Ọlọ́pàá mú tọkọtaya tó ń lu ọmọ wọn ní ìlù ẹranko ní Èkó

Fẹ́mi Akínṣọlá

Iléeṣẹ́ ọlọ́pàá ìpínlẹ̀ Èkó ti mú obìnrin kan àti olólùfẹ́ rẹ̀, fún ẹ̀sùn pé wọ́n fi ìyà jẹ ọmọdé méjì, ní agbègbè Egbeda ní ìpínlẹ̀ náà.

Obìnrin náà, Busola Oyediran, tó jẹ́ ìyà àwọn ọmọ náà, àti ọkọ rẹ̀ tuntun, Akebiara Emmanuel, ni ọwọ́ tẹ̀ lọ́jọ́ Ẹtì.

Agbẹnusọ iléeṣẹ́ ọlọ́pàá ní ìpínlẹ̀ Eko, SP Benjamin Hundeyin, sọ fún àwọn akọ̀ròyìn pé ọjọ́ orí àwọn ọmọ náà jẹ́ ọdún márùn-ún àti ọdún méjì.

Ìròyìn sọ pé àwọn alajọ́gbelé tọkọtaya náà, tó rí bí wọ́n ṣe máà ń lu àwọn ọmọ ọ̀hún, èyí tó ti dá oríṣìíiríṣì ọgbẹ́ sí wọn lára, ló fi ọ̀rọ̀ náà tó àwọn ọlọ́pàá l’étí.

Èyí sì ló mú kí ọlọ́pàá fi òfin gbé wọn lọ́jọ́ Ẹtì, ọjọ́ kẹtàlá, oṣù Kínní, 2023.
Àjọ tó ń gbógun ti fífi èèyàn ṣe òwò ẹrú àti ìlòlulò ẹ̀dá, NAPTIP, sọ lójú òpó Twitter rẹ̀ pé tọkọtaya ọ̀hún ti wà nì àtìmọ́lé.

Bákan náà ní àjọ náà sọ pé wọ́n ó gbé àwọn méjèèjì lọ sílè ẹjọ́, lọ́jọ́ Ajé, ọjọ́ kẹrìndínlógún, oṣù Kínní, 2023.

Àwọn òṣìṣẹ́ báńkì tó gbówó ńlá jáde lásùnwọ̀n oníbàárà ti rẹ́wọ̀n he

Ọrẹ Òtítọ́jù

Ikún ń jọ̀gẹ̀dẹ̀,ikún ń rẹ́dìí,ikún ò tètè mọ̀ pé n tó dùn ń pani.
Àwọn òṣìṣẹ́ báńkì méjì kan, Agbo John Agama àti Edoh Steve, ni wọ́n ti dèrò ẹ̀wọ̀n báyìí látàrí àwọn ẹ̀sù-un jìbìtì, ìlẹ̀dí àpò pọ̀ lórí owó tó tó bíi mílílọ̀nù mẹ́sàan-án Náírà àti ààbọ̀ (9.4 million).

Onidaajọ Mojisọla Ọlajuwọn ti ile-ẹjọ giga ilẹ wa to wa niluu Abuja, lo dajọ awọn ọdaran naa ‘l’Ọjọruu, Wẹsidee, ọjọ kọkanla, oṣu Kin-in-ni, ọdun 2023.

Ẹsun oniga kan ti ajọ to n gbogun ti iwa ibajẹ nilẹ wa, EFCC, ẹkun Makurdi, nipinlẹ Benue, fi kan wọn ni wọn fi ṣedajọ awọn ọdaran mejeeji ọhun.

Gẹgẹ bi ẹsun ti wọn fi kan wọn, awọn ọdaran mejeeji yii pẹlu awọn agbodegba wọn ti wọn ti fẹsẹ fẹ ẹ, ni wọn sọ pe lasiko ti wọn ṣi jẹ oṣiṣẹ nile ifowopamọ Access Bank, ẹka ti Makurdi, ti i ṣe olu ilu ipinlẹ Benue, ni wọn lo irinṣẹ imọ ẹrọ kan ti wọn ko lẹtọọ si lati gba obitibiti owo ninu apo banki ọkunrin kan to n jẹ Mejuru Chibueze Gospel ni ọjọ kẹjọ, oṣu Kin-in-ni, ọdun 2021.

Ẹsun ti wọn fi kan wọn yii ni wọn lo ta ko abala ikẹtalelọgbọn iwe ofin to sọrọ lori iwa jibiti ori ẹrọ ayelujara ti ọdun 2015, ti ijiya si wa fun un labẹ abala ofin ọhun bakan naa.

Ṣugbọn awọn mejeeji ni awọn ko jẹbi.

Onidaajọ Ọlajuwọn waa paṣẹ pe ki ẹni kọọkan wọn lọọ faṣọ penpe roko ọba fun ọdun mẹta mẹta. Bẹẹ naa ni wọn tun pa ẹni kọọkan wọn laṣẹ lati san ẹgbẹrun lọna ọgọrun-un Naira (100, 000) owo itanran fun ijọba apapọ, ki kaluku wọn si da miliọnu meji Naira o le ẹgbẹrun lọna ọgọrun-un (2.1 million), pada fun ọkunrin ti wọn lu ni jibiti owo.

Hèèmọ̀! Abilékọ kan já bọ́ lẹ́yìn ọ̀kadà, ò sì gbabẹ̀ dèrò ọ̀run

Ọrẹ Òtiọ́jù

Ìṣẹ̀lẹ̀ à-gbọ́-bomi-lójú ló ṣẹ̀ lọ́jọ́ Àìkú, ọjọ́ kẹjọ, oṣù Kìn-ín-ní, ọdún yìí, níbi tí abilékọ kan ti dágbére fáyé. Ọkọ rẹ̀ ló fi ọ̀kadà Bajaj, tí nọ́ńbà rẹ̀ jẹ́ TTN 08 VG, gbé e, tó sì jókòó sẹ́yìn ọkùnrin náà pẹ̀lú ọmọ wọn, lásìkò tí wọ́n ń lọ sí ṣọ́ọ̀sì ládùúgbò Fajol, agbègbè Ọ̀báńtokò, nílùú Abẹ́òkúta.

Ajọ Akoroyinjọ ilẹ wa, NAN, ṣalaye pe iṣẹlẹ buburu yii waye lasiko ti ọkọ oloogbe fẹẹ sare pẹwọ fun ọkada to fẹẹ kọ lu wọn lati iwaju. Ọkada to n bọ niwaju, to si jọ pe o fẹẹ rọ lu wọn lọkunrin naa fi sare pẹwọ, ti iyawo ẹ to jokoo sẹyin si ja bọ latari ẹru biba ati bi ko ṣe jokoo daadaa tẹlẹtẹlẹ, oju-ẹsẹ to ṣubu naa lo dagbere faye. Ṣugbọn ohun to ba ni lọkan jẹ ni pe ọkada keji to fẹẹ rọ lu tọkọ-taya naa ko duro ṣugbaa wọn, niṣe lo sa lọ”.

Agbẹnusọ ajọ to n ri si igboke-gbodo ọkọ nipinlẹ Ogun, Ogun Traffic Compliance and Enforcement Corps (TRACE), Ọgbẹni Babatunde Akinbiyi, to fidi iṣẹlẹ naa mulẹ ṣalaye pe iwakuwa ẹni to wa ọkada lo jẹ ki ọwọ ẹ tase, to fi tibẹ sọ ijanu rẹ nu, eyi to pada ṣokunfa bi obinrin naa ṣe ṣubu, to tun fori gbalẹ nibi to ja bọ si, to si gbabẹ ku lojiji.

O tẹsiwaju pe awọn ọlọpaa ti wọ ọkada naa kuro loju titi fun iwadii to peye, awọn mọlẹbi oloogbe si ti gbe oku ẹ kuro nibẹ.

Nigba to n ranṣẹ ibanikẹdun sawọn mọlẹbi oloogbe, Akinbiyi gba awọn ọlọkada nimọran lati maa ṣe suuru, ki wọn si maa ṣọra pẹlu ere asapajude lati dena iru iṣẹlẹ bẹẹ lọjọ iwaju

Àjọ “INEC” fi kún ọjọ́ gbígba káàdì ìdìbò

Ọrẹ Òtítọ́jù

Àjọ elétò ìdìbò orílẹ̀ yìí INEC ti kéde àfikún ọjọ́ sí ọjọ́ tí àwọn aráàlú ní ànfàní láti gba káàdì ìdìbò fún ètò ìdìbò ọdún 2023.

Saaju ni ajọ ọhun ti kede pe awọn yoo fi opin si igba kaadi idibo lọjọ kejilelogun ọsu kinni ódun yii ṣugbọn wọn ti sọ di ọjọ kọkandilọgbọn oṣu kinni ọdun ta a wa yii.

Ikede yii waye lẹyin ipade ti ajọ naa ṣe Lọjọbọ ọsẹ yii.

Ninu atẹjade ti kọmisọna ajọ INEC, Festus Okoye fi ransẹ si awọn akọroyin,
o ni “Ajọ INEC ti pinnu lati jẹ ki awọn oludibo to fi orukọ silẹ gba kaadi idibo wọn saaju eto idbo. Fun idi eyi, ati fi ọjọ mẹjọ kun ọjọ to yẹ ki gbigba kaadi idibo wa sopin.

“O yẹ ki gbigba kaadi idibo wa sopin lọjọ Aiku, ọjọ kejilelogun, sugbọn a ti fi ọsẹ kan kun un, ti yoo si wa sopin lọjọ kọkandinlọgbọn .

“Asiko ti awọn eeyan le gba kaadi idibo wọn,wa laarin ago mẹsan an arọ di ago mẹta ọsan. A n sisẹ ni ipari ọsẹ ati ọjọ isinmi pẹlu.”

Aipẹ yii ni ajọ INEC kede pe mimi kan ko ni mi awọn lati sun eto idibo siwaju.

Alaga Ajọ naa, Mahmood Yakubu ni gbogbo eto lo ti wa nilẹ eyi ti yoo mu eto idibo lọ lai si rogbodiyan rara.

Yakubu ni ki awọn ọmọ orilẹede Naijiria lọ fi ọkan wọn balẹ lori ọrọ eto idibo.

Àlàájì kan kú sínú mọ́tò rẹ̀ lásíkò tó kíù nílé epo kan n’Íbàdàn,

Fẹ́mi Akínṣọlá

Àwọn àgbà bọ̀ wọ́n ní ,àrìnfẹsẹ̀sí kìí ṣèrìn in kìlómítà.
Gbogbo èrò tó tò sílé epo kan ládùúgbò Olúyọ̀lé, n’Íbàdàn, láti ra epo bẹntiróòlù nìṣẹ̀lẹ̀ náà ṣe ní kàyééfì pẹ̀lúl u bí ọ̀kan nínú àwọn awakọ̀ tó tò fún epo níbẹ̀ ṣe dédéd pa ojú dé, tó sì ṣe bẹ́ẹ̀ sọdá sálákeji l’Ọ́jọ́bọ, ọjọ́ kọkàndínlọ́gbọ̀n, oṣù Kejìlá, ọdún tí a lòtán yìí 2022 .

Bí àwọn awakọ̀ yòókù ṣe tò fún epo láti ra bẹntiróòlù níléepo ni bàbá yìí jókòókó sínú ọkọ̀ ayọ́kẹ́lẹ́ rẹ̀ tí nọ́mbà rẹ̀ jẹ́ AKD 878 GP, tó n dúró dìgba tí yóó kan òun paàpá láti ra epo sínú mọ́tò rẹ̀.

Èrò tó pọ̀ níléepo ọ̀hún kò jẹ́ kí kinní ọ̀hún yá, n ni baba ti ko sẹni to mọ orúkọ rẹ̀, ṣùgbọ́n tí wọ́n ń pè ní Àlàájì nítorí bí ìmúra rẹ̀ ṣe jọ ti Mùsùlùmí yìí bá gbórí lé orí ṣíárìn ọkọ̀ rẹ̀, àwọn èèyàn sì rò pé ó ń sinmi ní tirẹ̀ ni, ṣé ó pẹ́ díẹ̀ tí wọ́n ti tò sórí ìlà níbẹ̀ nítorí wọ́n ṣẹ̀ṣẹ̀ já epo síléepo ọ̀hún tán ni.

Ṣùgbọ́n nígbà tí àwọn ọkọ̀ tó wà níwájúu bẹ̀rẹ̀ sí í sún síwájú díẹ̀díẹ̀ lẹ́yìn àsìkò díẹ̀ tí gbogbo wọn ti wà lójú kan gbári , Àlàájì kò sún kúò lójú kan tó wà, àwọn tó wà lẹ́yìn rẹ̀ bẹ̀rẹ̀ sí í fọn fèrè mọ́tò o wọn “pin-in! Pin-n! Pin-in” láti pè é sákìíyèsí pé ààyè ti ṣí sílẹ̀ níwájú ẹ̀, ṣùgbọ́n bàbá ọ̀hún ò dá wọn lóhùn.

Gbogbo àwọn tó ń wo bàbá yìí bó ṣe jókòó tí kò mira lójú kan náà tó wà lọ̀rọ̀ yìí bẹ̀rẹ̀ sí í bí nínú, tó bẹ́ẹ̀ tí àwọn kan fi ń rọ̀jò èébú lé e lórí, tí òmí-ìn nínú wọn papàá sì ń gbé e ṣépè, ṣùgbọ́n síbẹ̀síbẹ̀, Àlàájì kò kọbi ara sí wọn.

Pẹ̀lú ìbínú làwọn kan fi sọ́ kalẹ̀ nínú un mọ́tò wọn láti jí bàbá tó gbórí lé ṣíárìn ọkọ̀ ṣùgbọ́n táwọn èèyàn rò pé ó ti sùn lọ yìí pé kó sọ oorun yòókù dìgbà tó bá délè, kó sún mọ́tò rẹ̀ síwájú jàre, ọjọ́ ń lọ. Wọ́n fi ọwọ́ gbá a pẹ́pẹ́, kò tún mira síbẹ̀, nígbà náà ni wọ́n tó ó mọ̀ pé kì í ṣe pé Àláájì ń sùn, baba oníbaba ti kú pátápátá ni.

Nígbà tó n fìdí ìròyìn yìí múlẹ̀, Alámòójútó iléepo ọ̀hún, Ọ̀gbẹ́ni Joseph sọ pé “Kàyééfì gbá à nìṣṣẹ̀lẹ̀ yẹn jẹ́ lójúj mi nítorí níṣe ni bàbá yẹn gbè orí lé ṣíárìn, tó gbẹ́sẹ̀ ọ̀tún ẹ̀ sórí i tọ́tù nínú mọ́tò tó ṣílẹ̀kùn ọkọ̀ sílẹ̀, tó sì fi ẹsẹ̀ kejì tilẹ̀, oorun lásán làwọn èèyàn kọ́kọ́ rò pé ó n sùn, láìmọ̀ pé ó ti kú”.

Alákòóso iléepo ọ́hún fìdí ẹ̀ múlẹ̀ síwájú pé àwọn ti fi ìṣẹ̀lẹ̀ náà tó àwon agbófinró létí, wọ́n sì ti gbé òkú ọ̀hún lọ sí ààyè ìṣòkúlọ́jọ̀ títí tí wọn yóó fi rí àwọn ẹbí i rẹ̀.

• Ilé isé̩ ìdárayá kò rí àtìle̩yìn kankan láti ò̩dò̩ Ìjo̩ba – Emmanuel Ayilo̩la

  Mary Fágbohùn

  Olugbere jade Naijiria kan, Emmanuel Ayilola, ti ke pe ijoba lati se iranlowo ati pe ki won fi aaye gba ile ise idaraya lati goke ni orile ede yii, o wi pe ile ise naa le e fi opin si oro ainise laarin awon odo ati pe yoo si mu owo goboi wole fun ijoba Naijiria.

  Ayilola, eni to sapejuwe ile ise idaraya bii eyi ti o won sowo to si ni ere lori, figbe ta pe ijoba ko se nnkankan lati ran ile ise naa ati awon osere tiata lowo.

  O soro pelu awon oniroyin ni Akure, oluilu ipinle Ondo, lori ibi ti ile ise idaraya de duro ni Naijiria.

  O wi pe, “Ile ise idaraya je eka ti o lere. Awon omo Naijiria n pa owo wole lati ibe ni orisiirisii ona. Sugbon o se ni laaanu pe ijoba ko se idokowo si ile ise yii rara. Ijoba n se die tabi ka so pe ko si nnkankan ti won n se lati ti ile ise yii leyin. Lati ya fiimu won sowo. Lati se agbega ebun abinibi gan an o gba opolopo isinmi le owo.

  “Ile ise igbasile fiimu meloo lo je ti ijoba? Se awon eniyan n ri owo ya lati odo ijoba? Ko si ile ifowopamo kan to fe ya eka yii lowo. Atileyin wo ni awon eniyan to wa ni eka yii n ri lati odo ijoba? Mo mo iye owo ti mo na lati da ile ise igbasile fiimu sile. O gba oore ofe Olorun lati se aseyori. A o ti debe sugbon sibe a dupe lowo Olorun wi pe ibi kan lati bere.”

  Olugbere jade naa, eni ti o tun je agbejoro, wi pe inilo wa fun idanisile eka ti yoo ma a ri si oro idaraya lati le e dojuko gbogbo isoro ti eka naa n koju.

  “Ijoba wa ni lati gbaruku ti ile ise yii. Won gbodo fi aaye gba awon ti o wa ni eka yii lati se aseyori. A ti pe lati ni iwe ti o faye gba won lati sise naa ko rorun.

  “Idi niyi ti mo fi ro pe eka ijoba kan gbodo wa ti yoo ma a ri si ohun ti o n lo ni ile ise idaraya, eleyii ko buru rara. Opolopo nnkan ni yoo niyanju ti won ba se eyi. Yoo je ise kan gbogi fun eka ijoba yii lati sise lori gbogbo ohun to niise pelu oro idaraya. Awon ajo to ti wa tele yoo ma sise labe eka ijoba yii. Eleyi se e se nitori pe ile ise naa tobi,” ni ohun ti o fikun n.

  Ayilola tun beere fun ofin ti yoo de isowo idaraya lati odo awon asofin ki won le e se igbelaruge ati ki won le e dabo bo ile ise naa, o wi pe afarape je isoro kan gbogi ti ile ise naa n dojuko ati pe won nilo atileyin ijoba lati koju isoro naa.

  “E gba pelumi pe ile ise idaraya je okan lara ile ise to n dagba si i lojoojumo ni Naijiria. Ni pato, Nollywood Naijiria wa lara awon ile ise fiimu to tobi ju to si n da gba si i lojoojumo ni Naijiria. Eka orin ko gbeyin ninu ile ise idaraya. E e ri pe orin ile okeere ko lese nle mo ni Naijiria. Ipa ti ofin n ko ko se e fowo ro seyin. Mo ti n wo ofin to dara lati fi se igbelaruge ati idabo bo ile ise idaraya ni Naijiria ki o le e se fiyanga lagbaye.

  “Ko dami loju pe a ri ofin to to lori ile ise idaraya. Ile ise idaraya tobi o si ni ere. Opo eniyan lo ti laluyo lorisirisi eka ni ile ise naa. Abadofin fun idasile eka ijoba pataki lati le e dari ile ise idaraya ni Naijiria kii se aseju. Isoro kan gbogi ni ile ise naa ni afarape. Mo ro pe gbogbo wa gbodo sise papo lati dojuko eyi pelu irinse ofin,” ni ohun ti olugbere jade naa toka si.