀ fi kàn-án.

Ikú Sisí Quadri, àwọn àgbàgbà òṣèré mómi lójú pòròpòrò

Fẹ́mi Akínṣọlá

Àwáyé è kú kò sí, kóówá n relé bọ́jọ́ bá tipé.
Àwọn àgbà ní bí ọ̀rọ̀ nlá ò bá tíì tán, èèyàn ńlá ò níín sinmi àròyé .
Láti ọjọ́ Ẹtì tí ìròyìn ikú òjìji tó pa gbajúmọ̀ onítíátà nnì Tọlani Quadri Oyebamiji, tí gbòde kan làwọn èèyàn ti ń ṣe dárò adẹ́rìn-ín-pòṣónú yìí.

Yàtọ̀ sáwọn olólùfẹ́ rẹ̀ tí wọ́n ń gbádùn bó ṣe máa ń bú àwọn èèyàn bíi ẹni láyin nínú fíìmù, àwọn àgbààgbà lágbo tíátà Yorùbá náà sọ̀rọ̀ nípa Sisi Quadri lójú òpó ayélujára Sítágíràmù wọn.

Lára àwọn gbajúmọ̀ òṣèré tó ṣèdárò ikú Sisí Quadri ni Biola Bayo, Ibrahim Yẹkini, Odunlade Adakola, Mr Latin, Ibrahim Chatta, Regina Chukwu, àti bẹ́ẹ̀ bẹ́ẹ̀ lọ.

Ibrahim Yẹkini sọ pé “Ilé ayé ilé asán.”

Ní ti Bọlaji Amusan, Mr Latin, ó ní kí Olúwa fún un nísinmi ayérayé.

Regina Chukwu ni “Kò burú o. Bẹ́ẹ̀ mo ṣì ń ṣọ̀rọ̀ nípa rẹ̀ lọ́jọ́ mélòó kan sẹ́yìn o, láì mọ̀ pé ó ń gbìyànjú láti ṣẹ́gun ikú lọ́wọ́.”

“Ọ̀pọ̀lọpọ̀ èèyàn ò mọ̀ pé mo kọ́ṣẹ́ lọ́dọ̀ rẹ̀ gẹ́gẹ́ bíi aṣojúlóge fún ọ̀pọ̀lọpọ̀ ọdún. Bẹ́ẹ̀ ni, iṣẹ́ aṣojúlóge ni mo ń ṣe fáwọn onítíátà tẹ́lẹ̀. Ó dàárọ̀ o, Ọ̀gá.”

Fẹmi Adebayọ Salami, ní ọjọ́ burúkú ni ọjọ́ ikú olóògbé náà jẹ́, ó sì gbàdúrà kí Ọlọrun tu ìdílé rẹ̀ nínú.
Ọdunlade Adekọla ni “Èyí ba ni nínú jẹ́ púpọ̀ . Ọrun ire, Sisi Quadri.”

Ibrahim Chatta, Saidi Balogun, Laide Bakare, àtàwọn gbajumọ òṣèré tíátà mii tún banujẹ lórí ikú Sisí Quadri.

Ikú òṣèré tíátà Yorùbá nnì,Tolani Quadri Oyebamiji, Sisí Quadri sì ń ṣe ọpọ olólùfẹ rẹ̀ bí ìrànrán.

Káàkiri ojú òpó ayélujára làwọn èèyàn ti ń bèèrè pé kí ló ṣokùnfà ikú rẹ̀ àti pé ipò wo ní ó wà tí ọlọjọ fi dé báa.

Nígbà ti oníròyìn kàn sí ọ̀kan lára àwọn tó kọ́kọ́ kéde ikú rẹ̀ lójú òpó ayélujára Otunba

Adekunle Abolade tí gbogbo ayé mọ sí Dodo Èdè.

Lójú òpó rẹ̀ tó ti kéde ikú Ṣiṣi Quadri, ó sọ pé oun ṣẹ́ṣẹ wo fiimu ti Sisi Quadri ti kópa nínú rẹ̀ Anikulapo tán ni ló wùúrọ òní.

Ó ní Sisí Quadri kú nínú fíìmù náà tó sì ti wá padà jáde láyé lójú ayé gangan.

Nínú àlàyé rẹ̀ tó ṣe Dodo Èdè ní ìlú Ogbomosho ni Sisí Quadri dákẹ sí àti pé ní ilé ìwòsàn Fásitì Ladoke Akintola ló ti ń gba ìtọjú lórí àìlera tó ń kojú lẹnu lọọlọ yìí.

Alága nígbà kan rí fún ẹgbẹ́ sọrọ sọrọ ní ìpínlẹ̀ Ọ̀ṣun yi sọ pé lọwọlọwọ báyìí òun wà lójú ọnà Iwo sí Ogbomosho láti lọ wo irú ètò tó yẹ ní ṣíṣe fún ẹ̀yẹ ìkẹhìn olóògbé

Ikú Sisí Quadri dùn mí nítorí mó sẹsẹ wò fíìmù Anikulapo tàn níbi tó tí ku nínú rẹ̀ ní.

Lára ìbéèrè tí àwọn èèyàn ń bèèrè nípa ikú Sisí quadri ni pé wọ́n fẹ́ mọ irú ikú tó mu ẹmi rẹ̀ lọ.

Báwọn kan ṣe ń sọ pé àìsàn kídìrín ni àwọn mii ń sọ pé àìsàn ráńpẹ́ ló ṣokùnfa ìdágbére rẹ̀
fáyé.

Dòdò Èdè sọ fún akọròyìn pé òun kò lè sọ pàtó ohun tó ṣokùnfa ikú rẹ̀ àmọ́ ó ti tó ọjọ́ mélòó kan tó wà ní ilé ìwòsàn tó ti ń gba ìtọjú ní Ogbomoso.

”Ogbomoso ló dákẹ sí. Ibẹ̀ ni wọ́n sì ti pe mi láti sọ. Lọ́wọ́ báyìí òkú rẹ̀ wà ní àyè ìgbókùúpamọ́sí táa mọ sí mọ́ṣùárí. Kí Ọlọ́run tẹ́ẹ sí afẹ́fẹ́ rere”

Ó fikún-un pé àwọn mọ̀lẹ́bí ni wọ́n wà nípò láti sọ ohun tó pa Sisí Quadri.

Ó ní ikú rẹ̀ jẹ́ ìbànújẹ ńlá fún àwọn èèyàn ìlú Ìwó tó jẹ́ ibi tí wọ́n ti bí Sisí Quadri.
Ó jẹ́ ká mọ wí pé Sisí Quadri fi bàbá sílẹ , ìyàwó àti ọmọ.

E̩gúngún ń rìn ní bèbè è̩wò̩n

Yínká Àlàbí

Egungun ti gbogbo eniyan mo̩ si ‘ara o̩run’ lo ma ti n rin ni bebe e̩wo̩n aye bayii.
Ni ilu Agege ni ipinle̩ Eko ni awon egungun kan ti ko ara wo̩n jo̩ ti won si be̩re̩ si ni wo̩ igboro ka.
Ni o̩wo̩ iro̩le̩ ti wo̩n jade naa ni iroyin kan awo̩n o̩lo̩paa E̩le̩re̩ lara pe̩lu o̩se̩ buruku ti n se ni ilu. Wo̩n be̩re̩ si ni fi e̩ku eegun hale̩ mo̩ awo̩n eniyan, ti awo̩n o̩lo̩ja yii ba ti sare kuro nidii o̩ja ni awo̩n kan a ti pale̩ oja wo̩n mo̩.
E̩yi ya awo̩n ara adugbo Agege le̩nu,wo̩n si sare gba o̩ga o̩lo̩paa agbegbe naa laago, ni eyi ti o mu ki awo̩n o̩lo̩paa pale̩ wo̩n mo̩ ni kia.
O̩ga o̩lo̩paa E̩le̩re̩ ni wo̩n maa foju ba ile e̩jo̩ fun e̩sun ole jija, dida ilu ru ati e̩sun miiran ti awo̩n ara ilu ba tun mu wa ki awo̩n to pa faili wo̩n de.
Oga o̩lo̩paa ni adoju ti asa ni awo̩n eniyan naa nitori pe Egungun kii dede jade laisi o̩dun tabi etutu kankan, eyi si maa je̩ ki awo̩n foju wo̩n wina labe̩ ofin ile̩ wa lati le ko̩ awo̩n miiran to n pale̩mo̩ iwa buruku be̩e̩ lo̩gbo̩n.

Ẹ se sùúrù fún Tinubu, ọrọ̀ ajé Nàìjíríà ti kú kó tó gbàjọba lọ́wọ́ Buhari – Fayose.

Gbọ́làhàn Quseem

Gómìnà ìpínlẹ̀ Èkìtì tẹ́lẹ̀, Ayodele Fayose, ti sọ pé ó yẹ kí àwọn aráàlú gbóríyìn fún Ààrẹ Bola Tinubu fún àwọn akitiyan rẹ̀ láti sọ ètò ọrọ̀ ajé Nàìjíríà jí padà.

Fayose lo sọ ọrọ naa ninu ifọrọwerọ kan pẹlu ileeṣẹ iroyin Channels, nibi to ti ni ọrọ aje Naijiria ti di oku ki Tinubu to gba ijọba.

O ni “Oku ni ọrọ aje Naijiria ki ijọba to bọ sọwọ Tinubu, nitori naa, ohunkohun ti a ba n sọ, o yẹ ka kan sara si i.”

Ti ẹ ko ba gbagbe, lẹyin ti Aarẹ Tinubu fopin si owo iranwọ ori epo bẹntiro ni gbogbo nnkan bẹrẹ si n gbowo lori ni Naijiria, ti awọn araalu si n kigbe ebi.

Eyi lo mu ki ọpọ araalu maa sọ pe ijọba Tinubu ko san awọn nitori ebi ti wa niluu, ti awọn mii si n sọ pe mariwo ni ijọba Buhari to kọja, lai mọ pe egungun gan ni ijọba Tinubu yoo jẹ.

Amọ ṣa, Fayose ti sọ pe Tinubu n gbiyanju, o si n ṣe awọn ohun to yẹ lati ṣatunṣe si awọn nnkan ti ijọba Buhari ti bajẹ ni Naijiria.

Gomina Ekiti tẹlẹ naa sọ pe ko si iṣẹ iyanu kankan ti Tinubu le ṣe lati tun ohun ti ijọba ana ti bajẹ ṣe laarin oṣu mẹsan an pere.

Ninu ifọrọwerọ naa ni Fayose ti naka abuku si ijọba Muhammadu Buhari.

O ni o jẹ ohun ibanujẹ pe ijọba Buhari ti fa ọwọ aago ilọsiwaju Naijiria sẹyin gidi, iya rẹ si lawọn araalu n jẹ loni yii.

Fayose ni “Ẹ wo ọdun mẹjọ ti Aarẹ Buhari lo lori oye, ti Tinubu ba tilẹ ni afojusun rere fun Naijiria, bawo ni yoo ṣe ṣe? Ẹ wo gbogbo gbese to jẹ silẹ, bawo ni yoo ṣe yanju rẹ?”

Gomina tẹlẹri ọhun wa rọ Aarẹ Tinubu ko dẹkun ati maa gboriyin fun Buhari nitori Buhari kii ṣe ibukun fun Naijiria.

Lẹyin naa lo rọ Tinubu ko gbagbe nipa Buhari, ko si ṣiṣẹ takuntakun lati ri daju pe o mu ileri to ṣe fun awọn ọmọ Naijiria lasiko ipolongo ibo rẹ ṣẹ.

Èsì ìpàdé Ààrẹ Tinubu pẹ̀lú àwọn olórí ẹgbẹ́ Afenifere rèé lórí wàhálà tí n bẹ ní ‘lùú.

Gbọ́láhàn Quseem

Ààrẹ Bola Tinubu ti ṣe àbẹwò sì adari ẹgbẹ Afenifere, Pa Reuben Fasoranti fún igbà akọkọ lẹyìn ti o di ààrẹ orilẹede Naijiria

Àbẹwò ọhun waye ni ilu Akure ni ọjọ kejidinlogbon oṣù keji ni ilé adari ẹgbẹ naa.

Ipade naa to wayẹ ni atilekun mori pelu adari Afenifere ati awọn agba-gba ẹgbẹ naa bi Bashorun Sehinde Arogbofa, Akọwe ìjọba àpapọ̀ tẹlẹ Oba Olú Falae

Lẹyìn wákàtí kan ti ipade naa bẹrẹ, ààrẹ Tinubu gbera kuro ni ilé adari ẹgbẹ Afẹ́nifẹ́re.

Agbẹnusọ fún ẹgbẹ Afenifere Ogbeni Jare Àjàyí sọ pẹ awọn ẹgbẹ Afenifere ba ààrẹ Tinubu sọrọ lórí atunto orileede Naijiria ni ẹka òṣèlú, ọrọ ajé, ìbarà eni gbepọ ati awọn ẹka miran.

Laara awọn nnkan ti ẹgbẹ Afenifere bẹrẹ fún nipa atunto orileede Naijiria ni ki awọn agbegbe lẹtọ sì ànfàní lori awọn ọun alumọni ti ìjọba ba ri l’agbegbe wọn

” Gẹgẹ bi o ṣe wa bayi, awọn agbegbe ti orileede Naijiria tin ri epo rọbi lo ni ànfàní sì awọn owo kan sùgbọ́n eleyi ko gbọdọ̀ wa fún epo rọbi nikan, awọn àgbègbè ti ohun alumọni ilẹ̀ wa naa lẹtọ lati maa gba awọn owo kan naa lowo ìjọba gege bi ẹtọ.”

Ogbeni Jare Àjàyí tun sọ pe ààrẹ Tinubu fi daa Pa Fasoranti ati awọn agba Afenifere loju pe ìnira ti awọn ọmọ Nàìjíríà n koju lọwọ yóò di ohun afiseyin teegun n fiṣo.

O ni “Ààrẹ sọ fun wa pe : ṣe ni mo gbàdúrà lati di ààrẹ orilẹede Naijiria . Mo kọrin, mo si jo si. Gbogbo idojukọ yi ni mo ti gbaradi fún. Gẹgẹ bi mo ṣe ṣe ni ilu Eko ti o fi di ipinlẹ ti ọrọ ajé rẹ ni idagbasoke julọ ni ilẹ Africa mo fé fi ipinlẹ to muna doko silẹ fún atunto”

Àjàyí sọ pẹ ààrẹ Tinubu gbe iwe moyege ti INEC fún wa hàn adari ẹgbẹ Afenifere.

Gomina ipinlẹ Ondo Lucky Aiyedatiwa ati Gomina ana dokita Olusegun Mimiko wa lara awọn to peju sibi ìpàdé naa.