Ipò Aláàfin kì í ṣe fún jẹhunjẹhun- Seyi Makinde
Fẹ́mi Akínṣọlá
Ṣé àwọn àgbà bọ̀,wọ́n ní èèyàn tí kò gbọ́ tẹnu ẹ̀gà ní-ín pè é lẹ́yẹ aláròyé.
Gómìnà ìpínlẹ̀ Ọ̀yọ́, Onímọ̀ẹ̀rọ Ṣyí Mákindé ti ké sí àwọn ọmọ ìlú àti àwọn ọmọọba tó ń jìjàdù fún ipò Aláàfin Ọ̀yọ́ láti dẹ́kun ìlépa wọn nítorí ipò náà kìí ṣe ohun tí ẹnikẹ́ni lè fi owó rà.
Mákindé tí ó sọ ọ̀rọ̀ náà níbi ìṣíde òpópónà tuntun Ọ̀yọ́-Ìṣẹ́yìn lọ́jọ́ Ẹtì fi kún ọ̀rọ̀ rẹ̀ pé ipò Aláàfin kò sí fún káràkátà.
Ó ní, “Mo ké si àwọn ọmọọba àti àwọn mìíràn tó nífẹ̀ẹ́ sí ipò Aláàfin Ọ̀yọ́ láti jáwọ nínú ìjìjàdù lórí ẹni tí yóó gun orí ìtẹ́ náà.
Ipò ọ̀wọ̀ náà kò ní bọ́ sí ọwọ́ ẹnikẹ́ni tí ó bá fẹ́ fi owó ràá, ẹnikẹ́ni tí ó bá sì gbìyànjú láti tà á yóó kan ìdin nínú iyọ̀”.
Ipò Aláàfin Ọ̀yọ́ ṣí sílẹ̀ lẹ́yìn ìpapòdà Ọba Lamidi Olayiwola Adéyẹmí III, ti gbésẹ̀ nínú oṣù kẹrin ọdún 2022.
Lẹ́yìn ìpapòdà Ọba Adéyẹmí sì ni ọ̀pọ̀lọpọ̀ àwọn ọmọọba àti ìdílé tó ń fi ọba jẹ ti bẹ̀rẹ̀ ìjìjàdù lórí ẹni tí ó kàn láti dé adé ọba.
Lọ́wọ́lọ́wọ́, ìkéde ti Gómìnà Mákindé ni gbogbo èèyàn ìlú ń retí láti sọ ẹni tí yóò jẹ́ Aláàfin tuntun. A kú ojú lọ́nà
