NLC kò yọjú,TUC, ìjọba ṣèpàdé lórí owó oṣù tó kéré jùlọ

Fẹ́mi Akínṣọlá

Ìjọba àpapọ̀ Orílẹ̀ yìí ti ní àwọn yóò ṣe àgbéyẹ̀wò àwọn nǹkan tí ẹgbẹ́ òṣìṣẹ́ TUC gbé síwájú àwọn tó fi mọ́ owó oṣù tó kéré jùlọ.

Nígbà tó ń bá àwọn akọ̀ròyìn sọ̀rọ̀ lẹ́yìn ìpàdé tó wáyé láàárín ìjọba àpapọ̀ àti TUC èyí tó wáyé fún bíi wákàtí mẹ́ta, Agbẹnusọ ìjọba àpapọ̀, Dele Alake ní àwọn máa wò ó tó bá jẹ́ wí pé àwọn ìbéèrè jẹ́ ohun tí ìjọba le ṣe àmúṣẹ rẹ̀.

Ó ní lára nǹkan tí ìjọba ń rò láti ṣe tẹ́lẹ̀ láti mú ìdẹ̀kùn báwọn lórí ìrànwọ́ orí epo bẹntiróòlù tí wọ́n yọ ni láti fi ojú fo owó orí fún wọn fún ìgbà kan ná.

Ẹgbẹ́ òṣìṣẹ́ Nàìjíríà, NLC kọ̀ láti yọjú síbi ìpàdé náà.

Alake ní ohun tó dájú ni pé Ààrẹ Bola Ahmed Tinubu yóò gbé ìgbìmọ̀ kan dìde èyí tí àwọn ìpínlẹ̀ àti ẹgbẹ́ òṣìṣẹ́ yóò ní aṣojú níbẹ̀, tí wọn yóò sì jíròrò lórí owó òṣìṣẹ́ tó kéré jùlọ.

Ó ṣàlàyé pé kò sí aáwọ̀ láàárín ìjọba àpapọ̀ àti ẹgbẹ́ òṣìṣẹ́ Nigeria Labour Congress, NLC lórí ìbéèrè wọn pé kí ìjọba fowo kún owó òṣìṣẹ́.

Bákan náà ló fi kun pé bí NLC kò ṣe sí níbi ìpàdé tí wọ́n ṣe lọ́jọ́ Àìkú kò túmọ̀ sí pé wọ́n fojú kéré wọn.

Agbẹnusọ Tinubu ní ìjọba àpapọ̀ tún ti ń gbìyànjú láti kàn sí wọn fún ìpàdé lọ́jọ́ Ìṣẹ́gun.

Ẹ̀wẹ̀, TUC nínú ìbéèrè tí wọ́n gbé síwájú ìjọba àpapọ̀ ní kí ìjọba dá owó epo padà sí iye tó wà tẹ́lẹ̀ kí ìjíròrò fi wáyé láàárín wọn.

Ààrẹ TUC, Festus Osifo ní àwọn ní ìrètí pé ìjọba àpapọ̀ yóò gbọ́ tàwọn gẹ́gẹ́ bí wọ́n ṣe ṣe ìlérí pàápàá lórí ọ̀rọ̀ owó oṣù tó kéré jùlọ tí òṣìṣẹ́ yóò máa gbà.

Ọ̀gá méjì ò lè wakọ̀ kan ṣoṣo ni mo fi yọ Auxiliary nípò – Makinde

Fẹ́mi Akínṣọlá

Ṣé wọ́n ní bí gbogbo nnkan bá yí padà, bí n ó ṣe ṣe nnkan mi nìyí kò yí padà.
Gómìnà ìpínlẹ̀ Oyo, Seyi Makinde ti ṣàlàyé ìdí tó fi ní kí alága tẹ́lẹ̀ rí fún gááràjì ní ìpínlẹ̀ náà, Alhaji Mukaila Lamidi tí ọ̀pọ̀ mọ̀ sí Auxiliary lọ rọ́kún nílé.

Makinde ní ọba kò lè pé méjì láàfin ni òun fi fọwọ́ òsì júwe ilé fún Auxiliary.

Níbi ètò ìsìn ìdúpẹ́ fún ìbúrawọlé sáà kejì rẹ̀ ní ilé ìjọsìn Cathedral of St. Peter, Aremo, Ibadan lọ́jọ́ Àìkú ni Seyi Makinde ti sọ̀rọ̀ náà.

Makinde sọ àrídájú rẹ̀ wí pé ìjọba yóò ṣe àfọ̀mọ́ àwọn gáréèjì àti pé gbogbo àwọn tó ń da ìlú láàmú ni àwọn máa fi òfin gbé.

Ó ṣàlàyé pé kí ètò ìdìbò tó wáyé ni àwọn ti pe àwọn alókòóso gáréèjì sí ìpàdé láti ṣe ìkìlọ̀ fún wọn pé àwọn kò fẹ́ kí ẹnikẹ́ni máa fa wàhálà.

“A ṣàlàyé fún wọn pé tí a bá wọlé fún sáà kejì, a máa ri dájú pé àláfíà jọba, tí a máa ri pé ìrẹ́pọ̀ wà láàárín wọn.”

“Ẹnìkan ló fárígá pé òun kò lè bá àwọn yòókù ṣe, èmi náà sì sọ pé ìjọba méjì kò lè máa ṣàkóso ìlú kan.”

Makinde yan alága ẹgbẹ́ awakọ̀ PMS tuntun láti rọ́pò Auxiliary l’Ọ́yọ̀ọ́

Fẹ́mi Akínṣọlá
Àwọn àgbà bọ̀, wọ́n ní bí ẹ̀rẹ̀kẹ́ ọmọ ẹranko ò bá bàjẹ́,ọmọ èèyàn ò le dùn, bẹ́ẹ̀ lọ̀rọ̀ dà báyìí, bí Ìjọba ìpínlẹ̀ Ọ̀yọ́ lábẹ́ ìṣàkóso Onímọ̀ ẹ̀rọ Ṣèyí Mákindé ti kéde Ahaji
Oluwatomiwa Omolewa, akọ̀wé ẹgbẹ́ ìgbìmọ̀ tó ń se àkóso àwọn gáréèjì ọkọ̀ níìpínlẹ̀ Ọ̀yọ́, PMS tẹ́lẹ̀ gẹ́gẹ́ bí alága tuntun fún ẹgbẹ́ náà níìpínlẹ̀ Ọ̀yọ́.

Bákan náà ni ìjọba Ọ̀yọ́ kéde pé Alhaji Kasali Ajisafe Lawal tí ọ̀pọ̀ mọ̀ sí Baba Bola yóó sì jẹ́ Akọ̀wé ẹgbẹ́ tuntun.

Èyí ló jẹyọ nínú àtẹ̀jáde tí agbẹnusọ Gómìnà lórí ìròyìn, Sulamion Olarenwaju fi ránṣẹ́ sí àwọn akọ̀ròyìn lọ́jọ́ àìkú.

Àtẹ̀jáde náà ní lẹ́yìn
tí ìjọba se ìpàdé pẹ̀lú àwọn ọmọ ìgbìmọ̀ ẹgbẹ́ tó ń se àkóso àwọn gáréèjì ọkọ̀ ní ìpínlẹ̀ Ọ̀yọ́, PMS ni wọ́n yan alága tuntun ọ̀hún.
Àtẹ̀jáde náà ní; “ Ìjọba ìpínlẹ̀ Ọ̀yọ́ ń fi àsìkò yìí kéde Alhaji Oluwatomiwa Omolewa, akọ̀wé ẹgbẹ́ tẹ́lẹ̀ gẹ́gẹ́ bí alága tuntun fún ẹgbẹ́ PMS ní ìpínlẹ̀ Ọ̀yọ́.

“Alhaji Kasali Ajisafe Lawal tí ọ̀pọ̀ mọ̀ sí Bàbá Bola yóó sì jẹ́ akọ̀wé ẹgbẹ́ náà

“ Èyí ni àtúnṣe tí ìjọba fẹ́ se sí ẹgbẹ́ àwọn ibùdókò ọkọ̀ ní ìpínlẹ̀ Ọ̀yọ́ .”

Ààrẹ Tinubu ṣèpàdé bòńkẹ́lẹ́ pẹ̀lú Wike, Makinde àti Ibori

Fẹ́mi Akínṣọlá

Ṣé àwọn àgbà ní ohun tí a kò bá fẹ́ kó bàjẹ, ó ní bí wọ́n ti í se. Bẹ́ẹ̀ ohun tí a bá fi pamọ́ òhun níí níyì.
Títí di àkókò tá a sa ìròyìn yìí jọ, kò tí ì sẹ́ni tó mọ kókó ohun tí ìpàdé ìdákọ́nkọ́ kan tó wáyé láàrin olórí orílẹ̀-èdè yìí, Ààrẹ Bola Ahmed Tinubu àti Gómìnà ìpínlẹ̀ Rivers tẹlẹ, Ọgbẹni Nysom Wike, Gómìnà ìpínlẹ̀ Ọ̀yọ́, Ṣeyi Mákindé àti Olóyè James Ibori, èyí tó wáyé nínú ọọ́fíìsì Ààrẹ tó wà ní Aso Rock, nílùú Abùjá dá lé lórí. Ohun táwọn kan tó sún mọ́ àwọn èèyàn náà dáadáa ń sọ ni pé ìpàdé pàjáwìrì náà ní í ṣe pẹ̀lú ọ̀rọ̀ òṣèlú ilẹ̀ wa, àti pé ó ṣeé ṣe kí wọ́n tún fẹ́ gba ipò pàtàkì nínú ìjọba Tinubu, nítorí pé kò fara sin rárá pé àwọn èèyàn náà kópa pàtàkì lákòókò tí ọkùnrin yìí ń dupò Ààrẹ orílẹ-èdè yìí, bó tilẹ̀ jẹ́ pé ọmọ ẹgbẹ́ òṣèlú PDP ni wọ́n.

Ohun tí a gbọ́ ni pé nnkan bíí aago méjì ààbọ̀ ọ̀sàn ọjọ́ Ẹtì, ọjọ́ kejì, oṣù Kẹfà, ọdún 2023 yìí, làwọn mẹ́tẹ̀ẹ̀ta dé sílùú Abuja, bí wọ́n ti ṣe dé sílé ìjọba ní Aso Rock, ni wọ́n ti lọ tààràtà síbi tí Ààrẹ Tinubu ti n dúró dè wọ́n fún ìpàdé pàtàkì ọ̀hún.

Wọn kò gba àwọn oníròyìn kankan lààyè láti bá àwọn èèyàn ọ̀hún wọnú ibi tí wọ́n ti fẹ́ ṣèpàdé pàtàkì ọ̀hún pẹ̀lú Aarẹ, èyí ló si fà á ti kò fi sẹ́ni tó mọ kókó ohun tí ìpàdè bònkẹ́lẹ́ nàà dá lé lórí láàrin àwọn èèyàn ọ̀hún.

Bẹ́ẹ̀ ò bá gbàgbé, kí Wike tóó fipò sílẹ̀ gẹ́gẹ́ bíi Gómìnà ìpínlẹ̀ Rivers ló ti ránṣẹ pe Tinubu pé kó wáá b’óun ṣí àwọn iṣẹ́ àkànṣe pàtàkì kan tí ìjọba rẹ̀ ṣe fáwọn aráàlú ní ìpínlẹ̀ rẹ̀. Ìgbésẹ̀ yìí ló mú ki ọ̀pọ̀ máa sọ pé, ó ṣeé ṣe kó jẹ́ pé Wike pàápàá kò ní í pẹ́ kéde pé òun ti darapọ̀ mọ́ ẹgbẹ́ APC báyìí.

Bákan náà làwọn kọ̀ọ̀kan ń sọ pé àtìlẹ́yìn nlá ti Wike àti Gómìnà Mákindé ṣe fún Ààrẹ Tinubu wà lára ohun tó gbé e dépò ọ̀hún, nítorí pé kì í ṣe ìbò kékeré rárá làwọn méjèèjì fún Tinubu ní ìpínlẹ̀ wọn lákòókò ìbò tó wáyé lọ́jọ́ kẹẹ̀ẹ́dọ́gbọ̀n, oṣù Kejì, ọdún 2023 yìí.

Ẹgbẹ́ òṣìṣẹ́ yóó bẹ̀rẹ̀ ìyanṣẹ́lódì

Fẹ́mi Akínṣọlá

Bí ọ̀rọ̀ táwọn olórí ẹgbẹ́ òṣìṣẹ́ lórílẹ̀-èdè wa ń sọ bá jẹ́ òótọ́, Ọjọ́rú, ọjọ́ keje, oṣù Kẹfà, ọdún 2023 yìí, ni wọ́n sọ pé àwọn yóó bẹ̀rẹ̀ ìyanṣẹ́lódì jákè-jádò orílẹ̀èdè yìí, nítorí ọrọ̀ owó ìrànwọ́ epo bẹntiróòlù tíjọba àpapọ̀ kéde rẹ̀ pé àwọn ti yọ kúrò, èyí tó ti mú kí gbogbo nǹkan gbówó lórí, tí àwọn aráàlú sì ń kojú ìnira ńlá.

Àtẹ̀jáde pàtàkì kan tí Akòwé àgbà àjọ náà, Kọmureedi Emmanuel Ugboaja, fi léde lẹyìn ìpàdé ẹgbẹ́ náà, èyí tó wáyé lọ́jọ́ Ẹtì, ọjọ́ kejì, oṣù Kẹfà, ọdún yìí, ní wọ́n ti fìdí rẹ̀ múlẹ̀ pé kò sóhun tó lè dí àwọn lọwọ́ láti má ṣe bẹrẹ ìyanṣẹ́lódì náà lọ́sẹ̀ yìí bíi ìpinnu àwọn olóyè ẹgbẹ́ náà lórí ọhún tí ìjọba àpapọ̀ ṣe nípa bí wọ́n ṣe yọwó ìrànwọ́ lórí epo bẹntiróòlù kúrò.

Bákan náà ni wọ́n rọ gbogbo àwọn olórí ẹ̀ka iléeṣẹ́ gbogbo tí wọ́n jẹ́ ojúlówó ọmọ ẹgbẹ́ àjọ òṣìṣẹ́ nílẹ̀ yìí pé kí wọ́n gbárùkù ti ètò náà, kó baà lè kẹ́sẹjárí láyọ̀ àti àlàáfíà báyìí.

Apá kan lẹ́tà ọ̀hún sọ pé: ‘A ti gbé e yẹ̀wò dáadáa, ìgbésẹ̀ ìjọba àpapọ̀ lórí bó ṣe yọwọ́ ìrànwọ́ lórí epo bẹntiróòlù ọ̀hún kìí ṣohun tó dáa rárá, a kò ní í gbà fún wọn, bí ìjọba kò bá tètè yí ìpinnu rẹ̀ padà lórí ọ̀rọ̀ náà, gbogbo òṣìṣẹ́ nílẹ̀ yìí pátá ni wọn yóó gùn lè ètò ìyanṣẹ́lódì lọ́sẹ̀ tó ń bọ̀. Kò sóhun náà tó lè dá wa dúró rárá pé ká má bẹ̀rẹ̀ ìyanṣẹ́lódì. À ń fi àsìkò yìí rọ gbogbo àwọn ojúlówó àjọ òṣìṣẹ́ nílẹ̀ yìí pé kí wọ́n wà ní ìgbaradì fún ètò náà lọ́sẹ̀ tó ń bọ. Jákè-jádè orígun mẹ́rẹ̀ẹ̀rin orílẹ̀-èdè yìí ní àwọn òṣìṣẹ́ yóó ti daṣẹ́ sílẹ̀.’

Àìlera Akérédolú fa awuyewuye ní ìpínlẹ̀ Òǹdó

Fẹ́mi Akínṣọlá

Awuyewuye ló ti bẹ́ sílẹ̀ lórí ipò ìlera Gómìnà Oluwarotimi Akeredolu ti ìpínlẹ̀ Òǹdó láti bíi wákàtí mẹ́rìndínlógún sẹ́yìn.

Ìwé ìròyìn orí ẹ̀rọ̀ ayélujára kan ló ti kọ́kọ́ gbé ìròyìn pé Gómìnà Akérédolú kò lè dìde mọ́ débi pé yóó rìn kó tóó di pé púpọ̀ nínú àwọn olùgbé ìpínlẹ̀ náà bẹ̀rẹ̀ sí níí kọminú nípa ipò ìlera Gómìnà náà lórí ẹ̀rọ ayélujára tí àwọn kan sì ń kó ara wọn jọ ní méjì mẹ́ta láti sọọ̀ láàrin ìgboro.

Kódà àwọn kan tilẹ̀ bẹ̀rẹ̀ sí níí sọọ́ lórí ìkànnì ìbánidọ́rẹ̀ẹ́ ‘facebook’ pé Gómìnà náà kò sí láyé mọ́, léyìí táwọn alátìlẹ́yìn Gómìnà ọ̀ún wí pé irọ́ tó jìnà pátápátá sí òótọ́ ni.

Lára ohun tó fa ìbéèrè nípa ipò ìlera Akérédolú tó ti ń ṣe Àárẹ̀ láti ìgbà díẹ̀ sẹ́yìn ni bí Gómìnà náà kò ṣe yọjú síbi ayẹyẹ ibúra wọlé fún Bola Tinubu gẹ́gẹ́ bí Ààrẹ orílẹ̀-èdè Nàìjíríà, tí kò sì tún bá àwọn Gómìnà ẹgbẹ́ rẹ̀ yọjú sí Ààrẹ tẹ́lẹ̀ rí, Muhammadu Buhari, ní Ọjọ́bọ ọ̀sẹ̀ yìí.

Ẹgbẹ́ òṣèlú SDP ní ìpínlẹ̀ Ondo ló ti ní kí àwọn amúgbálẹ́ẹ̀gbẹ́ Gómìnà Akérédolú ò fi ipò ìlera Gómìnà náà lédè fún gbogbo ará ìlú.

NNPC ti kéde àfikún iye tí wọ́n ta jáálá èpo bẹntirol!

Fẹ́mi Akínṣọlá
Ilé eṣẹ epo bẹntirolu lórílẹ̀ èdè Nàìjíríà, NNPC ti kéde àfikún owó epo bẹntirolu lórílẹ̀ èdè Nàìjíríà.

NNPC fi léde nínú àtẹjáde tí wọ́n fi léde lójú òpó Twitter wọn láti kéde iye owó tuntun tí wọ́n ta epo báyìí.

NNPC ní bí ojú ọjà ṣe rí báyìí ló mú kí àwọn ṣe àfikún iye tí wọ́n ń ta epo báyìí.

Bákan náà ni wọ́n fikún un pé epo náà yóò wà ní yanturu fún àwọn aráàlú láti rà.

Àmọ́ wọ́n tọrọ àforíjìn lọwọ́ àwọn aráàlú tí iye owó tí wọ́n ń ta jálá epo náà lè fa ìnira fún.

Bí ó tilẹ̀ jẹ́ pé wọn kò sọ oye tuntun tí wọn yóò máa ta epo náà, ṣáájú ni ìròyìn ti gbé pé epo bẹntirolu ti di ọwọn gógó báyìí lẹyìn tí àwọn iléepọ gbé owó gọbọi lé iye owó tí wọ́n ń ta jálá epo.

Ní àwọn iléepo NNPC ni wọ́n ti rí ibi tí wọ́n ti ń ta j jálá epo ní N488, tí àwọn mìíràn sì ń tà á ní N511 àti bẹ́ẹ̀ bẹ́ẹ̀ lọ!

Adedoyin gbọ́jọ́ ikú ó pohùnréré níwájú adájọ́

Fẹ́mi Akínṣọlá
Yorùbá bọ̀ wọ́n ní bí Ọlọ́run bá rí ọ, jẹ́ kí èèyàn náà ó rí ọ gbẹ̀rí jẹ́.Ọ̀tafà sókè yíbó bóri, b’ọ́ba ayé ò rí ọ, dájúṣáká, t’Ọ̀run n wò ọ́.Bí ó tilẹ̀ jẹ́ pé àwọn àgbà ní akọ igi kò gbọdọ̀ soje, bẹ́ẹ̀ gẹ́lẹ́ lọ̀rọ̀ rí lọ́dọ̀ Dókítà Rahaman Adedoyin, ìyẹn lẹ́yìn tí Onídàájọ́ Adepele Ojo ka ìdájọ́ rẹ̀ tán, tó ní òun pàṣẹ kí wọ́n lọ̀ọ́ yẹgi fún ọkùnrin tó ni ilé ẹ̀kọ́ gíga Fásitì Odùduwà yìí títí tí ẹ̀mí yóó fi bọ́ lára rẹ̀. Ṣùgbọ́n kò sí ẹni tó máa gbọ́ ọjọ́ ikú rẹ̀ ti kò ní í bara jẹ́. Níṣe ni ojú ọkùnrin yìí yípadà, béèyàn bá sì wo ìrísí rẹ̀ nílé-ẹjọ́ lọ́jọ́ Ìṣẹ́gun yìí,oní tọ̀hún yóó mọ́ pé òógùn tó ń jáde lára ọkùnrin náà gbóná janjan bíi omi gbígbóná ni.

Bí adájọ ti parí mrọ̀ rẹ̀ ni Adedoyin nawọ́ sókè, ó lóun ní ohun tí òun fẹ́ sọ. Ṣùgbọ́n Adájọ́ Ojo ṣẹ́wọ́ sí lọ́ọ́yà Adedoyin, ó bèèrè lọ́wọ́ rẹ̀ pé kí lọkùnrin náà fẹ́ sọ. N ni agbẹjọ́rò rẹ̀ bá ní kí adájọ jọ̀wọ́ jàre, gba oníbàárà òun láàyè láti sọ̀rọ̀, nígbà tí wọ́n gbé gbohùngbohùn sí í lẹ́nu. Tàánútàánú lọkùnrin náà fi sọ pé, ‘Ọlọ́run rí mi o, Ó mọ pé mi ò pààyàn, mi ò sì rán ẹnikẹ́ni láti pààyàn… Ọ̀rọ̀ yìí ló ń sọ lọ́wọ́ tí Adájọ́ àgbà fi dá a mọ́ ọn lẹ́nu, ló bá ní , ‘òní kì í ṣe ọjọ́ ọ̀rọ̀ o, ó ní ọ̀rọ̀ lẹ́yìn ìdájọ́ nìyẹn, kò sì lè tẹ̀wọ̀n lẹ́yìn tí ìdájọ ti wáyé, wọ́n ní tó bá dé ilé-ẹjọ́ kò-tẹ́-mi-lọ́rùn, kó máa lọ̀ ọ́ sọ gbogbo ohun tó bá ní lọkàn tó fẹ́ ẹ́ sọ.

Èyí tó ṣe ọ̀pọ̀ èèyàn láàánú nínú ọ̀rọ̀ náà ni ti ọ̀kan nínú àwọn ọmọọṣẹ́ Adedoyin tí wọ́n jọ dájọ́ ikú fún . Níṣe ni ọmọkùnrin náà wólẹ̀ lẹ́sẹ̀ ọ̀gá rẹ̀, tó sì bẹ̀rẹ̀ sí í sunkún kíkorò.

Kín ló dé! Ìdílé àwọn òṣèrè yìí pàpà dàrú

Ọrẹ Òtítọ́jù

Sùúrù kìípọ̀jù, à fi bí kó bá
ní-ín tó lókù .Ayé ò ní-ín yé sọ̀rọ́ ọ wa.
Lóòtótọ́ ló ti pẹ́ tí àwọn èèyàn ti ń gbé e pooyi ẹnu pé kò jọ pé aàọṣepọ̀ tó dán mọ́rán wà láàrin àwọn òṣèré ilẹ̀ wa méjì tí wọ́n jẹ́ tọkọ-tìyàwó, Bukọla Awoyẹmi tí gbogbo èèyàn mọ sí Arugba àti Damọla Ọlatunji, tóun náà jẹ́ òṣèré.

Ibi tára ti ń fu àwọn èẹyàn ìṣesí wọn lásìkò ayẹyẹ ọjọ́ọ̀bí wọn, àti pé àwọn olólùfẹ́ wọn kò sì tún rí wọn papọ̀ bí wọ́n ṣe jọ máa ń ṣe tẹ́lẹ̀ pẹ̀lú àwọn ọmọ wọn.

Bo tilẹ jẹ pe ọpọ ni ko ka eleyii si, bẹẹ ni awọn oṣere mejeeji yii naa ko sọrọ jade lati sọ pe bẹẹ ni tabi bẹẹ kọ lori pe igbeyawo wọn ti tu ka, ti onikaluku si ti n lọ lọtọọtọ.

Ṣugbọn gbogbo awuyewuye yii ti wa sopin bayii pẹlu bi Bukọla Arugba ṣe gbe iwe ipinya laarin oun ati Damọla ti lọọya rẹ kọ sori ikanni Sítágíràmù rẹ lati sọ fun gbogbo eeyan pe oun ko si pẹlu baba ọmọ oun naa mọ, ati pe awọn mejeeji ti pin gaari.

Ninu lẹta naa ti agbẹjọro rẹ kọ ọhun lo ka bayii pe, ‘‘Awa gẹgẹ bii agbẹjọro Arabinrin Bukọla Awoyẹmi ti gbogbo eeyan mọ si Arugba n fi asiko yii sọ fun yin pẹlu aṣẹ ti a gba lati ọdọ onibaara wa ka too gbe ọrọ yii jade pe a n fi asiko yii kede pe a fẹ ki ẹ fi eleyii sọkan pe onibaara wa, Bukọla Awoyẹmi, ati Damọla Ọlatunji ko ni ajọṣepọ kankan papọ mọ. Onikaluku ti n lọ nilọ rẹ, lai ni ikunsinu kankan sira wọn. Ko sigba kankan ti awọn mejeeji ṣegbeyawo, ṣugbọn Ọlọrun fi ibeji ta wọn lọrẹ.

‘‘Awọn mejeeji ni wọn ti jọ fohun ṣọkan pe awọn yoo ma ri si itọju awọn ọmọ mejeeji yii’’.

Ohun ti awọn kan n gbé pooyi ẹnu ṣugbọn ti ẹri rẹ o mulẹ ni pe oṣere-kunrin naa ti fun ẹlomi-in loyun nita.

Bẹ́ ò bá gbàgbé, kí Damọla tóó fẹ́ Arugba ló ti kọ́kọ́ ṣegbeyawo pẹ̀lú ọmọbìnrin kan, Raliat Abiọdun Ṣobọwale, lọjọ kẹtala, oṣù Kẹrin, ọdún 2013.

Ìgbéyàwó náà kò ju ọdún kan lọ tó fi túká. Ẹ̀sùn àgbèrè ni ọmọbìnrin náà fi kan Damọla. Bukọla Awoyẹmi tí Damọla padà fi fi sílẹ̀, ti wọ́n sì ti kọ ara wọn báyìí ,ni ọmọbìnrin tó ń gbé nílùú òyìnbó nígbà náà fẹ̀sùn kàn pé ó ń ṣe wọlé-wọ̀de pẹ̀lú ọkọ òun, èyí tó sì padà fa ìpínyà láàrin wọn.

Seyi Makinde yọ Auxiliary alága onímọ́tò n’Ibadan

Ọrẹ Òtítọ́jù

Lẹ́yìn ìbúrawọlé fún sáà ìkejì ìjọba Gómìnà ìpínlẹ̀ Ọ̀yọ́ Ṣeyi Makinde lọ́jọ́ Ajé ni ìròyìn mìíràn tún jáde wí pé ìjọba ìpínlẹ̀ Ọ̀yọ́ ti gba iṣẹ́ lọwọ́ alamojuto ìgbòkègbodò ọkọ, ‘Park Management System (PMS)’, Alhaji Mukaila Lamide tí ọpọ èèyàn mọ sí “Auxiliary” àti gbogbo ìgbìmọ̀ rẹ̀.

Nínú atẹjade ti olori oṣiṣe tuntun n’ipinlẹ Ọyọ, Họnọrebu Segun Ogunwuyi fi lede lorukọ Gomina, o ni, “Mo ti gba aṣẹ lọwọ Gomina ipinlẹ Ọyọ, Ṣeyi Makinde lati fi ọrọ too yin leti nipa ituka igbimọ to n ṣe amojuto igbokegbodo ọkọ bẹrẹ lati oni, ọjọ Aje ọjọ kọkandinlọgbọn oṣu karun un ọdun 2023”.
Gbogbo wa la mọ wi pe ọrọ kii dede ṣẹlẹ bi ko ba ni idi. Awọn igun kan ninu ẹgbẹ awakọ meji ọtọọtọ to n ṣe akoso igbokegbodo ọkọ tẹlẹri n’ipinlẹ Ọyọ, ‘National Union of Road Transport Workers(NURTW)’, ati ‘Road Transport Employers Association of Nigeria (RTEAN)’ ni a gbọ pe wọn ṣe abẹwo sí Ṣeyi Makinde saaju eto idibo ti o gbe Gomina naa wọle fun saa ikeji, wọn si ṣe ileri fun un wi pe awọn yoo baa ṣiṣẹ pọ ki o le de ibi ilepa rẹ.

Bo tilẹ jẹ wi pe ifanfa wa laarin ẹgbẹ mejeeji ati Gomina ipinlẹ Ọyọ tẹlẹri, Makinde gba lati fun wọn ni aye ki aigbọraẹni ye ti wọn ni tẹlẹri le di ohun igbagbe.

Eyii lo mu ki Gomina ke si alakoso igbimọ to n ṣe akoso awọn ọlọkọ ero n’ipinlẹ Ọyọ, PMS, iyẹn Alaaji Mukaila Lamidi ti ọpọ mọ si ‘Auxiliary’ wi pe ki o fi aye gba awọn igun ẹgbẹ awakọ ero mejeeji naa lẹyin ti wọn gba lati dara pọ mọ gomina ki alaafia si le tubọ jọba lẹka awọn ọlọkọ ero ni ipinlẹ Ọyọ.
Ṣe wọn ni Oriṣa jẹ n pe meji obinrin ko denu. Igbesẹ yii ko dun mọ Auxiliary ninu, idi si niyi ti o fi kọ eti ọgbọin si aṣẹ ti Makinde pa.

Gbogbo akitiyan lati rii pe iṣọkan jọba laarin ẹgbẹ awọn awakọ ero lo n ja si pabo pẹlu bi Auxillary ṣe faake kọri pe oun ko ni ba awọn ẹgbẹ awakọ ero meji toku, iyẹn NURTW ati RTEAN ṣe

Ohun ti a gbọ siwaju sii ni pe Gomina Seyi Makinde n fi ara daa gbogbo iwa aigbọran ati ti inu mi ni n o ṣe yii pelu erongba wi pe yoo pada fi aye gba wọn, eleyi ti wọn ba wọeto burawọle fun Makinde lati ṣe ijọba fun saa ikeji.
Lẹyin gbogbo pọpọsinsin ayẹyẹ iburawọle fun saa keji gomina Seyi Makinde ni papa iṣire Ọbafẹmi Awolọwọ, ti ọpọ ṣi mọ si Liberty Stadium nilu Ibadan lọjọ Aje ọjọ kọkandinlọgbọn oṣu karun un ọdun 2023 ni awọn aṣoju ẹgbẹ awakọ ero mejeeji, iyẹn NURTW ati RTEAN ba ni ki awọn sin Gomina de ile rẹ to n bẹ ni agbegbe Ikọlaba lati kii ku oriire. Ni Ibẹ ni a gbọ wi pe Auxiliary ati awọn eeyan rẹ ti pade wọn ti ọrọ si di iṣu ata yan-an-yan-an.

Ọrọ yii lo bi Gomina Ṣeyi Makinde ninu ti o si pa aṣẹ wi pe ki wọn gba iṣẹ lọwọ Auxiliary ati awọn igbimọ alabaṣiṣẹpọ rẹ.

Lati igba ti ijọba si ti ṣe ikede yii ni ariwo ti n sọ lọtun losi lori iwa ipa ti awọn janduku kan ti ọpọ fura si pe wọn jẹ ara ọmọ ẹgbẹ awakọ ero to wa labẹ Auxiliary n hu lawọn agbegbe bii Olodo, Iwo Road ati bẹẹ bẹẹ lọ.

Ni gbogbo awọn adugbo yii ni awọn eeyan ti n ke gbajare wi pe awọn n gbọ iro ibọn lakọ-lakọ.

Nínú oṣù karún- ún ọdún 2019 ni Makinde fi òfin de ẹgbẹ́ awakọ̀ NURTW àti RTEAN nítorí wàhálà tí wọ́n fa lórí ipò adarí, lẹ́yìn èyí sì ni ó ṣe ìdásílẹ̀ àjọ PMS tó ń mójútó ìgbòkègbodò ọkọ eléyìí tí Auxiliary àti ìgbìmọ̀ rẹ̀ ń ṣe àkóso fún.