Òògùn owó ni mo fẹ́ fi àwọn ọ̀rẹ́ méjì tí mo pa ṣe— Ọ̀daràn lahùn

Fẹ́mi Akínṣọlá

Àwọn aláṣẹ iléeṣẹ́ ọlọ́pàá ìpínlẹ̀ Bauchi ti mú Ọgbẹni Ibrahim Umar, ẹni ogójì ọdún, tó pa àwọn òṣìṣẹ́ méjì níléeṣẹ́ kan tó wà lágbègbè Gamawa, níjọba ìbílẹ̀ Gamawa, níìpínlẹ̀ Bauchi.

Àwọn méjèèjì ọ̀hún tí wọ́n pàdé ikú òjìji láti ọwọ́ ọ̀daràn náà ni: Kabiru Idi, ẹni ọdún mẹ́rìndínlógójì àti Bato Ali, ẹni ọdún méjìdínlógún.

Òun tí a gbọ́ ni pé Ibrahim tí í ṣe ọmọ ìlú Ungogo, lọ sílùú Taranka, níjọba ìbílẹ̀ Gamawa, láti lọ̀ọ́ hùwà láabi ọ̀hún, tọ́wọ́ sì tẹ̀ ẹ́ lẹ́yìn tó ṣiṣẹ́ ibi ọhún tán.

Ọ̀gbẹ́ni Adamu, ẹni ọdún mẹ́tàdínlọ́gọ́ta kan tó ń gbé nílùú Taranka, níjọba ìbílẹ̀ Gamawa yìí kan náà, ló lọ sọ́dọ̀ àwọn ọlọ́pàá agbègbè ọ̀hún láti lọ fẹjọ́ sùn wọn pé àwọn kò tí ì rí àwọn òṣìṣẹ́ méjèèjì táwọn ń wá láti nǹkan bíi oṣù kan sẹ́yìn .

Àtẹ̀jáde kan tí Alukoro iléeṣẹ́ ọlọ́pàá ìpínlẹ̀ náà, Ọ̀gbẹ́ni Mohammed Wakili, fi síta lọ́jọ́ Ìṣẹ́gun, ọjọ́ Kejìlá, oṣù Kẹsàn-án, ọdún 2023 yìí ni wọ́n ti sọ pé ìwádìí ìjìnlẹ̀ àwọn ọlọ́pàá ọ̀tẹlẹ̀múyẹ́ kan ló fìdí rẹ̀ múlẹ̀ pé Ibrahim ló pa àwọn méjèèjì ọ̀hún láti lò wọ́n fún ètùtù ọlà.

‘Lẹ́yìn táwọn ọlọ́pàá gbá a mú tán, wọ́n lọ̀ ọ́ yẹ ilé rẹ̀ wò, wọ́n sì bá gálọ́ọ̀nù ńlá kan tí ẹ̀jẹ̀ kún inú rẹ̀ fọ́fọ́, èyí tí wọ́n gbàgbọ́ pé ẹ̀jẹ̀ àwọn ẹni tó pa ló wà níbẹ̀.

Lójú-ẹsẹ̀ ni wọ́n ti jù ú sáhàámọ, láti lè ràn wọ́n lọ́wọ́ nínú ìwádìí wọn.

Ọ̀dọ̀ àwọn ọlọ́pàá ló ti jẹ́wọ́ pé lóòótọ́, òun lòun pa àwọn èèyàn ọ̀hún láti fi wọ́n ṣòògùn owó. Lẹ́yìn náà ló mú àwọn ọlọ́pàá lọ síbi tó sìnkú wọn sí.

Wọ́n ti hú òkú àwọn èèyàn náà jáde, wọ́n sì ti bẹ̀rẹ̀ ìwádìí lórí ìṣẹ̀lẹ̀ náà láti fìdí òótọ̀ múlẹ̀.

Àwọn ọlọ́pàá ti gbé òkú àwọn èèyàn ọhún fáwọn èèyàn wọn, kí wọ́n lè lọ ṣètò ìsìnkú wọn. Bákan náà ni wọ́n láwọn máa fojú ọdaràn náà balé -ẹjọ́ lópin ìwádìí àwọn.

Kò pọndadan ká lo Àmọ̀tẹ́kùn fún ìdìbò ìjọba ìbílẹ̀ Ọ̀yọ́- Àjọ elétò ìdìbò

Fẹ́mi Akínṣọlá
Ṣé wọ́n ní ẹni tó wẹjú ni ẹ̀rù n bà.
Àjọ elétò ìdìbò ìpínlẹ̀ Ọ̀yọ́ (OYSIEC), ti sọ pé àwọn kò níí i ṣàmúlò ikọ̀ elétò ààbò ilẹ̀ Yorùbá tá a mọ̀ sí Àmọ̀tẹ́kùn fún ètò ààbò níbi ìdìbò ìjọba ìbílẹ̀ tó ń bọ̀.

Alága àjọ náà, Isiaka Ọlagunju, ló fìdí èyí múlẹ̀ lásìkò àbẹwò tó ṣe sí Correspondents’ Chapel), ìyẹn ẹ̀ka ẹgbẹ́ àwọn oníròyìn ìpínlẹ̀ Ọ̀yọ́ (Oyo NUJ), nílé ẹgbẹ́ wọn tó wà ní Òpópónà Àgọ́ Tapa, ní Mọkọla, n’Íbàdàn.

Gẹ́gẹ́ bó ṣe sọ, “ Iléeṣẹ́ ọlọ́pàá lòfin fún ní ojúṣe pàtàkì jù lọ láti pèsè ètò ààbò lásìkò ètò ìdìbò. Síbẹ̀síbẹ̀, a ti bèèrè fún àtìlẹ́yìn àwọn elétò ààbò mí-ìn bíi sífú dìfẹǹsì, àwọn aláàmójútó ọgbà ẹ̀wọ̀òn, àti bẹ́ẹ̀ , bẹ́ẹ̀ lọ.

Ṣùgbọ́n a kò pe àwọn Àmọ̀tẹ́kùn nítorí àwọn èèyàn kò ní nígbàgbọ́ nínú wọn nígbà tó jẹ́ pé ìjọba ìpínlẹ̀ Ọ̀yọ́ ló ni wọ́n, a ò sì fẹ́ nǹkan tó máa tàbùkù ètò ìdìbò yìí ”.

Ọkùnrin amòfin àgbà yìí fi kún un pé “a ò lè torí pé ẹgbẹ́ PDP tó ń ṣèjọba ló yàn wá sípò yìí, ká wá sọ pé ẹgbẹ́ PDP ló gbọdọ̀ wọlé ìdìbò. Ààyè pé à ń kọ ìbò fún ẹgbẹ́ òṣèlú kan ti kọjá lọ, ẹgbẹ́ tí àwọn aráàlú bá dìbò fún jù lọ ló máa wọlé ìdìbò tó ń bọ̀ lọ́nà yìí.

Ààrẹ Ọlagunju fìdí rẹ̀ múlẹ̀ síwájú pé àwọn èèyàn tí kò dín ní ẹgbẹ̀rún méjìdínlógún (18,000) lajọ náà yóò gbà gẹ́gẹ́ bíi àwọn òṣìṣẹ́ tí yóò ṣètò ìdìbò ọ̀hún, àti pé láìpẹ́ làwọn yóó ṣàyẹ̀wò fáwọn olùdíje ẹgbẹ́ òṣèlú kọ̀ọ̀kan.

Tẹ́ ò bá gbàgbé, láìpẹ́ yìí làjọ OYSIEC kéde ọjọ́ kẹtàdínlọ́gbọ̀n, (27) oṣù Kẹrin, ọdún 2024, gẹ́gẹ́ bíi ọjọ́ ìdìbò àwọn ìjọba ìbílẹ̀ gbogbo níìpínlẹ̀ Ọ̀yọ́.

Díẹ̀ lára àwọn tó kọ́wọ̀ọ́rìn pẹ̀lú alága àjọ elétò ìbò ìpínlẹ̀ yìí ni Ọ̀mọ̀wé Babatunde Adeniyi, Ọ̀gbẹ́ni Kunmi Agboọla àti Emmanueli Ọlanrewaju.

Díhẹ̀ dìhẹ̀ díhẹ̀, gbèsè Nàìjíríà sún wọ tírílíọ̀nù mẹ́tàdínláàdọ̀rún péré (N87tn)

Fẹ́mi Akínṣọlá

Kò tó nnkan,kò tó nnkan, ó mà ń dòòyì kọ́ní ńlẹ̀ yí.
Wọ́n ní ó ń bọ̀, ó ń bọ̀, lásìkò yìí gbogbo ara ni wọ́n-ọ́n mú tó o .
Ọ̀rọ̀ ti jọ pé ewu ń bẹ lóko Lóńgẹ́, gbèsè tí orílẹ-èdè Nàìjíríà jẹ ti di tírílíọ̀nù mẹ́tàdínláàdọ́rùn-ún láàrin oṣù mẹ́ta péré.

Ẹ̀ka ìjọba tó ń rí sí ọ̀rọ̀ gbèsè Nàìjíríà, DMO ṣàlàyé pé iye owó yìí ni gbèsè Nàìjíríà lẹ́yìn oṣù mẹ́fà nínú ọdún 2023 yìí.

Èyí túmọ̀ sí pé ìdá márùndínlọ́gọ́rin nínú ọgọ́rùn-ún ni gbèsè náà fi lé síi lẹ́yìn tí gbèsè Nàìjíríà jẹ́ N49tn ní ìparí oṣù kẹta.

Iléeṣẹ́ ìjọba tó ń rí sí ọ̀rọ̀ gbèsè Nàìjíríà ní owó yìí jẹ́ àpapọ̀ gbogbo gbèsè tí Nàìjíríà ń jẹ lábẹ́lẹ́ àti lágbàáyé, tó fi mọ́ gbèsè tí ìpínlẹ̀ mẹ́rìndínlógójì àti Àbújá ń jẹ.

Iléeṣẹ́ náà ní àfikún tiriliọnu tírílíọ́nù méjìlélógún(N22.712tn) ni kókó owó tó gorí gbèsè ọ̀hún.

Ọkùnrin kan tó fẹ ìyàwó méje lẹ́ẹ̀kan náà sọ pé kò sí owú láàrin wọn

Fẹ́mi Akínṣọlá

Ohun tó bá wolówó ní-ín fowó rẹ̀ rà.N tó bá sì wu ọmọ ọ́n jẹ, kì í run ọmọ nínú ni ọ̀rọ̀ Ssaalongo Nsikonenne Habib Ssezzigu tí ọ̀rọ̀ rẹ̀ tí gba orí ayélujára lẹ́yìn tó fẹ́ ìyàwó méje ní ọjọ́ kan náà.

Lára obìnrin méje ní a ti rí ẹ̀gbọ́n àti àbúrò, tí ìgbéyàwó ọ̀hún sì wáyé ní Abule Bugerek lórílẹ̀ èdè Uganda lọ́jọ́ kẹwàá oṣù kẹsàn án ọdún 2023.

Orúkọ àwọn ìyàwó náà ni Mariam, Madinah, Aisha, Zainabu, Fatuma, Rashida àti Musanyusa, tó jẹ́ ìyàwó rẹ̀ àkọ́kọ́ tó ti wà pẹ̀lú rẹ̀ fún ọdún méje.

Nínú àtẹ̀jáde kan tó wà lórí ayélujára, sọ̀rọ̀ sọ̀rọ̀ Caleb Canaan ní ayẹyẹ ìgbéyàwó bẹ̀rẹ̀ ní ago mẹ́jọ àárọ̀ lẹ́yìn tí wọ́n gbé àwọn ìyàwó náà lọ ilé oní dìrí.

“Lẹ́yìn tí ọkọ àti àwọn ìyàwó rẹ̀ ṣe ìbúra, Nsikonenne àti àwọn ìyàwó rẹ̀ méje gun kẹ̀ẹ̀kẹ̀ káàkiri abúlé bí Kalagi, Kasana àti Nakifuma kí wọ́n tó lọ ilé wọn ní ago mẹ́fà ìrọ̀lẹ́ .”

Nsikonenne ra ọkọ̀ bọ̀gìnì tuntun fún àwọn ìyàwó náà, tó sì rọ àwọn ìyàwó náà láti fẹ́ ẹ pẹ̀lú òtítọ́ inú.

“Kò sí owú láàrin àwọn ìyàwó mi. Mo mọ wọ́n ní ọ̀tọ̀ọ̀tọ̀ tí mò ṣì pinnu láti fẹ ṣe ìgbéyàwó pẹ̀lú wọn ní ẹ̀kanáà láti ní ìdílé aláyọ̀.”

Nsikonenne ní òun yóò tún fẹ́ ìyàwó sí i lọ́jọ́ iwájú

“Ọmọdé sì ni mí àti pé lọ́jọ́ iwájú, tí Ọlọ́run bá fẹ́ máa fẹ́ ìyàwó sí i .”

Bàbá ọkọ, Hajj Abdul Ssemakula ní fífẹ́ ìyàwó púpọ̀ ló jẹ́ nǹkan tó wà nínú ẹ̀jẹ̀ mọ̀lẹ́bi wọn.

“Bàbá tó bí bàbá mi fẹ́ mẹ́fa, Bàbá mi fẹ́ márùn un, èmi gan fẹ́ fẹ́ mẹ́rin tí a jọ ń gbé ilé kan náà.”

Habib ló ti wá fi ìtàn balẹ̀ gẹ́gẹ́ bí ọkùnrin tó fẹ́ ìyàwó méje lẹ́ẹ̀kanáà lórílẹ̀ èdè Uganda.