Ọba Ọlákùlẹ́yìn gbọ̀pá àṣẹ gẹ́gẹ́ bí Olúbàdàn Kẹtàlélógójì

Fẹ́mi Akínṣọlá

Wọ́n ní orì tí yóó dádé, inú agogo idẹ ní tií wá,ọrùn tí yóó lèjìgbà ìlẹ̀kẹ̀,inú agogo idẹ ní tií wá, ìbàdí tí yóó lo mọ́sàajì, aṣọ Ọba tí í taná yanranyanran,,inú agogo idẹ ní tií wá, èyí ló bí bí Gómìnà ìpínlẹ̀ Ọ̀yọ́, Onímọ̀ Ẹ̀rọ Ṣèyí Mákindé ti gbé ọ̀pá àṣẹ fún Olúbàdàn tuntun,níbi àkànṣe ètò ìfinijoyè tó wáyé ní gbàgede Mapo nílùú Ìbàdàn l’ọ́jọ́ Ẹtì .

Nínú ọ̀rọ̀ tí Mákindé sọ níbi ìpéjọpọ̀ náà, ó ṣe àlàyé wí pé ìgbésẹ̀ tí òun gbé láti fún Olúbàdàn tuntun ní ọ̀pá àṣẹ àti ìwé ẹ̀rí ìyanisípò wà ní ìbámu pẹ̀lú agbára tí a fún un gẹ́gẹ́ bíi Gómìnà ìpínlẹ̀ Ọ̀yọ́.

Lẹ́yìn tí Olúbàdàn tuntun Ọba Owólabí Ọlakulẹhin, Ige Ọlakulẹhin 1 gba ọ̀pá àṣẹ ni Kábíyèsí náà dúpẹ́ lọ́wọ́ gbogbo àwọn tó wá sí ibi àjọyọ̀ náà, gẹ́gẹ́ bí ó ṣe ń gbàdúrà pé ìlú Ìbàdàn yóó máa gòkè àgbà síi.

Àwọn ládéládé-lóyèlóyè, aṣojú ìjọba, àwọn alákòóso ẹgbẹ́ òṣèlú, àwọn asíwájú ẹ̀ṣin àti ọ̀kanòjọ̀kan ẹgbẹ́ àwùjọ kò gbẹ́yìn níbi àkànṣe ètò náà.

Lára wọn ni Mínísítà fún àkóso iná ọba, Adebayo Adelabu tí ó ṣojú Ààrẹ orílẹ̀-èdè yìí, Bọla Ahmed Tinubu, Gómìnà ìpínlẹ̀ Ọ̀yọ́, Onímọ̀ Ẹ̀rọ Ṣèyí Mákindé, Igbákejì rẹ̀, Adebayo Lawal, Gómìnà ìpínlẹ̀ Ògùn, Dapọ Abiọdun, igbákejì Gómìnà ìpínlẹ̀ Òǹdó, Olaide Adelami, igbákejì Gómìnà Ọ̀ṣun, Kola Adewusi, Ọọ̀ni Ilé Ifẹ̀, Ọba Adewusi Enitan Ogunwusi, Sultan Sokoto, Sa’ad Abubakar, Ewi Ado, Oba Rufus Adeyemo Adejugbe, Olugbon Orílé Ìgbọ́n, Ọba Francis Olusola Alao Asẹ́yìn ìlú Ìṣẹ́yìn, Sefiu Oyebola Adeyeri III, Ajirotutu I, Olú Igboọra, Ọba Jimoh Olajide Titiloye, Olóyè Rashidi Ladọja àti àwọn Gómìnà tẹ́lẹ̀rí n’ípìínlẹ̀ Ọyọ, Ààrẹ Mùsùlùmí ilẹ̀ Yorùbá, Edo àti Delta, Alhaji Dauda Akinola, Kọmisana Ọlọ́pàá ìpínlẹ̀ Ọyọ, Ayọdele Ṣonubi, àti bẹ́ẹ̀ bẹ́ẹ̀ lọ.

Gbajúgbajà olórin, Taye Currency ló kan ìlù sí àwọn èèyàn n’íbàdí níbi ìpéjọpọ̀ náà.

Lórí owó oṣù tó kéré jùlọ Tinubu àtẹgbẹ́ òṣìṣẹ́, àáyá ń tiro, Ògúngbè ń bẹ̀rè̩

Fẹ́mi Akínṣọlá

Ìpàdé láàárín ẹgbẹ́ òṣìṣẹ́ àti Ààrẹ Bola Ahmed Tinubu tó wáyé ní ilé ìjọba ní ìlú Abuja ti wá sópin.

Ṣùgbọ́n wọn kò ì tíì fẹnukò lọrí owó oṣù tó kéré jùlọ fún àwọn òṣìṣẹ́.

Ààrẹ ẹgbẹ́ òṣìṣẹ́, Nigeria Labour Congress, Joe Ajaero àti akẹgbẹ́ rẹ̀ ti Trade Union Congress, Festos Osifo ni wọ́n ṣaájú ikọ̀ ẹgbẹ́ òṣìṣẹ́ láti lọ ṣèpàdé pẹ̀lú ààrẹ Tinubu lórí ọ̀rọ̀ owó oṣù tó kéré jùlọ fáwọn òṣìṣẹ́ lọ́jọ́bọ̀, ọjọ́ Kọkànlá, oṣù Keje, ọdún 2024.

Níṣe ni ìrètí wà pé lẹ́yìn tí wọ́n bá parí ìpàdé náà ni ààrẹ Tinubu yóò kéde pé àwọn ti fẹnuk]o pẹ̀lú àwọn òṣìṣẹ́ àma tí èyí kò ṣẹlẹ̀.

Mínísítà fétò ìròyìn, Mohammed Idris tó bá àwọn akọ̀ròyìn sọ̀rọ̀ lẹ́yìn ìpàdé náà ṣàlàyé pé ìjíròrò ṣì ń lọ lọ́wọ́ lórí owó oṣù náà àti pé ìpàdé tí ààrẹ ṣe pẹ̀lú àwọn ẹgbẹ́ òṣìṣẹ́ ni láti fẹnukò lórí iye kan ní pàtó.

Idris ṣàlàyé pé ẹgbẹ́ òṣìṣẹ́ ní lẹ́yìn ìjíròrò wọn pẹ̀lú ààrẹ, ẹgbẹ́ òṣìṣẹ́ ní kí ààrẹ fún àwọn ní ọ̀sẹ̀ láti lọ jíròrò pẹ̀lú àwọn èèyàn wọn kí wọ́n sì jábọ̀ padà nígbà náà.

Ó ní òun ní ìgbàgbọ́ pé lẹ́yìn ọ̀sẹ̀ kan yìí, ẹgbẹ́ òṣìṣẹ́ àti ìjọba yóò fẹnukò lórí iye kan pàtó àti pé yóò so èso rere fáwọn ọmọ Nàìjíríà.

Ẹ ó rántí pé láti bíi oṣù mélòó kan ni ìfaǹfà ti ń wáyé láàárín ìjọba àpapọ̀ àti ẹgbẹ́ òṣìṣẹ́ lórí owó oṣù tó kéré jùlọ.

Ẹgbẹ́ òṣìṣẹ́ ní ẹgbẹ́rùn lọ́nà igba lé ní àádọ́ta náírà (N250,000) ni àwọn ń fẹ́ gẹ́gẹ́ bí owó oṣù tó kéré jùlọ àmọ́ ìjọba àpapọ̀ àtàwọn iléeṣẹ́ aládani ní àwọn kò lè san ju ẹgbẹ́rùn méjìlélọ́gọ́ta (N62,000) lọ.

Bákan náà ni àwọn gómìnà ní àwọn kò lè san ẹgbẹ́rùn méjìlélọ́gọ́ta (N62,000) tí ìjọba àpapọ̀ ní àwọn fẹ́ san.

Ọwọ́ àwọn àjọ òṣìṣẹ́ sifudiẹnsi tẹ àwọn afurásí méjì tí wọ́n ṣòwò egbòogi oloró ní ìpínlẹ̀ Òǹdó.

lbrahim Adédèjì.

Ọwọ́ àwọn òṣìṣẹ́ sífúdìfẹǹsì ẹka tí ìpínlẹ̀ Òǹdó, ti tẹ àwọn afurasí méjì kan tí wọ́n fẹsùn kàn pé wọ́n ń ṣòwò òògùn olóró nílùú Aykurẹ.

Awọn afurasi ọhun, Chukwudi Victor Amoke, ọmọ bibi ijọba ibilẹ Igboeze, nipinlẹ Enugu, ati ọrẹ rẹ, Timilẹyin Abed, to wa lati Ilogbo Ekiti, lọwọ tẹ nitosi ileetura kan ti wọn n pe ni Benue, eyi to wa lagbegbe Ṣáṣá, Ọba-Ile, nijọba ibilẹ Ariwa Akurẹ, lọjọ kẹta, oṣu Keje, ọdun yii.

Ninu atẹjade kan ti Alukoro sifu difẹnsi tipinlẹ Ondo, Ọgbẹni Daniel Aidamembor, fi ṣọwọ si awọn oniroyin lọjọ Iṣẹgun, ọjọ kẹsan-an, oṣu Keje yii, o ni iṣẹ ti Chukwudi ati ẹni keji rẹ yan laayo ju lọ ni pinpin ati tita oriṣiiriṣii oogun oloro fawọn onibaara wọn niluu Akurẹ ati agbegbe rẹ.

Aidamembor ni agbegbe Zone A Glory Land, l’Akurẹ, ni Chukwudi fi ṣe ibugbe, nigba ti Timilẹyin to jẹ ọrẹ rẹ n gbe l’Ojule kẹrinlelogun ninu ọja Ṣaṣa, niluu Akurẹ, kan naa.

Yatọ si ọkan-o-jọkan oogun oloro to ni awọn ba nikaawọ wọn, awọn afurasi mejeeji lo ni wọn tun jẹwọ lasiko ti awọn n fọrọ wa wọn lẹnu wo pe loootọ lawọn n ṣowo egboogi oloro.

O ni awọn ti n gbe igbeṣẹ lati fi awọn mejeeji ṣọwọ sọdọ ajọ to n gbogun ti oogun oloro lẹyin ti iwadii ba ti pari lori ọrọ wọn.

ìrújú sẹlẹ̀ lórí àgbékalẹ̀ ètò òṣèlú France

Gbọ́láhàn Quseem

Lẹ́yin ìkéde èsì ìbò ní France, ìrújú wà lórí bí àgbékalẹ̀ ìlànà ìṣèjọba yó ṣe rí lórílẹ́-èdè náà pẹ̀lú bí kò ṣe sí ìkankan nínú àkójọpọ̀ ẹgbẹ́ òṣèlú mẹ́tẹ̀ẹ̀ta lórílẹ̀-èdè náà ṣe le dá ìjọba ṣe pẹ̀lú iye ìbò tí wọ́n ní.

Nibayii naa, Aarẹ orilẹ-ede naa, Emmanuel Macron ti rọ olootu ijọba, Gabriel Attal pe ko ṣi ni suuru naa, ko si maṣe kọ ‘we fi ipo rẹ silẹ nitori ati mu ki eto iṣejọba duro re lẹyin esi idibo naa.

Olotu ijọba France, Gabriel Attal kede pe oun fẹ kọwe fi ipo silẹ ki Aarẹ Macron to tako igbesẹ naa .

Labẹ ofin ilẹ naa, Aarẹ ni yoo kede ẹni ti yo jẹ olotu ijọba orilẹ-ede naa lati ara akojọpọ ẹgbẹ oṣelu to pọ julọ ni ‘le aṣofin orilẹ-ede naa. Ohun ti ẹgbẹ oṣelu National Popular Front n sọ bayi ni pe awọn yo fi orukọ eeyan ti awọn fẹ ni ipo olotu ranṣẹ si ko to
di opin ọṣẹ.

Ìpalára ńlá ni òjò sé sí ojú òpópónà mọ́tò nípínlẹ̀ Ògùn

Ọlámídé Motúnráyọ̀

Òjò àrọ̀rọ̀dá kan tó rọ̀ láìpẹ́ yìí, lápá ìwọ̀ òòrùn Nàíjíríà ṣe ìjàmbá sí ojú ọ̀nà márosẹ̀ lójú títì; àwọn onímọ́tò ò ríbi gbà, ẹlẹ́sẹ̀ náà kò ríbi rìn.

Ohun tójú ń rí láwọn òpópónà tó wà ní ìpínlẹ̀ Ògùn, tí fi ọ̀pọ̀ àṣírí hàn gbangba pé àwọn òpópónà ti di ẹgẹrẹmìtì. Ní èyí tí ọ̀pọ̀lọpọ̀ aráàlú sì da ẹnu bo ìpínlẹ̀ Ògùn jùlọ, lórí ẹ̀rọ ayélujára.

Èyí mú ikọ̀ akọ̀ròyìn tẹkọ̀létí gba ìpínlẹ̀ Ògùn lọ láti fi ojú gánní ipò tí àwọn òpópónà náà wà àti ìrírí àwọn
aráàlú lágbègbè náà nípa àwọn òpópónà yìí.

Ọ̀pọ̀ àwọn èèyàn ìpínlẹ̀ náà pàápàá àwọn awakọ̀ àtawọn oníṣòwò ni wọ́n ké tantan, tí wọ́n sì ń fi àìdunnú wọn hàn sí ipò ti àwọn òpópónà naa wà léyìn tí ó sì ń jẹ́ ọgbẹ́ ọkàn fún wọn. Wọ́n ní kìí ṣe ọṣẹ́ díẹ̀ ni àwọn òpópónà náà ti ṣe kó bá ọrọ̀ ajé wọn tí awọn mìíràn tilẹ̀ ní ó ti rán àwọn lọ sí oko gbèsè.

Ẹ̀yin ọlọ́pàá orílẹ̀-èdè Algeria, Tunisia, Morocco, ẹ bá wa mú Yahaya Bello tẹ́ ẹ bá rí o – EFCC

Ọrẹ Òtítọ́jù

Yoòbá bọ̀, wọ́n ní ìwákúwàá ohun tó bá sọnù, àti pé bí ẹni à ń pè kò bá tí ì dáhùn, ẹni ń pè’ni kò ní ín dákẹ, èyí ló d’ífà fún bí àjọ tó ń gbógun ti ìwà jìbìtí lílù, ì kówójẹ ní koto ọba àti ìwà àjẹbánú gbogbo nílẹ̀ wa, Economic and Financial Crimes Commission (EFCC) ṣe kégbàjarè s’áwọn ọlọ́pàá ọ̀tẹlẹ̀múyẹ́ àgbáyé, International Police, tí wọ́n ń pè ní INTERPOL láwọn orílẹ-èdè Tunisia, Morocco àti Algeria, pé kí wọ́n wa lójúfò dáadáa báyìí, kí wọ́n máa fura, kí wọ́n sì máa dọdẹ Gómìnà ìpínlẹ̀ Kogi àná, Ọ̀gbẹ́ni Yahaya Adoza Bello, bóyá wọ́n lè kẹ́ẹ́fín rẹ̀, tàbí kó sá pamọ́ sọ́dọ̀ wọn, wọ́n ní kí wón tètè b’áwọn fọwọ́ sìkún òfin mú un, kí wọ́n sì tètè ta àwọn lólobó, k’áwọn lè wá mú un níbikíbi tó bá wà, tàbí kẹ, kí wọ́n fi s’ọ̀kò padà sí Nàìjíríà, torí àwọn sì ń wá bàbá náà lójú méjèèjì.

EFCC ni yatọ s’awọn orileede Ariwa Afrika mẹta t’awọn darukọ yii, wọn tun fẹ k’awọn ọlọpaa orileede Egypt, Libya ati Sudan naa wa lojufo, lati ba wọn mu gomina tẹlẹri yii.

Olofofo kan nileeṣẹ EFCC sọ fawọn oniroyin pe laipẹ yii, Alaga ajọ EFCC, Ọgbẹni Ọla Olukoyede, gba orileede Singapore sọda si Tunisia, nibi to ti ba awọn oniroyin, awọn agbofinro, at’awọn aṣoju alaṣẹ ijọba wọn sọrọ lori igbesẹ lati gbe’gi dina fun awọn onijibiti, at’awọn ti wọn n ṣ’owo ijọba baṣubaṣu, titi kan awọn ti wọn n ji owo ko tọju pamọ si ilẹ okeere.

Nibi apero naa ni Olukoyede ti ṣepade idakọnkọ pẹlu awọn olori ileeṣẹ ọlọpaa ọtẹlẹmuyẹ agbaye, iyẹn awọn INTERPOL pe ki wọn ṣeranwọ f’awọn lori Yahaya Bello ti ajọ EFCC ti kede pe awọn n wa, o lẹjọ i jẹ lori awọn iwa ikowojẹ to waye lasiko iṣejọba rẹ nipinlẹ Kogi.

Olobo naa sọ pe awọn alaṣẹ INTERPOL ti gba lati ṣeranwọ lori ọrọ yii, ti wọn si ti sọ fawọn ẹṣọ wọn gbogbo lati wa lojufo daadaa, nipa irinsi Bello.

A gbọ pe ọpọlọpọ eto ati igbesẹ lo ti n lọ wẹrẹwẹrẹ labẹnu lati fi pampẹ ofin gbe Bello.

Wọn ni sisapamọ ti Yahaya Bello sapamọ jẹ ọna ẹtan lati ma ṣe kawọ pọnyin ro’jọ ni kootu lori awọn ẹsun ti wọn fi kan an, eyi ti EFCC lawọn ti ṣewadii rẹ, ẹri si wa daadaa pe ọkunrin naa lẹbọ lẹru.

Ẹ o ranti pe obitibiti owo ti iye rẹ ju biliọnu lọna ọgọrin Naira lọ ni EFCC lo poora mọ Yahaya Bello lọwọ gẹgẹ bii Gomina ipinlẹ Kogi, eyi ti wọn fi tori ẹ kọwe si i pe ko yọju si wọn, amọ ti ko ṣe bẹẹ. Kaka bẹẹ, niṣe l’ọkunrin naa gbọna ẹyin sa mọ awọn EFCC lọwọ l’oṣu Karun-un, ọdun yii, nigba ti wọn wa a lọ lati fi pampẹ ọba gbe e.

Ẹ gbọ! Wọ́n ní Tinubu lọ́wọ́ nínú wàhálà oyè Emir nílùú Kano

Gbọ́láhàn Quseem
À fi kí Ọlọ́run má jẹ́ kí wọ́n parọ́ tó jọni mọ́ni.
Ẹni tó jẹ́ alága ẹgbẹ́ òṣèlú NNPP ní ìpínlẹ̀ Kano, Hashimu Dungurawa, ti fẹsùn kan Ààrẹ Bola Ahmed Tinubu pé òun ló ń dá wàhálà sílẹ̀ láàárín Muhammadu Sanusi Kejì àti Aminu Ado Bayero ní ìpínlẹ̀ Kano.

Ọjọgbọn Hashimu ló sọ ọ̀rọ̀ náà nínú ìfọ̀rọ̀wérọ̀ kan pẹ̀lú àwọn akọròyìn níbi tó ti sọ pé òun ni ẹrí ti kò se é takò láti fi kín ọ̀rọ̀ òun lẹ́yìn.

O ni “O han gbagba pe Aarẹ Tinubu lọwọ ninu ohun to n ṣẹlẹ lọwọlọwọ laarin àwọn
mejeeji.

“Tinubu, latari ibaṣepọ rẹ pẹlu iya to bi Emir ana, iyẹn Aminu Ado Bayero, sọ pe oun ko ni gba ayafi ti wọn ba da pada sipo to wa tẹlẹ.

“Wọn ko awọn ọlọpaa ati ọmọ ogun wa s’ilu Kano lasiko naa ti Naijiria n koju iṣoro eto abo, eyii ko si ṣẹyin erongba rẹ lati gbogun ti awọn ti ko ṣatilẹyin fun.”

Nigba ti awọn akọroyin bere lọwọ adari ẹgbẹ NNPP naa boya o ni ẹri lati kin ọrọ rẹ lẹyin, o ni “Ta ni Aarẹ Naijiria lọwọ yii? Ṣe ki n ṣe Tinubu ni? Njẹ o ṣeeṣe ki wọn ko ọlọpaa ati ọmọ ogun lọ si agbegbe kan fun ọpọlọpọ oṣu ki Aarẹ ma mọ nipa rẹ? To ba sọ pe oun ko mọ, a jẹ pe wahala wa nigbayẹn.”

È̩mi kankan kò sòfò nìnú ìko̩lù òpópónà Abe̩okuta si Eko – Agbẹnusọ ọlọ́pàá.

Gbọ́láhàn Quseem

Lásìkò tí ó n fi íròyìn síta lórí ìṣẹ̀lẹ̀ ọ̀hún, SP Ọmọlọlá Odùtọ́lá tó jẹ́ agbẹnusọ ọlọ́pàá ní ìpínlẹ̀ Ògùn sọ pé, àwọn ti bẹ̀rẹ̀ si sèwadìí l’órí àwọn ajínigbé náà.

Odutọla ninu atẹjade naa ṣalaye pe, ọkunrin kan ni awọn ajinigbe ọhun tọpinpin rẹ de agbegbe ti ọna ko ti dara lopopona marosẹ ọhun, ko to di pe wọn yin ‘bọn mọ taya mejeeji to wa ni ẹyin ẹsẹ mọto rẹ lati le daa duro.

Ninu ọrọ rẹ, o sọ pe “Ikọ agbebọn ti enikẹni ko le sọ pato iye wọn, ninu mọto Toyota Venza ti ko ni nọmba idanimọ, ni wọn tọpinpin ọkunrin kan to wa ninu mọto Toyota RAV4, alawọ eeru rẹ pẹlu nọmba idanimọ AGL-16-JE.

“Bi wọn ṣe de agbegbe ti ọna ko ti dara, ni wọn wa mọto dina mọ mọto ọkunrin naa.

“Awọn ọdaran naa yin ‘bọn ẹlẹnu mẹrin ti igbagbọ wa pe AK-47 ni wọn gbe dani, si taya ẹyin rẹ, ti wọn si tun yin ‘bọn fun taya iwaju.

Loju ẹsẹ ni wọn bọ silẹ, ti wọn si wọ ọkunrin ọhun bọ silẹ lati wọ inu mọto rẹ, ko to di pe wọn mori le ọna Ijẹbu-Ode.

“Lasiko ikọlu naa, awọn ọdaran yii tun yin ‘bọn fun awakọ Toyota Camry, alawọ dudu kan lẹsẹ lasiko to n gbiyanju lati yi pada, ko si salọ.

Bakan naa, wọn tun fọ gilaasi awakọ bọọsi kan to n rinrin-ajo lati Abuja lọ si Eko, ti wọn si gba foonu rẹ lọ, pẹlu ikilọ pe oun kọ ni wọn n wa.”

Odutọla fidi rẹ mulẹ pe, ko si ẹni to padanu ẹmi rẹ ninu ikọlu ọhun, ati pe, awọn mọto meji to bajẹ ninu ikọlu naa ni wọn ti wọ lọ sagọ ọlọpaa to wa nitosi.

O fi kun ọrọ rẹ pe ọga ọlọpaa ipinlẹ Ogun ti gbọ si iṣẹlẹ naa, to si ti paṣẹ pe ki ikọ to n ri sọrọ ijinigbe bẹrẹ iṣẹ iwadi .

Abilékọ kan figbeta níwájú adájọ́ n’Ílọrin: “Mo fẹ́ kọ̀ ọ́ lọ́kọ kò sí ààbò f’ẹ́mìí mi mọ́”

Fẹ́mi Akínṣọlá

Iwájú Onídàájọ́ Sakariyau Abdulrasak, tilé-ẹjọ́ kọkọ-kọkọ kan tó wà ní agbègbè Akérébíata, niluu Ìlọrin, tí í ṣe olú ìl ipinlẹ Kwara, làwọn tọkọ-taya méjì kan, Abilékọ Ajara Taofeek àti Ọ̀gbẹ́ni Taofeek Abdulrasheed, wọ́ ara wọn lọ. Abilékọ Ajara ló gbé ẹjọ́ ọkọ rẹ̀ lọ sílé-ẹjọ́ ọ̀hún pé kí adájọ́ bá òun tú ìgbéyàwó ọdún gbọọrọ tó wà láàrin àwọn méjèèjì ká, kí kálùkù àwọn lè máa lọ láyọ̀ àti àlàáfíà báyìí.

Ninu ọrọ rẹ nile-ẹjọ ọhun lo ti sọ pe, ‘‘Oluwa mi, inu mi maa dun gidi bẹ ẹ ba le tu igbeyawo ọdun gbọọrọ to wa laarin emi pẹlu ọkọ mi yii ka, ẹmi mi ti fẹẹ pin, ko si aabo fun ẹmi mi mọ o, mi o si fẹẹ foju sunkun ọmọ mi mọ.

‘‘Ọmọ marun-un ni mo bi fun baba ọmọ mi yii, ọkan si ti ku, wọn ṣẹ ku mẹrin. Nitori ẹmi mi atawọn ọmọ mi, mi o fẹẹ foju sunkun ọmọ kankan mọ, Oluwa mi, ẹ ba mi bẹẹ ko yọnda mi”.

Olujẹjọ, Taofeek Abdulrasheed, sọ fun ile-ẹjọ pe, ‘’Iyawo mi ko ri ẹsun kankan ka si mi lọrun pe ohun ti mo ṣe ree, o kan ni oun ko ṣe mọ ni, ṣugbọn emi ko ṣetan lati kọ iyawo mi, mo si nifẹẹ rẹ.

“Obinrin gidi niyawo mi, ni asiko to rẹ mi, ti ẹṣẹ mi da, o duro ti mi, ṣaaṣa lobinrin to le duro ti ọkọ lọjọ iṣoro, koda, oun lo n gbọ gbogbo bukaata ile, ṣugbọn ara mi ti ya, emi naa si ti n ṣiṣẹ bayii.

Gbogbo igbiyanju adajọ lati mọ idi pataki ti Abilekọ Ajara, fi ni oun ko ṣe mọ lo ja si pabo, ‘ko si ifẹ mọ, ẹmi mi ti pin’ ni orin ti obinrin naa n kọ.

Adajọ Sakariyau sun igbẹjọ siwaju di ọjọ kẹtadinlogun, oṣu Keje, ọdun 2024.

Adájọ́ da ẹjọ́ kòtẹ́milọ́rùn tí Bàbà Ìjẹ̀ṣà pè nù, wọ́n ní dandan ni kó lo ọdún márùn-ún lẹ́wọ̀n

Fẹ́mi Akínṣọlá

Ẹsẹ̀ kò gbèrò nílé-ẹjọ́ kòtẹ́milọ́rùn kan tóo wà nílùú Ìkejà, níìpínlẹ̀ Èkó, lásìkò ìgbẹ́jọ́ ti adẹ́rìn-ín-pòṣónú nnì, Ọ̀gbẹ́ni Ọlanrewaju James, ẹni táwọn èèyàn mọ̀ sí Bàbá Ìjesha pè, láti dín iye ọdún tí Onídàájọ́ Oluwatoyin Taiwo jù ú sí lọ́jọ́ kẹrìnlá, oṣù Kẹjọ, ọdún 2022 kù.

Awọn alaṣẹ ijọba ipinlẹ Eko ni wọn ba Baba Ijesha ṣẹjọ lori ẹsun iwa ti ko bofin mu wọn fi kan an pe o n ba ọmọde kan tọjọ ori rẹ ko ju ọdun mẹrinla lọ ṣere egele. Iwaju Onidaajọ Oluwatoyin Taiwo, tile-ẹjọ akanṣe kan to n ri si lilo ọmọde nilokulo ati fifipa ba awọn obinrin sun, ‘Special Offences Court’, to wa niluu Ikeja, nipinlẹ Eko, ni wọn wọ Baba Ijesha lọ nigba naa lọhun-un. Ẹsun mẹfa ọtọọtọ, ninu eyi ti igbiyanju lati ba ọmọde ni nnkan pọ, lilo ọmọde nilokulo ati bẹẹ bẹẹ lọ wa ni wọn fi kan oṣere yii. Lẹyin gbogbo atotonu oun ati ti lọọya rẹ, adajọ ju u sẹwọn ọdun marun-un pẹlu iṣẹ aṣekara lọgba ẹwọn Kirikiri, niluu Eko.

Nigba ti igbẹjọ rẹ waye l’Ọjọbọ, ọjọ kẹtadinlọgbọn, oṣu Kẹfa, ọdun yii, Onidaajọ Fọlashade Ojo to ṣaaju ikọ adajọ ẹlẹni mẹta kan to n gbọ ẹjọ rẹ ni ko si awijare kankan fun olujẹjọ nipa ẹjọ kotẹmilọrun to pe. Pe o gbọdọ lo iye ọdun ti Onidaajọ Abilekọ Taiwo da fun un lọgba ẹwọn.

O ni ọrọ to sọ lọdọ awọn ọlọpaa Sabo, lọjọ kọkanlelogun, oṣu Kẹrin, ọdun 2021, ati lọjọ kejidinlọgbọn, oṣu Kẹrin, ọdun 2021, nipa ipa to ko ninu ẹsun ti wọn fi kan an ko yatọ rara.

Pẹ̀lú ìdájọ́ yìí, ìrètí Bàbá ljẹṣa láti tètè kúrò lọ́gbà ẹ̀wọ̀n ti já sí pàbó, àfi bó bá tún gbé ẹjọ́ náà lọ sí ilé-ẹjọ́ tó ga jù lọ nílẹ̀ wa ló kù.