Ó lágbára o! Wọ́n bá òkú ọ̀gá tó ni òtẹ́ẹ̀lì “Water View”, ninu yara kan n’llọrin

Fẹ́mi Akínṣọlá

Hùn! Ògédé ẹni Ọlọ́run bá pamọ́ nìkan ló yọ lọ́wọ́ ewu.
Títí di àsìkò yìí , kò tí ì sẹ́ni tó mọ ohun tó ṣokùnfà ikú Adeniyi Ojo, ọga olotẹẹli kan tí wọ́n ń pè ní Water View, tó wà lágbègbé GRA, nílùú Ìlọrin, ní ìpínlẹ̀ Kwara. Níṣe ni wọ́n kàn bá òkú rẹ̀ nínú ọ̀kan lára àwọn yàrá òtẹ́ẹ̀lì rẹ̀, láì mọ irú ikú tó pa á.

Nínú àtẹ̀jáde kan tí Alukoro iléeṣẹ́ ọlọ́pàá ìpínlẹ̀ Kwara fi ṣọwọ́ sáwọn akọ̀ròyìn lọ́jọ́ Ẹtì, ọjọ́ kọkàndínlọ́gbọ̀n, oṣù Kẹsàn-án yìí, ló ti fìdí ìṣẹ̀lẹ̀ náà múlẹ̀, ó ní ọkùnrin kan, Kẹhinde Ọlaṣẹinde, tó jẹ́ ọ̀kan lára àwọn òṣìṣẹ́ òtẹ́ẹ̀lì náà ló mú ẹ̀sùn wá sí iléeṣẹ́ ọlọ́pàá pé àwọn rí òkú Olùdásílẹ̀ àti alákòóso iléètura Water View, nínú ọ̀kan nínú àwọn yàrá òtẹ́ẹ̀lì ọ̀hún, táwọn kò sì mọ irú ikú tó pa á.

Ajayi ní àwọn ti gbé ọkùnrin náà lọ sí iléèwòsàn, tí wọ́n sì ti fìdí ẹ múlẹ̀ pé ó ti kú. Ó fi kún un pé wọ́n ti gbé òkú olóògbé yìí lọ sí yàrá ìgbókùú-sí fún àyẹ̀wò láti mọ irú ikú tó pa á.

Ó ní Kọmísánnà ọlọ́pàá ní Kwara, CP Victor Ọlaiya, ti pàṣẹ kí ìwádìí bẹ̀rẹ̀ lórí ikú òjìji tó pa Adeniyi ní kíá.

Àádọ́ta mílíọ̀nù náírà ni àwọn tó jí akọrin wa gbé n béèrè fún – ìjọ CAC

Ọrẹ Òtítọ́jù

Ṣé wọ́n ní ọ̀kánjúà ń dà
gbà, ọgbọ́n inú rẹ̀ ń rewájú.
Àwọn ọmọ ìjọ CAC Oke Igan nílùú Akure tó jẹ́ olú-ìlú ìpínlẹ̀ Òǹdó ni wọ́n ti bẹ̀rẹ̀ ádùrá ní kíkan látàrí àwọn akọrin ìjọ ọ̀hún táwọn ajínigbé kó lọ.

Ohun tí a gbọ́ ni pé àwọn ọmọ ìjọ ọ̀hún láàárọ̀ ọjọ́ Àbámẹ́ta péjú láti rawọ́ ẹ̀bẹ̀ sí Ọlọ́run lórí ìtúsílẹ̀ àwọn tí wọ́n jí gbé ọ̀hún.

Láti ìta ilé ìjọsìn náà ni ariwo ádùrá náà ti ń dun lákọlákọ.

Adarí ìjọ náà, àlùfáà Benjamin Akanmu, to jẹ alakoso ijọ CAC ni ẹkun Odubanjo wi pe, ilu Ifọn ni awọn akọrin naa n lọ fun aṣalẹ onigbagbọ fun eto isinku baba to bi aladura ijọ wọn to doloogbe.

Ó ṣàlàyé pé ní ọjọ́ Ẹtì ni wọ́n gbéra kúrò nílùú Akure tó sì yẹ kí wọn padà dé lọjọ Àbámẹ́ta lẹyìn ìsìnkú.

“Ní nǹkan bíi aago mẹ́rin ìrọ̀lẹ́ ọjọ́ Ẹtì ni ẹnìkan pè mí pé òun rí ọkọ̀ ìjọ wa lẹ́bàá ọ̀nà lágbègbè Ẹlẹgbẹka tí kò sì sí ẹnikẹ́ni nínú rẹ̀.

Ẹ kó ìbọn yín lọ síléeṣẹ́ ọlọ́pàá ìpínlẹ̀ Ọ̀yọ́ fún àtùngbéyẹ̀wò –Ọ̀gá ọlọ́pàá

Fẹ́mi Akínṣọlá

Ṣé wọn ní tojútìyẹ́ ni àparò fi í ríran.Kómi ó má ba à wá tẹ̀yìn wọ̀gbín lẹ́nu látàrí bí àwọn ẹrúukú ṣe ń kó oríṣìíríṣìí ìbọn àtàwọn ohun ìjà olóró pamọ́ sílé, ọgá àgbà ọlọ́pàá ìpínlẹ̀ Ọ̀yọ́, CP Adebọla Hamzat, ti kìlọ fún gbogbo àwọn èèyàn náà láti tètè lọ jọ̀wọ́ àwọn nǹkan ìjà olóró náà sílẹ̀ fáwọn agbófinró tàbí kí òun tẹsẹ̀ bọ ṣòkòtò kan náà pẹ̀lú wọn.

Nígbà tí Alukoro iléeṣẹ́ ọlọ́pàá ìpínlẹ̀ Ọ̀yọ́ ń lu aago ìkìlọ̀ náà ṣétí àwọn tọ́rọ̀ ọ̀hún kan lórúkọ ọgá àgbà ọlọ́pàá, ló ti sọ pé ọ̀rọ̀ yìí kò yọ àwọn tó ní ìwé àṣẹ fún ìbọn wọn sílẹ̀.

Ìyẹn ni pé bí àwọn tó ń lo ìbọn lọ́nà àìbófin mu gbọdọ̀ ṣe jọ̀wó ẹ̀ sílẹ̀, káwọn tó ń lò ó lọ́nà tó bófin mu náà fi tiwọn pàápàá sílẹ̀ fún àyẹ̀wò àti àtúnṣe ìwé àṣẹ wọn.

Oṣifẹsọ ní èyí wà ní ìbámu pẹ̀lú òfin ọdún 2004, èyí

tó de àwọn ohun ìjà olóró, ìdí nìyẹn tí òun fi rọ àwọn olùgbé ìpínlẹ̀ Ọ̀yọ́ tí irú ohun ìjà báyìí bá wà níkàáwọ́ wọn láti kó wọn lọ sí téṣàn ọlọ́pàá tó bá wà nítòsí wọn, àti pé ìgbésẹ̀ náà kò ná wọn lówó kankan.

Gẹ́gẹ́ bí ó ṣe sọ, “Ìkéde tí CP Hamzat ṣe yìí wáyé lẹ́yìn tí Ọgá àgbà ọlọ́pàá lórílẹ̀-èdè yìí, AIGP Kayọde Ẹgbẹtokun, pàṣẹ pé kí àwọn ọlọ́pàá káàkiri ìpínlẹ̀ gbogbo lórílẹ̀-èdè yìí wá gbogbo ọ̀nà láti paná ìwà ọ̀daràn nílẹ̀ yìí, èyí tó ń wáyé látàrí bí àwọn nǹkan ìjà olóró ṣe pọ̀ láwùjọ.

Àtẹ̀jáde ọ̀hún ṣàlàyé pé èyí kò yọ àwọn tó láṣẹ láti ní irú àwọn ohun ìjà yìí lọ́wọ́, kí wọ́n baà lè ṣàtúngbéyẹ̀wò lánsẹ́nsì wọn.

Ó wáá rọ àwọn aráàlú tó bá ní ohunkóhun tí wọ́n fẹ́ ẹ́ fi tó àwọn agbófinró létí láti pe ilé-iṣẹ́ ọlọ́pàá sórí àwọn nọ́mbà wọ̀nyí:0705549513 àti 08081768614 pẹ̀lú nọ́mbà ètò ààbò ìpínlẹ̀ Ọ̀yọ́, ìyẹn 615.

Ó gbọdọ̀ tọrọ àforíjìn – Afẹ́nifẹ́re sí Ọbásanjọ́

Fẹ́mi Akínṣọlá

Ṣé wọ́n ní tẹni n tẹni àkísà ni tààtàn ẹgbẹ́ Afẹ́nifẹ́re ilẹ̀ Yorùbá ti korò ojú sí Ààrẹ Nàìjíríà tẹ́lẹ̀rí, Olóyè olusegun Obasanjo lórí ìhùwàsí rẹ̀ s’áwọn Orí-adé ìpínlẹ̀ Ọ̀yọ́.

Fídíò tó ṣàfihàn bí Obasanjo ṣe peṣẹ́ fáwọn ọba alayé náà pé kí wọ́n dìde kí wọ́n sì tún jókòó lásìkò tí Gómìnà Seyi Makinde dé sí ibi ètò tí wọ́n wà di iṣu ata yán-an yàn-an pàápàá jùlọ lórí ayélujára.

Nínú àtẹ̀jáde tó fi síta lẹ́yìn ìpàdé rẹ̀ ní Ọjọ́rú nílùú Àkúrẹ́, Afẹ́nifẹ́re sọ pé Obasanjo gbọdọ̀ tọrọ àforíjìn lọ́wọ́ àwọn Orí-adé tọrọ kàn.

Afẹ́nifẹ́re sọ nínú àtẹ̀jáde tí akọ̀wé ẹgbẹ́ náà, Ọ̀gbẹ́ni Jare Àjàyí kà síta pe “ìyàlẹ́nu ní ìṣẹ̀lẹ̀ tó wáyé lọ́jọ́ kẹẹ̀ẹ́dógún oṣù kẹ̀sán án nílùú Iṣẹyin jẹ́ níbi tí Obasanjo ti pàṣẹ fáwọn ọba alayé tó sì tún sọ fún wọn pé kí wọ́n jókòó padà.

Níṣe ló dàbí ẹni pé ọ̀gágun kan ló ń peṣẹ́ fáwọn ọmọ ogún.

Àwa Yorùbá bọ̀wọ̀ fún àṣà wa àtàwọn tó jẹ́ aṣojú àṣà wa bákan náà eléyìí tí í ṣe àwọn ọba alayé.

Àti wípé kìí ṣe lásán ni Yorùbá máa ń pe àwọn ọba ní igbákejì òrìṣà.

Ìdí èyí ni àwa ẹgbẹ́ Afenifere fi képe Ààrẹ Nàìjíríà tẹ́lẹ̀ láti tọrọ àforíjìn lọ́wọ́ àwọn ọba alayé yìí.

A kò gbọdọ̀ fààyè gba ẹnikẹ́ni láti tàbùkù àṣà àti ìṣe wa nílẹ̀ Yorùbá.

Èyí gan an làwọn Ọba kò ṣe máa dìde láwùjọ láti kí ẹnikẹ́ni gẹ́gẹ́ bí ó ṣe wà ní ilẹ̀ Gẹ̀ẹ́sì àti káàkiri àgbáyé.”

Ẹ̀wẹ̀, Afenifere tún képe ìjọba àpapọ̀ lórí ètò àbò tó mẹ́hẹ lórílẹ̀ èdè Nàìjíríà.

Ẹgbẹ́ náà ní ìjọba gbọdọ̀ ri pé ètò àbò múlẹ̀, àti pé ìjọba gbọdọ̀ wá iṣẹ́ fáwọn ọ̀dọ̀ torí ọwọ́ tó bá dilẹ̀ ni Èṣù máa ń bẹ́ níṣẹ́ k’íṣẹ́.

Afenifere ní ìjọba gbọdọ̀ ri pé àwọn agbésùnmọ̀mí, jàǹdùkú àtàwọn tó ń tì wọ́n lẹ́yìn gbọdọ̀ fojú winá òfin.

Olórí ilé aṣòfin Òǹdó ké gbàjarè,pé wọ́n ń lépa ẹ̀mí òun

Fẹ́mi Akínṣọlá
Ṣé wọ́n ní a kìí dákẹ́ ẹ́ kú.Ó jọ pé ọ̀rọ̀ awuyewuye lórí ìyọninípò igbákejì Gómìnà ìpínlẹ̀ Òǹdó tún ti gba ọ̀nà mìíràn yọ pẹlú bí Olórí ilé aṣòfin Òǹdó ṣe ké gbàjare pe káwọn agbófinró ṣàájú òun torí ìdúnkokò ẹ̀mí.
.
Olamide Oladiji tó jẹ́ olórí ilé sọ pé àti òun àti àwọn ọmọ ilé ní ọkàn àwọn ò balẹ̀ mọ́ láti ìgbà tí àwọn bẹ̀rẹ̀ ìgbésẹ láti yọ igbákejì Gómìnà ìpínlẹ̀ Òǹdó, Lucky Aiyedatiwa kúrò nípò.

Lásìkò tó ń bá àwọn akọ̀ròyìn sọ̀rọ̀ ní Àkúrẹ́ ló ke gbàjarè yìí lọ́jọ́ Ajé.

Gẹ́gẹ́ bí ó ṣe wí , ó ní ”lówùúrọ̀ yìí ni mo tún bá ẹbọ táwọn èèyàn kan gbé sí iwájú ilé ìgbé ti ìjọba là kalẹ̀ fún mi”

Ó ní ilé ìgbé yi tó nílò àtúnṣe jẹ́ ibi tóun kò sábà máa lò sí.

Ó ní ìpàdé ẹ̀ẹ̀kànkan àwọn ọmọ ilé aṣòfin ìpínlẹ̀ làwọn máa ń ṣe níbẹ̀.

”Lówùúrọ́ yí ni mo rí ẹbọ tí èèyàn kan gbé sí iwájú ilé yìí. Yàtọ̀ sí eléyìí mo ti ń gba ìpè lórí ago táwọn kan fi ń dúnkookò mọ́ ẹ̀mí mi àti àwọn ọmọ ilé aṣòfin mí-ìn.Ìdààmú yí pọ̀ lórí ẹ̀mí mi”

Mohbad wẹ̀jẹwẹ̀mu láwùjọ ẹni ibi. – Tunde Bakare

Fẹ́mi Akínṣọlá

Àwọn àgbà bọ̀ wọ́n ní àgùtàn tó bá ajá rìn, yóó jẹ imí, bẹ́ẹ̀ wọ́n ní ẹgbẹ́ buúkú ba ìwà rere jẹ́.
Àṣamọ̀ yìí jọ mọ́ n tí
Pásítọ̀ àgbà ìjọ Citadel Global Community Church, Tunde Bakare, sọ pé gbajúgbajà olórin tàkasúùfé tó jáde láyé, Ilerioluwa Aloba ‘Mobad’ bá àwọn ẹni ibi dòwòpọ̀ nígbà ayé rẹ̀.

Bakare ló sọ ọ̀rọ̀ náà níbi ìwàásù rẹ̀ nínú ìjọ The Envoy Nation, tó wà nílẹ̀ Gẹ̀ẹ́sì

Nínú ìwàásù náà tó wáyé lásìkò àjọ àjọ̀dún ọdún Kejì ìjọ náà ni Bakare ti sọ pé àwọn èèyàn búburú ni Mohbad bá rìn lásìkò tó wà láyé.
Tí ẹ kò bá gbàgbé, ọjọ́ Kejìlá, oṣù Kẹsan án, ọdún 2023 yìí ni Mohbad dágbéré fáyé, tí wọ́n sì sin òkú rẹ̀ lọ́jọ́ kejì.

Bakare sọ pé “ Mélòó nínú yín ló mọ Mohbad, olórin ọmọ Nàìjíríà tó jáde láyé lẹni ọdún mẹ́tàdínlọ́gbọ̀n?

“ Nígbà tó ń mu ọtí àti sìga, tó sì ń bá àwọn èèyàn búburú rìn, kò mọ̀ pé yóò kérè iṣẹ́ ọwọ́ rẹ̀ láìpẹ́ tí ẹ̀mí rẹ̀ yóó sì gé kúrú laipẹ ọjọ́.

“Mi ò da lẹ́bi o, mo kàn ń bi yín ni pé ṣé orúkọ ọmọlúàbí ni Mohbad?”

Ẹwẹ, lẹ́yìn tí fídíò ìwàásù náà gbòde lórí ayélujára, ọ̀pọ̀ aráàlú ló ti bẹ̀rẹ̀ sí ní bu ẹnu àtẹ̀ lu pásítọ̀ náà fún ọ̀rọ̀ rẹ̀.

Lára àwọn èèyàn tó ń sọ̀kò ọ̀rọ̀ sí Bakare ni gbajúgbajà òṣèré, Tonto Dikeh àti Femi Fani-Kayode.

Wàyí ò, ilé-iṣẹ́ ọlọ́pàá ti ṣe àyẹ̀wò òkú olóògbé náà láti mọ irú ikú tó pa á, ó sì ti ké sí àwọn aráàlú kí wọ́n ní sùúrù títí tí èsì àyẹ̀wò náà yóò fí jáde.

Egbẹ́ òṣìṣẹ́ NLC,TUC fárígá kéde ìyanṣẹ́lódì ọlọ́jọ́ gbọọrọ

Fẹ́mi Akínṣọlá

Ó ti pẹ́ tí àwọn èèyàn ti máa n sọ pé èdè kan ṣoṣo tí ìjọba gbọ́ kò ju ìyanṣẹ́lódì lọ, ní báyìí àgbáríjọpọ̀ ẹgbẹ́ òṣìṣẹ́ Nàìjíríà Nigeria Labour Congress, NLC àti Trade Union Congress, TUC ti panupọ̀ kéde pé àwọn yóó gùnlé ìyanṣẹ́lódì ọlọ́jọ́ gbọọrọ ní Nàìjíríà.

Ìkéde yí wáyé lẹ́yìn ìpàdé tí wọ́n ṣe lọ́jọ́ Ìṣẹ́gun tí wọ́n sì fẹnukò pé bẹ̀rẹ̀ láti ọjọ́ Ìṣẹ́gun ọjọ́ Kẹta oṣù Kẹwàá 2023 àwọn yóó bẹ̀rẹ̀ ìyanṣẹ́lódì náà.

Ṣaájú ní wọ́n ti fún ìjọba ní gbèdéke ọjọ́ méjìlá àti ìyanṣẹ́lódì ìkìlọ̀ ọlọ́jọ́ méjì láti fi jẹ́ kí ìjọba wá nǹkan ṣe sí ìnira tó dé ba aráàlú lẹ́yìn tí ìjọba yọ ẹ̀kúnwó epo bẹntiróò.

Ààrẹ NLC àti ti TUC Comrade Joe Ajaero àti Comrade Festus Osifo ló jọ buwọ́lu àtẹ̀jáde tó tẹ̀yìn ìpàdé yìí wáyé.

Wọ́n ní ní ìbámu pẹ̀lú àyájọ́ òmìnira Nàìjíríà àwọn náà ṣetán láti rí pé òmìnira tó péye fáwọn aráàlú nípa gbígba arawọn sílẹ̀ àti mímú àyánmọ́ arawọn ṣe fún ara wọn.

Ní báyìí ẹgbẹ́ òṣìṣẹ́ láwọn tikésí gbogbo àwọn ẹ̀ka ẹgbẹ́ náà láti bẹ̀rẹ̀ ìpalẹ̀mọ́ láti yan iṣẹ́lódì kí wọn sì gba ìgboro kan pẹlú ìwọ́de títí tí ìjọba yóò fi tẹ́tí sí àwọn ẹ̀dùn ọkàn táwọn fi ṣọwọ́.

Nínú ọ̀rọ̀ tí NLC àti TLC sọ nínú àtẹ̀jáde tí wọ́n fi síta, wọn ní kókó pàtàkì ni pé àti àwọn ẹgbẹ́ òṣìṣẹ́ àti ìjọba àríyànjiyàn kò sì lórí pé yíyọ ẹ̀kúnwo epo bẹntiró mú kí ara máa ni aráàlú púpọ̀.

Àmọ́ wọ́n ní ìjọba kọ̀ láti gbé ìgbésẹ̀ gẹ́gẹ́ bí ojúṣe wọn èyí tí yóó mú ìnira ẹbi àti òṣì tó kárí yìí dínkù láwùjọ.

”Ìjọba àpapọ̀ kàn dá ọgbọ́n lórísìí láti fọ̀rọ̀ jomi toro ọ̀rọ̀ pẹ̀lú ẹgbẹ́ òṣìṣẹ́ ní láti lè mú ìdẹ̀kùn bá aráàlú nítorí ẹ̀dínwó epo tí wọ́nyọ.”

Àwọn ẹgbẹ́ náà tẹ̀síwájú pé ìjọba kó fi ọ̀nà kankan tó bójúmu wá nǹkan ṣe sí àwọn ẹ̀dùn ọkàn ẹgbẹ́ òṣìṣẹ́ àti aráàlú gẹ́gẹ́ bí ó ṣe wà nínú ìlànà àjùmọ̀fẹnukò sí ti yóó mú kí ara dẹ aráàlú.

Torí náà àwọn olórí ẹgbẹ́ òṣìṣẹ́ ti wá sọ pé gbogbo ọ̀nà ni ìjọba ń gbà láti sọ ẹgbẹ́ òṣìṣẹ́ lẹ́nu pàápàá lójú òpó ayélujára tí wọ́n sì ń lo agbára wọn láti fún àwọn lọ́rùn dípò kí wọ́n fi agbára ọ̀hún mú ayé dẹrùn fáráràlú.

Ọkùnrin kan pàdánù $2.1 sórí ‘cryptocurency’

Fẹ́mi Akínṣọlá

Ṣé àwọn àgbà bọ wọ́n ní ajé ní-ín bojú ọ̀rẹ́ jẹ́.
Ní báyìí tí ọkùnrin tí wọ́n ń pè ní ‘King of Crypto’ yóó máa jẹ́jọ́ lórí onírúurú ẹ̀sùn jìbìtì, ọkùnrin ọmọ ilẹ̀ Gẹ̀ẹ́sì kan ti ṣàlàyé bí òun àti ọ̀pọ̀ èèyàn káàkiri àgbáyé ṣe pàdánù òbítíbitì owó sí iléeṣẹ́ Sam Bankman-Fried.

Títí di ìgbà tí iléeṣẹ́ náà fi lulẹ̀, Sunil Kavuri ṣì gbàgbọ́ pé Sam Bankman-Fried ṣì lè wá ọ̀nà àbáyọ sí ìṣòro tí wọ́n dojúkọ.

Bó tilẹ̀ jẹ́ pé iléeṣẹ́ King of Cryotp ti ń dàwó, Sunil gbàgbọ́ pé kò sí ewu lóko.

Èyí kò ṣẹ̀yìn àwọn ìrírí rẹ̀ nípa ìdòwòpọ̀ pẹ̀lú àwọn ilé-iṣẹ́ ńlá ńlá bíi ilé ìfowópamọ́ àti bó ṣe máa ń ṣòwò crypto ṣaájú.

Ìgbàgbọ́ rẹ̀ pọ̀ nínú Sam Bankman-Fried tó bẹ́ẹ̀ tó fi sọ pé kò sí ewu lóko.

Ẹnu rẹ̀ ló wà títí tó fi rí àtẹ̀jíṣẹ́ pé kò sí ànfààní láti gba owó jáde mọ́.

Èyí kò ṣẹ̀yìn bí iléeṣẹ́ FTX, tó jẹ́ iléeṣẹ́ tó tóbi jùlọ lágbàáyé nípa pàṣípààrọ̀ cryptocurency ṣe lulẹ̀.

Gbogbo òógùn ojú Sunil fun ọjọ́ pípẹ́ ló bá iléeṣẹ́ náà lọ lẹ́yìn tó pàdánù owó tí iye rẹ̀ jẹ́ $2.1 níbẹ̀

Ìròyìn ní ọgbẹni Sunil ni ọmọ ilẹ̀ Gẹ̀ẹ́sì tó pàdánù owó tó pọ̀ jùlọ nínú ìṣẹ̀lẹ̀ náà.

Àmọ́ yàtọ̀ sí Sunil ọ̀pọ̀ àwọn èèyàn bíi tirẹ̀ ló pàdánù owó nlá sílẹ́eṣẹ́ náà káàkiri àgbáyé, ó sì ti darapọ̀ mọ́ àwọn èèyàn náà láti pe FTX lẹ́jọ́ báyìí.

Sunil ni “ẹnìkan tilẹ̀ wà lórílẹ̀-èdè Turkey tó jẹ́ pé $600 nìkan ló kù lọ́wọ́ rẹ̀ lẹ́yìn tó pàdánù gbogbo owó rẹ̀ ṣọ́wọ́ FTX, nígbà tí ẹlòmíràn ní South Korea ti dèrò ilé ìwòsàn .”

Sunil ti bẹ̀rẹ ìrànlọ́wọ́ fún àwọn èèyàn láti ilẹ̀ Amẹ́ríkà, Canada, Argentina, Dubai, Turkey, Hong Kong, China àti Singapore lẹ́yìn ìṣẹ̀lẹ̀ ọ̀hún.

Púpọ̀ nínú wọn ló ti di ẹdun arinlẹ̀, nígbà tí àwọn mìíràn pàdánù owó tó lé ní òbítíbitì mílíọ̀nù.

Gbogbo wọn ló ń dúró de ìgbẹ́jọ́ rẹ̀ lọ́sẹ̀ tó ń bọ̀.

Ẹ̀sùn méje ọ̀tọ̀ọ̀tọ̀ tó ní ṣe pẹ̀lú ìwà jìbìtì ni àwọn aṣòfin ilẹ̀ Amẹ́ríkà fi kan Sam Bankman Fried.

Ọkùnrin ẹni ọdún mọ́kànlélọ́gbọ̀n náà, tó dá iléeṣẹ́ FTX ti sọ pé òun jẹ̀bi ẹ̀sùn tí wọ́n fi kan òun, àmọ́ yóò pe ẹjọ́ tako àwọn ẹ̀sùn ọ̀hún.

Yàtọ̀ sí òun, àwọn lọ́gàlọ́gà níléeṣẹ́ rẹ̀ náà ti gbà pé àwọn jẹ̀bi ẹ̀sùn tí wọ́n fi kàn wọ́n, wọ́n sì ṣetán láti sọ̀rọ̀ lórí bí iléeṣẹ́ náà ṣe dà wó.

FTX jẹ́ iléeṣẹ́ tí ọ̀pọ̀ gbàgbọ́ pé wọ́n lè kó owó wọn lé lórí fún òwò crypto ṣíṣe.

Lára àwọn kátàkárà tí àwọn èèyàn lè ṣe níléeṣẹ́ náà ni Bitcoin, àtàwọn owó ayélujára mìíràn.

Mílíọ̀nù mẹ́ṣàn-án èèyàn ló bá iléeṣẹ́ náà dòwòpọ̀ láti àwọn orílẹ̀-èdè bíi ọgọ́rùn ún.

Nígbà tí iléeṣẹ́ ọ̀hún dàwó, nǹkan bíi mílíọ̀nù kan èèyàn ni owó wọn bọ́ há nítorí wọn kò tètè gba àwọn owó náà jáde.

Kókó ẹ̀sùn tí wọ́n fi kan Sam Bankman Fried ni pé ó lo owó àwọn tó bá iléeṣẹ́ rẹ̀ dòwòpò fún àwọn òwò mí ìn fún ànfàní ara rẹ̀, àti láti ra àwọn ilé olówó ńlá, wọ́n ní ó tún bùn ún ọ̀pọ̀ olóṣèlú lówó fún ìpolongo ìbò.