Ìrònú dorí àgbà kodò’ Emefiele búsẹ́kú ní kóòtù,

Ọrẹ Òtítọ́jù

Yooba bọ̀, wọ́n lọrọ tó bá mú kí àgbàlagbà máa làágùn yọbọ lábẹ́ òrùlé, ẹkùn làgbà ọ̀hún ń sun, àmọ́ ní ti ọrọ̀ Ọgá àgbà bánkì àpapọ̀ ilẹ̀ wa, CBN, ti wọ́n yọ nípò, Godwin Emefiele, to si n káwọ́ pọ̀nyìn rojọ lórí àwọn ẹsùn kan tí wọ́n fi kàn án, ọ̀rọ̀ ọkùnrin náà kọjá kí àgbàlagbà máa làágùn o, níṣe ni bàbá ọ̀hún bú sẹ́kún kíkorò ní kóòtù, tó ń wa ẹkùn mu bíi kà-à-sí nǹkan.

Iṣẹlẹ to ṣeeyan laaanu yii waye l’Ọ́jọ́bọ, ọjọ kẹtàdínlógún, oṣù Kẹjọ yìí, lásìkò ti wọn tún fojú Emefiele balé-ẹjọ́ gíga ilú Abuja, lolu-ilu ilẹ wa, amọ ti ẹjọ rẹ ko le tẹsiwaju, ti ireti ati atotonu Emefiele lati kuro lahaamọ awọn agbofinro tun ja si pabo. Niṣe ladajọ ni ọsẹ to n bọ, iyẹn Ọjọruu, ọjọ́ kẹtadinlogun, oṣù Kẹjọ yìí, ni kí wọ́n tún mú olujẹjọ yìí wá síwájú òun, ó ní kí wọ́n ṣì dá a padà sakolo àwọn ẹṣọ́ ọtẹlẹmuyẹ àpapọ̀ ilẹ̀ wa, Department of State Service (DSS). Bí Emefiele ṣe gbọ́ àṣẹ tadajọ pa yìí lọkunrin náà dorikodo, ó bu sẹkun gbaragada ni.

Ohun to mu ki idena ba igbẹjọ rẹ lori awọn ẹsun tuntun tijọba ṣẹṣẹ fi kan an, eyi to da lori igbimọ-pọ lati huwa ibajẹ, kiko owo jẹ ni koto ọba, ṣiṣẹ owo ilu mọkumọku ati iwa jibiti lilu, ti ẹjọ naa ko fi tẹsiwaju ni pe ọkan lara awọn ti wọn jọ fẹsun iwa ọdaran yii kan, Sa’adatu Yaro, ko le yọju si kootu. Emefiele, Yaro ati ileeṣẹ kan bayii nijọba ni wọn lọwọ ninu ẹsun ti wọn fi kan wọn naa.

Lara ẹsun ti wọn we mọ Emefiele lẹsẹ ni pe o fi owo ilu ṣe jẹ-ki-n-jẹ pẹlu Yaro, ti wọn ni ọga agba kan loun ni tiẹ nileeṣẹ kan ti wọn fi wọ obitibiti owo jade lasunwọn banki apapọ loṣu kẹrin, ọdun 2016, wọn lowo ọhun n lọ bii biliọnu meje Naira (N6.9b).

Bi wọn ṣe kawe ẹsun yii atawọn mi-in si Emefiele leti tan, ni adajọ beere pe awọn olujẹjọ gbogbo da, wọn ni Emefiele nikan lawọn ri mu wa, niṣe ni Adajọ Hamza Muazu bẹrẹ si i kọwe wẹrẹwẹrẹ kan, lẹyin naa lo kede pe igbẹjọ ko le tẹsiwaju, tori ẹsẹ olujẹjọ ko pe, lo ba paṣẹ ki wọn da Emefiele pada sibi ti wọn ti mu un wa.

Gbogbo alaye ti lọọya rẹ fẹẹ ṣe lati bẹbẹ iyọnda aaye tabi beeli fun onibaara rẹ ni ko ṣee ṣe, tori bi adajọ ṣe paṣẹ tan ni wọn pariwo, “kọọtu”, ti adajọ naa si dide lori aga wọle lọ.

Bóyá ti pé o kéré tán, Emefiele yóò tún lo ọsẹ kan gbáko sí lákolo àwọn DSS yìí ló pa bàbá náà nígbe ni o, bóyá tí igbẹjọ tí kò sì lè tẹ̀síwájú ni, a ò mọ, àmọ́ àwọn àgbà bọ̀, wọ́n ní àròkàn ní í fa ẹkún àsun-ì-dá wá.

Ẹ ó rántí pé ó ti lé lósù kan báyìí tí Emefiele ti ń pààrà kóòtù, tí kò sì tí lè fàtàrí lé pílò nínú ilé rẹ̀, àkàtà àwọn DSS ló ń bá dé kóòtù, ibẹ̀ náà ló sì ń padà sí, lórí àwọn ẹsùn ọlọkan-o-jọkan tí wọ́n fi kan ọgá àgbà àwọn báńkì ilẹ̀ wa náà, Central Bank of Nigeria.

Ìjọba àpapọ buwọ́lu N5bn owó ìrànwọ́ “palliative” fún ìpínlẹ̀ kọ̀ọ̀kan àti Abuja

Fẹ́mi Akínṣọlá

Ìjọba àpapọ̀ orílẹ-èdè Nàìjíríà ti buwọ́lù iye owó bílíọ̀nù márùn náírà fún ìpínlẹ̀ kọ̀ọ̀kan lórílẹ̀ èdè Nàìjíríà tó fi mọ́ olú ìlú orílẹ-èdè yìí ìyẹn ìlú Abùjá.

Ìjọba ní kí wọ́n fi owó yìí ra oúnjẹ láti pín fún àwọn tí kò rọ́wọ́ họrí ní gbogbo ìpínlẹ̀ kówá wọn.

Gómìnà ìpínlẹ̀ Borno, Babangana Zulum lo fi èyí léde ní ilé Ààrẹ nílùú Abùjá ní kété tí ìgbìmọ̀ aláṣẹ fún ètò ọ̀rọ̀ ajé parí ìpàdé níbẹ̀.

Lafikun sí ọrọ̀ owó yìí, Zulum ṣàlàyé pé ìjọba àpapọ̀ tún ṣe àgbékalẹ̀ àpò ìrẹsì tó kún ọkọ̀ akẹ́rù márùn fún gbogbo àwọn Gómìnà ìpínlẹ̀ mẹ́rìndínlógójì.

Gómìnà Zulum ṣe é ní àlàyé wípé gbogbo Gómìnà kọ̀ọ̀kan ló gba àṣẹ láti ra àpò ìrẹsì ẹgbẹ̀rún lọ́nà ọgọ́ọ̀rún, àpò àgbàdo ẹgbẹ̀rún lọ́nà ogójì àti ajílẹ̀.

Ó ní ìjọba fún wọn ní ìdá méjìléláàdọ́ta gẹ́gẹ́ bí ẹ̀bùn owó àmọ́ ìdá méjìdíláàdọ́ta tó kù jẹ́ gẹ́gẹ́ bíi owóyàá.

Ohun tó se ìmísí orin mi jẹ́ “Iṣẹ́ Ìyanu” — Ada Ehi

Mary Fágbohùn

Ilumooka olorin ihinrere Ada Ogochukwu Ehi ti a mo pelu oruko itage, Ada Ehi, ti safihan orisun imisi orin re tuntun “(Iyanu Miran) Another Miracle,” pe oun ri gba lati ara ero to so si oun lokan.

Olugbafe eye akorinsile ati iya omo meji naa, so pe orin naa je oro atenumo igbagbo oun ati idahun oun si ibeere aye.

Gege bi o se so, “Ohun to se imisi orin naa ni ero ati asaro okan mi. Awon nnkan yi ni mo n ro loorekoore ati idahun mi si ibeere aye lojoojumo, oun lo se imisi orin naa. O je oro igbagbo mi si ibeere aye ati ipo ti o le.”

Lori bo se pe to fun un lati mu orin naa wa, o salaye pe, “Kii se oun to ya kankan ninu yara igborinsile. Dena Mwana wa fun RockFest ni odun 2022 o si duro nitori a mo pe a jo fe sise papo lori orin kan ati pe ki a si seda nnkan to duro fun asa awa mejeeji.

“Nitori naa, a lo si yara igborinsile, mo pe agborinjade, Preach Zagi, eni to je onijita mi a si jo wa iro ilu lati ri adun naa. O je akoko iyin, bo ti le je pe a o ti ni oro orin.

“Nitori naa, leyin to kuro, a bere si ni sise lori oro orin lori asaro okan ati emi mi ojoojumo”.

O so pe inu oun dun fun anfaani ti Olorun fun un lati sise pelu Dena lori orin naa bi o se ni afojusun lati ko opolopo orin pelu re.

Gómìnà Èkìtì pàṣẹ kí kọmísánnà rẹ̀ tuntun kan ó lọ̀ọ́ sinmi ná

Ọrẹ Òtítọ́jù

Gómìnà ìpínlẹ̀ Èkìtì, Biọdun Oyebanji, ti ní kí kọmiṣanna fún ọrọ̀ oyè jíjẹ ni ipinlẹ náà, Ọlaiya Atibioke, lọ máa sinmi nílé ná.

Ẹsùn àfojúdi ni wọ́n ní Gómìnà fi kan ọkùnrin náà, nítorí bó ṣe kúrò níbi ètò kan tí wọ́n ń ṣe láì gbaaye.

Olùdámọ̀ràn Gómìnà lórí ètò ìròyìn, Yinka Oyebọde, tó fi ọrọ̀ náà léde sọ pé ìpàdé apejẹ kan ni wọ́n ṣe, Gómìnà pàápàá sì wà níbẹ̀ títí tó fi wá sópin, ṣùgbọ́n Atibioke fi ibẹ̀ sílẹ̀ láì tọrọ ààyè.

Ninu atẹjade naa lo ti ni, “Gomina ti fofin de Atibioke, latari bo ṣe kuro nibi eto apejẹ ọlọjọ mẹta ti wọn ṣe fawọn igbimọ ijọba ipinlẹ Ekiti, atawọn akọwe agba ni gbọngan nla Bishop Adetiloye, Trade Fair Complex, Ado-Ekiti, lọjọ Abamẹta, Satide, ọjọ kejila, oṣu Kẹjọ, ọdun yii.

Loju-ẹsẹ nibẹ lo si ti paṣẹ pe ko lọọ rọọkun nile fun odidi ọsẹ meji”.

Lati Ọjọbọ, Tọsidee, ọjọ kẹwaa, oṣu Kẹjọ, ọdun yii, ti eto naa ti bẹrẹ ni gomina ti wa nikalẹ titi to fi wa sopin.

Ṣaaju ọjọ ti eto naa yoo bẹrẹ, lọjọ Iṣẹgun, Tusidee, ni wọn ni Gomina Oyebanji yan awọn kọmiṣanna mọkandinlogun mi-in atawọn oludamọran mẹtala. Ọkan lara awọn kọmiṣanna tuntun ọhun ni Atibioke.

Wọ ni nigba to di nnkan bii aago marun-un irọlẹ ọjọ ti eto naa yoo pari, wọn ke si awọn kọmiṣanna atawọn akọwe agba nileeṣẹ ijọba to wa nibẹ lati wa maa fọwọ siwee lori bi eto naa ṣe lọ si. Aṣiri ọrọ tu nigba ti wọn pe orukọ Atibioke, ti ko sẹni to gbọ idahun rẹ.

Pẹ̀lú ìbínú ni wọ́n ní gómìnà fi he ẹ̀rọ amóhùndún-gbẹ̀mù, tó bèèrè kọmíṣọ́nnà ọ̀hún, ṣùgbọ́n tí kò gbúròó rẹ̀. Níbẹ̀ ni wọ́n ní gómìnà tí pàṣẹ pé kó lọ̀ọ́ dúró sílé fódidi ọ̀sẹ̀ méjì gbáko.

Ó kàsíàrà , wọ́n ká òògùn olóró mọ́ òṣìṣẹ́ NDLEA lọ́wọ́

Fẹ́mi Akínṣọlá

Kólékólé dasọ́de,jàgùdà di baálẹ̀ ọjà.Òbìlẹ̀jẹ́ ò kọ̀ kí n kan ó bàjẹ́.
Ọwọ́ ikọ̀ ọ̀tẹlẹ̀múyẹ́ iléeṣẹ́ ọlọ́pàá ìpínlẹ̀ Èkó ti ba ọkùnrin agbóògùn olóró kan, Kelechi Chukwumeeije, tó pe ara rẹ̀ ní òṣìṣẹ́ àjọ tó ń rí sí ìlòkulò oògùn olóró nílẹ̀ wa, National Drug Law Enforcement Agency (NDLEA) lọjọ Àìkú, ọjọ́ kẹtala, oṣù Kẹjọ, ọdún 2023 yìí, lágbègbè Cement, ní ìpínlẹ̀ Èkó, pẹ̀lú irúfẹ́ òògùn olóró kan tí wọ́n ń pè ní Marsh-Mallow, tó jẹ́ ìwọ̀n kílò mẹ́rin (4kg).

Lásìkò tí ọgá ọlọ́pàá kan, ASP Samuel Sunday, ko ikọ ọlọ́pàá sòdí láti ṣe pàtìrólùù gbogbo agbègbè náà lọ́wọ́ ba afurasí yìí ní ibùdókọ̀ tó ti fẹ́ wọkọ̀.

Nígbà ti wọ́n fi ọ̀rọ̀ pò ó nífun pọ̀ ló jẹ́wọ́ pé ọmọ bíbí ìpínlẹ̀ Abia lòun, àti pé òṣìṣẹ́ àjọ NDLEA, ẹ̀ka ti ìpínlẹ̀ náà lòun, First gate,Tin-Can Island, ló ní wọ́n pín òun sí.

Ó fi kún ọ̀rọ̀ rẹ̀ pé òògùn olóró Marsh-Mallow tí wọ́n bá lára rẹ̀ ọ̀hún jẹ́ ti ọ̀ga oun kan lati ẹka àwọn tí wọ́n n pé ní Odogwu. Ló gbé e fóun, tó sì ní kí òun lọ̀ ọ́ mọ bó ṣe máa jẹ́ títà.

Alukoro iléeṣẹ́ ọlọ́pàá ìpínlẹ̀ Èkó, Benjamin Hundeyin, tó fìdí ìṣẹ̀lẹ̀ náà múlẹ̀, ó ní lóòótọ́ ni ọwọ́ ba Kelechi Chukwumeeije, tó pera rẹ̀ lóṣìṣẹ àjọ NDLEA, ṣùgbọ́n ìwádìí ti ń tẹ̀síwájú lórí rẹ̀ láti lè fìdí ẹ múlẹ̀ pé ṣé lóòótọ́ lọ jẹ́ ojúlówó òṣìṣẹ̀ àjọ náà, káwọn sì fà á lé àwọn ọ̀gá wọn lọ́wọ́.

DSS kòì túkùn lọ́rùn Emefiele, wọ́n ló lẹ́jọ́ tuntun láti jẹ́

Fẹ́mi Akínṣọlá
Iná ò tán láṣọ, ẹ̀jẹ̀ ò tán léèkáná lọ̀rọ̀ Ìjọba àpapọ̀ àti Emefiele
Ìjọba àpapọ̀ ti yọwọ́ nínú ẹjọ́ tí wọ́n pe Gómìnà tẹ́lẹ̀ fún báńkì àpapọ̀ Nàìjíríà,CBN Godwin Emefiele lórí ẹsùn “ níní ìbọn lọ́nà ti kò bá òfin mu ,èyí tí wọ́n pè é níwájú ilé ẹjọ́ gíga àpapọ̀ tó wà nílùú Èkó.

Adarí àgbà iléeṣẹ́ ètò ìdájọ ni ìjọba àpapọ̀, Mohammed Abubakar ṣàlàyé nínú àrọwà àfẹnuṣe kan tó gbé kalẹ̀ níwájú ilé ẹjọ́ náà pé àwọn ń gbé ìgbésẹ̀ yìí nítorí àwọn èsì ìwádìí tuntun tó tẹ àwọn lọ́wọ́ .

Àmọ́ṣá agbẹjọ́rò fún Emefiele, Agbẹjọ́rọ̀ àgbà Joseph Daudu, SAN tako ìpè yìí pẹlú àwíjàre pé kí ìjọba kọ́kọ́ yẹ ara rẹ̀ wò lórí àìgbọràn rẹ̀ sí àṣẹ tí ilé ẹjọ́ ti kọ́kọ́ pa pé kí wọ́n gba béélí Emefiele kí wọ́n tó gba ìpè wọn wọlé.
Onídájọ́ Nicholas Oweibo tó gbọ́ ẹjọ́ náà sún ìgbẹ́jọ́ sí Ọjọ́bọ ọjọ́ kẹtàdínlógùn oṣù kẹjọ ọdún 2023 láti gbé ìdájọ́ kalẹ̀ lórí ẹ̀bẹ̀ tuntun tí ìjọba àpapọ̀ gbé ka iwájú rẹ̀ náà.

Nínú ọ̀rọ̀ tó bá àwọn akọ̀ròyìn sọ lẹ́yìn ìjókòó ilé ẹjọ́ náà, adarí àgbà ní iléeṣẹ́ ètò ìdájọ́ ìjọba àpapọ̀ tó tún jẹ́ agbẹjọ́rò fún ìjọba ṣàlàyé pé ogún ẹ̀sùn míràn ló tún ti jáde tí wọ́n ti fi kan Emefiele niíwájú ilé ẹjọ́ gíga àpapọ̀ tó wà ní ìlu Abuja tíí ṣe olú ìlú Nàìjíríà.

Wèrè l’O̩ló̩run lò fún mi – Sam Olu Alo̩

Okan ninu awon gbajugbaja iranse Olorun ni Wolii Sam Olu Alo, bee lo si tun je okan ninu awon iranse Olorun ti won ri aanu ati oju rere Olorun gba. Laipe yii ni won ba awon oniroyin soro nipa iriri won, paapaa ohun toju ri ki Olorun too tu won sile ninu igbekun ayeraye ati bi Olorun se gbe won pade Ayo Babalola ko too di pe won bere ise iranse. Die lara ohun ti won so ree.
“Emi funra mi mo pe omo ologo ni mi, sugbon mi o ri ogo yii lo nibere pepe aye mi. Ojo kan lemi funra mi, lai je pe enikan so fun mi, pinnu lati fi ilu abinibi mi sile, mo si ba ara mi da majemu pe o digba ti nnkan ba too yipada fun mi ki n too le pada siluu ohun.
“Egbon mi kan to n sise birikila ni mo gba odo won lo, mo bere si i tele won, sugbon won je ki n mo pe awon ko nile tawon le gba mi si, emi naa si so fun won pe mi o setan ati fi won sile, bi won ko tile ni yara ti won maa gba mi si. Mo saa pinnu pe, abule yii o, emi o ni pada sibe mo, digba ti n ba too soriire.
“Ohun akoko ti mo sakiyesi ni pe oga mi, ti won tun je egbon mi yii, kii sise bi awon birikila egbe won yooku. Mo tun sakiyesi pe oye ise naa ye won daadaa. Ileejosin Anglican ni won n lo, emi naa si darapo mo won, mo bere si i ba won josin nibe.
“Gbogbo igba yen ni mo ti n gbo ohun kan to n ko si mi pe; ‘Olorun ni mi i fi se, Olorun fee lo mi’, sugbon mi o gba ohun naa gbo rara, mo ti gba pe mi o le di iranse Olorun laelae, bi mo se maa dolowo, ti mo maa di gbajumo nla ni mo n ro. Ohun to maa n wa si mi lokan nipa ise iranse ni pe ki Olorun bukun fun mi ki n rowo toju awon iranse Olorun. Nitori loju temi, awon iranse Olorun n jiya, sibe emi naa ko lowo kan lowo.”
Baba Adamimogo to tun je oludasile ileejosin Christ Apostolic Church Grace of Mercy Prayer Mountain International tun salaye fun awon akoroyin pe; “Lojo kan ni mo pade okunrin were kan, bo ti ri mi lo so pe; ‘Iwo okunrin yii, Olorun n pe e, o n sise birikila, bo tie je pe anfaani ati kawe ko si fun e, Olorun n pe e, o ko etiikun, oko iparun lo n lo yen o.” Ohun ti okunrin were naa so fun mi lojo naa niyen.
Ki wa ni nnkan to sele gan-an?
“Leyin ti mo pari ekose owo birikila ti mo ko lowo oga mi, egbon mi yii, ojo to ye ki n kuro lodo oga mi gan an ni won le mi jade nile tibinu-tibinu, bee ko si ibi ti mo le lo tabi duro si paapaa, se e ranti pe mo ti pinnu lati ma pada sile.”
Okunrin ojise Olorun yii tun ni, “Leyin ti mo pade okunrin were yii, ni mo wa gba imisi loru ojo kan, mo ri Aposteli Ayo Babalola, bo tie je pe mi o pade won ri loju aye, sugbon mo pade won loju iran, won si n so fun mi loju oorun naa pe Jesu lo n pe mi sise, won ni okunrin ti mo ri bii were loju aye to n ba mi soro yen kii se were rara, won ni Jesu lo n pe mi lati gba ise re.”
Baba yii ni leyin toun ji loju oorun naa, oun ko ri baba to n soro naa mo. “Se lo da bii pe enikan n soro si mi leti, mi o le fi taratara pe e ni iran. Ojo kan gan an ni ile aye mi bere si i gba otun, iyipada de paapaa pelu ebun imo ti Olorun fi fun mi. Leyin naa ni okan mi bere si i fa sodo Olorun, sugbon sibe mo pinnu pe mi o ni sise iranse.
“Mo tun sun, ni mo ba ri i ti won gbe bibeli le mi lowo, mo ka bibeli naa, latigba ti mo si ti ta ji ni mo ti bere si i ka bibeli.”
Wolii Sam Olu Alo ko gbagbe ibi to ti n bo, bo ti n ran won lowo bee lo n saanu fun awon ti won ba iranlowo wa sodo re, paapaa nipase ajo to da sile eyi to ti mu iyipada de ba opolopo awon eeyan lai fi tesin se.
Ni bayii, okunrin naa ti n gbaradi lati gbalejo ipago kan ninu osu kejo yii, nibi ti won ti n reti opo eeyan nibi ipade ohun. Ibudo ipago re ti won pe ni Jesus City Camp ground to wa l’Ekoo nipade ohun yoo ti waye.