Àwọn agbanipa pa olùdíje sípò aṣòfin ẹgbẹ́ Labour, wọ́n tún dáná sunlé e rẹ̀

Ọrẹ Òtítọ́jù

Ní fẹ̀rẹ̀mọ́jú ọjọ́ Ẹtì, ọjọ́ kẹrìndínlógún, oṣù Kejìlá, ọdún yìí, làwọn agbébọn kan tí wọ́n fura sí pé agbanipa ni wọ́n, ya lọ sílé Ọ̀gbẹ́ni Christopher Elehu, tí í ṣe olùdíje fúnpò aṣojú–ṣòfin tí yóó ṣojú Ìjọba ìbílẹ̀ Onuimo, ní ìpínlẹ̀ ọ̀hún, láti inú ẹgbẹ́ òṣèlú Labour Party, tì wọ́n sì dá ẹ̀mí ẹ̀ légbodò.

Lẹyin ti wọn pa a tan, ni wọn lawọn ẹni ibi yii tun dana sun ile ati dukia ẹ, titi kan ọkọ alupupu to wa layiika ile ẹ. Fun bii wakati meji leralera ni wọn lawọn afurasi ọhun fi n yinbọn nidaaji kutukutu, nigba tẹnikẹni o ti i ji bọ sita niluu naa.

A gbọ pe awọn to ṣiṣẹ buruku ọhun tun n ya ile awọn oloṣelu yooku laduugbo ọhun lẹyọ kọọkan ṣugbọn ori ba awọn yẹn ṣe e, wọn ko si nile lasiko akọlu naa.

Ọkan ninu awọn alatilẹyin ọkunrin naa ṣalaye pe “Wọn ti pa Christopher Elehu ti gbogbo awọn eeyan maa n pe ni Wasco o. Nigba aye ẹ, oun ni oludije funpo aṣofin kekere nijọba ibilẹ Onuimo. Nigba ti wọn ri i pe oorun ti wọ awọn eeyan lara ni wọn ya bo ile ẹ, ti wọn bẹrẹ si i yinbọn fun bii wakati meji. Lẹyin ti wọn pa ọkunrin yii tan, bii pe eyi ko ti i to, niṣe ni wọn tun sọna sile ẹ ti wọn jo o kanlẹ. Gbogbo awọn nnkan-ini ẹ pata tọwọ wọn ba ni wọn bajẹ raurau. Nigba ti gbogbo abule fi maa de ibi ti oku ẹ sun gbalaja si, oju ada ati aake to wa lara ẹ ko ṣeeka”.

Haa-hin-in lọrọ iku ọkunrin naa n ṣe gbogbo awọn eeyan abule wọn, awọn ti ki i ṣe oloṣelu laarin wọn gan-an si n bẹru, nitori boya lo le ti i ju ọjọ mẹwaa lọ lẹyin ti oludije lẹgbẹ oṣelu Labour Party nijọba ibilẹ mi-in to sun mọ wọn, Ọgbẹni Chukwunonye Irouno, ku lojiji.

Irouno yii ti wọn yan gẹgẹ bii ẹni ti yoo ṣakoso eto ipolongo aarẹ ẹgbẹ Labour nipinlẹ naa, lo ṣadeede ṣubu lalẹ ọjọ ipolongo ibo ku ọla. Bo tilẹ jẹ pe wọn sare gbe e digbadigba lọ sile iwosan ijọba apapọ Federal Medical Centre, niluu Owerri, ni kete ti wọn gbe e debẹ lawọn dokita sọ pe ọkunrin naa ti dagbere faye.

Oke pa ọ̀rẹ́ ẹ̀ nítorí ọ̀ọ́dúnrún Náírà

Ọrẹ Òtítọ́jù

Yorùbá bọ̀, wọ́n ní owó níín bojú ọ̀rẹ́ jẹ́, bẹ́ẹ̀ ni ìbínú kò mọ̀ pé olówó òun kò lẹ́sẹ̀ nílẹ̀.
Inú àbíjù yìí ló kó bá ọkùnrin kan tó ń jẹ́ Godstime Oke, tó torí àpò kan ààbọ̀ Náírà rán ọ̀rẹ́ ẹ̀, Allia, lọ sọ́run ọ̀san gangan.
Oke ati ọrẹ ẹ, Ọgbẹni Gaga Allia, ti wọn jọ n gbele ni wọn ni ede aiyede bẹ silẹ laarin wọn latari ọọdunrun Naira owo Nepa ti wọn pin fun ile ti wọn n ya gbe, eyi to wa l’Ojule kejilelọgbọn, Opopona Ole, lagbegbe Okumagba, Warri, nipinlẹ Delta. Ni nnkan bii aago mẹwaa alẹ Ọjọruu, ọjọ kẹrinla, oṣu Kejila, ọdun yii, niṣẹlẹ buburu ọhun waye.

Ohun ti a gbọ ni pe ọrẹ timọtimọ ni Oke ati Allia ti wọn jọ n gbe nile oniyara kan ninu ile naa.

Oke ni wọn lo maa n gba owo ina jọ lọwọ gbogbo awọn ara ile, ko le baa rọrun lati ko o ni kiṣi fawọn oṣiṣẹ ileeṣẹ mọnamọna lai ni i mu ariyanjiyan dani nigba ti wọn ba fẹẹ sanwo. Ṣugbọn lọjọ tiṣẹlẹ buburu yii maa waye, Oke ko si nile, nitori bẹẹ ni ọkan ninu awọn ti wọn jọ n gbele ṣe san ọọdunrun Naira (300) owo ina tiẹ fun ọrẹ ẹ, Allia, lati ba a fi jiṣẹ fun un to ba dari wọle. Nigba ti Oke pada dele lalẹ to beere owo ti wọn fi ran ọrẹ ẹ silẹ, niṣe ni Allia kọ jalẹ ti ko fun ọrẹ ẹ lowo ti wọn fi ran an silẹ.

Ọrọ owo yii ni wọn lo dija laarin awọn mejeeji, nibi ti wọn ti n ja ni Oke ti ki ẹkufọ igo mọlẹ, to si fi gun ọrẹ ẹ nibi ọrun. Loju-ẹsẹ ni wọn lọkunrin naa ṣubu lulẹ, to bẹrẹ si i japoro, bẹẹ lẹjẹ n tu yaayaa nibi ọrun ẹ titi to fi ki aye pe o digbooṣe.

Nigba ti oju Oke walẹ to ri wahala to da bọ ara ẹ lọrun lo ki ere mọlẹ, diẹ lo si ku ki ọwọ awọn eeyan tinu n bi ti wọn n leri pe awọn maa pa a tẹ ẹ.

Adugbo Ugborikoko ti ko fi bẹẹ jinna sibi ti wọn n gbe ni wọn lo sa lọ lati lọọ fara sinko, nibẹ naa lọwọ si ti tẹ ẹ l’Ọjọbọ, ọjọ kẹẹẹdogun, oṣu Kejila, ọdun yii. Nibẹ ni wọn ti fa a le awọn agbofinro teṣan ọlọpaa ‘B’ Division, niluu Warri lọwọ.

Agbẹnusọ ọlọpaa ipinlẹ Delta, Bright Edafe, fidi iṣẹlẹ naa mulẹ, bẹẹ lo fi kun un pe iwadii ti bẹrẹ, awọn si ti n sapa lati mu Tega, to jẹ agbodegba afurasi ọhun

K1 de Ultimate kí Messi kú oríire ife è̩ye̩ FIFA World Cup o̩dún 2023

E̩ gbó̩ àwo orin náà

Àfojúsùn èmi àti ọkọ ọ̀ mí kó papọ̀ mọ la ṣe túká- Funke Akindele

Fẹ́mi Akínṣọlá

Gbajúgbajà òṣèré tíátà àti Igbákejì olùdíje sípò Gómìnà ìpínlẹ̀ Eko, Funke Akindele tí tú kẹ̀ẹ̀kẹ́ ọ̀rọ̀ lórí bí ìpínyà ṣe wáyé láàrin òun àti ọkọ rẹ̀, Abdul Rasheed Bello, tí ọ̀pọ̀ mọ̀ sí JJC Skillz.

Nínú ìfọ̀rọ̀wérọ̀ tó ṣe pẹ̀lú iléeṣẹ́ ìròyìn Legit, Funke ní àfojúsùn òun àti ọkọ òun àná ni kò papọ̀ mọ́.

Gẹ́gẹ́ bí ó ṣe sọ, ó ní gbogbo ohun tí àwọn jọ fojúsùn wò papọ̀ nínú ìgbeyàwó àwọn ni kò báraawọn mú mọ́, ìdí nìyí.

Ó ní gbogbo ìgbìyànjú láti jẹ́ pé ìgbeyàwó náà sì wà láàyè ni àwọn gbé ṣùgbọ́n ọ̀rọ̀ bá ibò mìíràn yọ, tí àwọn sì pinnu láti túka.

“Òtítọ́ ọ̀rọ̀ ibẹ̀ nipé àfojúsùn wa nínú ìgbeyàwó wa kò papọ̀ mọ́ àti pé gbogbo ìgbìyànjú láti ríipé a sì wà papọ̀ ni ó jásí pàbó. Fún ìdí èyí, kò sì ìdí fún wa láti jọ wà papọ̀.”

Adedoyin ló ní kí ń sọ fún ọlọ́pàá pé Timothy Adegoke kò sun sílé ìtura Hilton – Ẹlẹ́rìí

Ọrẹ Òtítọ́jù

Ṣé wọ́n ni bí ọ̀rọ̀ ńlá ò bá tíì tán, èèyàn ńlá ò ní-ín tí ì sinmi àròyé é ṣe.
Ìgbẹ́jọ́ tún tẹ̀síwájú lọ́jọ́ Ẹtì nílé ẹjọ́ gíga ìpínlẹ̀ Ọ̀sun, tó wà nílùú Òṣogbo láti tanná wádìí ikú tó pa Timothy Adégòkè.

Lásìkò ìgbẹ́jọ́ náà sìi ni ikọ̀ olùjẹ́jọ́ ti kó àwọn afurasí jáde láti wá sọ tẹnu wọn lórí ohun tí wọ́n mọ̀ nípa ìṣẹ̀lẹ̀ ọ̀hún.

Nibi igbẹjọ naa si ni afurasi kan to jẹ oṣiṣẹ ile itura naa, arabinrin Adedeji Adesola ti tu kẹkẹ ọrọ silẹ nipa ohun to mọ lori iku Timothy Adegoke.

Adesola ni oludasilẹ ile itura naa, Ọmọọba Rahmon Adedoyin lo sọ fun oun nipa idahun ti oun yoo fun awọn ọlọpaa to wa se iwadii Timothy to di awati.

Obinrin naa, tii se osisẹ nile itura Hilton Hotels nilu Ile Ife, to jẹ ti Adedoyin fikun pe oludasilẹ ile itura naa lo sọ fun oun pe ki oun sọ fawọn ọlọpaa pe Timothy Adegoke ko wa si ile itura naa lọjọ to de si ibẹ.

Nigba to n dahun si ibeere lọwọ awọn agbẹjọro, Adesola sọ fun adajọ pe Rahmon Adedoyin ati ọmọ rẹ Roheem, lo kọ oun ni ọrọ ti oun yoo sọ naa.

O ni awọn mejeeji lo pe oun wa si ilegbe wọn, ti wọn si sọ pe ki oun sọ fun awọn ọlọpaa pe Timothy Adegoke ko de si ile itura naa rara ati rara.

Osisẹ-binrin naa ni Roheem Adedoyin tun fun oun ni iwe miran dipo eyi to wa nilẹ tẹlẹ, ti orukọ Timothy Adegoke wa.

O ni iwe akọsilẹ tuntun to fun oun naa lo ni ki oun fi orukọ ẹlomiran rọpo orukọ Timothy, ki oun si fun awọn ọlọpaa ti wọn ba ti beere iwe akọsilẹ orukọ awọn alejo to sun sile itura naa.
keji ọdun 2023
Wayi o, ile ẹjọ giga naa ti sun igbẹjọ iwadi iku to pa Timothy Adegoke siwaju di ọdun to n bọ.

Adajọ Adepele Ojo to n gbọ ẹjọ ọhun lo kede bẹẹ lẹyin ti awọn agbẹjọro Olupejọ ati Olujẹjọ bere ibeere lọwọ awọn ẹlẹrii to yọju si ileẹjọ lọjọ Ẹti

Adajọ Ojo ni igbẹjọ naa yoo tẹsiwaju lọjọ keji oṣu keji, ọdun 2023.

Ọọ̀ni Ilé Ifẹ̀, Adéyẹyè Ògúnwùsì sọ ìdí tó fi fẹ́ ìyàwó púpọ̀

Ọrẹ Òtítọ́jù

Ọọ̀ni ìlú Ilé Ifẹ̀, Ọba Adeyẹye Ogunwusi, Ọ̀jájá kejì sọ pé òun kò dédé fẹ́ ìyàwó púpọ̀ láti kó obìnrin jọ làáfin bí àwọn ẹni ìṣaájú gẹ́gẹ́ bí àwọn kan ṣe rò.

Ninu ọrọ to sọ nibi eto kan to waye lati fi dupẹ fun awọn oṣiṣẹ aafin rẹ, iyẹn ile Oodua, gẹgẹ bi ara ayẹyẹ fun sisami ọdun rẹ lori itẹ ni Ọọni Ogunwusi ti ṣalaye ọrọ yii.

Ọọni ile ifẹ ni kii ṣe lati figagbaga loun tori ẹ fẹ awọn iyawo pupọ bi ko ṣe lati tubọ mu ki ogo ilẹ adulawọ goke si.
Ọlọrun fi awọn iyawo rere ti wọn jẹ ọrẹ tootọ ati alabarin rere ta mi lọrẹ. Eredi fifẹ ọpọlọpọ Olori kii ṣe nitori orogun tabi figagbaga, bikoṣe lati fi aaye silẹ fun igbeleke ogo adulawọ lọna ati lee ṣiṣẹ pupọ sii lọna ati maa ṣe iranwọ to yẹ fun ọmọniyan nipasẹ awọn olori mi ti awọn pẹlu ko ṣe fi ọwọ rọ sẹyin. Akẹkọjade awọn ile ẹkọ giga fasiti ni Naijiria ati loke okun ni wọn.

“Mo ni dokita niyawo, mo ni agbẹjọro niyawo, mo ni onimọ ẹrọ nipa alumọni inu omi ati aṣaṣọ lẹṣọ niyawo, mo ni akẹkọọjade fasiti Cambridge ati Harvard niyawo, mo ni oluṣiro owo to gba iwe aṣẹ nilẹ Gẹẹsi niyawo ati bẹẹbẹ lọ.

“Yatọ si pe awọn Olori mi rẹwa pupọ pupọ, ọpọlọ wọn gan ji pepe, wọn kawe doju ami, wọn ri ita, wọn si kọ wọn ,wọn si tun gbẹkọ. Ki wa lo de ti emi ko ni dupẹ lọwọ Eledumare?”

Ni oṣu kẹsan an ni Ọọni fẹ akọkọ ninu ohun ti yoo di eto igbeyawo ni ṣisẹ-n-tẹle eyi to ṣi duro lori mẹfa bayii.

Ọpọ lo n woye igbesẹ ti Arole Oodua yoo gbe lẹyin ti Naomi Silẹkunọla kede lori ayelujara loṣu kejila ọdun 2021 pe oun ti fi Ọbalaye naa silẹ.

Amọṣa lọjọ kẹfa oṣu kẹsan an ọdun 2022 ni ọọni gbe Olori Mariam Ogunwusi niyawo gẹgẹ bii yeyelua tuntun. Lẹyin eyi ni Olori Elizabeth Ọpẹoluwa, olori Tobi, Olori Ashley, Olori Ronkẹ ati Temitọpẹ wọle si aafin Oodua ni ṣisẹ-n-tẹle.
Ọọni Ogunwusi ni gbogbo ohun ti o ku fun oun lati maa ṣe bayii ni lati maa ṣeto iranwọ fun awọn to ku diẹ kaato fun lawujọ.

“Gbogbo ohun ti mo fẹ da nile aye ni mo ti da bayii. Ohun to ku fun mi ko ju lati maa gbe awọn eeyan ga, ki n si maa ṣe iranwọ to yẹ fun awọn to ku diẹ kaato fun lawujọ wa ati ṣiṣe iranwọ fun awọn ọdọ ilẹ afirika lati maa dagba sii ni koriya. Eduwa si ti fi awọn obinrin to n gbaruku ti iran mi ti mi. Ki lo de ti n o ni dupẹ lọwọ Ọlọrun Ọba?”

Obasanjo àti Adebanjọ ní kò sí gìrì lórí olùdíje táwọn ń tẹ̀lé

Ọrẹ Òtítọ́jù

Ṣé wọ́n ní èyí wùmí, èyí ò wù ọ́, ni kìí jẹ́ á pawọ́ pọ̀ fẹ́bìnrin. Ààrẹ Orílẹ̀ yìí nígbà kan rí, Olóyè Olúségun Obásanjọ́ tún ti fọwọ́ gbáyà nípa olùdíje sípò Ààrẹ tó ń se àtìlẹyin fún láti borí ìbò lọ́dún 2023.

Obasanjo sisọ loju ọrọ yii ninu fidio to jade sita lasiko to wa ni ibujoko ẹgbẹ Ohaneze Ndigbo to wa ni Enugu.

Oloye Obasanjo ati eekan kan ninu ẹgbẹ Afenifere, Alagba Ayo Adebanjo pẹlu Peter Obi si ni wọn se abẹwo solu ile ẹgbẹ Ohaneze Ndigbo naa.

Obasanjo ati Adebanjo si ni wọn se abẹwo si Enugu lati se abẹwo ibanikẹdun lori iku Minisita feto irina ofurufu ni saa oselu alagbada akọkọ, Mbazulike Amaechi.

Aarẹ tẹlẹ naa, to wọ asọ ibilẹ ẹya igbo, ni ẹnu awọn ọmọ Naijiria ti n kun saaju pe Peter Obi, tii se oludije aarẹ fẹgbẹ iselu Labour, lo n se atilẹyin fun lati bori ibo aarẹ lọdun 2023.

Bẹẹ ni Olusegun Obasanjo wa fọwọ gbaya ninu akọtun fidio to jade sita naa pe ko si ẹnikẹni to le halẹ mọ oun lori oludije aarẹ ti oun n satilẹyin fun.

Obasanjo ni “Mo ti ta ẹjẹ mi silẹ fun isọkan orilẹede Naijiria, ti mo si tun ti se ẹwọn ri, nitori naa, ko si ẹnikẹni to to bẹẹ lati dun mahuru-mahuru mọ oun lori oludije ti oun ba pọn lẹyin rẹ.

“Ki wa ni wọn fẹ maa fi dẹru ba mi? Ohun kan soso ti ẹgbọn mi, Ayo Adebanjo ko tii se ni tiwọn ni pe ki wọn ta ẹjẹ wọn silẹ amọ awọn naa ti lọ se ẹwọn ri, a si fi itan naa silẹ di igba mii.”

Oloye Obasanjo wa woye pe isoro orilẹede yii kọja ti ẹlẹyamẹya, gbogbo Naijiria ni ọrọ yii kan.

Aarẹ Naijiria tẹlẹ naa wa n fi ika hanu pe aisi asaaju to ni iwa rere ti yoo tu ọkọ orilẹede yii gan ni isoro kan gboogi, to n wa ọkọ orilẹede yii sẹyin.

O fikun pe ti oun ba gbe ọwọ le eeyan kan lori, o tumọ si pe oun n se afiwe onitọun pẹlu awọn ẹlomiran ni.

O ni oun ti ri pe ọpọ anfaani wa lara onitọun ni, eyi ti yoo se orilẹede Naijiria loore.