Portable olórin Zazu jèrè agárán, Benz bóṣe ṣòwò èébú lára Bobrisky
Fẹ́mi Akínṣọlá
Onírúrurí àwòràn ní ojú n rí báyìí bó ṣe jẹ́ pé ìrọ̀lẹ́ ayé súnmọ́.Ọ̀kan tó súnmọ́ ni bi akọrin Zazu, Habeeb Okikiọla (Portable) ṣe sáré wọ ilé orin tó sì po orin pọ̀ tako Bobrisky, ọkùnrin tó n ṣe bíi obìnrin, ti fún un lánfààní mọ́tò ayọ́kẹ́lẹ́ Benz báyìí.
Fúnra Portable ló sọ èyí di mímọ̀ lásìkò tó wà lóko eré kan pẹlú Ẹniọla Ajao, òṣèrébìnrin tó ṣe sinimá Àjàkájú tó dá awuyewuye sílẹ̀ láìpẹ yìí.
Portable ti wọ́n tún ń pè ní Ìdààmú àdúgbò, sọ pé, ‘’ Nítorí Ẹniọla Ajao ni. Fíìmù rẹ̀, Àjàkájú, dá wàhálà sílẹ̀, èmi dẹ gba mọto Benz nítorí mo sọ wàhálà náà d’orin.’’
Ẹniọla Ajao ló ṣàfihàn sinimá rẹ̀ tó sì pe Bobrisky (Idris Okunẹyẹ Ọlanrewaju) síbẹ̀ .
Níbi ètò náà ni wọ́n ti ní Bobrisky ni ìmuúra rẹ̀ gba ipò Kìn-ín-ní nínú àwọn obìnrin tó wà lóde náà.
Èyí ló di wàhálà, tó dohun tí àwọn òṣèré bíi Dayọ Amusa àti Fẹmi Adebayọ ń sọ̀kò ọ̀rọ̀ síra wọn lórí ayélujára.
Bákan náà lọpọ èèyàn koro ojú sí bí wọ́n ṣe fún Bob to jẹ́ ọkùnrin lami-ẹyẹ obìnrin, nígbà tí àwọn elétò náà mọ pé akọ tó ń múra bíi obìnrin ni.
Ẹniọla Ajao tó ni eré ọ̀hún pàápàá kabaamọ pé òun fún Bobrisky lámì ẹ̀yẹ àti mílíọ̀nù kan náírà tó tẹlé ami-ẹyẹ náà.
Ó sunkún lórí ayélujára, ó sì tọrọ àforíjìn lọwọ́ àwọn èèyàn.
Bí wàhálà náà ṣe ń lọ lọwọ́ ni Bobrsisky náà ń sọ pé àwọn obìnrin kò rọgbọn ẹ̀ dá, àfi kí wọ́n gba òun sáàrin wọn.
Ó lóun ti ṣe ìdí, òun ṣe ọyàn, òun sì ti yọ nǹkan ọkùnrin kúrò lábẹ́ òun, ti obìnrin ló wà níbẹ̀ .
