APC ti fi àwòrán Tinubu àti ti ìgbákejì rẹ̀ tuntun síta
Ọrẹ Òtítọ́jù
Ẹgbẹ́ òṣèlú APC ti fi àwòrán Aàrẹ tí aráàlú dìbò yàn, Bola Ahmed Tinubu síta pẹ̀lú ti igbákejì rẹ̀, Kashim Shettima.
Eyi n waye saaju iburawọle ti yoo waye ni Ọjọ Kọkandinlọgbọn,oṣu Karun un, ọdun 2023.
Agbẹnusọ fun Bola Tinubu, Bayo Onanuga,lo fi aworan naa lede loju ọpọ Twitter.
Bakan naa lo fikun un pe ajọ to n risi iburawọle aarẹ ati gbakeji rẹ ti araalu dibo yan buwọlu aworan tuntun naa.
O ni ọpọ eeyan ni yoo maa lo aworan naa ,ti wọn yoo si maa fi si ọfisi wọn gẹgẹ bi aworan aarẹ ati ti igbakeji rẹ.
Saaju ni agbẹnusọ aarẹ naa ti kede pe Tinubu rin irinajo lọ si oke okun nitori awọn to fẹ ri fun ipo kan tabi omiran ti pọju bi o se yẹ lọ.
O ni irinajo naa yoo fun ni anfaani lati gbaradi bi o se yẹ fun iburawọle naa ti yoo waye ni aipẹ.
Bi ọjọ iburawọle yi ṣe n kan lẹkun dẹdẹẹ, bẹẹ naa ni awọn ikọ kan n pe fun ki wọn ma burawọle fun aarẹ ti ilu dibo yan yi.
Wọ́n ní àwọn ń pe ìpe yìí nítorí magomago lásìkò ìdìbò náà tó gbé Ààrẹ tí wọ́n dìbò yàn náà wọlé.
