Home Blog Page 72

IIé-ẹjọ́ tó ga jù lọ tèsíwájú lórí àwọn ẹ̀sùn tuntun t’Atiku fi kan Tinubu

By
iroyinowuro
-

IIé-ẹjọ́ tó ga jù lọ tèsíwájú lórí àwọn ẹ̀sùn tuntun t’Atiku fi kan Tinubu

Ọrẹ Òtítọ́jù

Ṣé wọ́n ní bí ọ̀rọ̀ ńlá kò bá tíì tán,èèyàn ńlá kò ní-ín sinmi àròyé n lọ̀rọ̀ dà báyìí
Bí ọ̀gọ̀ọ̀rọ̀ èèyàn ṣe ń fojú sọ́nà, tí gbogbo inú kóòtù sì pa rọrọ láti gbọ́ ibi tí ìdájọ́ yóó forí sọ lórí ẹjọ́ kò-tẹ́-mi-lọ́rùn tí Alaaji Atiku Abubakar, olùdíje fúnpò Ààrẹ lábẹ́ àsìá ẹgbẹ́ òṣèlú Peoples Democratic Party (PDP), nínú ètò ìdìbò gbogbogboo tó wáyé lóṣù Kejì, ọdún 2023 yìí, pè ta ko Ààrẹ Bọla Ahmed Tinubu, láti ẹgbẹ́ All Progressives Congress (APC), síwájú ilé-ẹjọ́ tó ga jù lọ nílẹ̀ wa, to wa niluu Abuja, àwọn adájọ́ náà ti gbé ìpinnu wọ́n kalẹ̀, wọ́n láwọn kò tí ì lè ṣe ìdájọ́ ojú-ẹsẹ̀ lórí atótónu àti àwíjàre olùpẹ̀jọ́ àti olùjẹ́jọ́, pàápàá lórí ẹ̀bẹ̀ tí Atiku tún bẹ̀ wọ́n pé kí wọ́n gba àwọn ẹ̀sùn tuntun tóun lọ̀ọ́ gbà nílẹ̀ Amẹ́ríkà lòdì sí Tinubu wọlé, wọ́n láwọn yóó gbé ìdájọ́ àwọn kalẹ̀ tó bá yá.

Eyi waye nigba ti Onidaajọ Inyang Okoro n ka ipinnu igbimọ onidaajọ naa sawọn eeyan leti lọjọ Aje, Mọnde, ọjọ kẹtalelogun, yii.

Ṣaaju lawọn adajọ naa ti kọkọ ke si awọn lọọya to ṣoju ọkọọkan olupẹjọ ati olujẹjọ lati yẹ iwe ẹsun ati awijare koowa wọn, eyi ti igbimọ to n gbọ awuyewuye lori ẹsun to su yọ nibi idibo aarẹ, iyẹn Presidential Election Petition Tiribunal to ti kọkọ ṣedajọ lori ẹjọ naa fi ṣọwọ si wọn.

Wọn si ni ki awọn lọọya naa buwọ luwe lati fara mọ alaye, awijare ati atotonu koowa wọn, boya o peye, eyi ti ọkọọkan wọn ṣe bẹẹ.

Awọn adajọ naa tun tẹti bẹlẹjẹ si ẹbẹ pataki kan ti Amofin agba Chris Uche, to jẹ agbẹjọro Atiku Abubakar bẹ ọba awọn kootu naa pe ki wọn tẹwọ gba awọn ẹsun tuntun toun ko wa, eyi to da lori bi wọn ṣe ni Tinubu yiwee, o ṣe ayederu sabukeeti, o si purọ labẹ ibura.

O lonibaara oun rọ ile-ẹjọ lati wo awọn ẹsun ati ẹri wọnyi, ki wọn wo bo ṣe tẹwọn to, ki wọn si ṣedajọ ododo. O ni adura onibaara oun, iyẹn Atiku, ni pe kile-ẹjọ giga ju lọ yẹ aga mọ ọn nidii, ki wọn si da a lẹbi, pe ko kunju oṣuwọn lati waa dije tabi wa nipo aarẹ.

Àmọ́, isọrọ-nigbesi, loju-ẹsẹ lawọn lọọya olujẹjọ, ìyẹn Amofin àgbà Abubakar Mahmoud, to ṣoju fún àjọ elétò ìdìbò ilẹ wa, Independent National Electoral Commission (INEC), ati Amofin àgbà, Olóyè Wọle Ọlanipẹkun, tó ṣojú fún Ààrẹ Bọla Tinubu, àti Amofin àgbà Akin Olujimi, tóun dúró fún ẹgbẹ́ òṣèlú All Progressives Congress (APC, ti nawọ soke, ti wọn si ta ko ẹbẹ Atiku, wọn ni kile-ẹjọ naa ma ṣe gba awọn ẹsun tuntun wọnyi wọle, tori ẹsun ti ko lẹsẹ nilẹ, ti ko si nitumọ ni. Eyi lawọn agbẹjọro naa ṣe fa-n-fa-a mọ ara wọn lọwọ tile-ẹjọ náà fi lọ fún ìsinmi ráńpẹ́.

  1. Nígbà tíjokòó bẹ̀rẹ̀ padà, àwọn adájọ́ ọ̀hún fẹnu kò pé àwọn máa lọ̀ọ́ yiiri gbogbo ẹ̀bẹ̀ àti àwíjàre wọ̀nyí wò, àwọn yóó sì gbé ìdájọ́ kalẹ̀ tó bá yá.

Ọwọ́ ọlọ́pàạ́ ìpínlẹ̀ Ògùn tẹ ọkùnrin tó fipá bá wòlíìbìrin láṣepọ̀ ní ṣọ́ọ̀ṣì

By
iroyinowuro
-

Ọwọ́ ọlọ́pàạ́ ìpínlẹ̀ Ògùn tẹ ọkùnrin tó fipá bá wòlíìbìrin láṣepọ̀ ní ṣọ́ọ̀ṣì

Fẹ́mi Akínṣọlá

Ìwé mímọ́ sọ pé bí òpin ayé bá kù dẹ̀dẹ̀, onírúurú ìṣẹ̀lẹ̀ à gbọ́ ṣe hàà ni yóó ṣẹ̀lẹ̀ ọ̀kan ni èyí, tí Iléeṣẹ́ ọlọ́pàá ìpínlẹ̀ Ògùn ṣẹ̀rí ẹ̀ pé ọwọ́ àwọn ti tẹ ọkùnrin, ẹni ogójì ọdún kan, Lekan Sunday, ti wọ́n fi ẹ̀sùn kan pé ó f’ipá bá wòlíì obìnrin láṣepọ̀ nínú ṣọ́ọ̀ṣì.

Ọ̀sẹ̀ tó kọjá ni wọ́n sọ pé Sunday f’ipá bá wòlíì obìnrin náà láṣepọ̀ nínú ṣọ́ọ̀ṣì rẹ̀, tó wà ládugbó Ilogbo Adu, Kemta nílùú Abẹokuta, kí ọwọ́ tó tẹ̀ ẹ́ .

Ojú oorun ni wọ́n sọ pé ìyá wòlíì náà wà nígbà tí Sunday fi digun wọ ṣọ́ọ̀ṣì ọ̀hún pẹ̀lú àwọn nǹkan ìjà, kí ó tó fi tipátipá ṣí ìyá wòlíì náà láṣọ wò lẹ́yìn tó ti dúnkookò mọ́ ọ.

Ìròyìn tó tẹ wá lọ́wọ́ sọ pé ní ṣe ni Sunday yọ ọ̀bẹ sí obìnrin náà, tó sì fi halẹ̀ mọ́ ọn pé bí kò bá gbà nǹkan tóun wá ṣe, òun yóò gun pa.

Ìyá wòlíì náà pariwo ìbosi ará àdúgbò títí láì sí ẹni tó gbọ́ ariwo rẹ̀ rárá.

Nígbà tó ń f’ìdi ìròyìn ọhún múlẹ̀, agbẹnusọ ọlọ́pàá ìpínlẹ̀ Ògùn, Ọmọlọla Odutọla sọ pé iṣẹ́ bíríkìlà ni Sunday ń se lágbègbè Kemta.

Odutọla ní wòlíì náà dá Sunday mọ̀ dáadáa, bí ó tilẹ̀ jẹ́ wí pé alẹ́ ló fi lọ ká a mọ́ ṣọ́ọ̀ṣì láti ṣe iṣẹ́ ibi náà,

Alukoro iléeṣẹ́ ọlọ́pàá ni ìpínlẹ̀ Ògún náà ṣàlàyé síwájú síi pé ní kété tí ọwọ́ àwọn agbófinró ti tẹ̀ ẹ́, ní ìwádìí ti bẹ̀rẹ̀, kó tó di pé àwọn f’ójú rẹ̀ ba ilé-ẹjọ́.

Ní ìpínlẹ̀ Bayelsa, Ilé-ẹjọ́ wọ́gilé olùdíje Gómìnà APC níbò kù fẹ́ẹ́rẹ́fẹ́

By
iroyinowuro
-
Ní ìpínlẹ̀ Bayelsa, Ilé-ẹjọ́ wọ́gilé olùdíje Gómìnà APC níbò kù fẹ́ẹ́rẹ́fẹ́
Ọrẹ Òtítọ́jù
 Bí kò ṣe ju oṣù kan péré lọ mọ́, tí ètò ìdìbò sípò Gómìnà yóò wáyé ní ìpínlẹ̀ Bayelsa, ilé-ẹjọ́ gíga kan tó fìkàlẹ̀ sílùú Abuja ti wọ́gi lé olùdíje  fúnpò Gómìnà ìpínlẹ̀ ọ̀hún lábẹ́ àsìá ẹgbẹ́ òṣèlú All Progressives Congress, APC, Ọ̀gbẹ́ni Timipre Sylva, wọn ní kò lẹ́tọ̀ọ́ láti sọ póun ń díje, kò sì kúnjú òṣùwọ̀n láti dupò ọ̀hún.
Onídàájọ Donaltus Okorowo, ló pàṣẹ lọjọ Ajé, ọjọ́ kẹsan-an, oṣù Kẹwàá, ọdún 2023 yìí, pé kí àjọ elétò ìdìbò ilẹ̀ wa, Independent National Electoral Commission, INEC, pa orúkọ olùdíje ọhún rẹ̀ nínú ìwé ìdìbò, kí wọn sì yọ ọ kúrò lára àwọn olùdíje lẹyẹ-o-sọka.
Ìdájọ́ yìí wáyé látàrí ẹjọ́ tí ọmọ ẹgbẹ́ APC ìpínlẹ̀ ọhún kan, Domosueyefa Kosomo pe loṣu Kẹfa ọdun yii, tako iyansipo Sylva ninu eto idibo abẹlẹ APC ti wọn ṣe loṣu kẹrin ọdun yii, olupẹjọ naa ni Sylva ti APC fa kalẹ yii ko lanfaani lati dije fun ipo gomina ipinlẹ naa mọ, nitori wọn si ṣebura wọle fun un sipo gomina lẹẹmeji ọtọọtọ labẹ iwe ofin ilẹ wa, iyẹn constitution, ti ọdun 1999 ta a n lo.
Lásìkò igbẹjọ, agbẹjọro olupẹjọ, Amofin-agba Abiọdun Amuda-Kannike ṣàlàyé pé ẹẹmeji ọtọọtọ ni wọ́n ti búra wọlé fún Sylva sípò Gómìnà náà, kò sì lè díje wọlé fúnpò kan náà yìí lẹẹkẹta tó fẹ́ ṣe yìí, torí ṣíṣe bẹ́ẹ̀ yóò lòdì sí òfin tó wà ní isọri kejilelọgọrin, apa akọkọ iwe ofin ilẹ wa.
 Ó ṣàlàyé pé ọjọ́ kẹrinla, oṣù Kẹrin, ọdún 2007 ni àwọn aráàlú Bayelsa kọkọ dìbò fún olùdíje yìí, lábẹ́ ẹgbẹ́ òṣèlú Peoples Democratic Party, PDP, to wa nigba yẹn, to si yege ibo ọhun, wọn bura fun lọjọ kọkandinlọgbọn, oṣu Karun-un, ọdun naa gẹgẹ bii gomina.
Àmọ́, lọjọ kẹẹẹdogun, oṣù Kẹrin ọdún tó tẹle e, ìyẹn 2008, ilé-ẹjọ́ ko-tẹ-mi-lọrun ti ẹjọ́ awuyewuye ẹsùn ìbò máa ń pẹkun si nígbà náà, yọ Slyva dànù, wọn ni ibo to gbe e wọle mẹhẹ, wọn sì pàṣẹ àtúndì ìbò latokedelẹ.
Àtúndì ìbò mí-ìn wáyé lọjọ kẹrinlelogun, oṣù Karùn-ún ọdún 2008 ọ̀hún, Sylva yii ló tún wọlé lẹẹkeji, tí wọ́n sì bura fún-un lọjọ kẹtadinlọgbọn, oṣù Karùn-ún lẹẹkeji, ipò yìí lo si wà títí di ọjọ́ kẹtadinlọgbọn oṣù Kínní ọdún 2012 tí sáà ọdún mẹrin rẹ̀ pé.
Olupẹjọ yìí ní òun fẹ́ kí ilé-ẹjọ́ wo ìṣẹlẹ̀ yìí lójú ìlà ohun tí òfin sọ pé wọ́n kò lè búra fún ẹni kan fún ipò kan náà ju ìgbà méjì lọ.
Nígbà tí Onídàájọ Okorowo ń gbé ìdájọ
 rẹ̀ kalẹ̀, ó ní fifa tí APC fa Sylva kalẹ̀ gẹ́gẹ́ bíi olùdíje wọ́n tako òfin yìí, nítorí tó bá wọlé ìbò, yóò di ẹẹmẹta nìyẹn tí wọ́n ń dìbò yàn an sípò kan naa, ti wọ́n yóò sì máa búra fún un sípò Gómìnà, eyi tí kò bofin mu. Torí ẹ, ó wọgi le Mínísítà lórí ọrọ̀ epo rọbi tẹlẹri náà, ó ní kò kúnjú ìwọn láti dupò
Títí  dàsìkò tá a fi ń kó ìròyìn yìí jọ, kò tíì dájú bóyá Sylva yoo pẹjọ ko-tẹ-mi-lọrun lórí èyí, tàbí ẹgbẹ́ APC yoo gbé ìgbésẹ̀ mí-ìn. Ọjọ́ kọkànlá oṣù Kọkànlá ọdún yìí ni ètò ìdìbò tuntun yóò wáyé ní ìpínlẹ̀ Bayelsa.

Àwọn tó pa ọkùnrin tó ni otẹẹli Water ti jẹ́wọ́ bí wọ́n ṣe gbẹ̀mí ẹ̀

By
iroyinowuro
-
Àwọn tó  pa ọkùnrin tó ni otẹẹli Water ti jẹ́wọ́ bí wọ́n ṣe gbẹ̀mí ẹ̀
Fẹ́mi Akínṣọlá
 Àṣé lóòótọ́ ni pé ẹgbẹ̀rún Sàámú kò lè sá mọ́ Ọlọ́run lọ́wọ́, èyí ló se rẹ́gí ìṣẹlẹ̀ bí ọwọ́ ṣe tẹ àwọn ọ̀rẹ́ méjì kan tí wọ́n jingíri nínú ìbálòpọ̀ eléèyàn mẹ́ta tàbí jù bẹ́ẹ̀ lọ, tí wọ́n ṣekú pa Adeniyi Ojo, ọkùnrin tó ni òtẹ́ẹ̀lì kan tí wọ́n ń pè ní Water View, tó wà lágbègbè GRA, nílùú Ìlọrin, ní ìpínlẹ̀ Kwara.
Bíi àjẹ́ tó jẹ  èèpo ọ̀bọ̀ làwọn afurasí ọ̀hún,
Joseph Joy Adama, àti Vandora Davies Ọrẹoluwa Favour, ti
ń kà báyìí, lẹ́yìn tọ́wọ́ tẹ̀ wọ́n ní Mowe Ibafo, ní ìpínlẹ̀ Ogun, tí wọ́n sá lọ lẹ́yìn tí wọ́n hùwà burúkú yìí.
Alukoro iléeṣẹ́ ọlọ́pàá àpapọ̀ nílẹ̀ wa, ACP Olumuyiwa Adejọbi, ló ṣàfihàn àwọn ọ̀daràn méjèèjì yìí pẹ̀lú àwọn afurasí mìíràn nílùú Abuja. Ó ní lọ́jọ́ kẹfà, oṣù Kẹwàá, ọdún yìí, lọwọ́ tẹ̀ àwọn afurasí méjèèjì, Adama àti Favour, tí wọ́n jẹ́ akẹ́kọ̀ọ́ ilé-ẹ̀kọ́ Gbogbonìse tìpínlẹ̀ Kwara (Kwara State Polytechnic), lórí ọ̀rọ̀ tó ní í ṣe pẹ̀lú ikú Ọ̀gbẹ́ni Adeniyi Ojo, tó ni òtẹ́ẹ̀lì Water View, n’llọrin.
Ó ṣàlàyé pé lẹ́yìn táwọn afurasí yìí ní ìbálòpọ̀ pẹ̀lú olóògbé tán, tí wọ́n bèèrè owó lọ́wọ́ rẹ̀, bọ́yá ìyẹn kò tètè fún wọn, ni wọ́n bá rọ ọ́ lọ́tí yó kí wọ́n lè rí i jà lólè, nìyẹn bá gba ibẹ̀ kú.
Nígbà tí ọ̀kan nínú wọn, Adama, ń bá àwọn oníròyìn ṣọ̀rọ̀, ó ní òun àti Adeniyi ti máa ń bá ara àwọn ní  àṣepọ́ ọjọ́ ti pẹ́, ó ní oníbàárà òun ni, ṣùgbọ́n lọ́jọ́ tí ìṣẹ̀lẹ̀ burúkú náà wáyé, àwọn lọ sí òtẹ́ẹ̀lì rẹ̀ láti lọ̀ọ́ jà á lólè ni, nígbà tí kò fẹ́ gbà lẹ́rọ̀ làwọn rọ ọ́ lọ́tí yó, táwọn sì jí fóònù àti àwọn ẹrù rẹ̀ mìíràn kó lọ káwọn tóó padà gbọ́ pé  ó ti kú.

Ẹ máà pín owó rìbá yín kàn mí, ọ̀gá àgbà ọlọ́pàá kìlọ̀ f’áwọn ọlọ́pàá

By
iroyinowuro
-
Ẹ máà pín owó rìbá yín kàn mí, ọ̀gá àgbà ọlọ́pàá kìlọ̀ f’áwọn ọlọ́pàá
Fẹ́mi Akínṣọlá
Ṣé wọ́n ní ọlọ́tọ̀ ní tòun ọ̀tọ̀, Ọ̀gá àgbà iléeṣẹ́ ọlọ́pàá orílẹ-èdè Nàìjíríà, Kayode Egbetokun ti fi ọ̀rọ̀ léde  pé òun kò retí kí ọlọ́pàá kankan pín owó kan òun pẹ̀lú àlàyé pé ojúṣe tí òfin là kalẹ̀ fún iléeṣẹ́ ọlọ́pàá nìkan ló yẹ kó jẹ wọ́n lógún.
Igbákejì ọ̀gá àgbà iléeṣẹ́ ọlọ́pàá láti ẹkùn ikọkanla tó jẹ́ iṣẹ́ náà lásìkò àbẹwò sí olú iléeṣẹ́ ọlọ́pàá tó ń bẹ nílùú Ìbàdàn, olú ìlú ìpínlẹ̀ Ọ̀yọ́ l’Ọ́jọ́rú, Paul Ojeka Odama   pàrọwà si gbogbo òṣìṣẹ́ iléeṣẹ́ ọlọ́pàá láti dẹ́kun gbogbo ìwà tí  ó lè ta ẹrẹ bá aṣọ àlà iléeṣẹ́ náà.
Ó ní, “Iṣẹ́ tí ó lọ́lá nínú ni iṣẹ́ ọlọ́pàá, tí ó sì dúró fún ìdájọ́ òdodo àti àlàáfíà. Agbófinró tuntun ti wọ ìlú, òun sì ni ọ̀gá àgbà tuntun fún iléeṣẹ́ ọlọ́pàá. Gbogbo ìgbà sì ló máa ń fi ikorira hàn sí ìwà  àjẹbánu.
Àpẹrẹ rere ló máa ń jẹ́ ní gbogbo ibi tí  ó bá ti ṣiṣẹ́. Àkọsílẹ̀ àwọn ìwà náà ń bẹ n’íìpínlẹ̀ Kwara níbi tó ti ṣiṣẹ́ gẹ́gẹ́ bíi Kọmísánà àjọ ọlọ́pàá àtí àwọn  ibòmíì tí ó ti ṣiṣẹ́.”
Ọlọ́pàá tó bá mọ nǹkan tó ń ṣe kò ní báwọn gba r’íbà – Ọ̀gá àgbà ọlọ́pàá Nàìjíríà ṣe àlàyé pé iṣẹ́ ni wọ́n rán gbogbo ọlọ́pàá láti ṣe n’ígboro, bẹ́ẹ̀ sì ni kìí ṣe láti pa owó wọlé fún ẹnikẹ́ni gẹ́gẹ́ bí òfin orílẹ-èdè Nàìjíríà ti ọdún 1999 ṣe làá kalẹ.
Ọ̀gá àgbà iléeṣẹ́ ọlọ́pàá ní òṣìṣẹ́ àjọ náà tí ó bá mọ ohun tí ó ń ṣe kò ní bá wọn gba owó ìbọ̀bẹ́ lọ́wọ́ ọlọ́kadà tàbí awakọ̀ kankan.
Ó ní ìwà ìbàjẹ́ tí  ó gbudọ̀ dópin ni bí awakọ̀ ṣe ń gba owó lọ́wọ́ èrò ọkọ̀ láti fún ọlọ́pàá tó dènà ọkọ̀ nítorí owó ẹ̀yìn.
Egbetokun ní gbogbo òṣìṣẹ́  iléeṣẹ́ ọlọ́pàá ló gbudọ̀ ṣe iṣẹ́ wọn pẹ̀lú ìbẹrù Ọlọ́run kí wọ́n sì tẹ̀lé òfin ìjọba lẹ́nu iṣẹ́ wọn.
Bákan náà ló  ké sí àwọn ọlọ́pàá láti ṣọ́ra fún irúfẹ́ ìròyìn tí wọ́n ń pín kiri lórí ayélujára. Ó ní wọ́n gbúdọ̀ ṣe àyẹ̀wò fínífíní kí wọ́n tó pín ohunkóhun kiri lórí ìtàkùn àgbáyé.
Ọ̀gá àgbà iléeṣẹ́ ọlọ́pàá tún mẹ́nuba pàtàkì ìmúra àwọn ọlọ́pàá àtí bí wọ́n ṣe ń wọ aṣọ wọn lẹ́nu iṣẹ́ àti nígbà tí wọ́n bá ṣíwọ́ iṣẹ́, nítorí ìrínisí ni ìṣenilọ́jọ̀.
Tẹ́lẹ̀rí ni ìròyìn má a ń lọ káàkiri wí pé àwọn òṣìṣẹ́ ọlọ́pàá kan ti wọ́n ń hùwa ìbàjẹ́ n’ígboro tí wọ́n sì ń gba owó lọ́nà àìtọ́ ní àwọn ọ̀gá tí wọ́n n fi owó ọ̀hún jíṣẹ́ fún.
Ọ̀rọ̀ tí ọgá àgbà iléeṣẹ́ ọlọ́pàá fi léde fi hàn gbangba wí pé irú ìwà bẹ́ẹ̀ kò ní wáyé nínú ìṣàkóso tuntun yìí.

Ìjọba Ogun fèsì lórí fídíò ìrẹsì “palliative” tó gba orí ayélujára

By
iroyinowuro
-
Ìjọba Ogun fèsì lórí fídíò ìrẹsì “palliative” tó gba orí ayélujára
Fẹ́mi Akínṣọlá
Ṣé wọ́n ní bí ará ilé rẹ bá lẹ́nu, ó di dandan kí ìwọ paàpá ó lẹ́ṣẹ̀, bí bẹ́ẹ̀ kọ́,omi lè tẹ̀yìn wọ̀gbín lẹ́nu mọ́ olúwaarẹ̀ lọ́wọ́.
 Ìjọba ìpínlẹ̀ Ogun ti ní àwọn kan ló fẹ́ máa ba àwọn lórúkọ jẹ́ lórí ọ̀rọ̀ pínpín ìrẹsì gẹ́gẹ́ bí ètò ìrànwọ́ láti mú àdínkù bá ìṣòro tí àwọn ènìyàn ń kojú lẹ́yìn tí ìjọba àpapọ̀ yọ ìrànwọ́ orí epo bẹntiróòlù.
Ìjọba náà ṣèkìlọ̀ fún àwọn ènìyàn láti yàgò fún àwọn olóṣèlú tí wọ́n ń wá gbogbo ọ̀nà láti bu ẹnu àtẹ́ lu ìgbésẹ̀ tí ìjọba àpapọ̀ àtàwọn ìjọba ìpínlẹ̀ ń gbé láti mú kí ayé rọrùn fún àwọn aláìní.
Nígbà tó ń sọ̀rọ̀ lórí àwọn fídíò tó gba orí ayélujára níbi tí àwọn èèyàn kan ti ń fẹ̀sùn kan ìjọba pé ìrẹsì tí kò nǹkan ni wọ́n ń fún àwọn, agbẹnusọ gómìnà ìpínlẹ̀ Ogun, Lekan Adeniran ní iṣẹ́ àwọn ẹgbẹ́ alátakò ni àwọn fídíò náà.
Adeniran ní àwọn ènìyàn ń ṣe bẹ́ẹ̀ láti tàbùkù ìṣèjọba gómìnà Dapo Abiodun ni.
Ó ní ìjọba àpapọ̀ ti fìdí rẹ̀ múlẹ̀ lọ́pọ̀ ìgbà pé àwọn ìrànwọ́ náà kò sí fún gbogbo ènìyàn bíkòṣe àwọn tí kò rí ọwọ́ họrí láwùjọ.
Ó tẹ̀síwájú pé èròńgbà tí kò dára tó ni àwọn ènìyàn tí wọ́n ń gbé ìròyìn náà kiri lórí ayélujára ní láti fi bu ẹnu àtẹ́ lu bí ètò náà ṣe ń lọ dáradára láti ìgbà tí wọ́n ti bẹ̀rẹ̀ ètò pínpín oúnjẹ ọ̀hún.
Ó fi kun pé ṣáájú ni gómìnà Abiodun ti làá mọ́lẹ̀ pé ìrànwọ́ oúnjẹ náà gbọ́dọ̀ dé ọ̀dọ̀ àwọn tó ní ẹ̀tọ́ si àmọ́ àwọn kan ló ń mọ̀ọ́mọ̀ fẹ́ sọ ìjọba lẹ́nu.
Ṣaájú ni fídíò kan ti gbá orí ayélujára níbi tí ọkùnrin kan ti fẹ̀sùn kan ìjọba ìpínlẹ̀ Ogun pé ìrẹsì àpò kékeré ni wọ́n fún gbogbo àwọn tí àwọn ń gbé nínú ìletò àwọn láti pín.
Ọkùnrin náà tó pe ara rẹ̀ ní alága Sokeye CDA ní àwọn kan ló wá bá òun nílé, tí wọ́n sì gbé àpò ìrẹsì kékeré kan wá fún òun.
Ó ní wọ́n sọ pé ìrẹsì náà ló wà fún gbogbo àwọn olùgbé Ẹ́sítéètì Sokeye tí òun jẹ́ alága rẹ̀.
Ó ṣàlàyé pé ojúlé 147 ló wà nínú Ẹ́sítéétì àwọn, tí ọ̀pọ̀ ilé náà sì ní ẹbí tó pọ̀ àti pé kò yé òun bí òun ṣe máa pín ìrẹsì náà fún àwọn ènìyàn náà tó máa fi kárí.
Ó ní tí ìjọba bá fẹ́ ṣe ìrànwọ́ fún àwọn ènìyàn ó yẹ kí wọ́n ṣe ní ọ̀nà tó tọ́ nítorí gbogbo nǹkan tí wọ́n gbé fún àwọn láti pín kò tó ìdá mẹ́rin odidi àpò ìrẹsì kan.
“Tí ò bá ṣeéṣe ẹ má mú ara yín ní tipá láti ṣe ìrànwọ́ fún àwọn ènìyàn nítorí a kìí ṣe elébi ní ọ̀dọ̀ wa yìí.”
“Tí ẹ bá fẹ́ ṣe ìrànwọ́ fún wa, ẹ má fi bú wa nítorí èébú ńlá ni eléyìí jẹ́ fún wá.”
Ọkùnrin náà ní òun máa dá ìrẹsì náà padà nítorí kò sí bí òun ṣe máa pin.
Nígbà tó ń fèsì sí fídíò yìí, Adeniran ní àpò ìrẹsì tí ọkùnrin náà ń fi hàn kìí ṣe fún gbogbo àwọn tí wọ́n ń gbé nínú àdúgbò rẹ̀.
Ó ní àwọn tó ń pín oúnjẹ náà kàn gbe fún-un gẹ́gẹ́ bí alága àdúgbò rẹ̀ láti gbé fún opó kan tó bá mọ̀ tó nílò rẹ̀ nínú àdúgbò náà.
Agbẹnusọ gómìnà náà ní kàkà kí alága náà gbe fún ẹni tó yẹ, ó mọ̀ọ́mọ̀ ṣe fídíò láti fi ṣe òṣèlú tí kò dára tó.
Bákan náà ló ní àwọn àpò ìrẹsì míì ni wọ́n tún pín sí inú àdúgbò Shokeye tí ọkùnrin náà ń sọ àmọ́ tí kò gba ọ̀dọ̀ rẹ̀ kọjá nítorí ìsọ̀rí ìsọ̀rí ni wọ́n pín oúnjẹ ọ̀hún.
Ó wá rọ àwọn ènìyàn pé kí wọ́n kọ etí ọ̀gbọin sí fídíò náà nítorí kìí ṣe ohun tó wáyé gangan ni ọkùnrin náà sọ nínú fídíò  ọ̀hún.

Ìwé – Ẹ̀rí Tinúubú: Àtíkù kìí ṣe èèyàn dáadáa o – Tèmítópẹ́ Àjàyí

By
iroyinowuro
-

Ìwé – Ẹ̀rí Tinúubú: Àtíkù kìí ṣe èèyàn dáadáa o – Tèmítópẹ́ Àjàyí

 

Fẹ́mi Akínṣọlá/Nurudeen Ridwan

 

Àwọn àgbà bọ̀ wọ́n ní bọ́rọ̀  ńlá kò bá tíì tán,èèyàn ńlá kò ní-ín sinmi àròyé.

Olùdámọ̀ràn pàtàkì lórí ètò ìròyìn sí Ààrẹ Bọ́lá Ahmed Tinúubú, ọ̀gbẹ́ni Tèmítọ́pẹ́ Àjàyí, ti bẹnu àtẹ́ lu igbákejì olórí orílèèdé yìí tẹ́lẹ̀rí, Àláájì Àtíkù Àbúbákà, fún bó ṣe tẹpẹlẹ mọ́ gbígba ìwé-èrí Tinúubú jáde ní ilé ìwé fásítì Chicago( CSU), nílẹ̀ Àmẹ́ríkà, látàrí àwọn ìwádìí ìjìnlẹ̀ àti àṣírí kan tó n wá. Àjàyí ní ìwà tí Àtíkù hù náà kòdára tó, kìí sì ṣe èèyàn dáadáa rárá.

lójú òpó ayélujára ìkànì abẹ́yẹ fò bí Àsá(túítà) rẹ̀ lọkùnri náà ti sọ̀rọ̀ ọ̀hún lọ́jọ́ Ìṣẹ́gun , ọjọ́ kẹta, oṣù kẹsàn-án, ọdún yìí.

Tèmítọ́pẹ́ kọọ́ síbẹ̀ pèé: Ní tèmi o, ọ̀rọ̀ tó wà nílẹ̀ yìí kọjá boyá Ààrẹ Tinúubú gboyè jáde ní fásitì chicago tàbí ko ṣe bẹ́ẹ̀. òótọ́ tó wà ni pé igbákejì Ààrẹ àná, Àtíkù kìí ṣe eku ire.

“kó dàá kéèyàn yẹpẹrẹ ọ̀rẹ́ rẹ̀, tàbí wọ́ọ nílẹ̀ ní gbangba bíi irú èyí tí Àtíkù ṣe fún Ààfẹ Tinúubú yìí, nítorí ipò ayé lásán, àti ìdíje fún ipò àṣẹ.

Tinúbú tà á n sọ̀rọ̀ rẹ̀ yìí , kò sóhun tí ṣe tán láti ran Àtíkù lọ́wọ́ sẹ́yìn . Tinúubú tó dáṣọ iyì bo Àtíkù, tó tún pèṣè ibùgbé fún un lásìkò tí Ààrẹ Olúṣẹ́gun Ọbásanjọ́ àti ẹgbẹ́ ọ̀ṣèlú PDP rẹ̀ nàá lẹ́gba, tí wọ́n tún ja sí ìhòhò nídìí oṣèlú  lọ́dún 2007.

“kó dàá kí ọ̀rẹ́ kan sọ ara rẹ̀ di aléni mádẹ̀yìn gẹ́gẹ́ báwọn Èkìtì ṣe máa n sọ, bíí irú èyí tí Àtíkù ṣe yìí, kò sídìí tó fi yẹ bẹ́ẹ̀.

Ó tún ní, “kí lo fẹ́ẹ́ tìdí ìtọpinpin àtọkudórógbó yìí jáde gan an? ìmúlè mófo lásán ni” bẹ́ẹ̀ lọkùnrin náà sọ.

Àmòó lójú ẹṣẹ̀ làwọn kan tí n fèsì sọ̀rọ̀ ọ̀hún . Bí wọn ṣe n sọ pé ni tòdodo , kò dáa kéèyàn finú han ọ̀rẹ́, wọn ní o ti méjì inú àwọn ọ̀rẹ́ ìmùlẹ́ Tinúubú báyìí tí wọ́n tẹ́nbẹ́lú ẹ̀ ní gbangba, bẹ́ẹ̀ làwọn mí ìn n sọ pé ìwà yíyíwèé àti irọ́ pípa lábẹ́ ọ̀fin kò dáa rárá.

Ẹ ò rántí pé lẹ́yẹ ọ̀ sọkà táwọn ìwé ẹ́rí Ààrẹ Bọ́lá Tinúubú ti tẹ Àtíkù lọ́wọ́ l’Amẹ́ríkà làwọn àṣírí kan ti bẹ̀rẹ̀ sìí tú jáde pé Tinúubú yíwèé, wọ́n ló ṣe ayédèrú ìwé- ẹ̀rí  Fásitì Chicago tó lọni, bẹ́ẹ̀  ló parọ́ iléèwé gírámà tó lọ.

Bákan náà ló jẹ́ pé àrọ̀nì ò wálé oníkòyí ò sinmi ogun í lọ ni Àtíkù fi ọ̀rọ̀ gbígba àwọn ìwé-ẹ̀rí náà ṣe nínú ẹjọ́ tó pè l’Amíríkà, bẹ́ẹ̀ ni dẹ̀yìn lóríàrọwà táwọn kan pá fún un pé kó jáwọ́ nínú wíwá fín-ín ìdí kókó sábúkéètì Tinúubú.

Mi ò je̩ e̩niké̩ni ní àlàyé ìdí tí ìgbéyàwó mi fi kùnà – Bolanle Ninalowo

By
iroyinowuro
-

Mi ò je̩ e̩niké̩ni ní àlàyé ìdí tí ìgbéyàwó mi fi kùnà – Bolanle Ninalowo

Mary Fágbohùn

Osere tiata Naijiria Bolanle Ninalowo ti so pe oun ko je enikeni ni alaye lori idi ti igbeyawo re se kuna.

Irohin jade pe osere tiata naa ni ojo Eti, ninu atejade kan to fi lede ni oju opo Instagram re, kede ipinya to waye laarin oun ati iyawo re, Bunmi.

“Emi ati iyawo mi ti pinnu lati pinya lati lo ona igbeyawo ti o tuka laisi atunse,” ni o so.

Leyin ikede re, fonran iforo-wani-lenu-wo osere tiata naa atijo kan pelu Jideonwo jade si ori ayelujara.

Ninu fonran naa, o soro nipa atunse ti o la koja lati doola igbeyawo re ti o kuna ati lati gba iyawo re pada leyin opolopo igbe aye aisooto re.

Fonran naa lo tun ru ina si aheso oro nipa ohun to se okunfa ipinya won.

Nigba ti yoo fesi si aheso oro naa lori itan Instagram re, osere tiata naa wi pe: “Eni to segun kii soro. Mi o je enikeni ni alaye lori ipinnu aye mi. Awon onirohin ayelujara je alagabagebe to n pongbe fun awo.

“Eyikeyi iforo-wani-lenu-wo to ba n lo kaakiri je ti odun mefa saaju ki n to ri igbeyawo mi eyi to ti dopin bayii. Emi ni mo n sajoyo, eyin le n se iyonu. Olorun to ran mi lowo yoo ran yin lowo.”

Ìdá mó̩kàndínló̩gó̩rùn-ún àwo̩n olùdámò̩ràn ayélujára kò rí ayé wo̩n tò – Yul Edochie

By
iroyinowuro
-

Ìdá mó̩kàndínló̩gó̩rùn-ún àwo̩n olùdámò̩ràn ayélujára kò rí ayé wo̩n tò – Yul Edochie

Mary Fágbohùn

Ogbontarigi osere tiata Naijiria, Yul Edochie ti se’kilo fun awon afenifere re sora fun imoran lati ori ayelujara eyi to toka si bii ti eni to n tiraka lati to ile aye won papo.

Edochie, eni to wa si abe adojuko ni opo igba lori ayelujara lati igba to ti se igbeyawo pelu iyawo re keji, Judy Austin; lo si ori Instagram re lati fi ikilo naa lede.

Osere naa gba awon afenifere re nimoran lati se ohun to ba sise fun won ati pe ki won dena imoran ti won ba ri lati ori ayelujara.

Edochie ko o pe, “Se e si n teti si imoran lati odo awon eniyan lori ayelujara? Mo rerin. Ida mokandinlogorun-un awon eniyan ti won n gba yin nimoran ko tii ri ona lati to igbesi aye won. Won o tii yanju isoro ebi won. Arakunrin, arabinrin, se o si n se bee. Se nnkan to ba sise fun e. Dojuko irinajo re.”

 

Tí ìgbéyàwó re̩ bá kùnà, wàá dá owó mi padà -Cubana Chief Priest

By
iroyinowuro
-

Tí ìgbéyàwó re̩ bá kùnà, wàá dá owó mi padà -Cubana Chief Priest

Mary Fágbohùn

Gbajumo oloti Naijiria Pascal Chibuike Okechukwu, ti a mo si Cubana Chiefpriest ti safihan pe to ba wu tokotaya kan lati pinya, won gbodo san owo ti oun na ni ojo igbeyawo won pada fun oun.

Cubana Chief Priest so eyi di mimo ninu atejade kan to fi lede lori Instagram ni ojo Isegun.

O so pe saaju ki tokotaya to pinnu lati pinya, won gbodo gbiyanju lati wo iranlowo owo ti awon eniyan se fun won ni ojo igbeyawo won.

Cubana tesiwaju wi pe ti won ba pe oun si ibi igbeyawo, tokotaya naa yoo fi owo si iwe lati seleri pe won yoo san owo fun oun pada ti oro won ko ba wo mo.

O wi pe, “Saaju ki e to pinya e gbiyanju lati wo Owo/Akoko/Agbara ti a fi dokowo si inu igbeyawo yin.

“Ni itesiwaju ti o ba pe mi fun igbeyawo a maa jo ni adehun pe ti igbeyawo yin ba fe baje e maa da owo mi pada.

1...717273...121Page 72 of 121

EDITOR PICKS

POPULAR POSTS

POPULAR CATEGORY

© Iroyinowuro 2022