l’Ékìtì ,afurasí ìbejì tó ń jalè dèrò àtìmọ́lé
Fẹ́mi Akínṣọlá
Ó jọ pé ọ̀rọ̀ àwọn ìbejì yìí wọ̀ ní kádàrá ṣe tún kò lé wọ́n lórí fún yíyan olè jíjà gẹ́gẹ́ bíi iṣẹ́ àmútọ̀run wá bí wọ́n ṣe sọ pé wọ́n fẹ́ràn láti máa já ìlẹ̀kùn ilé onílé àti ṣọ́ọ̀bù láti jalè níbẹ̀.
Iléeṣẹ́ ọlọ́pàá ìpínlẹ̀ Ekiti ló kéde síta láìpẹ́ yìí pé ọwọ́ àwọn tẹ ìbejì tí wọ́n pe orúkọ wọn ní Taiwo àti Kẹhinde Ọlasọji pẹ̀lú àwọn méjì mìíràn, Funkẹ Afọlayan àti Nnaji Aroh lórí ẹ̀sùn olè jíjà.
Nínú àtẹ̀jáde tí ọ̀gá ọlọ́pàá Èkìtì, Adeniran Akinwale gbé jáde, èyí ti Sunday Abutu tó jẹ́ agbẹnusọ buwọ́lù láìpẹ́ yìí ló ti jẹ́ kó di mímọ̀ pé ìlú Ado-Ekiti lọ́wọ́ ti tẹ àwọn mẹ́rẹ̀ẹ̀rin.
Akinwale ṣàlàyé pé ọjọ́ karùndínlọ́gbọ̀n, oṣù kẹrin tí a wà yìí lọwọ́ pálábá àwọn Ìbejì náà ségi lásìkò tí wọ́n ń gbìyànjú láti já ṣọ́ọ̀bù ìtajà kan ládùúgbò Mathew to wà ní Odo-Ado, Ado-Ekiti.
Nínú ọ̀rọ̀ rẹ̀, ó tẹ̀síwájú pé àwọn ìbejì náà ti jẹ́wọ́, àti pé bí wọ́n ṣe jẹ́wọ́ ló mú kí ọwọ́ tẹ Funkẹ àti Nnaji tí àwọn máa ń gba ẹrù tí wọ́n bá jígbé lọ́wọ́ wọn.
Ó ní àwọn ìbejì náà ṣàlàyé pé àwọn ni wọ́n lọ fọ́ ṣọ́ọ̀bù mẹ́ta ọ̀tọ̀ọ́tọ̀ tó wà nínú ọjà Fayẹmi, Agric Ọlọpẹ tó wà nílùú Ado-Ekiti, tí wọ́n sì jí àpò ìrẹsì mẹ́ta, àpò ẹ̀wà méjì àti àwọn ohun jíjẹ mìíràn tí owó wọn dín díẹ̀ ní mílíọ̀nù kan (N936,750) náírà.
Akinwale ti wá fidi rẹ̀ múlẹ̀ pé gbogbo wọn ni yóó fojú bá ilé-ẹjọ́ láti sọ tẹnu wọn.
