Àwọn òsìṣẹ́ ilé ẹjọ́ gíga ìpínlẹ̀ Osun àtàwọn ọlọ́pàá gbéná wojú ara wọn

Fẹ́mi Akínṣọlá

Lónìí ọjọ́ kejìdínlógún, oṣù Kọkànlá ọdún 2023, laàkókò tí àwọn òṣìṣẹ́ ile ẹjọ́ gíga tí ìpínlẹ̀ Osun fẹ́ ṣe ìpàdé pọ pẹ̀lú àwọn Adájọ́ ni àwọn ọlọ́pàá da gáàsì tajútajú bolẹ̀

Bí àwọn òṣìṣẹ́ ilé ẹjọ́ gíga tí ìpínlẹ̀ Osun ṣe n ṣe ìfẹ̀hónúhàn láti má fi ààye gba Adájọ́ó Àgbà Adepele Ojo láti wọ ọ́fíìsì rẹ̀ ni ìṣẹ̀lẹ̀ náà wáyé.

Àwọn ọlọ́pàá fi gáàsì tajútajú lé àwọn òṣìṣẹ́ náà, ọ̀pọ̀ lára àwọn sì fara pa pẹ̀lú àwọn akọ̀ròyìn to lọ síbẹ̀ pẹlu.

Nígbà tí ẹnì to jẹ́ alága àwọn òṣìṣẹ́ ilé ẹjọ́ gíga náà, Olugbenga Olakunle Eludire ba àwọn akọ̀ròyìn sọ̀rọ̀ lórí ìṣẹ̀lẹ̀ náà, sọ pe ẹtọ awọn làwọn ń bèèrè fún.

Eludire ni “Ẹ̀tọ́ wa lawá bèèrè lọ́wọ́ Adájọ́ Àgbà Adepele Ojo tí àwọn èèyàn wa sì ṣe ìfehónúhàn lórí ẹ̀tọ́ àwọn.

Lójijì ni ọ̀gọ̀ọ̀rọ̀ àwọn ọlọ́pàá yà de tí wọ́n sì fi gáàsì tajútajú lé wa pẹ̀lú kòbókò tí ọ̀pọ̀ sì farapa yánnayànna.”

Eludire ni àwọn ìgbìmò kan lára àwọn Adájọ́ ló pè fún ìpàdé lórí ẹ̀tọ́ àwọn òṣìṣẹ́ náà kì àwọn ọlọ́pàá tó tẹ̀lé Adájọ́ àgbà Adepele tó fìyà jẹ ọ̀pọ̀lọpọ̀ nínú wọn.

“Oun tí àwa òṣìṣẹ́ bèẹrè lọ́wọ́ Adájọ́ Àgbà Adepele Ojo ni pé kó dá àwọn òṣìṣẹ́ tó tí fún ní ìwé ìdádúró lẹ́nu isẹ́ padà àti àwọn ẹ̀tọ́ wọn.”

Ní báyìí ẹni tó jẹ́ Alága fún àwọn òṣìṣẹ́ ilé ẹjọ́ gíga tí ipínlẹ̀ Osun, Olugbenga Olakunle Eludire tí kéde ìdasẹ́sílẹ̀ títí ìgbà tí Adájọ́ Àgbà Adepele Ojo yóó fi san gbogbo àwọn ẹ̀tọ́ wọn .

Toyin gbakú oníkú kú, ọmọ ẹgbẹ́ òkùnkùn ló ṣá a pa

Fẹ́mi Akínṣọlá

Yorùbá ní ole kò ní í ja àgbà ko má ṣe é lójú fìrí. Òwe yìí ló dífá fún owuyẹ kan tó sọ pé àwọn afurasí ọmọ ẹgbẹ́ òkùnkùn ló ṣekú pa akẹ́kọ̀ọ́ gbogbonìse tìjọba àpapọ̀ tó wà nílùú Ọffa, ní ìpínlẹ̀ Kwara, (Federal Polytechnic, Ọffa). Omidan Toyin Bamidele, tó wà ní HND1, lẹka tí wọ́n ti ń kọ nípa ìmọ nípa oúnjẹ (Food Technology), ni àwọn ìkà èèyàn kan ká mọ’nu ilé ẹ, tí wọ́n sì ṣá a pa síbẹ̀ .

Ọ̀kan lára àwọn tí ìṣẹlẹ náà ṣoju rẹ̀, ṣùgbọ́n tó ní ká má darukọ òun sọ pé ní nǹkan bíi aago mẹfa irọlẹ Ọjọ́bọ, ọjọ́ kẹrindinlogun, oṣù Kọkànlá yìí, làwọn afurasí ọmọ ẹgbẹ́ òkùnkùn ọ̀hún ya bo agbègbè Dapson, níbi tí Toyin ń gbé nílùú Ọffa, pẹ̀lú àdá, àáké àtàwọn ohun ìjà olóró lọkan-o-jọkan, tí gbogbo àwọn èèyàn tó rí wọn sì ń rọ gìlàgìlà fún ẹmi wọn pẹ̀lú àwọn ohun ìjà olóró tí wọ́n kó dání ọ̀hún.

A gbọ́ pé yàrá Toyin ni wọ́n gbà lọ tààrà, bí wọ́n ṣe fojú kàn án ni wọ́n bẹrẹ sí ṣá a láàáké àti ad àdá bíi ẹran Iléyá, nígbà tí ẹmi bọ lára rẹ̀ tán ni wọ́n tóó fi sílẹ̀ nínú àgbàrá ẹ̀jẹ̀, tí wọ́n sì sá lọ.

Ó ní wọ́n lò tó iṣẹju mẹẹẹdogun kí wọ́n tó kúrò nínú yàrá Toyin, nígbà tí àwọn ọmọ ẹgbẹ́ òkùnkùn ọ̀hún lọ tán làwọn tó ó wọ yàrá arẹwa obìnrin yìí, táwọn sì bá a nínú àgbàrá ẹ̀jẹ̀, tí wọ́n sì ti kun ún bíi ẹran.

Ẹni yìí ní èyí ló mú káwọn lọ fi ìṣẹ̀lẹ̀ náà tó àwọn aláṣẹ ilé-ẹ̀kọ́ náà létí kí wọ́n lè gbé ìgbéṣẹ tó tọ.

Ó tẹ̀síwájú pé Toyin jẹ́ ọ̀rẹ́bìnrin ọ̀kan lára olórí ọmọ ẹgbẹ́ òkùnkùn igun kan, ṣùgbọ́n nígbà tí wọ́n fẹ́ pa ìyẹn tó sá lọ ni wọ́n fi lọ pa ọ̀rẹ́bìnrin rẹ̀, Toyin Bamidele.

Wọ́n ní ó ti wà nínú àṣà àti ìṣe àwọn akẹ́kọ̀ọ́ Ọffa Poli, kí wọ́n máa para wọn lásìkò tí wọ́n bá ń ṣe ayẹyẹ ìkẹ́kọ̀ọ́-jáde, àti pé lọ́jọ́ Ajé, ọ̀ṣẹ tó kọjá yìí, ni wọ́n ṣe ayẹyẹ náà, tí wọ́n sì pa akẹ́ẹ̀kọ́ kan tóun náà jẹ́ ọ̀kan lára àwọn ọmọ ẹgbẹ́ òkùnkùn ọ̀hún síwájú géètì ilé-ẹ̀kọ́ yìí. Àwọn ọlọ́pàá ló padà lọ palẹ̀mọ́ òkú ọ̀hún.

Àwọn aláṣẹ iléẹ̀kọ́ náà ti fòfin de ayẹyẹ ìkẹ́kọ̀ọ́-jáde tí wọ́n tún máa ń lọ ṣe níta ilé-ẹ̀kọ́, kí wọ́n lè raaye pa ẹni tí wọ́n bá fẹ́ pa nínú wọn, nítorí pé lọ́jọ́ náà gan-an ni ọjọ́ ikú àwọn tí wọ́n bá fẹ́ pa máa ń pé.

Saheed Osupa kẹ́kọ̀ọ́ gboyè ìjìnlẹ̀ ní fásitì Ibadan lẹ́ni ọdún 52

Fẹ́mi Akínṣọlá

À ṣé òòtọ́ lọ̀rọ̀ àwọn àgbà pé, kò sí ìgbà táà dáṣọ, tá ò rílẹ̀ fi wọ́.Àṣamọ̀ yìí ló jọ ti gbajúgbajà akọrin Fuji, Akorede Babatunde Okunọla tí ọ̀gọ̀ọ̀rọ̀ èèyàn mọ̀ sí Saheed Oṣupa bi òun náà ti ṣe wà lára àwọn tó kẹ́kọ̀ọ́gboyè ní fásitì Ibadan, UI lọ́jọ́rú.

Saheed Oṣupa kẹ́kọ̀ọ́gboyè ìjìnlẹ̀ ìmọ̀ nípa ọ̀rọ̀ òṣèlú (Bsc Political Science) ó sì wà lára àwọn akẹ́kọ̀ọ́jáde Fásitì náà tí wọ́n gbé ọwọ́ oyè lé lórí níbi ayẹyẹ ìkẹ́kọ̀ọ́gboyè ilé ẹ̀kọ́ náà tó wáyé lọ́gbà Fásitì Ìbàdàn.

Gbajúmọ̀ akọrin náà bọ́ sí ojú òpó sítágíráàmù rẹ̀ láti fọnrere rẹ̀ fún gbogbo àgbáyé pé òun ti di bàbá olóyè tuntun lẹ́ka ètò ẹ̀kọ́.

Saheed Oṣupa tó jẹ́ ẹni ọdún méjìléláàdọ́ta ṣàlàyé nínú àtẹ̀jáde tó fi sí ojú òpó ayélujára rẹ̀ náà pé ìpele òṣùwọ̀n ìjááfá ìmọ̀ ẹ̀kọ́ Kejì tí òyìnbó ń pè ní Second Class Upper ni òun gbé jáde ní ilé ẹ̀kọ́ náà.

Ọdún 1987 ni Saheed Oṣupa jáde ilé ẹ̀kọ́ girama kí ó tó tẹ̀ síwájú lọ sí ilé ẹ̀kọ́ gbogbonìṣe Polytechnic Ibadan láti gba ìwé ẹ̀rí Ordinary National Diploma nínú ẹ̀kọ́ ìmọ nípa àkóso okoòwò (Business Administration lọ́dun 1992.

Saheed Osupa ń darapọ̀ mọ́ àwọn àgbààgbà òṣèré tí wọ́n ti padà lọ kẹ́kọ̀ọ́gboyè lẹ́yìn ọ̀pọ̀lọpọ̀ ọdún tí wọ́n ti fi àdàgbá ẹ̀kọ́ tì.

Ilé ẹjọ́ gíga pàṣẹ pé kí wọ́n fi Emefiele sí ọgbà ẹ̀wọ̀n Kuje

Fẹ́mi Akínṣọlá

Ilé ẹjọ́ gíga ìjọba àpapọ̀ tó wà ní Abuja ti pàṣẹ pé kí wọ́n fi gómìnà àná fún ilé ìfowópamọ́ àpapọ̀ Nàìjíríà, CBN, Godwin Emefiele sí ọgbà ẹ̀wọ̀n Kuje títí ti wọ́n máa fi parí gbígba béèlì rẹ̀.

Ẹ̀sùn ìwà àjẹbánu lásìkò tó wà nípò gẹ́gẹ́ bí gómìnà CBN ni Emefiele ń kojú.

Ìgbẹ́jọ́ rẹ̀ ló ti rí ìdádúró ní ẹ̀ẹ̀mẹta ọ̀tọ̀ọ̀tọ̀ fún ìdí kan tàbí òmíràn ṣùgbọ́n tó wáyé lọ́jọ́ Ẹtì.

Ẹ̀sùn ogún tí àpapọ̀ owó rẹ̀ jẹ́ bílíọ̀nù mẹ́fà lé ọwọ́ márùn-ún náírà ni ìjọba àpapọ̀ kọ́kọ́ kà sí Emefiele lọ́rùn láti kojú ìgbẹ́jọ́ lé lórí.

Àmọ́ ìjọba àpapọ̀ ti mú àdínkù bá iye ẹ̀sùn náà sí mẹ́fà tí owó rẹ̀ sì lé bílíọ̀nù kan náírà ní ilé ẹjọ́ lọ́jọ́ Ẹtì.

Agbẹjọ́rò Emefiele, Mathew Burkaa níbi ìgbẹ́jọ́ tó wáyé ní kí ilé ẹjọ́ fún Emefiele ní béèlì àmọ́ agbẹjọ́rò ìjọba, Rotimi Oyedepo kọ̀ jálẹ̀ pé wọn ò gbọdọ̀ fún ní béèlì.

Adájọ́ Hamza Muazu ní òun kò ní lè dájọ́ kankan lórí ìbéèrè náà látàrí bí àwọn agbẹjọ́rò méjéèjì ṣe gbé ọ̀rọ̀ wọn kalẹ̀.

Adájọ́ ní òun nílò àkókó díẹ̀ láti fi ṣe àgbéyẹ̀wò ẹ̀rí tí agbẹjọ́rò Emefiele gbé wá sílé láti mọ̀ bóyá wọ́n máa fun ní béèlì tàbí bẹ́ẹ̀ kọ́.

Ó wá sún ìgbẹ́jọ́ lórí ọ̀rọ̀ béèlì Emefiele sí ọjọ́ Kejìlélógún oṣù Kejìlá, tó sì ní ìgbẹ́jọ́ lórí ẹjọ́ tó ń kojú gan-an.

Ó ní kí wọ́n fi Emefiele sí ọgbà ẹ̀wọ̀n Kuje títí tí wọ́n fi máa gbọ́ ẹjọ́ lórí gbígba béèlì náà.

Ṣáájú ni Adájọ́ Olukayode Adeniyi ti pàṣẹ lọ́jọ́ Kẹjọ, oṣù Kọkànlá ọdún 2023 pé kí wọ́n tú Emefiele sílẹ̀ fún agbẹjọ́rò rẹ̀ lẹ́yìn tó ti lo ọjọ́ 151 ní àhámọ́.

Gómìnà tuntun ní Kogi gbàwé ẹ̀rí mo yege

Fẹ́mi Akínṣọlá

Àjọ tó ń rí sí ètò ìdìbò ní Nàìjíríà, INEC ti fún gómìnà tí wọ́n ṣẹ̀ṣẹ̀ dìbò yàn ní ìpínlẹ̀ Kogi, Usman Ododo àti igbákejì Joel Salifu ní ìwé ẹ̀rí mo yege.

Ní orúkọ àjọ INEC tó wà ní ìlú Lokoja ni wọ́n ti fi ìwé ẹ̀rí náà lé Ododo àti igbákejì rẹ̀ lọ́wọ́.

Ododo, tí ẹgbẹ́ òṣèlú All Progressives Congress, APC ní ìbò 446,237 níbi ètò ìdìbò tó wáyé lọ́jọ́ Kọkànlá oṣù Kọkànlá ọdún 2023.

Olùdíje lẹ́gbẹ́ òṣèlú Social Democratic Party, SDP, Murtala Ajaka ló tún súnmọ́ Ododo nígbà tí òun ní ìbò 259,052 tí Dino Melaye tẹgbẹ́ òṣèlú Peoples Democratic Party, PDP ní ìbò 46,362 gẹ́gẹ́ bí INEC ṣe kéde.

Nígbà tó ń sọ̀rọ̀ lẹ́yìn tó gba ìwé ẹ̀rí náà, Ododo ní òun máa ri dájú pé gbogbo ìlérí tí òun ṣe lásìkò ìpolongo ìbò ni òun máa múṣẹ.

Ó ní òun máa gùnlé àwọn àṣeyọrí Gómìnà Yahaya Bello láti mú ìlọsíwájú àti ìṣọ̀kan bá ìpínlẹ̀ Kogi.

Ó tún dúpẹ́ lọ́wọ́ àwọn ènìyàn ìpínlẹ̀ náà fún àtìlẹyìn tí wọ́n ṣe fún òun lásìkò ìbò ní èyí tó ṣàpejúwe gẹ́gẹ́ okùn tó so ìpínlẹ̀ Kogi ró.

Bákan náà ló tún sọ àrídájú rẹ̀ pé ìṣèjọba òun máa mú ìgbélárugẹ àwọn ọ̀dọ́ àtàwọn obìnrin ní òkúnkúndùn gẹ́gẹ́ bí ìjọba tó wà lóde náà ṣe ń ṣe.

“Ìpinnu mi láti pèsè iṣẹ́ fún àwọn ọ̀dọ́ àti láti ri pé ètò ẹ̀kọ́ wà ní oókan àyà ìṣèjọba mi kò ní yẹ̀.

“Gbayawu ni ilẹ̀kùn ọ́fíìsì mi máa ṣí fún gbogbo ènìyàn láìfi ẹ̀yà, ẹ̀sìn tàbí ẹgbẹ́ òṣèlú ṣe, gbogbo àwọn ará ìlú ni mà á fún láàyé nínú ìṣèjọba mi.

Gómìnà Yahaya Bello tí òun náà wà níbi ètò náà rọ àwọn ènìyàn ìpínlẹ̀ Edo láti fọwọ́sowọ́pọ̀ pẹ̀lú pẹ̀lú Ododo láti mú ìpínlẹ̀ Kogi gòkè àgbà.

Aṣojú INEC ní ìpínlẹ̀ Kogi, Gabriel Longpet ní ètò náà wà lára ojúṣe INEC lásìkò ìbò.

Gííwá Fásitì Adekunle Ajasin ṣàbẹ̀wò sí ẹ̀ka rẹ̀ n’Ìbàdàn

Fẹ́mi Akínṣọlá

Gííwá Fásitì Adekunle Ajasin Ọ̀jọ̀gbọ́n Olugbenga Ebenezer Ige, ti ṣàbẹ̀wò sí ẹ̀ka Fásitì náà èyí tó wà ní ilé ẹ̀kọ́ Òlùkọ́ni Ṃufutau Lanihun n’Ìbàdàn lọ́jọ́ Ajé, ọjọ́ kẹfà oṣù kọkànlá ẹ̀gbàá okòóọdúnlémẹ́ta.
Àbẹ̀wò Gííwá náà ni láti wo ìgbaradì ẹ̀ka Fásitì ọ̀hún fún àbẹ̀wò Àjọ tó n ṣègbéléwọ̀n ìfòntẹ̀ lu ìdàngájíá àwọn Fásitì lórí àwọn ètò ẹ̀kọ́ gbogbo tí wọ́n ti buwọ́lù àti àfikún òmíràn, ní ìbámu pẹ̀lú àwọn èròjà àmúyẹ ìgbàlódé fún ètò ẹ̀kọ́.

Làsìkò àbẹ̀wò rẹ̀, Ọ̀jọ̀gbọ́n Olugbenga fìdí ẹ̀ múlẹ̀ pé lọ́wọ́lọ́wọ́, Àjọ̀ National University Commission (NUC). wà ní Maraba,ní ìpínlẹ̀ Nasarawa,fúnrúfẹ́ ìgbéléwọ̀n yìí kan náà.

Gííwá Fásitì ọ̀hún jẹ́ ó di
mímọ̀ pé, àbèwò àjọ(NUC) yìí ṣè pàtàkì sí ìdáhùn fífí òntẹ̀ lu àgbénde ìlànà ẹ̀kọ́ Fàsitì ọ̀hún ,ọlọ́gbarangandan tó fi mọ́ gbígboyè ẹ̀kọ́ ìmọ̀ ìjìnlẹ̀ ẹlẹ́ẹ̀kejì àti àwọn mìíràn lẹ́ka rẹ̀ tó wà ní Ìbàdàn.

Nínú ọ̀rọ̀ ti ẹ̀, aṣojúdarí Fásitì Adekunle Ajasin ẹ̀ka ti Ìbàdàn, Ọ̀jọ̀gbọ́n Taiwo Gbolagade, fi ìdùnnú rẹ̀ hàn sí àbẹ̀wò ẹnu iṣẹ́ tí Gííwá náà ṣe sí ẹ̀ka Fásitì ọ̀hún n’Ìbàdàn.

Ọ̀jọ̀gbọ́n Taiwo kò sàì mu
dá Gííwá ilé-ẹ̀kọ́ ọ̀hún lójú pé ojú òpó tí Fásitì náà là sílẹ̀ ni àwọn n tọ̀ látìgbàyí wá, àti pé àwọn yóó tẹ̀síwájú ní gbogbo ọ̀nà látí ríi pé àwọn àkẹ́kọ̀ọ́ gba ìmọ̀ ẹ̀kọ́ tí yóó mú kí wọ́n dántọ́ láti lè fagagbága pẹ̀lú àwọn akẹẹgbẹ́ wọn káàkiri orílẹ̀.
Àbẹ̀wò Gííwá fásitì ọ̀hún ló n ṣàfihàn ìjáfá ohun ìkógìírí mọ́ṣẹ́ èyí tó n fi gbogbo ìgbà mú kí ìràwọ̀ fásiti náà ó máà gbókè tàn kárí ayé.

Ọwọ́ tẹ adigunjalè yìí , ṣe ló ń kà bòròbòrò níwájú ọlọ́pàá

Fẹ́mi Akínṣọlá

Ọjọ́ gbogbo ni tolè, ọjọ́ kan ni ti oníǹkan.
Ọkùnrin kan, Alao James, ti ń káwọ́ pọ̀nyìn rojọ́ ni olú iléeṣẹ́ ọlọ́pàá ìpínlẹ̀ Ògùn tó wà ní Eleweeran, lórí ohun tó mọ̀ nípa mọ́tò kan tí wọ́n rí ní sàkání rẹ̀.

Láìpẹ́ yìí ni wọ́n jí mọ́tò Toyota Rav4 SUV , aláwọ̀ búlúù tó jẹ́ ti Elogie Polycap, gbé nílé ìgbọ́kọ̀sí kan tó páákì rẹ̀ sí lágbègbè Gbagada.

Nígbà tí Polycap lọ fi ìṣẹlẹ̀ náà tó àwọn ọlọ́pàá agbègbè Sango létí ni wọ́n bẹ̀rẹ̀ ìgbésẹ lórí ẹ̀, kò sì pẹ púpọ̀ tí wọ́n fi ri mọ́tò náà.

Alukoro iléeṣẹ́ ọlọ́pàá ìpínlẹ̀ Ògùn, SP Ọmọlọla Odutọla, ṣàlàyé nínú àtẹ̀jáde kan pé ìwádìí kíkún tí àwọn ọlọ́pàá ṣe lórí ọ̀rọ̀ náà ló jẹ́ kí ọwọ́ tẹ James níbi tó farapamọ́ sí.

Odutọla fi kún ọ̀rọ̀ rẹ̀ pé agbègbè Ilu Ọta, ni ọkùnrin afurasí ẹni ọdún márùndínlọ́gọ́ta náà sá pamọ́ sí kí ọwọ́ tóó tẹ̀ ẹ́.

Ó ní gbogbo àwọn ẹ́síbíìtì tí wọ́n bá lọ́wọ́ rẹ̀ ni wọn yóò kó fún àwọn ọlọ́pàá agbègbè Gbagada, níbi tí wọ́n ti jí mọto ọ̀hún.

Usman Ododo, àyánrán gómìnà ní ìpínlẹ̀ Kogi

Fẹ́mi Akínṣọlá
Ahmed Usman Ododo tẹgbẹ́ òṣèlú All Progressives Congress, APC ti gbégbá orókè níbi ètò ìdìbò sípò gómìnà ìpínlẹ̀ Kogi.

Àjọ tó ń rí sí ètò ìdìbò ní Nàìjíríà, INEC ló kéde yìí lẹ́yìn tí wọ́n ka àkójọpọ̀ àwọn èsì káàkiri ìjọba ìbílẹ̀ mọ́kànlélógún tó wà ní ìpínlẹ̀ náà.

Gíwà àgbà ilé ẹ̀kọ́ gíga University of Nsukka, Ọ̀jọ̀gbọ́n Johnson Ozoemenam Urama, tó ń ṣiṣẹ́ fún INEC níbẹ̀ kéde pé Ododo ní ìbò 446,237 láti fẹ̀yìn àwọn akẹgbẹ́ rẹ̀ tí wọ́n jọ dupò náà janlẹ̀

Bákan náà ló kéde pé olùdíje lẹ́gbẹ́ òṣèlú Peoples Democratic Party, Dino Melaye rí ìbò 46,362 tí Murtala Ajaka, ti ẹgbẹ́ òṣèlú Social Democratic Party, SDP ní ìbò 259,052.

Ododo gbégbá orókè ní ìjọba ìbílẹ̀ ….. nígbà tí Melaye gbégbá orókè ní ìjọba ìbílẹ̀ …. tí Ajaka náà sì jáwé olúborí ní ìjọba ìbílẹ̀ …..

Ní ọjọ Kọkànlá, oṣù Kọkànlá ọdún 2023 ni ètò ìdìbò sípò gómìnà ìpínlẹ̀ Kogi wáyé tí INEC sì kéde ṣíṣe ìdádúró ìbò dídì ní wọ́ọ̀dùn mẹ́sàn-án látàrí àwọn kùdìẹ̀kudiẹ kan tó wáyé ní àwọn ibùdó ìdìbò náà.

Nǹkan bí aago mẹ́wàá òwúrọ̀ kọjá ní ọjọ́ Àìkú ni ètò kíkéde èsì ìbò bẹ̀rẹ̀ ní ìlú Lokoja tó jẹ́ olú ìlú ìpínlẹ̀ Kogi.