Kìí ṣe gómìnà ló máa yan ọba fún wa— Ọ̀tún Olúbàdàn
Fẹ́mi Akínṣọlá
Ṣé wọ́n ní ẹ̀là lọ̀rọ̀, bá ò bá làá, kì í yéni dáa dáa.
Pẹ̀lú Awuyewuye tó ń wáyé lórí ọ̀rọ̀ ta lọ́kàn láti gun orí ìtẹ́ Olúbàdàn ti ilẹ̀ Ìbàdàn.
Olóyè Adéwọ̀lú Ládojà tó jẹ́ ọ̀tún Olúbàdàn ti fèsì sí ọ̀rọ̀ tí olóyè àgbà Ọba Ajíbólá sọ pé ara ọba Ọlákùlẹ́yìn tí oyè Olúbàdàn tọ́ sí kò le dáadáa.
Ó sọ pé àwọn onímọ̀ nípa ètò ìlera nìkan ni wọ́n ní ànfàní láti sọ nípa ìlera ẹníkẹni.
Ladoja ní amòfin ni ọba Ajibola, kìí ṣe onímọ̀ nípa ètò ìlera nítorí náà kò sí ohunkóhun tó se ara ọba Ọlákùlẹ́yìn, koko lara baba le.
Ó tún fi kún un pé ọba Ọlákùlẹ́yìn kìí ṣe ọmọ ọgbọ̀n ọdún, ẹni tó ju ọmọ ọgọ́rin ọdún lọ ni kò sì ṣeé ṣe kí ara rẹ̀ dà bíi ọmọ ogún ọdún.
Ó ní “arúgbó náà ti ṣoge rí àti pé ọmọ ológun ni bàbá nígbà tó wà ní èwe, ẹjẹ́ ká gbàgbé wípé ara Olúbàdàn kò yá .”
Ọ̀tún Olúbàdàn fi kún un pé “ láti ọdún 1983 ni ọba Olákùlẹ́yìn tí ń gun àkàsọ̀ yii bọ̀ láti joyè Olúbàdàn ṣùgbọ́n Ọlọ́run nìkan ló ń fi ọba jẹ.
“ Nítorí a rí ọ̀pọ̀lọpọ̀ àwọn tó wà ní ipò ọba Ọlákùlẹ́yìn yìí ṣùgbọ́n tí wọn kò dé ipò Olúbàdàn, tí Ọlọ́run bá kà wọ́n yẹ láti dé bẹ̀ kò sí ẹnikẹ́ni tí yóó díi lọ́nà èròńgbà rẹ̀.
“Ohun tí òfin ṣọ ni pé a gbọ́dọ̀ yan ọba tuntun láàrin ọgbọ̀n ọjọ́ nítorí ìdí rẹ̀ ni ìpàdé yóò fi wáyé ní ọ̀la.
“ Lẹ́yìn náà a máa lọ gbé orúkọ ẹni tí a bá yàn fún Gómìnà láti buwọ́lù, kìí ṣe Gómìnà ló máa yan ọba fún wa ṣùgbọ́n Gómìnà ní àṣẹ láti ní kí a lọ mú ẹlòmíràn wá tí ẹni tí a yàn kò bá yẹ lóyè .”
