Dẹ́rẹ́bà tó wa bọ́ọ̀sì to kọlu rélùwéè l’Eko ti jọ̀wọ́ ara rẹ́ fún ọlọ́pàá

Fẹ́mi Akínṣọlá

Dẹrẹba tó wa ọkọ̀ bọọsi BRT tó forígbárí pẹ̀lú reluwé nílùú Èkó l’Ọjọbọ ti jọ̀wọ́ ara rẹ̀ sílẹ̀ fá wọn agbófinró.

Gómìnà ìpínlẹ̀ Èkó, Babajide Sanwo-Olu ló sọ èyí nígbà tó ń bá àwọn akọroyin sọ̀rọ̀ lẹ́yìn tó ṣe àbẹ̀wò sí ilé ìwòsàn ńlá Fásitì ìpínlẹ̀ Èkó, LASUTH.

Awakọ̀ tó wa ọkọ̀ bọ́ọ̀sì BRT àwọn òṣìṣẹ́ ìjọba náà ti kọ́kọ́ sá lọ ní kété tí ìṣẹ̀lẹ̀ náà ṣẹlẹ̀, kí ó tó di pé ó padà fara rẹ̀ hàn.
Gómìnà Sanwo-Olu ní awakọ̀ náà ti wà ní àkóso àwọn ọlọ́pàá báyìí.

Àwọn márùndínlọ́gbọ̀n ti gba ìtọ́jú kíákíá wọ́n sì ti ń gbé wọn lọ sí àwọn ilé ìwòsàn ìjọba míràn káàkiri ìpínlẹ̀ Èkó.

Gómìnà Sanwo-Olu tún fi kún un pé èrò márùndín láàdọ́rù-ún 85 ló wà nínú ọkọ̀ b bọ́ọ̀si náà, méjìlélógójìj nínú wọn ni ohun tó ṣe wọ́n kò fi bẹ́ẹ̀ pọ̀ púpọ̀, mọ́kàndínlọ́gbọ̀n nínú wọn ló fara ṣèṣe púpọ̀, tí mẹ́jọ nínú wọn sì farapa fẹ́ẹ́rẹ́fẹ́.
Èèyàn mẹ́fà ló ti jáde láyé nínú àwọn èèyàn tó farakáásá ìjànbá náà. Méjì nínú wọn ni wọ́n gbé dé ilé ìwòsàn lókùú, ṣùgbọ́n mẹ́rin míràn jáde láyé lẹyìn tí wọ́n gbé wọn dé ilé ìwòsàn.

Ó fi kún un nínú àlàyé rẹ̀ pé àwọn ọmọdé tí wọ́n jẹ́ akẹ́kọ̀ọ́ tí wọ́n ń lọ pẹ̀lú àwọn òbí wọn tó jẹ́ òṣìṣẹ́ ìjọba Èkó wà nínú ọkọ̀ bọọsi náà nígbà tí ìjànbá náà wáyé.

Adeleke kàn ń gba oríyín fún àṣeyọrí Oyetola ni – APC Ọṣun

Fẹ́mi Akínṣọlá

Ẹgbẹ́ òṣèlú All Progressive Congress APC ìpínlẹ̀ Osun, ti fi ẹ̀sùn kan ìṣèjọba Ademola Adeleke pé kò dẹ̀kun láti gba oríyìn àwọn àṣeyọrí Gómìnà Gboyega Oyetola.

APC Osun ní kò bójúmu bí ìjọba Ademola Adeleke se dáwọ́ iṣẹ́ dúró lórí Fásitì Ilesha, èyí tí wọ́n ní Gómìnà tẹ́lẹ̀, Gboyega Oyetola ti parí gbogbo isẹ́ lórí Fásitì náà.

Alága fìdíhẹẹ́ ẹgbẹ́ òṣèlú APC, Tajudeen Lawal ló sọ eléyìí níbi ìpàdé kan tí wọ́n ṣe pẹ̀lú àwọn akọ̀ròyìn nílùú Òsogbo l’Ọjọru.

Lawal ní owó tó tó àádọ́rùn-ún bílíọ̀nù náírà ni ó wà ní àpò ìjọba nígbà tí Adeleke di Gómìnà l’óṣù mẹ́ta sẹ́yìn.

Kola Olabisi, agbẹnusọ ẹgbẹ́ òṣèlú APC, to lọ sojú alága níbi ayẹyẹ ọgọ́rùn-un ọjọ́ gẹ́gẹ́ bíi Gómìnà tí Adeleke ṣe ni kò bójú mu rárá, àti pé aadọrun bílíọ̀nù náírà náà ni ìjọba Adeleke kò rí nawọ́ sí pé nǹkan báyìí ló fi se.

“Adeleke gba iṣẹ́ lọwọ́ àwọn elétò ìlera tó tó ẹ̀ẹ́dẹ́gbàata níye nígbàtí tí ètò ìlera ṣì mẹ́hẹ ní ìpínlẹ̀ náà.

“Adeleke ń lo àwọn jàǹdùkú láti dunkookò mọ́ àwọn ọmọ ẹgbẹ́ òṣèlú APC lásìkò tí ètò ìdìbò Ààrẹ àti ilé ìgbìmọ̀ wáyé.

Síbẹ̀, kò tíì sí èsì tí ìjọba Ademola Adeleke fọ sí gbogbo ọ̀rọ̀ tí ẹgbẹ́ òṣèlú APC Osun lọ́ mọ́ ọ lẹ́sẹ̀ yìí.

Ààrẹ orílẹ̀èdè Tunisia fẹ́ tú ìjọba ìbílẹ̀ ká

Fẹ́mi Akínṣọlá

Ààrẹ orílẹ̀-èdè Tunisia, Kais Saied ti kéde pé òun yóò tú àwọn ìjọba ìbílẹ̀ tí wọ́n dìbò yàn ní ọdún 2018 ká.

Ààrẹ Saied tún sọ pé ìjọba fìdíhẹẹ́ tí yóò jẹ́ ìgbimọ àwọn àkànṣe aṣojú.

Àwọn ìgbìmọ̀ yìí jẹ́ ara àwọn ohun àmúyangàn ìjọba tiwa-n-tiwa tí àwọn èèyàn Tunisia lè sọ pé ó jẹ́ èrè àwọn lẹ́yìn ìwọ́de ńlá tó wáyé lọ́dún 2011 èyí tó lé Ààrẹ Zine al-Abidine Ben Ali kúrò nípò.

Àwọn èèyàn tí ọ̀pọ̀ mọ̀ sí àwọn ọmọ ẹgbẹ́ òṣèlú alátakò tó tako ìjọba Ààrẹ Saied ló wà láwọn ìgbìmọ̀ ìṣèjọba ìbílẹ̀ náà .

Ààrẹ Saied ní àwọn aráàlú ni yóò dìbò yan àwọn ọmọ ìgbimọ yìí ṣùgbọ́n òfin tuntun ni yóò wà nílẹ̀ fún wọn.

Iléẹjọ́ kòtẹ́milọ́rùn fún INEC láṣẹ láti ṣàtúntò BVAS fún ìdìbò Gómìnà

Fẹ́mi Akínṣọlá

Ilé ẹjọ́ kòtẹ́milọ́rùn tó ń gbọ́ àwọn awuyewuye ètò ìdìbò sípò ààrẹ ní Nàìjíríà tó wáyé lóṣù tó kọjá ti fún àjọ INEC láǹfàní láti ṣe àtúntò ohun èlò àyẹwò olùdìbò lọ́nà ìgbàlódé, BVAS tó lò fún ètò ìdìbò sípò ààrẹ.

Èyí tako ẹ̀bẹ̀ tí olùdíje fún ipò ààrẹ lẹ́gbẹ́ òṣèlú LP, Peter Obi àti ẹgbẹ́ òṣèlú rẹ̀ gbé ka iwájú ilé ẹjọ́ náà pé kó ká àjọ INEC lọ́wọ́ kò pé kò gbọdọ̀ fọwọ́ kan ẹ̀rọ ìgbàlódé BVAS náà, àti pé ó gbọdọ̀ gba òun láàyè láti yẹ̀ ẹ́ wò.

Àwọn ìgbìmọ̀ adájọ́ mẹ́ta tó ń gbọ́ ẹjọ́ náà ṣàlàyé pé dídá INEC lọ́wọ́ kọ́ yóó pagidínà ètò ìdìbò sípò Gómìnà àtàwọn ìgbìmọ̀ aṣòfin ìpínlẹ̀ tí yóò wáyé lọ́jọ́ ọ Sátidé, ọjọ́ kọkànlá oṣù kẹta.

Agbẹjọ́ró fún INEC ṣàlàyé pé kò yẹ kí Peter Obi àti ẹgbẹ́ òṣèlú rẹ̀ bẹrù ohunkohun nítorí pé gbogbo ohun tó wà lórí àwọn ẹrọ BVAS náà ni wọ́n yóò fi pamọ́ sínú agbada ayélujára ‘server’ wọn fún ẹnikẹ́ni láti wò nígbà kúùgbà.

Àwọn agbẹjọ́ró tó ṣojú fún Peter Obi àti Atiku Abubakar, ní àwọn ohun tí àwọn nílò fún ẹjọ́ àwọn ló ṣeéṣe kí wọ́n parẹ́ bí àjọ INEC bá ṣe àtúntò BVAS rẹ̀ ọhún

Ilé ẹjọ́ kòtẹ́mi lọ́rùn fún Obi àti ẹgbẹ́ òṣèlú rẹ̀ láṣẹ láti yẹ àwọn ohun èlò gbogbo tí INEC lò fún ètò ìdìbò ààrẹ tó kọjá lórílẹ̀ èdè Nàìjíríà wò fún ẹjọ́ tó pè tako ìdìbò náà.

Sùgbón, àjọ elétò ìdìbò INEC dìde tako Obi àti ẹgbẹ́ òṣèlú rẹ̀ lẹ́yìn tó ní òun fẹ́ ṣe àtúntò BVAS fún àti lò lásìkò ìdìbò Gómìnà tí yóò wáyé lọ́jọ́ Sátidé.

Tinubu padà sí Eko, Ó ní iṣẹ́ ti bẹ̀rẹ̀ ní pẹrẹu

Fẹ́mi Akínṣọlá

Àpèjúwe bí ààrẹ tuntun tí ìlú dìbò yàn ṣe padà sí ìlú Èkó ko yàtọ̀ sí pé kí jagunjagun ìgbà a nì bá jàjàyè, tí wọ́n sì fẹ́ wọ̀lú padà lọ̀rọ̀ jọ lọ́jọ́ Àìkú, ọjọ́ karùn-ún, oṣù Kẹta yìí, pẹlu bí òbítíbitì èrò ṣe tú jáde láti kí ààrẹ tuntun, Aṣíwájú Bọ́lá Ahmed Tinubu, káàbọ̀ padà sílùú Èkó, láti Àbújá.

Tìlù -tìfọn làwọn o lólùfẹ́ èèkàn olóṣèlú tó ti fìgbà kan jẹ Gómìnà ìpínlẹ̀ Èkó náà lọọ pàdé rẹ̀, bi wọ́n ṣe ń kọrin, bẹ́ẹ̀ ni wọ́n ń jó, tí wọ́n sì ń kókìkí rẹ̀ gẹ́gẹ́ bíi akọni ọkùnrin tó gbóúnjẹ fẹ́gbẹ́, tó sì gbàwo bọ̀.

Láti pápákọ̀ òfurufú Murtala Mohammed, MMIA, tó wà n’Ikẹja, làwọn èèkàn èèkàn lẹ́gbẹ́ òṣèlú All Progressives Congress, APC, ti lọ̀ ọ́ pàdé Jagaban, gẹ́gẹ́ bí wọ́n ṣe ń pé ọ̀kan nínú àwọn orúkọ oyè rẹ̀.

Lára àwọn tí wọ́n lọ ọ kí i káàbọ̀ ni Gómìnà ìpínlẹ̀ Èkó, Babajide Oluṣọla Sanwo-Olu, Olórí àwọn òṣìṣẹ́ ọba, Ọgbẹni Tayọ Ayinde, Sẹnetọ Musiliu Ọbanikoro, àti àwọn òṣìṣẹ́ ọba mìíràn.

Láti Ikẹja ọ̀hún ni gbogbo wọn ti jùmọ̀ rìn pẹ̀lú ọkọ̀ ayọ́kẹ́lẹ́ bọ̀gìnnì wọn gbogbo, tààrà ni wọ́n mórí lé ààfin Iga-Iduganran, ibẹ̀ ni Ọba Rilwanu Akiola, Ọba ìlú Èkó, ti kí Tinubu káàbọ̀, bẹ́ẹ̀ lẹsẹ̀ àwọn olóyè onífìlà funfun nílùú Èkó pé báákán síbẹ̀.

Ṣé tèwe-tàgbà ní-ín ṣapẹ́ wo líìlí, àti pé bí sìkìǹmidìn bá wọnú ọjà, tẹrú tọmọ ní-ín jó o.
Iṣẹ́ àṣelàágùn làwọn ẹ̀ṣọ́ aláàbò àtàwọn ọ̀tẹlẹ̀múyẹ́ ṣe kí wọ́n tóó jẹ́ kí Tinubu bọ́ọ́lẹ̀ nínú ọkọ̀ ayọ́kẹ́lẹ́ rẹ̀, ìrìn tí kò yẹ kó gbà ju ìṣẹ́jú péréte náà sì gba àkókò gígùn kó tóó fáàyè wọlé, bó ti ń ṣíṣẹ̀ lọ́kọ̀ọ̀kan ló ń juwọ́ sáwọn ogunlọ́gọ̀ tí wọ́n wá ṣàyẹ́sí i rẹ̀ níbẹ̀.

Láàfin Ọba Akiolu, Tinubu ní ìrìn àjò tóun là kọjá láti àsìkò ìdìbò abẹ́lẹ́ tí wọ́n fi fa òun kalẹ̀ gẹ́gẹ́ bíi olùdíje, títí dìgbà tí ètò ìdìbò náà fi wáyé, tó sì parí lọ́sẹ̀ tó lọ yìí, kò yàtọ̀ sí ìdíje ife àgbáyé bọ́ọ̀lù aláfẹsẹ̀gbá tó máa ń wáyé, níbi tó jẹ́ ojú ogun àti eré ẹlẹ́mìí ẹṣin ni, síbẹ̀ ẹgbẹ́ kan ṣoṣo ni yóó gbé ife lọ sílé.

Ó dúpẹ́ lọ́wọ́ Ọlọ́run àtàwọn èèyàn fún àṣeyọrí rẹ̀, bákan náà ló dúpẹ́ gidigidi lọ́wọ́ Ọba Akiolu àtàwọn orí-adé gbogbo fún ádùrá àti ìfẹ́ wọn.

Lẹ́yìn èyí ló ṣàfihàn ìwé -ẹ̀rí i ‘mo yege’ tí àjọ elétò ìdìbò INEC fún un, ó sì ya fọ́tò pẹ̀lú Ọba àtàwọn ìjòyè láti ṣèrántí ìṣẹ̀lẹ̀ amọ́kànyọ̀ ọ̀hún.

Ó wáá ṣèlérí pé gbogbo ẹ̀jẹ́ tóun jẹ́ lásìkò ìdìbò lòun yóó ṣiṣẹ́ lé lórí, òun ò sì ní í já àwọn tó rọ̀jò ìbò fóun àti gbogbo ọmọ Nàìjíríà kulẹ̀ tóun bá ti gbọ̀pá àṣẹ láìpẹ́.

Káhàsà! Ọmọ Ṣani Abacha kú lójijì, wọ́n ló sùn ni ò jí mọ́

Fẹ́mi Akínṣọlá

Àrùn la rí wò,a ò rí ti ọlọ́jọ́ ṣe.Títí di àsìkò yìí ni àwọn èèyàn ṣì ń bá mọ̀lẹ́bí olórí orílẹ̀-èdè wa tẹ́lẹ̀, Ibrahim Sani Abacha, kẹ́dùn. Èyí kò sẹ̀yìn bí ọkàn nínú àwọn ọmọ rẹ̀ ọkùnrin ṣe fò sánlẹ , tó sì ṣe bẹ́ẹ̀ kú lójijì.

Oun tí á gbọ́ ni pé Abdullahi Abacha yìí ti ojú oorun dé ojú ikú ni nílé rẹ̀ tó wà ní òpópónà Nelson Mandella, nílùú Àbùjá. Wọ́n ní kò sí ohun tó ṣe é kó tó wọlé sùn lálẹ́ ọjọ́ náà, bẹẹ ni kì i ṣe pé àìsàn kankan ti wa lára rẹ̀ ṣaájú àsìkò tí ikú mú un lọ yìí, gẹ́gẹ́ bí ọ̀kan nínú àwọn mọlẹbi ṣe sọ, ó kàn sùn náà ni, nígbà tó sì di òwurọ̀ ọjọ́ kejì ni wọ́n rí i pé ó ti sọdá sódìkejì ayé. A gbọ́ pé ọmọkùnrin ẹni ọdún mẹ́tàdínlógójì yìí ló wà ní ipò kẹjọ nínú àwọn ọmọ mẹ́sàn-án tí Olóògbé Sanni Abacha fi sáyé lọ.

Ẹ̀gbọ́n olóògbé náà, Fatimah-Gumsu Abacha-Buni tó jẹ́ ìyàwó Gómìnà ìpínlẹ̀ Yobe, ló kéde ọ̀rọ̀ náà lórí ìkànnì abẹ́yẹfò (twitter) rẹ̀ pé, ‘‘Inna lillahi wa inna ilaehi rajiun (Ohun tó dájú ni pé ọ̀dọ̀ Allah ni a ti wá, ọ̀dọ̀ Rẹ̀ náà ni a ó padà sí). Mo pàdánù àbúrò mi, Abdullahi Sani Abacha. Ojú oorun ló ti dé ojú ikú. Kí Ọlọrun Allah fojú pa àṣìṣe rẹ̀ , kó sì tẹ ẹ sí Aljanah onídẹ̀ra. Ẹ jọ̀wọ́, ẹ bá mi rántí rẹ̀ nínú ádùrá.
Ìrọ̀lẹ́ ọjọ́ Àbámẹ́ta, Sátidé, ọjọ́ kẹrin, oṣù yìí, ni wọ́n ni ètò ìsìnkú rẹ̀ yóò wáyé ní mọṣalaṣi ńlá tó wà nílùú Àbùjá láago mẹ́rin ìrọ̀lẹ́.

Burna Boy, Tems àti Rema seré níbi NBA Halftime Show

Mary Fágbohùn

Olugbafe eye grammy, Damini Ogulu, ti a mo si Burna Boy ati Tems pelu Rema korin nibi NBA All-Star game halfshow ti 2023.

NBA All-Star game halfshow ti 2023 ni won se ni Salt Lake City, USA ni ojo Aiku.

Are Afrobeat naa side pelu Burna Boy, eni to ko orin re to gbori lodo gbogbo eniyan “It’s Plenty” ati “Anybody”. Leyin Burna ni Rema eni to mu ori awon eniyan wu pelu “Calm Down” ati “Holiday”.

Tems si kase eto naa nle pelu orin lara orin re “Crazy Tings, Free Mind” ati ipa re to ko ninu orin “Essence” pelu Wizkid ti “Wait For U” Feature si wa lare re.

Are naa tun mu ki Burna Boy ko orin to gbori lodo opo eniyan “Last Last”.

Oníjìbìtì kan rí è̩wò̩n o̩dún méjì he fún síse àfarawé òsèré tíátà Bó̩láńlé Nínálowó

Mary Fàgbohùn

Onijibiti kan, Omoghan Igbinosa ti ri ewon odun meji he fun sise afarawe osere Nollywood, Bolanle Ninalowo.

Eyi ni ajo to n ri si oro magamago owo (EFCC) fi lede ni oju opo Twitter won lojo Aje.

Adajo Okon Abang ti ile ejo giga ti ijoba apapo ni Warri, ipinle Delta, se idajo re ni ojo keta-din-ni-ogun osu keji, 2023.

Esun naa ka bayii pe, “Iwo, Omoghan Destiny Igbinosa nigbakan laarin odun 2021 si 2022 ni ilu Benin, ipinle Edo laarin sakaani ile-ejo olola yii hu iwa jibiti nipa sise afarawe idanimo Ninalowo Bolanle, osere tiata Nollywood nipa fifi awon iwe kan ranse si Newon Quanon lati ori ayelujara ni eyi ti iwe ti o fi ranse naa ti so pe o wa lati odo Ninalowo Bolanle pelu erongba lati ri ere fun ara re.

“Nipase eyi lo fi se si ofin abala ikeji-le-ni-ogun ipa keji (Section 22 (2) (b) (i) Cybercrime (Prohibition Prevention,etc. Act 2015) ti ifiyajeni re si wa labe Section 22 (2) (b) (IV) abala ofin naa.

“Lori ejo yii, olujejo naa wi pe oun jebi oro naa. Nitori ebe won, olufesunkan, I. M. rawo ebe si ile-ejo lati se idajo naa boseye.

“Agbejoro olujejo, A. J. Onwuanaje ati Dickson Egberume rawo ebe si ile-ejo pe ki won je ki aanu sogo lori idajo, wi pe olujejo naa ti mo ese re lese.

“Adajo Abang se idajo fun olujejo naa o si so si ewon odun meji tabi ki o san owo itanran ti o to milionu kan naira. Olujejo naa tun gbodo padanu owo ti o to arun-din-ni-oji le ni egbeokanla owo dola ero ibanisoro re si apo ijoba apapo Naijiria.

Mi ò gbowó ló̩wó̩ olùdíje kankan láti polongo ìbò – Toyin Abraham

Mary Fágbohùn

Osere Nollywood, Toyin Abraham ti safihan pe atileyin oun fun oludije fun ipo aare ninu egbe oselu All Progressives Congress (APC), Bola Tinubu, kii se nitori owo.

E seranti pe osere tiata naa gba opolopo isorolodisi lori ayelujara nitori pe o kede atileyin re fun inubu.

O wi pe,“ Mo nife Asiwaju ati pe mo n soro nipa ara mi. Mo nife re. Maa dibo fun nitori pe mo nife re. Bo ti le je pe, mi o ti sepinnu, mo kan n so fun yin ni. Nitori pe o ti se opolopo nnkan fun mi ni ile-ise yi”

Lori ayelujara , yiyan oludije ti Toyin fe ti fa opolopo igboriyin ati idalebi fun n.

Toyin kolu awon omo Naijiria fun titako atileyin re fun Tinubu ninu iforojomitoro oro kan pelu Kemi Afolabi lori Instagram.

O wi pe otito ibe ni pe oun ko gbowo lowo oludije fun ipo aare ninu egbe oselu APC, awon ti won n sepe fun oun kan n fi akoko won sofo ni.

Toyin tesiwaju lati sekilo fun awon omo Naijiria pe ki jawo ninu pe a n hale mo ara wa lori ayelujara nitori oludije ti oun yan.

O wi pe, “Bi enikeni ba bumi tabi sepe fun mi, ko le ran mi nitori pe mi o gbowo. Awon to gbowo nikan ni epe le e ja.

“Emi, Oluwatoyin, mi o gbowo lowo enikeni bee si ni mi o polongo fun enikeni sugbon a n so oro yii nitori pe orile-ede mi niyi. Mo je omo Naijiria, mo si bi omo mi sibi.

“Ko seni ti le e sanwo fun mi. Mo n pawo owo wole, mo n tan fiimu mi ni sinima, mo n ta won ni awon oju awe kan, Mo n mowo wole mo si n se daadaa. Koko ni pe ki e yan oludije ti yin, e ma hale mo mi.”