Saidi Balogun wà lórí ‘Wheelchair’ ,ọ̀pọ̀ èèyàn ń ṣàdúrà fun un.
Fẹ́mi Akínṣọlá
Láìpẹ́ yìí ni àwòrán kan gbà orí ayélujára kan, èyí tó ṣe àfihàn gbajúmọ̀ òṣèré tíátà nnì, Saidi Balogun, tó jókòó sórí kẹ̀kẹ́ onírin tó wà fún àwọn èèyàn tí ẹṣẹ̀ ń dùn.
Àwòrán yìí sí lọ da ọkàn àwọn èèyàn tó wòó láàmú, pàápàá àwọn olólùfẹ́ rẹ̀.
Ọ̀pọ̀ wọn sì lọ ń fi ìtara pèé lórí fóònù tàbí fi àtẹ̀jísẹ́ ránṣẹ́ sì, bí wọ́n ṣe ń béèrè pé kí ló fàá, tí Saidi Balogun ṣe di èrò orí kẹ̀kẹ̀ onírin, náà ni wọ́n ń gbàdúrà fún pé Ọlọ́run yóò fún ní àlàáfíà.
Èrò ọ̀pọ̀ wọn ní pé ìjànbá kan ló wáyé, tí gbajúmọ̀ òṣèré náà kò ṣe leè rìn bó se yẹ, tó sì ń fi kẹ̀kẹ́ onírin ṣe ẹsẹ̀ rìn.
Èyí ló mú kí Saidi Balogun ṣe tètè ṣàlàyé fáwọn olólùfẹ́ rẹ̀ náà, ìdí tó ṣe ń ló kẹ̀kẹ̀ onírin láti rìn.
Saidi Balogun, nínú fídíò tó gbé sójú òpó Sítágíráàmù rẹ̀ ṣàlàyé pé kò sí ìjàmbá kankan tó ṣe òun, ko ko ko sì ni ara òun le.
Ó ní ère sinimá ni àwọn n ya lọ́wọ́ lásìkò tí òun jókòó sínú kẹ̀kẹ̀ onírin ọ̀hún ní ìbámu pẹ̀lú ipa tí òun kò nínú sinimá àgbéléwò náà.
Kódà, ṣe ni Saidi ń fò sókè, tó sì na apá àti ẹsẹ̀ rẹ̀ láti fi dá àwọn olólùfẹ́ rẹ̀ lójú pé sáká ni ara òun dá
Gbajúmọ̀ òṣèré tíátà náà wá ń kilọ fáwọn èèyàn tó ń gbé ayédèrú ìròyìn kiri lórí ayélujára pé kí wọ́n ṣọ́ra, kí wọn sì dẹ́kun ìwà aláìdára yìí.
Bákan náà lọ wà fi ẹ̀mí ìmoore rẹ̀ hàn sáwọn olólùfẹ́, ẹbí, ara, ọ̀rẹ́ àti ojúlùmọ̀ tó kàn sí lásìkò tí wọn rí àwòrán náà, tí wọ́n sì ń gbàdúrà fún.
