*BÀTÁ JÁKÙN Ó DÌKÀLẸ̀, ABẸSẸ̀ OLÚBÀDÀN Ó DÀÁRỌ̀ GBÉRE*
Bá á rebi
À dógún ọdún
Bá á ràjò
À dọ̀gbọ́n oṣù
Abẹsẹ̀ Olúbàdàn ìrìnàjò irú èwo lèyí
Ìpapòpà yín ṣe wá ní jìnìjìnì
Ojora ńlá mú toyún inú tàṣẹ́ ìdí
Ẹ̀rù baya lọ́nà odò
Ojora mú gìrìpá láginjù lábọ̀ oko
Èèmọ̀ wọ̀lú
Ìpapòdà Abẹsẹ̀ yí domijé nù pòòròpò lójú èwe níbi gbogbo
Àdììtú ni ìṣíwọ́ iṣẹ́ Olóyè jẹ́
Gbogbo ẹni tó lọ́kàn alábahun lomijé ń tojú wọn dà pẹ̀ pẹ̀ pẹ̀ bí ìgbàsọ̀rọ̀
Ìmọ̀ tààrà lọ nílẹ̀ yí ojúdá
Olóyè Lékan Àlàbí lọ
Abẹsẹ̀ Olúbàdàn ti lọ
Ẹyẹ lọ ìtẹ́ dòfo
Erín kọ̀ jẹ
Erin kọ̀ mu
Erin ṣubú yẹ́kẹ́
Erin ò yáǹde
Àgbàmi ìmọ̀ sùn papòdà
Olóyè ò jórúkọ àdídùn mọ́
Abẹsẹ̀ Olúbàdàn họ́wù!
So ti yá a di ÀBẸ̀GBÉ nù-un?
Háà! Abẹsẹ̀ Olúbàdàn
ó di kọ̀ kọ̀ kọ̀ bí omi tú
lọ lọ́rùn akèrèngbè
Bá a bá níkú Olóyè dùn wà tayọ bọ́ọ́gọ́
A ò sọ̀rọ̀ àpọ́npo pínrín
Bá a bá ń ṣọ̀fọ̀ Àlàbí
Ọjọ́ orí ẹ̀ kọ́ ló gbomijé lójú wa
AGBẸ̀DU ẹ̀bùn t’Ádániwáyé bù fún ló mú ọgbẹ́ ọkàn báàyàn.
Olóyè ò ṣahun ẹ̀bún
Olóyé ò fi ẹ̀bún ṣòwò
Lékan Àlàbí fi gbogbo ara lo ìmọ̀ fún àṣeyọrí ní gbogbo bi tó bá dé
ni .
Abẹsẹ̀ Olúbàdàn kìí fo jú pàáyàn rẹ́
Àkanlẹ̀dá ẹ̀dá Làlàbí, t’ọmọdé t’àgbà ni yó sàfẹ́kú baba
Eyín ká ilé ẹ̀rín wó
Ẹyẹ lọ ìtẹ́ dòfo
Àfèèbòjò kú ẹnu isà ń sọ̀fọ̀
Abẹ́rẹ́ Abẹsẹ̀ Àlàbí se rá rà rá abẹ́rẹ́ rá
Ìmọ̀ jìngòdò ṣe é dèèdé ẹsẹ̀ mẹ́fà
Ikú ṣe é yáwọ́ pajú akọni dé lódindi
Afẹ́fẹ́ bíńtín ṣe é gbẹ̀mí àtùpà
Ìjí jà ó gbódó
Ẹyẹ lọ ìtẹ́ dòfo
Àtàǹpàkò ò sí mọ́
Ọwọ́ dìlagbà
Àìsì mọ́ etí
Orí dàpólà igi
Abẹsẹ̀ Olúbàdàn Olóyé Lékan Àlàbí lọ
Ó ku kálukú pẹ̀lú ìwà
Àlàbí bá a ní o má jọ̀ọ̀kù
Bá a ní o má jẹran ekòló
Àyọjúràn ìṣe alákeji ni
Kò sí èèyàn tó dọ́run bọ̀ wáyé mọ n tí wọ́n bù lórí òkèlè
Olóyé bí jọ́ ìdájọ́ ò tí ì dé
B’Èdùwà Ò tí ì rí ti kóówá rò ní bojì
Abẹsẹ̀ Olúbàdàn,Lékan Àlàbí
Rere tó o gbáyéṣe
Ìmọ̀ tò tayọ tò ó ṣahun rẹ̀ yìí ń kọ́
Gbogbo ìròyìn ìdùnú táyé ń wí tomijé tomijé
wọ̀nyí ń kọ́
Àkọsílẹ̀ wọ̀nyí ò tàyé dàrú
Gbogbo wọn á gbẹnusọ ní kìyámọ̀
Ẹ wáyé láàyé
Ẹ yànpín tó gún
Ẹ rí ìpín lò dalẹ́
Alẹ́ yín là ń wò kò mọ́jú kẹlẹlẹ
N la ṣe mọ́ ikú lójú
N la ṣe ń fi apá jánú kiri
Ẹ kúkú dàgbà dáàyé kan
Ọjọ́ orí ò kéré
Ìrírí hẹ̀rìmọ̀
Àìsẹ̀ ikú Abẹsẹ̀ yí ṣèèmọ́ tórí pé ó lọ
Ó dàgbà kò dògbò gbórín
Kò sóhun méjì ìbànújẹ́
Ó fi ogbó ìyá ṣókè èèpẹ̀ ni
Àdììtú Èdùwà rè é
À ò rí ifá ẹ̀ ṣe,
Ọlọ́run Ọba tayọ gbogbo àníyàn
À fi kí Adẹ́dàá Ó bu tútù sí gbogbo ẹni t’íkú
Abẹsẹ̀ Olúbàdàn sọ sí
kàyéfì àpàpàndodo
Bó ṣé wù kọ́dún ò jìnà síra wọn tó
A kú ìpalẹ̀mọ́ ẹsẹ̀ mẹ́fà.
Ààyè ìrònúpìwàdà ò sí mọ́
Àsìkò yí ò lọ jù jù
Ìmí ìgbẹ̀yìn kò í dé
Àlàbí lọ
Gbogbo ayé ló ń fún ikú ní résúá
Ikú jíṣẹ́ àlùsì ọ̀hún nínú àìmọ̀kan
Olóyè Lékan Àlàbí ó dí gbéré
Abẹ́sẹ̀ Olúbàdàn, ó ti wá dàárọ̀ gbére
Ibi ẹ fàdàgbá ayé rọ̀ tì sí
Kí gbogbo ọmọ ó gbáyé ìrọ̀rùn lò yókù dògbó kùtàkùtà.
*Fémi Akínṣọlá*
