Iná jólé Alao Akala ní ẹ̀mí èèyàn kan bá a lọ

Fẹ́mi Akínṣọlá

Ní airotẹlẹ ni iná dédé ṣẹ́yọ nínú ọ̀kan lára àwọn ilé tó n bẹ nínú ọgbà Gómìnà tẹ́lẹ̀rí ní ìpìnlẹ̀ Ọ̀yọ́, Olóògbé Ọ̀túnba Adebayọ Alao Akala l’ówùúrọ̀ ọjọ́ Ajé.

Ọ̀kan lára àwọn olùgbé ilé náà, tí a fi orúkọ bò l’áṣìírí, fi ìdí ọ̀rọ̀ múlẹ̀ fún akọ̀ròyìn pé ní nnkan bíi aago méje ààbọ̀ sí mẹ́jọ òwúrọ̀ ọjọ́ Ajé ni ìṣẹ̀lẹ̀ náà wáyé.

Olùgbé ilé náà ní, “Iná ẹ̀lẹ́ntíríìkì ló dé lójijì l’ówùúrọ̀ ọjọ́ náà tí ó sì jó ẹni kan. Ẹlòmíràn náà tún fi ara pa.”

Ṣùgbọ́n, ìròyìn kan tí a kò lè fìdí rẹ̀ múlẹ̀ sọ pé èèyàn méjì ló kú nínú iná tó jó ọ̀hún .

Bákan náà ni ìròyìn sọ pé obìnrin méjì ló jóna nínú ilé náà, àmọ́ àwọn aláṣẹ kò tíì fìdí èyí múlẹ̀.

Gẹ́gẹ́ bí iléṣẹ́ ìròyìn orí ayélujára “Ogbomoso Insight “ṣe sọ, inú ilé alájà kan ọhún ni Olóògbé Àlàó Akálà gbé títí tó fi di igbákejì Gómìnà ìpínlẹ̀ Ọ̀yọ́ lọ́dún 2003.

Nínú oṣù kínní ọdún 2022 ni Ọ̀túnba Adébayọ̀ Àlàó-Akala jáde láyé.

Ó jẹ Gómìnà ìpínlẹ̀ Ọ̀yọ́ láàrin ọdún 2007 sí 2011

Láti ìgbà tí Gómìnà tẹ́lẹ̀rí náà ti re ibi àgbà n rè gìrìgìrì ẹsẹ̀ kò fi bẹ́ẹ̀ wọ́pọ̀ ní ilé náà, kí ó tó di pé iná sọ níbẹ̀ l’ówùúrọ̀ ọjọ́ Ajé.

Mo ti fẹ́yàwó kejì, mi ò ṣe mọ́- Ọkọ ìyàwó kan

Fẹ́mi Akínṣọlá

Túláàsì lóhun ó jókòó, ò lóò ráyè.
Iwájú Onídàájọ Abilékọ S.M Akintayọ, tile-ẹjọ kọkọ-kọkọ kan tó wà ní Mapo, nílùú Ìbàdàn, ìpínlẹ̀ Ọ̀yọ́, ni àwọn tọkọ-taya méjì kan, Ọ̀gbẹ́ni Kazeem Jẹjẹ àti Abilekọ Kafilat Jẹjẹ, gbé ara wọn lọ. Kazeem ló gbé ẹjọ́ ìyàwó rẹ̀ lọ sile-ẹjọ ọ̀hún, nǹkan tó sì ń fẹ́ ni kí adájọ́ tú ìgbéyàwó tó wà láàrin àwọn méjèèjì ká.

Nínú ọ̀rọ̀ rẹ̀ ni Kazeem ti sọ pé, ‘‘Oluwa mi, ẹ̀bẹ̀ kan ṣoṣo ti mo bẹ̀ báyìí ni pé kẹ́ ẹ tú ìgbéyàwó ogún ọdún tó wà láàrin èmi àti ìyàwó mi yìí ká, kẹ́ ẹ sì kìlọ̀ fún un pé kò gbọdọ̀ wáá bá mi lẹ́nu iṣẹ́ mi mọ́ láti fa wàhálà pẹ̀lú mi. Ọ̀rọ̀ rẹ̀ ti sú mi pátápátá, mi ò ṣe mọ́ , kò sífẹ̀ẹ́ láàrin àwa méjèjì mọ́, ojoojúmọ́, ìjà ni nínú ilé. Kẹ́ ẹ sì máa wò ó, ní nǹkan bíi ogun ọdún sẹ́yìn ni mo pàdé rẹ̀, gbogbo ìwà rẹ̀ ló tẹ́ mi lọ́rùn pátá, a ṣètò ìdána, bẹ́ẹ̀ ni mo sanwó orí rẹ̀ fáwọn ẹbí rẹ̀. Kò sóhun tí wọ́n bèèrè lọ́wọ́ mi tí mi ò fún wọn. Ṣùgbọ́n kò pẹ́ rárá tá a fẹ́ra wa sílé tán tí ìyàwó mi yìí bẹ̀rẹ̀ sí í yọwọ́-kọ́wọ́, wàhálà ni lójoojúmọ́, nígbà tó tún yá ló bá tún ń lọ rojọ mi níta pé mo ti lo nǹkan ọmọkùnrin mi láti fi ṣòògùn owó lòun kò ṣe rí ọmọ bí látìgbà tá a ti ṣègbéyàwó.

‘‘ Kò síbi tí mo lè dé báyìí, ṣe làwọn èèyàn á máa fi mí ṣe yẹ̀yẹ́, bẹ́ẹ̀ kí í ṣe pé mo lówó lọ́wọ́ ká baà sọ pé lóòótọ́ ni mò lo nǹkan ọmọkùnrin mi fún oògùn owó. Ọ̀pọ̀ ìgbà ni mo ti lọ fẹjọ́ rẹ̀ sun àwọn òbí rẹ̀, ṣùgbọ́n kò sí ìyàtọ̀ nínú ìṣesí rẹ̀. Bí mo gbé igbá nínú ilé, mi ò mọ̀ ọ́n gbé ni, kò sígbà tí má a jáde kúrò nínú ilé, ṣe nìyàwó mi á máa tú gbogbo ẹrù mi láti wò ó bóyá mo lóògùn kan tí mo fi pamọ́ fún un. Nígbà tó yá ni bàbá ìyàwó mi gbà mí nímọ̀ràn pé kí ń lọ fẹ́yàwó kejì síta. Àmọ̀ràn pàtàkì ọ̀hún ni mo tẹ̀lé tí mo fi lọ fẹ́yàwó mìíràn síta báyìí. Ọlọ́run sì ti ṣe é, ìyàwó ọ̀hún ti bímọ fún mi, èyí tó fihàn gbangba pé irọ nìyàwó mi ń pa mọ́ mi pé mo ti lo nǹkan ọmọkùnrin mi láti fi ṣòògùn owó. Ẹ ṣáà bá mi lé e kúrò nínú ilé mi lohun tí mo ń fẹ́ báyìí ’’.

Níwọ̀n ìgbà tí kò sí olùjẹ́jọ́, ìyẹn Abilékọ Kafilat Jẹjẹ, nílé-ẹjọ́, adájọ́ ilé-ẹjọ́ náà sún ìgbẹ́jọ́ síwájú di ọjọ́ kọkànlélọ́gbọ̀n, oṣù Kìn-ín-ní, ọdún 2024 tó ń bọ̀ yìí.

Bákan náà ló kàn án nípa fáwọn akọ̀wé kóòtù pé kí wọ́n rí i dájú pé wọ́n fún olùjẹ́jú níwèé ìpẹ̀jọ́, kó lè yọjú sílé-ẹjọ́ lọ́jọ́ tí ìgbẹ́jọ́ rẹ̀ máa tún wáyé.

Ẹgbẹ̀rún lọ́nà ọgọ́rùn-ún Náírà ni mo ta orí àti ọwọ́ akẹ́kọ̀ọ́ Fásitì Ifẹ̀ – Akeem

Fẹ́mi Akínṣọlá

Ẹni bá hùwà kòtọ́, ó di dandan kó fojú winá òfin.
Ọ̀dọ̀ àwọn ọlọ́pàá ní Eléwéeran, nílùú Abẹokuta, ìpínlẹ̀ Ògùn, ni Ọ̀gbẹ́ni Akeem Usman wà, níbi tó ti ń ràn wọ́n lọ́wọ́ lórí ìwádìí tí wọ́n ń ṣe láti lè fọwọ́ òfin mú gbogbo àwọn oníbàárà rẹ̀ gbogbo tó ń ta àwọn ẹ̀yà ara òkú fún, ní pàtàkì , ti ọmọ ilé-ẹ̀kọ́ Fásitì ‘Ọbafẹmi Awolọwọ University’ (OAU) kan, Olóògbé Quadry Salami, tó dẹ́mìí rẹ̀ lẹ́gbòodò láìpẹ̀ yìí, tó sì ta àwọn ibi pàtàkì ẹ̀yà ara rẹ̀ fáwọn oníṣẹ́ ibi kan.

Ohun tí a gbọ́ ni pé Alàgbà Salami tí i ṣe bàbá Quadry ló lọ fẹjọ́ sun àwọn ọlọ́pàá agbègbè Kenta, nílùú Abẹokuta, lọ́jọ́ kẹrìnlá, oṣù Kọkànlá, ọdún 2023 yìí, pé òun ń wá ọmọ òun, Quadry, tó jẹ́ akẹ́kọ̀ọ́ onípele àkọkọ́ 100 level nílé -ẹ̀kọ́ ‘Ọbafẹmi Awolọwọ University,’ (OAU). Bàbá náà ṣàlàyé fáwọn ọlọ́pàá pé láti ọjọ́ kẹjọ, oṣù Kọkànlá, ọdún yìí lòun ti fojú kàn án gbẹyin, ó lóun pe gbogbo fóònù rẹ̀, kò lọ, làwọn ọlọ́pàá bá bẹ̀rẹ̀ iṣẹ́ lórí ọ̀rọ̀ ọ̀hún.

Alukoro iléeṣẹ́ ọlọ́pàá ìpínlẹ̀ náà, S.P Ọmọlọla Odutọla, tó fìdí ìṣẹ̀lẹ̀ náà múlẹ̀ fáwọn oníròyìn l’Ọ́jọ́rùú, ọjọ́ kẹfà, oṣù Kejìlá, sọ pé fúnra ọ̀gá ọlọ́pàá pátápátá ní ìpínlẹ̀ Ògùn, C.P Abiọdun Alamutu, ló ṣaájú ikọ̀ àwọn ọlọ́pàá ọ̀tẹlẹ̀múyẹ́ agbègbè ‘Mile 6’, tó wà nílùú Ajebọ, láti lọ fọwọ́ òfin mú Akeem Usman, lẹ́yìn ti òhun tí wọ́n fi n wá fóònù olóògbé náà tọ́ka sí i pé ọwọ́ rẹ̀ ló wà. Wọ́n gbá a mú, ó sì mú wọn lọ síbi tó sìnkú olóògbé náà sí.

Akeem yìí ló tọ́ka sí oníṣèègùn kan, Ọ̀gbẹ́ni Ifadowo Niyi, tó pé ní ọ̀rẹ̀ rẹ̀. Nígbà tí wọ́n ń fi ọ̀rọ̀ wá a lẹ́nu wò ló jẹ́wọ́ fáwọn ọlọ́pàá pé òun pẹ̀lú Ifadowo làwọn jọ pín ẹ̀yà ara olóògbé náà fún òògùn owó.

Alukoro ní, ‘‘Akeem ti jẹ́wọ́ fáwọn ọlọ́pàá, ohun tó sọ ni pé òun pẹ̀lú Ifadowo làwọn jọ pa olóògbé náà, táwọn sì pín ẹ̀yà ara rẹ̀, orí olóògbé náà àti ọrùn ọwọ́ rẹ̀ méjèèjì ni Ifadowo kó lọ, ó sì san ẹgbẹ̀rún lọ́nà ọgọ́rùn-ún Náírà sínú àkáùǹtì Akeem.

‘‘Lẹ́yìn náà ni Akeem ń ta àwọn ẹ̀yà ara olóògbé náà lẹ́yọkọ̀ọ̀kan fáwọn èèyàn tó nílò rẹ̀ láti fi ṣòògùn Àwúre. Lópin ohun gbogbo, Akeem lọ ri ìyókù mọ́lẹ̀ nígbà tí kò wúlò fún un mọ́.

‘‘ Kódà àwọn méjèèjì ti tún jẹwọ́ fáwọn ọlọ́pàá pé kì í ṣe olóògbé yìí làwọn kọ́kọ́ pa, wọ́n ní àwọn ti fìgbà kan pa àwọn mẹ́rin kan sẹ́yìn, táwọn sì ti forí wọn ṣètùtù Oṣólẹ̀’’.

Ní ìparí ọ̀rọ̀ rẹ̀, Alukoro ní ọ̀gá ọlọ́pàá pátápátá ní ìpínlẹ̀ Ògùn tí lóun kò ní í fojú tó dáa wo àwọn ọ̀daràn gbogbo tí wọ́n fẹ́ sọ ìpínlẹ̀ Ògùn di ibùgbé wọn, àfi kí wọ́n fi agbègbè ọhún sílẹ̀ ní kíá.

Akẹ́kọ̀ọ́ ilé-ẹ̀kọ́ girama mẹ́fà rí ẹ̀wọ̀n he

Fẹ́mi Akínṣọlá

Àwọn àgbà sọ pé,ẹni bá ṣe ohun tẹ́nìkan ò ṣe rí, kò sí n tó burú, bí ojú u rẹ̀ bá rí n tẹ́nìkan ò rí. Àsamọ̀ yìí ló lọ pẹ̀lú bí à Nlwọn akẹ́kọ̀ọ́ mẹ́fà tí wọ́n lọ́wọ́ nínú ikú olùkọ́ wọn kan ní orílẹ̀ èdè France ti rí ẹ̀wọ̀n he.

Ní ọdún 2020 ní ìṣẹ̀lẹ̀ náà wáyé ní orílẹ̀ èdè France níbi tí àwọn kan ti gé orí olùkọ́, Samuel Paty fẹ́sùn wí pé ó fi àwòrán ẹ̀fẹ̀ Ànọ́bì hàn ní yàrá ìkẹ́kọ̀ọ́.

Ní ìwájú ilé ẹ̀kọ́ tó ti ń ṣiṣẹ́ olùkọ́ ni wọ́n pa Paty sí.

Ilé ẹjọ́ ní ọ̀kan lára àwọn akẹ́kọ̀ọ́ náà jẹ̀bi pé ó parọ́ nǹkan tó ṣẹlẹ̀ ní kíláàsì gan-an, tí wọ́n sì ní àwọn yòókù jẹ̀bi ẹ̀sùn pé wọ́n tọ́ka Paty sí ẹni tó pa á.

Ẹ̀wọ̀n oṣù mẹ́rìnlá sí ọdún méjì ni ilé ẹjọ́ dá àwọn akẹ́kọ̀ọ́ náà.

Ọ̀kan lára àwọn akẹ́kọ̀ọ́ náà tó jẹ́ obìnrin ni wọ́n ní ó sọ fún àwọn òbí rẹ̀ pé Paty lé gbogbo àwọn akẹ́kọ̀ọ́ tó jẹ́ mùsùlùmí kúrò ní yàrá ìkẹ́kọ̀ọ́ kó tó fi àwòrán náà hàn.

Àmọ́ ìwádìí ní ọmọbìnrin náà kò sí ní kíláàsì lọ́jọ́ tí ìṣẹ̀lẹ̀ náà wáyé tí ilé ẹjọ́ sì ní ó jẹ̀bi irọ́ pípa àti pé ó sọ àwọn nǹkan tó da omi àláfíà rú.

Àwọm márùn-ún yòókù, tí ọjọ́ orí wọn wà láàárín ọdún mẹ́rìnlá sí mẹ́ẹ̀dógún lásìkò tí ìṣẹ̀lẹ̀ náà wáyé, ni ilé ẹjọ́ ní wọ́n jẹ̀bi pé wọ́n fi olùkọ́ náà sínú ewu.

Ẹni tó ṣekúpa olùkọ́ náà, Abdoullakh Anzorov, ọmọ ọdún méjìdínlógún ni àwọn ọlọ́pàá yìbọn pa lásìkò ìṣẹ̀lẹ̀ náà.

Sáàkejì mi yìí , iná mọ̀nàmọ́ná yóó dúróore – Dapo Abiodun

Fẹmi Akinsola

Sé wọ́n ní ohun tó bá n dunni,n náà ní-ín pọ̀lọ́rọ̀ ẹni. Gómìnà Dapo Abiodun ti ìpínlẹ̀ Ògùn ti ní òun yóó sa akitiyan láti ríi pé ìṣòro iná mọ̀nàmọ́ná dópin kí òun tó kúrò ní ìṣèjọba gẹ́gẹ́ bí i Gómìnà.

Abiodun, ẹni tí ilé ẹjọ́ kòtẹ́milọ́rùn kéde pé òun ló jáwé olúborí nínú ètò ìdìbò Gómìnà tó kọjá, sọ fún iléeṣẹ́ Channels TV pé òun ṣetán láti se ju bí òun sese tẹ́lẹ̀ lọ ní ìpínlẹ̀.

“Èròngbà mi fún ọdún mẹ́rin sáà kejì yìí ni láti rí i pé iná mọ̀nàmọ́ná kò sẹ́jú mọ́ ní ìpínlẹ̀ Ogun kí ń tó kúrò ní ìṣèjọba.”

Gẹ́gẹ́ bí ó se ṣàlàyé ó ní ìjọba òun yóò bẹ̀rẹ̀ sí ní má a tún àwọn ilé ẹ̀kọ́ ìjọba ṣe fún ìgbáládùn àwọn akẹ́kọ̀ọ́ káàkiri ìpínlẹ̀.

“Ó tó ẹgbẹ̀rún kan ilé ẹ̀kọ́ tí a ti tún kọ́, tí a dẹ̀ tún se àtúnṣe sí wọn láàrin ọdún mẹ́rin.”

Ó fikún pé ìṣèjọba òun ti ṣe àtúnṣe àwọn ojú pópónà, kíkọ́ ilé ìwòsàn àti pípèsè iṣẹ́ fún àwọn ọ̀dọ́.

Bákan náà Gómìnà tún fi ogun rẹ̀ gbárí pé ìpínlẹ̀ Ògùn lè dá dúró láì gba owó lọ́wọ́ ìjọba àpapọ̀ nítorí bí ọrọ̀ ajé ṣe ń gbòòrò si ní ìpínlẹ̀ náà.

“Ó dá mi lójú pé ẹ mọ̀ pé ìpínlẹ̀ Ògùn ló ń léwájú nínu àwọn ohun àmúṣajé wọn.

Ìjọba àpapọ̀ kọ̀ faramọ́ bówó gáàsì ìdáná ṣe
gbẹ́nu ókè

Fẹmi Akinṣọlá

Ìjọba àpapọ̀ ilẹ̀ Nàìjíríà ti kọminú lórí owó gọbọi tí aráàlú ń ra gáàsì ìdáná, léyì í tó ti mú kí wọ́n gbé ìgbìmọ̀ kan kalẹ̀ láti ṣètò bí owó orí gáàsì ìdáná yóò fi wálẹ̀ láàrin ọ̀sẹ̀ kan ti kò sì níí sí ìdíwọ́ fún ìpèsè rẹ̀.

Mínísítà abẹ́lé fọ́rọ̀ epo rọ̀bì (tó ń mójú tó ọ̀rọ̀ gáàsì), Ekperikpe Ekpo, n ló ti dá sí àwọn ìpèníjà tó ń dojú kọ ìpèsè gáàsì náà àti oye tí wọ́n n tà á nígboro.

Olùrànlọ́wọ́ lórí ètò ìròyìn fún Mínísítà ọ̀ún, Louis Ibah, n lo wí pé bí owó kílò gáàsì kan ṣe fò sókè láti ẹẹdẹgbẹrin náírà sí ẹẹdẹgbẹrun náírà bí oye tó kéré jù láwọn agbègbè kan ló mú kí Mínísítà náà ó dá sí ọ̀rọ̀ náà.

Ìròyìn fi yé ni pé owó orí kílò kan gáàsì ti ń rá bàbà láàrin ẹgbẹ̀fà náírà sókè láwọn agbègbè kan.

Ibah ṣàlàyé nínú àtẹ̀jáde tó fi síta pé, lára àwọn kókó tó mú kí owó gáàsì ìdáná ó gbẹ́nusókè ni ọwọ́n gógó dọ́là àti bí àwọn tó n ta gáàsì nígboro kò ṣe ríi gbà tó látọwọ́ àwọn tó n pèsè rẹ̀.

Àwọn lọ́gàálọ́gàá níléeṣèẹ́ ìwapo bíi Chevron, NMDPRA àti NNPCL ló péjú síbi ìpàdé tí Mínísítà náà pè ní olú iléeṣẹ́ àjọ NNPC l’Abuja.

Mínísítà náà tó wòye pé Nàìjíríà ní ànító àti àníṣẹ́kù àlùmọ́ọ́nì gáàsì wí pé bí àwọn iléeṣẹ́ ìwakùsà gáàsì àti epo rọ̀bì ṣe mú ṣíṣu gáàsì lóṣùká lọ òkè-òkun láì ṣe ìpèsè tí yóò kájú lílò rẹ̀ nílẹ̀ yí ni kò bójú mu tó.

Èyí ló mú kí Mínísítà náà ó gbé ìgbìmọ̀ kan dìde tí ọ̀gá-àgbà iléeṣẹ́ NMDPRA, Farouk Ahmed, yóó jẹ́ Alága rẹ̀, láti wo sàkun bí ìpèsè gáàsì lọ́pọ́ yanturu láàrin ìlú yóó ṣe wáyé láàrin ọ̀sẹ̀ kan tí owó rẹ̀ yóó sì wálẹ̀ dáadáa.

Ààrẹ Tinubu dá sí aáwọ̀ láàrin Akeredolu àti Aiyedatiwa

Fẹ́mi Akínṣọlá

Bí kò bá sí ìyípadà kankan ó ṣeéṣe kí Ààrẹ Bọla Ahmed Tinubu ti yanjú aawọ tó ń wáyé láàrin Gómìnà ìpínlẹ̀ Òǹdó, Arakunrin Rotimi Akeredolu àti igbákejì rẹ̀, Lucky Aiyedatiwa.

Ojútùú sí ọ̀rọ̀ yí kò ṣẹ̀yìn ìpàdé kan tí Ààrẹ ṣe nílé ìjọba lAbuja lálẹ́ ọjọ́ Ẹtì ọ̀sẹ̀ yìí níbi tí Ààrẹ ti ní kí àwọn tí ọ̀rọ̀ náà gbérù gba àlàáfíà láàyè.

Níbi ìpàdé náà la ti rí Abẹnugan ilé ìgbìmọ̀ aṣòfin Òǹdó, Ọladiji Ọlamide, igbákejì Gómìnà Òǹdó, Lucky Aiyedatiwa, Alága ẹgbẹ́ òṣèlú APC Abdullahi Umar Ganduje.

Níbi ìpàdé yí sì ni olórí ilé aṣòfin ìpínlẹ̀ náà ti kéde pé àwọn ti dáwọ ìgbésẹ̀ àti yọ Aiyedatiwa nípò dúró.

Èyí wáyé lẹ́yìn àfẹnukò wọn níbi ìpàdé náà tó gbà wọ́n tó wákàtí mẹ́fà.

Abẹnugan ilé ìgbìmọ̀ aṣòfin Òǹdó tó ka àbájáde ìpàdé àlàáfíà náà se , tí àwọn akọroyin ṣàlàyé pé, ’’Àkọ́kọ́, a máa gba àlàáfíà láàyè, ìkejì, a kò ní í túlé ká mọ, igbákejì Gómìnà yóó máa bá iṣẹ́ lọ gẹ́gẹ́ bí àfẹnukò ilé aṣòfin ’’

Yàtọ̀ sí pé Ààrẹ ní kí wọ́n dáwọ ìyọni nípò igbákejì Gómìnà Aiyedatiwa dúró, Ààrẹ tún pàṣẹ pé kí Aiyedatiwa máa bá ìṣàkóso ìpínlẹ̀ náà lọ títí tí Gómìnà Akérédolú yóó fi padà sípò.

Bẹ́ẹ̀ náà ló sọ pé kí wọ́n kó gbogbo àwọn ọlọ́pàá tí wọ́n kó dí ẹnu ọnà ilé aṣòfin kúrò ní kíákíá.

Ìyanjú aáwọ̀ yí lọ́jó Ẹtì wáyé lẹ́yìn nǹkan bí ọjọ́ méjì tí àwọn àgbààgbà ipinlẹ Ondo késí aarẹ pe ki o tara dásí ọ̀rọ̀ awuyewuye Ondo yìí kí ó má baà fa ìdẹnukọlẹ̀ ìṣèjọba.

Wọ́n tún késí adarí ẹgbẹ́ òṣèlú APC kí wọ́n ṣe ìtọ́sọ́nà fáwọn tí ọ̀rọ̀ kan kí oníkálùkù baà lè tọwọ́ ọmọ rẹ̀ bọ aṣọ.

Nínú ìwé tí wọ́n kọ sí Ààrẹ, àwọn tó ṣagbátẹrù ọ̀rọ̀ yí, Reuben Fasoranti àti akọ̀wé Bakkita Bello rọ àwọn ilé aṣòfin láti má ṣe yọ Gómìnà tàbí igbákejì rẹ̀ nípò.

Láti ìgbà tí Gómìnà Akeredolu padà dé láti ìrìnàjò níbi tó ti lọ gba ìtọjú ni wàhálà ti bẹ̀ sílẹ̀ ní ìpínlẹ̀ Òǹdó.

Ọ̀sẹ̀ àkọ́kọ́ nínú oṣù kẹ̀sán ni Akeredolu padà dé sí Nàìjíríà lẹ́yìn oṣù mẹ́ta tó sì ti ń ṣe àkóso ìjọba láti ìlú Ìbàdàn tíí ṣe olú ìlú ìpínlẹ̀ Ọ̀yọ́.

Ọmọ lánlọọ̀dù gún ayálégbé baba rẹ̀ pa

Ọrẹ Òtítọ́jù

Ẹni bá pe soso,ó di dandan kí ó rí soso
lọ̀rọ̀ dà báyìí,bí àwọn ọlọ́pàá téṣàn agbègbè Ilajẹ-Ajah, ní ìpínlẹ̀ Èkó, ṣe ń wá Ọ̀gbẹ́ni Taiwo Adebayọ, ọmọ bàbá onílé kan tó wà l’Ójúlé kẹrìnlélógún, Òpópónà Adewumi, nílùú Ilajẹ-Ajah. Ẹ̀sùn táwọn ọlọ́pàá fi kàn án ni pé ó gún Olóògbé Shina Oluwaṣẹgun tí í ṣe ọ̀kan lára àwọn ayálégbé bàbá rẹ̀ pa nítorí ààyè ìgbọ́kọ̀sí táwọn méjèèjì ń jà sí

Oun tí a gbọ́ ni pé ní àsálẹ ọjọ́ Àìkú, ọjọ́ kọkàndílógún, oṣù Kọkànlá yìí, ni Taiwo lọ jí olóògbé náà lẹ́yìn tó ti sùn lẹyin tó dé láti ẹnu iṣẹ́ dẹrẹba ọkọ akerò tó ń ṣe lágbègbè náà pẹ̀lú mọto kórópe rẹ̀ kan. Ohun tí Taiwo ń fẹ́ lọ́wọ́ olóògbé náà ni pé kó wáá gbé mọ́tò kórópe tó fi ń ṣiṣẹ́ kúrò níbi tó páàkì rẹ si, wọn ni ibi to gbe e si ko bojumu. Ṣugbọn nigba ti oloogbe maa debi to paaki mọto rẹ si o ri i pe ibi gan-an toun maa n paaki ọkọ oun si lati aimọye oṣu sẹyin naa lo wa. Gbogbo akitiyan oloogbe lati sọ fun ọmọ baba lanlọọdu rẹ pe oun ko kọja aaye oun ni ko wọ ọ leti rara, to si faake kọri pe afi ko gbe mọto rẹ kuro nibi to wa. Bi oloogbe ṣe wọnu mọto naa lati wa a kuro ni Taiwo bá tún yọ ọbẹ aṣóóró kékeré kan to wa lapo rẹ jade, to si bẹrẹ si i fi gun olóògbé yánnayànna ni gbogbo ara.

Ọgbẹni Matthew toun náà jẹ́ ọ̀kan lára àwọn ayalegbe ibi tí ìṣẹ̀lẹ̀ náà ti wáyé sọ pé niṣoju oun niṣẹlẹ ọhun fi waye, ati pe ariwo lasan lawọn mejeeji n pa mọ ara wọn telẹ, nigba to ya ni oloogbe ba gbiyanju lati gbe mọto rẹ kuro nibi to n bi Taiwo ninu, láì mọ pé ọbẹ wà lọ́wọ́ Taiwo, tó sì fi gún un pa.

Ọgbẹni Shonibarẹ Faid tí í ṣe ẹgbọn olóògbé náà loun gba ipe pajawiri kan ni, nigba toun si maa dele taburo oun n gbe, ṣe loun ba a ninu agbara ẹjẹ to ti ku silẹ, ati pe mọṣuari ileewosan ‘Mainland Hospital, to wa niluu Yaba, nipinlẹ Eko lawọn gbe e lọ.

Ó ní, ‘‘Mo ti lọọ fiṣẹlẹ náà tó àwọn ọlọ́pàá agbègbè ibi tí àbúrò mi ń gbé létí, mo ṣalaye gbogbo ohun tawọn eeyan sọ fun mi nipa iṣẹlẹ to gbẹmi rẹ fun wọn pata. O yẹ ka ti lọọ ṣeto isinku rẹ ni ilana ẹsin Islaamu, ṣugbọn awọn ọlọpaa lo ni ka duro na, kawọn ṣayẹwo sara oloogbe naa lati mọ koko ohun to pa a.

Ohun tó ń bí mi nínú nípa ọrọ̀ ọ̀hún ni pé àwọn kọọkan tọrọ náà ṣoju wọn sọ pé ṣe niya to bi ọdaran náà, ìyẹn ìyàwó lanlọọdu, ń sọ fọmọ rẹ̀ pé kó tẹra mọ́ bó ṣe ń gún olóògbé títí tó fi kú.

Àti ìyàwó onílé tí í ṣe ìyá tó bí Taiwo, àti àwọn aráalé gbogbo ni wọ́n ti sá lọ báyìí, ìbẹrù pé káwọn ọlọ́pàá má wàá kó gbogbo wọn fóhun tí wọn kò mọ̀ nípa rẹ̀ tàbí káwọn ọdọ àdúgbò tínú ń bí wáá kojú ìjà sí wọn ló fà á tí wọ́n fi sá kúrò nílé báyìí.

Mo mọ ẹni tó pa ẹ̀gbọ́n mi–Àbúrò Mohbad

Fẹ́mi Akínṣọlá

Bí ọ̀rọ̀ ńlá kò bá tíì tán,èèyàn ńlá ò ní-ín sinmi.
Adura Alọba, tí í ṣe àbúrò àti ọmọ tí wọ́n bí lé olóògbé Ilerioluwa Alọba, táwọn èèyàn mọ̀ sí Mohbad, ti dárúkọ ẹni tó ní ó dá òun lójú pé ó pa bọ̀ọ̀dá òun.

Níwájú àwọn ìgbìmọ̀ tí wọ́n ń wádìí ikú tó pa Mohbad, nílé-ẹjọ́ tó wà ní agbègbè Ita-Ẹlẹwa, Ikorodu, ní ìpínlẹ̀ Èkó, ni Adura ti là á mọ́lẹ̀ pé ọ̀rẹ́ àti kékeré ni ẹgbọn òun, àti ẹni tí wọ́n ń pè ní Primeboy, tó gbẹ̀mí Mohbad.

“Àbúrò Mohbad gangan ni mi. Ọmọ ogún ọdún ni èmi. Òun ni ọmọ ẹlẹ́ẹ̀kejì, nígbà ti èmi jẹ́ ẹlẹ́ẹ̀kẹta. Ọ̀dọ̀ ẹ̀gbọ́n mi àtìyàwó rẹ̀ ni mo ń gbé. Wọ́n máa ń jà gan-an nínú ilé, lọ́pọ̀ ìgbà sì níyì, bàbá mi ló máa ń wá bá wọn yanjú ẹ. Wọ́n tún ja ìjà kan ṣaájú eré tí Mohbad ṣe kẹ́yìn nílùú Ikorodu, àmọ́ èmi ò sí níbẹ̀ nígbà tóun àti Primeboy ń jà. Wumi ló padà sọ fún mi pé wọ́n jà. Tí wọn bá ní kí n mú olórí afurasí lórí ẹni tó pa ẹ̀gbọ́n mi, Primeboy ni.

“ Bó tilẹ̀ jẹ́ pé mi ò sí níbẹ̀ lásìkò tí wọ́n jà, gbogbo bi ọ̀rọ̀ ṣe lọ ni Wumi ṣàlàyé fún mi pátá, mo sì gbà á gbọ́ . Nígbà tá a délé lẹ́yìn eré tó lọ ṣe, ìsàlẹ̀ lèmi wà nígbà tí gbogbo wọn ti gòkè lọ. Nígbà tó yá tí mo fẹ́ lọ fún ẹ̀gbọ́n mi ní fóònù rẹ̀ nínú yàrá rẹ̀, orí ariwo àti àríyànjiyàn ni mo bá àwọn àtìyàwó wọn nítorí fìsà Canada.

“ Kí nọ́ọ̀sì tó wá rárá, gágá ni ara bọ̀ọ̀dá mi yá, bó tilẹ̀ jẹ́ pé mo rí ipa ẹ̀jẹ̀ ní ẹgbẹ́ ìgúnpá rẹ̀ lọ́jọ́ Túsìdeè. Èmi ni mo ṣe Indomie tí gbogbo wá jẹ lọ́jọ́ náà. Lórí ọ̀rọ̀ pé ẹ̀gbọ́n mi ní àrùn ọpọlọ, irọ́ pátá gbáà ni o. Kokooko lara rẹ̀ le, kò sì sí ọ̀rọ̀ pé ó ti ní gán-án-gàn-àn-gán rí. Primeboy ló pa ẹ̀gbọ́n mi o”.

Atótónu Adura, àbúrò Mohbad nìyí níwájú àwọn tó n ṣèwádìí ikú ẹ̀gbọ́n rẹ̀.

A máa kàńpá fún INEC láti máa fi èsì ìbò sórí ayélujára – Ilé aṣòfin àgbà

Fẹ́mi Akínṣọlá

Ìgbìmọ̀ tó ń rí sí ètò ìdìbò nílé aṣòfin àgbà Nàìjíríà ti ní àwọn máa gbé òfin kalẹ̀ láti pọ́n ní dandan fún àjọ tó ń rí sí ètò Nàìjíríà, INEC láti máa fi èsì ìbò sórí ayélujára lásìkò ìbò.

Alága ìgbìmọ̀ náà, Aṣòfin Sharafadeen Alli ló sọ̀rọ̀ náà lásìkò tó ń bá Iléeṣẹ́ ìròyìn Channels TV sọ̀rọ̀ lọ́jọ́ Ìṣẹ́gun.

Alli ní òfin tó wà nílẹ̀ báyìí kò ṣe é ní dandan fún INEC láti máa fi èsì ìbò sórí ayélujára àmọ́ tí àwọn ti ń gbèrò láti yí òfin náà padà.

Ó ní ọ̀kan lára ètò tí ìgbìmọ̀ àwọn fẹ́ gbájúmọ́ nìyí tó fi mọ́ àwọn ọ̀rọ̀ tó jọ mọ́ ètò ìdìbò mìíràn.

Ó fi kún un pé àwọn tún ń mójútó láti ri pé gbogbo ẹ̀sùn tó máa ń wáyé ṣáájú ètò ìdìbò ni ilé ẹjọ́ yanjú kí ètò ìdìbò gangan tó wáyé.

Aṣòfin náà ni èyí máa mú àdínkù bá bí àwọn awuyewuye tó yẹ kó ti parí ṣáájú ètò ìdìbò ṣe máa ń wólẹ̀.

Bákan náà ló fi kun pé àwọn tún ń gbèrò láti rí pé gbogbo ẹ̀hónú tó ń wáyé lẹ́yìn ìdìbò ni ilé ẹjọ́ parí ṣáájú kí wọ́n tó búra wọlé fún ẹni tí ìlú bá yàn.

Ó ní èyí máa mú àdínkù bá bí ètò ìdìbò ṣe máa ń wáyé ní àwọn ìpínlẹ̀ kan lẹ́yìn ètò ìdìbò gbogbogbo.

Ó tẹ̀síwájú pé àwọn ohun èlò ẹ̀rọ̀ INEC ni àwọn tún ń gbèrò láti ṣe àmójútó rẹ̀ nítorí ohun ìyàlẹ́nu ló jẹ́ fún àwọn pé IReV kò ṣiṣẹ́ bó ṣe yẹ lásìkò ìbò tó kọjá.

Alli ni àwọn máa mójútó gbogbo àwọn nǹkan wọ̀nyí kí àsìkò ìbò mìíràn tó gbéra sọ.