OÚNJE̩ ÈKÓ: Sanwo-Olu kò já Tinubu kulè̩. Ó s’ètò pàtàkì lórí ebi tó ń pa’ra ìlú
Akeem Lasisi
Ge̩ge̩ bi awo̩n Yoruba ti maa n wi pe igba ipo̩nju laa mo̩re̩, Gomina Babajide Sanwo-Olu ti Ipinle̩ Eko ti fihan pe ijo̩ba oun kii se eyi to le gb’oju si e̩gbe̩ kan lasiko ti o̩wo̩n gogo ounje̩ n ba awo̩n ara ilu finra o. Bakan naa, o fihan pe oun ko gbo̩do̩ gbe̩yin nibi ti wo̩n ba ti n se oun ti o le mu ki ijo̩ba o̩ga re̩, iye̩n Asiwaju Bola Tinubu, se aseyo̩ri.
Sanwo-Olu fi eyi han nipa sise eto edinwo ounje̩ orisiirisii ni awo̩n o̩ja kan kaakiri Ipinle̩ Eko.
Eto ti wo̩n n pe ni OUNJE̩ EKO naa be̩re̩ ge̩ge̩ bii o̩ja Sunday, Sunday, nibi ti awo̩n ara ilu ti n ra ounje̩ ti o dinwo pe̩lu ida me̩e̩do̩gbo̩n.
Eyi tumo̩ si pe bi osunwo̩n e̩wa kan ba je̩ e̩gbe̩run kan, iye̩n N1000, N750 ni e̩ni to ba ra a yoo san.
Kii se pe Ijo̩ba Sanwo-Olu fi oogun mu awo̩n to n ta o̩ja naa, be̩e̩ ko fi ipa mu wo̩n ki wo̩n le ta a ni e̩dinwo.
Dipo be̩e̩, iromi to n jo leti odo, onilu re̩ n be̩ ninu omi ni.
Be̩e̩, e̩nu fifo kii dun namunamu. Eyi tumo̩ si pe Ijo̩ba ti san asansile̩ owo naa fun awo̩n o̩lo̩ja.
Lara awo̩n OUNJE̩ EKO naa ni ire̩si, e̩wa, gaari, ata ati tomato.
O̩go̩o̩ro̩ awo̩n ara Eko lo n wo̩ lo̩ si awo̩n o̩ja ti a n wi yii.
Ko yo̩ olowo sile̩, be̩e̩ ko yo̩ me̩kunnu sile̩.
Bakan naa, ati onile ati alejo; ati Yoruba, Hausa, Igbo ati be̩e̩ be̩e̩ lo̩ ni wo̩n n je̩ anfaani OUNJE̩ EKO naa.
Lasiko o̩dun Ajinde ti Easter, ijo̩ba Sanwo-Olu tun se be̩be̩ nipa sisi o̩ja naa ni o̩jo̩ E̩ti, iye̩n Friday. Biba ni ero tun po̩ nibe̩.
Nigba to n so̩ro̩ lori OUNJE̩ EKO naa, Gomina Sanwo-Olu ni oun mo̩ pe ara n ni awo̩n ara ilu latari o̩wo̩n gogo ohun gbogbo.
O ni ohun to se okunfa eyi ni awo̩n atunto pataki ti Ijo̩ba Apapo̩ n se.
O ni Aare̩ Tinubu n gbe igbese̩ naa lati ri pe orile-ede kuro ninu o̩gbun ti o ba a ni, kii se lati fi iya je̩ awo̩n eniyan.
O wa mu u da wo̩n loju pe, laipe̩, nnkan yoo se e̩nu rere, ti yo̩to̩mi yoo si pada si ilu. Se tita-riro laa ko̩ ila, bo ba jinna tan, oluware̩ a di oge.
Koda, Gomina Sanwo-Olu fi idunnu han pe owo Naira ti n gbewo̩n le̩gbe̩e̩ do̩la.
O wa ro̩ awo̩n olutaja ki wo̩n je̩ ki awo̩n nnkan o wale̩.
