Ọlọ́pàá pa olórí ikọ̀ adigunjalè
Fẹ́mi Akínṣọlá
Àwọn àgbà bọ̀,wọ́n ní ẹni tó jàde tó padà wọlé ẹ̀, ló rìnrìn àjò.
Iléeṣẹ́ ọlọ́pàá ní ìpínlẹ̀ Oyo, ti pa Balógun ikọ̀ adigunjalè tí wọ́n fura sí pé ó pa ọlọ́pàá kan nílùú Ìbàdàn láìpẹ́ yìí. Bakan náà ni àwọn ọlọ́pàá tun mu afurasí mẹ́ta mìíràn.
Agbẹnusọ ọlọ́pàá fún ìpínlẹ̀ Oyo, SP Adewale Osifeso, ló kéde ìgbésẹ̀ náà fún àwọn akọ̀ròyìn, lásìkò tó fi ojú àwọn afurasí náà hàn ní olú ileeṣẹ ọlọ́pàá tó wà ní Eleyele nílùú Ìbàdàn.
SP Osifeso ṣàlàyé pé, àwọn afurasí adigunjalè náà pa ASP Daniel Ogunleye, lásìkò tí wọ́n yabo ilé rẹ̀ ní àdúgbò Odo-Ona Kékeré, nílùú Ìbàdàn, lọ́jọ́. kọkàndínlọ́gbọ̀n, oṣù Kẹrin.
Àwọn afurasí náà, tó jẹ́ márùn-ún yabo agbègbè Orí-Agogo, Odo-Ona, ní bíi aago kan òru, tí wọ́n sì ja ọ̀pọ̀lọpọ̀ àwọn olùgbé ibẹ̀ lólè.
Lára àwọn tí wọ́n jà lólè ni ASP Ogunleye wà.
“Àwọn afurasí náà pa Ogunleye lẹ́yìn tí wọ́n ja òun àti ẹbí rẹ̀ lólè tán.
” Ẹ̀ka iléeṣẹ́ ọlọ́pàá tó ń wádìí ìwà ọ̀daràn, SCID, ní Iyaganku, ni Daniel ti ń ṣiṣẹ́ ṣaájú ikú rẹ̀.”
Bákan náà ló ní fóònù tí ẹnìkan lára àwọn afurasí ọ̀hún gbàgbé sí ibi tí wọ́n ti jalè, ló ṣe atọ́nà bí ọwọ́ ṣe tẹ̀ wọ́n.
Agbẹnusọ ọlọ́pàá sọ pé ọwọ́ tún tẹ oníṣègùn ìbílẹ̀ tó ń tọjú wọn.
” Lásìkò tí wọ́n dojú ìjà kọ àwọn ọlọ́pàá ní ibùba wọn, ní ìbọn pa olórí wọn.
Ọwọ́ tún tẹ obìnrin oníṣòwò tó má a ń ra àwọn ohun ọ̀ṣọ́ ara lọ́wọ́ wọn.
