Ìdìbò Gómìnà Bayelsa: Òjò owó dunlẹ̀ fáwọn oní kátàkárà ìbò

Fẹ́mi Akínṣọlá

Kò jọ pé ìṣẹ́ òhun òṣì tó
mu àwùjọ dúndúndún le jẹ́ kí òpin dé bá àṣà dìbò kóo sebẹ̀ tó gbajúgbajà láwọn ibùdó ìdìbò wa èyí tó má a n wáyé láwọn àkókò ìbò.
À fi ìgbà tí eji ń pitú, bẹ́ẹ̀ lòjò owó ń rọ̀ ní ìpínlẹ̀ Bayelsa, lásìkò ètò ìdìbò sípò Gómìnà tó wáyé níbẹ̀ lọ́jọ́ Àbámẹ́ta, ọjọ́ kọkànlá, oṣù Kọkànlá, ọdún yìí, pẹ̀lú báwọn olùdíje ṣe ń fowó táákà láti ra ìbó àwọn olùdìbò, táwọn olùdìbò náà sì ń ṣe kùkùkẹ̀kẹ̀ láti pawó sápò kóówá wọn.

Níbi tọ́rọ̀ ọ̀hún le dé , báwọn ẹ̀ṣọ aláàbò bíi ọlọ́pàá àtàwọn sífú dìfẹ́nsì, títí kan àwọn òṣìṣẹ́ àjọ tó ń gbógun ti jìbìtì lílù àti ṣíṣe owó ìlú mọ́kumọ̀ku, Economic and Financial Crimes Commission (EFCC), àti ti Independent Corrupt Practices and Related Offenses Commission (ICPC), ṣe dúró wámúwámú kò dí àwọn ràbòràbò ọ̀hún lọ́wọ́, bẹ́ẹ̀ lawọn olùdìbò kò jafara láti gba owó sápò pẹ̀lú.

Ohun táa gbọ́ ni pé láwọn ibùdó ìdìbò kan, níṣe làwọn àgbàlagbà méjì kan ń darí àwọn olùdìbò tó ń dé láti dìbò sí ọ̀dọ̀ obìnrin kan tó gbé àga sí ibik kọ̣́lọ́fín kan tí kò fi bẹ́ẹ̀ jìnnà síbùdó ìdìbò ọ̀hún, obìnrin yìí ló ń sanwó fún wọn láti fi ra ìbò wọn, pẹ̀lú àdéhùn ẹgbẹ́ tí wọn yóò dìbò fún.

Wọ́n ní báwọn olùdìbò yìí bá ti dìbò tán ni won yóó tùn ṣẹ́rí sọ́dọ̀ obìnrin yìí, láti gba owó lẹ́ẹ̀kejì, ìyẹn lẹ́yìn tí wọ́n bá ti fi ẹ̀rí àrídájú hàn pé àwọn ti dìbò náà gẹ́gẹ́ bíi àdéhùn wọn ìṣaájú

Akọ̀ròyìn ìwéèròyìn The Nation, sọ pé àwọn agbófinró ni wọ́n ń tọ́ka kọ̀rọ̀ ibi táwọn tó ń ra ìbó jókòó sí, tí wọ́n sì ń ṣe atọna àwọn olùdìbò láti lọ gbowó, bẹ́ẹ̀ lawọn olùdìbò kan ń fi ìwé ìdìbò wọn han àwọn oníròyìn tí wọ́n wà lórí ìdúró, wọ́n rò pé lára àwọn ràbóràbò tó máa fún wọn lówó ni wọn.

Àmọ́ wọ́n láwọn olùdìbò kan kò fi ìwé ìdìbò wọn sínú àpótí lẹ́yìn ìdìbò, níṣe ni wọ́n mú un lọ fáwọn tó ń ra ìbò, tí wọ́n sì ń gbowó sápò.

Ìwádìí fihàn pé àwọn olùdìbò kan gba ẹgbẹ̀rún mẹ́ta Náírà, àwọn kan gba ẹgbẹ̀rún márùn-ún Náírà láwọn ibòmí-ìn, nígbà tí wọ́n san ẹgbẹ̀rún mẹ́wàá Náírà tàbí jù bẹ́ẹ̀ lọ fáwọn mí-ìn.

Ní ìpínlẹ̀ Kogi, bákan náà lọrọ ṣe rí láwọn ibùdó ìdìbò kan, pàápàá lágbègbè Lokoja, tí í ṣe olú-ìlú ìpínlẹ̀ ọ̀hún, àwọn èèyàn ń gbowó kí wọ́n tóó dìbò, tí wọ́n sì tún ń gbowó lẹyìn tí wọ́n bá dìbò tán.

Àwọn éjẹ́ntì ẹgbẹ́ òṣèlú wà lọ́ọ̀ọ́kán tí kò jìnnà sáwọn olùdìbò yìí, ibẹ̀ ni wọ́n ti ń há owó fáwọn olùdìbò, tí wọ́n sì ń pàrọwà sí wọn láti dìbò fún ẹgbẹ́ òṣèlú kóówá wọn.

Lára nnkan tí wọ́n kọ́kọ́ ń bèèrè kí wọ́n tóó sanwó ni káàdì ìdìbò alálòpẹ. Wọ́n ní níṣe làwọn éjẹ́ntì náà ń lọ káàkiri láti ibùdó ìdìbò kan sí òmí-ìn láti rí i pé àwọn fowó wá àtìlẹ́yìn olùdìbò púpọ̀ fún ẹgbẹ́ wọn.

Èèmọ̀, Pásítọ̀ Ṣẹgun ríran èké s’ọ́mọ ìjọ rẹ̀, ló bá fi ọgbọ́n bá a sùn kárakára

Fẹ́mi Akínṣọlá

Kò séèyàn mọ́ ni ariwo tí àwọn èèyàn tó gbọ́ nípa ìṣẹ̀lẹ̀ àgbọ́ṣehà kan, níbi tí pásítọ̀ ìjọ Kérúbù àti Séráfù, ‘Cherubim And Seraphim’ tó wà lágbègbè Agbado, níìpínlẹ̀ Ogun, Ọ̀gbẹ́ni Sunday, ti ríran èkè sí ọ̀kan nínú àwọn ọmọ ìjọ rẹ̀, Omidan Aliu Blessing, ẹni ọdún mọ́kànlélógún, tó sì fipá bá a sùn láìmọye ìgbà níbi tó jí i gbé pamọ́ sí.

Ohun tí a gbọ́ ni pé nítorí pé ara ọ̀kan lára àwọn àbúrò ọmọbìnrin náà tí kò yá ló gbé e dé ṣọ́ọ̀ṣí Pásítọ̀ Ṣẹgun yìí lọ́jọ́ kejì, oṣù kejì, ọdún 2023 yìí, pẹ̀lú ìrètí pé àbúrò rẹ̀ yìí yóó rí ìwòsàn gbà níbẹ̀. Ṣùgbọ́n èyí tí ọkùnrin tó pera rẹ̀ ní ìránṣẹ́ Ọlọ́run yìí ì bá fi tán òkè ìṣòro tí Blessing gbé lọ síwájú rẹ̀, níṣe ló tún dá kún un pẹ̀lú ìran èké tí pásítọ̀ ọ̀hún rí sí i. Ó sọ fún un pé èmí Ọlọ́run sọ fóun pé ó máa kú lọ́jọ́ ìgbéyàwó rẹ̀ gan-an, bí kò bá gbà láti lájọṣepọ̀ ìkọ̀kọ̀ pẹ̀lú òun. Ó tún sọ fún un pé bí ọkùnrin mìíràn bá gbìyànjú láti bá a lájọṣepọ̀ yàtọ̀ sí òun, onítọ̀hún máa kú . Ìbẹ̀rù gbogbo ohun tí pásítọ̀ yìí sọ ló mú kí ọmọbìnrin náà gbà fún un, ló bá ń bá a lò pọ̀ bó ṣe wù ú.

Nígbà tó ń fìdí ìṣẹ̀lẹ̀ ọ̀hún múlẹ̀ ní olú-iléeṣẹ́ wọn tó wà ní Eleweeran, nílùú Abẹokuta, Alukoro iléeṣẹ́ ọlọ́pàá ìpínlẹ̀ Ògùn, S.P Ọmọtọla Odutọla, sọ pé, ‘‘Lóòótọ́, ọ̀dọ̀ wa ni pásítọ̀ Ṣẹgun wà, a ti bèèrè ọ̀rọ̀ lọ́wọ́ rẹ̀, ó sì ti jẹ́wọ́ gbogbo ohun tó ṣẹlẹ̀ sí Omidan Blessing lákàtà rẹ fún wa pátá. Nǹkan bíi oṣù méje ni ọmọbìnrin yìí fi wà lọ́dọ̀ rẹ̀, níbi tó jí i gbé pamọ́ sí. Fún gbogbo àkókò tí pásítọ̀ ọ̀hún fi jí Blessing gbé pamọ́ làwọn ẹbí rẹ̀ fi ń wá a káàkiri. ‘‘Ọgbẹni Aliu Yusuff tí i ṣe ẹgbọn Blessing lo lọọ fiṣẹlẹ náà tó àwọn ọlọ́pàá agbègbè wọn létí lẹ́yìn tí àbúrò rẹ̀ padà wá sílé. Ó ní ẹnu ya gbogbo àwọn nígbà táwọn tún fojú kàn án lọ́jọ́ Karùn-ún, oṣù Kọkànlá, ọdún yìí.

‘‘Ẹ̀gbọ́n Blessing ní àbúrò òun sọ fáwọn pé gbàrà táwọn kúrò ní ṣọ́ọ̀ṣì Pásítọ̀ Ṣẹgun ló ti lọ fi òun han àwọn ẹbí rẹ̀ kan nílùú Ilaro, tó sì tún lọ gba òtẹ́ẹ̀lì fóun, látìgbà náà ló ti bẹ̀rẹ̀ sí í bá òun lájọṣepọ̀ pẹ̀lú ipá nígbà gbogbo, àti nígbàkúùgbà tó bá wùú ’’.

Alukoro ní gbogbo báwọn ṣe ń bi pasitọ náà léèrè ọ̀rọ̀ ló ń bá àwọn sọ̀rọ̀, kò sì fi ẹyọ kan pe méjì fáwọn rárá. Ó ní ọkùnrin náà máa tó fojú balé ẹjọ́.

Ààfáà kẹ̀! Wọ́n tún ká orí àti ọwọ́ èèyàn tútù mọ́ Ààfáà Hasaan lọ́wọ́ n’Íbàdàn

Fẹ́mi Akínṣọlá

Ègbìrìn ọ̀tẹ̀,bí wọ́n ṣe n paná ọ̀kan bẹ́ẹ̀ lòmíràn n rú túú bí iná ẹ̀ẹ̀rùn.
Lẹ́yìn ọ̀sẹ̀ mẹ́ta tí ọwọ́ àwọn ọlọ́pàá tẹ àwọn ààfáà mẹ́ta kan fún bí wọ́n ṣe gé orí àtàwọn ẹ̀yà ara èèyàn n’Íbàdàn, tí wọ́n sì ti wà láhàámọ́ ọgbà ẹ̀wọn báyìí, ọwọ́ tún ti tẹ ààfáà mí-ìn tí wọ́n tún ká orí àti apá èèyàn mọ́ lọ́wọ́.

Afurasí ọ̀daràn ọ̀hún, Hassan Kọlawọle, tó jẹ́ ẹni ọdún márùndínláàádọ́ta (45) lọwọ́ àwọn agbófinró tẹ̀ níbi tó ti ń gbìyànjú láti fi orí àti apá èèyàn méjì jóògùn.

Orí pẹ̀lú apá èèyàn méjèèjì ọ̀hún ló jẹ́ ti ẹnìkan tá ò tí ì mọ, tá ò sì mọ irú ikú tó pa á títí a fi parí àkójọ ìròyìn yìí.

Lọjọ Ẹtì, ọjọ́ kẹwàá, oṣù Kọkànlá, ọdún 2023 yìí, ni Alukoro ileeṣẹ ọlọ́pàá ìpínlẹ̀ Ọ̀yọ́,

SP Adewale Ọṣifẹṣọ, ṣàfihàn ọkùnrin náà fáwọn oníròyìn tóun ti orí àti apá méjèèjì tí wọ́n ká mọ ọn lọwọ́.

SP Ọṣifẹṣọ, ẹni tó ṣèpàdé oníròyìn ọ̀hún lórúkọ CP Adebọla Hamzat, ti í ṣe ọgá àgbà àwọn ọlọ́pàá ìpínlẹ̀ Ọ̀yọ́, ṣàlàyé pe “awọn eeyan ti ọrọ ètò ààbò ìlú jẹ lógún ni wọn ta wa lolobo pe àwọn oniṣẹ ibi kan máa ń fi ẹyà ara èèyàn ṣòògùn ládùúgbò Ogbere-ti-o-ya, n’Ibadan.

“ Ìyẹn làwọn ọlọ́pàá teṣan Iyaganku, n’Ibadan, ṣe sare lọ sibẹ lọjọ Aje, Mọnde, ọjọ kẹfa, oṣù yìí, tí wọ́n fi mú afurasí ọdaràn yìí tó ń jẹ́ Hassan Kọlawọle, ko too di pe o fi awọn ẹya ara naa ṣe ohunkohun.

“ Afurasí ọ̀daràn yìí jẹ́ ọ̀kan nínú àwọn tó ń fi ẹ̀yà ara èèyàn ṣòògùn owó, ṣùgbọ́n tí wọ́n kàn ń fi iṣẹ́ ààfáà bójú láti tan àwọn èèyàn jẹ”.

Nígbà tó ń dáhùn ìbéèrè àwọn oníròyìn lólú iléeṣẹ́ ọlọ́pàá tó wà ládùúgbò Ẹlẹyẹle, n’Ibadan, afurasí ọkùnrin tó pera ẹ̀ láàfáà yìí fìdí ẹ múlẹ̀ pé òun lòun ni orí àtàwọn ọwọ́ èèyàn ọhún lóòótọ́, ṣùgbọ́n òun kọ lòun pa ẹni náà, ẹnìkan tó ń jẹ́ Tijani Waheed, lo gbé àwọn kinní náà wá fún òun.

Ó ṣàlàyé pé níbi ayẹyẹ ìrántí ọjọ́ọ̀bí Ànábì ti wọ́n ń pè ní Maloud lóun ti pàdé Waheed, níbi tí àwọn ti ń sọ̀rọ̀ nípa bí nǹkan ṣe rí ní Nàìjíríà lọkùurin náà sọ fóun pé òun ní òògùn àṣírí owó kan tó lágbára lọ́wọ́, ṣùgbọ́n aájò ọ̀hún jẹ mọ́ orí àti ọwọ́ èèyàn méjèèjì.

Ó ní nígbàtí òún sọ fún un pé òun kò mọ ibi tí òun ti lè rí i ló fi òun lọ́kàn balẹ̀ pé kí òun má ṣe fòyà, ọ̀rọ̀ ẹnu lásán lòun sì pè é lọ́jọ́ náà lọ́hù-ún, àfìgbà tó gbé àwọn ẹ̀yà ara èèyàn tútù náà wá fóun lóòótọ́.

Ìwádìí àwọn agbófinró ṣì ń tẹ̀síwájú lórí ìṣẹ̀lẹ̀ yìí gẹ́gẹ́ bí SP Ọṣifẹṣọ tíí ṣe agbẹnusọ fún iléeṣẹ́ ọlọ́pàá ìpínlẹ̀ Ọ̀yọ́ ṣe fìdí rẹ̀ múlẹ̀.

Babaláwo àtàwọn mẹ́rin mí-ìn wẹ̀wọ̀n, aṣòfin kan ni wọ́n lù ní jìbìtì

Fẹ́mi Akínṣọlá

Bí irọ́ bá lọ lógún ọdún, ọjọ́ kan péré lòótọ́ yóó le bá.
Adájọ́ ilé-ẹjọ́ gíga ìjọba àpapọ̀ kan tó wà nílùú Oṣogbo, ti dájọ́ ẹ̀wọ̀n ọdún márùn-ún fún babaláwo kan àtàwọn mẹ́rin mìíràn tí wọ́n lu olórí iléègbìmọ̀ aṣòfin Ọ̀ṣun àná, Ọnarébù Timothy Owoẹyẹ, ní jìbìtì owó ńlá.

Mílíọ̀nù méjìdínlógójì Náírà ni wọ́n fẹ̀sùn kan àwọn èèyàn ọ̀hún pé wọ́n gbà lọwọ́ Owoẹyẹ, bẹ́ẹ̀ ni wọ́n sì tún fi fọto ìhòòhò rẹ̀ sórí ìkànnì ayélujára láti lè fi dúnkookò mọ́ ọn, kí wọ́n lè rí owó gbà sí i lọ́wọ́ rẹ̀.

Ọdún 2018 làwọn ọlọ́pàá fi páńpẹ òfin gbé Kazeem Agbabiaka, Fẹmi Oyebọde, Abdul-Rasheed Ọjọnla, Babatunde Oluajọ, Adebiyi Kehinde, Oyebanji Oyeniyi àti Ismaila Azeez lórí ìṣẹ̀lẹ̀ náà.

Àwọn méjèèje kọ́kọ́ fara hàn nílé-ẹjọ́ májísíréètì kó tóó di pé wọ́n taari ẹjọ́ wọn sílé-ẹjọ́ gíga tìjọba àpapọ̀ lóṣù Kẹwàá, ọdún 2018.

Lára ẹ̀sùn tí wọ́n fi kàn wọ́n ni ìgbìmọ̀-pọ̀ láti hùwà búburú, lílu jibiti lórí ẹ̀rọ ayélujára, fífi ìkànnì ayélujára dunkookò mọ́ èèyàn àti bẹ́ẹ̀ bẹ́ẹ̀ lọ.

Lásìkò ìgbẹ́jọ́ yìí, igbákejì dàrẹ́kítọ̀ tó ń gbọ́ ẹjọ́ aráàlú, Bàrísítà Moses Faremi, kó ẹ̀rí mẹ́tàdínlọ́gọ́ta kalẹ̀, lára rẹ̀ ni ìwé àkọsílẹ̀ báńkì, àpótí onígi kan, owó dọ́là ọgọ́rùn-ún kan, ìbọn àtàwọn nǹkan míràn.

Bákan náà ló pe ẹlẹrìí mẹ́fà, nínú èyí tí olupẹjọ fúnra rẹ̀ wà, ó pé ọlọpaa tó ń ṣèwádìí ẹsùn náà àtàwọn òṣìṣẹ́ báńkì mẹ́rin láti jẹ́rìí ta ko àwọn olùjẹ́jọ́.

Nígbà tó ń gbé ìdájọ́ rẹ̀ kalẹ̀ lọ́jọ́ Ìṣẹ́gun, ọjọ́ keje, oṣù Kọkànlá, ọdún yìí, Onídàájọ́ Emmanuel Ayọọla, sọ pé àwọn márùn-ún lára àwọn olùjẹ́jọ́ jẹ̀bi ẹ̀sùn tí wọ́n fi kàn wọ́n.

Ó ní Agbabiaka tó jẹ́ babaláwo, Oyẹbọde tó jẹ́ aṣáájú kan nínú ìlú náà, Babatunde tóun jẹ́ ọmọọba àti Kehinde jẹ̀bi ẹ̀sùn ìgbìmọ̀-pọ̀ hùwà búburú àti lílu jìbìtì lórí ẹ̀rọ ayélujára, nígbà tí Adebiyi jẹ̀bi fífi ìkànnì ayélujára dúnkookò mọ́ èèyàn.

Onídàájọ́ Ayọọla yọ orúkọ Abdul-Rasheed Ọjọnla kúrò lára wọn nítorí pé ó ti sá lọ lásìkò ìgbẹ́jọ́, ó sì sọ pé kí Azeez máa lọ lálàáfíà nítorí kò jẹ̀bi àwọn ẹ̀sùn tí wọ́n fi kàn án.

Ó ni olùjẹ́jọ́ ti fi ìdí ẹ̀sùn tí wọ́n fi kàn àwọn olùjẹ́jọ́ náà múlẹ̀ kọjá iyèméjì, ó sì hàn gbangba pé wọ́n lu Owoẹyẹ ní jìbìtì mílíọ̀nù méjìdínlógójì Náírà, bẹ́ẹ̀ ni wọn tún ba orúkọ rẹ̀ jẹ́ nípasẹ̀ fífi fọ́tò ìhòòhò rẹ̀ síta.

Nítorí náà, ó ní kí ọ̀kọ̀ọ̀kan wọn lọ fi ẹ̀wọ̀n ọdún márùn-ún jura.

Nígbẹ̀yìn, Iléẹjọ́ gba béèlì Emefiele láàhámọ́

Fẹ́mi Akínṣọlá

Ó jọ́ pé àdúrà Gómìnà banki ilẹ̀ẹwa nígbàkan rí ,ti gbà báyìí o,bí Adájọ́ Olukayode Adeniyi ti ilé-ẹjọ́ gíga tó ń jòkó nílùú Àbújá ti gba béèlì Gómìnà fún báńkì àpapọ̀ tẹlẹri, Godwin Emefiele.

Adeniyi pa á lásẹ pé kí Emefiele má a tẹlé àwọn agbẹjọrò rẹ̀ lọ lẹsẹkẹsẹ, tí wọ́n sì ṣe ìlérí pé àwọn yóó mu wá sí ilé-ẹjọ́ ní ọsẹ tó ń bọ̀ tàbí ọjọkijọ tí ilé-ẹjọ́ bá fẹ́ kó farahàn

Gẹ́gẹ́ bí Adájọ́ ṣe sọ, Gómìnà Báńkì àpapọ̀ tẹlẹ náà gbọdọ̀ fi gbogbo àwọn ìwé ìrìnà rẹ̀ sílẹ̀ ní ilé-ẹjọ́.

Bákan náà ni Adájọ́ ní òpin gbọdọ̀ dé bá wíwà rẹ̀ ní àhámọ́, pẹ̀lú bí ó ṣe ti wà níbẹ̀ láti bí ọjọ́ mọ́kànlelaadọjọ, tí ìjọba àpapọ̀ àti agbẹjọ́rò àgbà lórílẹ̀ èdè Nàìjíríà sì gbọdọ̀ tẹ̀lé àṣẹ ilé-ẹjọ́

Àwọn kan ń gbèrò láti ṣèkọlù sáwọn ilé ìtura ńlá ní Nàìjíríà – Amẹ́ríkà ṣèkìlọ̀

Fẹ́mi Akínṣọlá

Ilé iṣẹ́ aṣojú ilẹ̀ America tó wà lorilẹ-ede Nàìjíríà ló ti fi léde pé àwọn kan ń gbìmo láti ṣe akọlu sáwọn ilé ìtura tó lórúkọ láwọn ìlú nla-nla káàkiri Nàìjíríà.

Nínú atẹjade kan tí ilé aṣojú náà fi sórí ìkànnì ayélujára wọn lọjo Ẹtì ọjọ́ kẹta oṣù kọkànlá ni wọ́n ti wí pé “ilẹ ní ẹri tó dájú pé ìpinnu àkọlù sáwọn ilé ìtura kan ní Nàìjíríà ló ti dé ààyè tó lápẹẹrẹ”.

Àtẹ̀jáde náà fikún pé àmọ́ àwọn ẹ̀ṣọ́ aláàbò nílẹ̀ Nàìjíríà ń sa gbogbo ipá wọn láti dènà àkọlù ọ̀hún.

Ẹ̀wẹ̀, ìjọba ilẹ̀ Amẹ́ríkà ti gba àwọn ọmọ ìlú náà tó wà ní Nàìjíríà lámọ̀ràn pé kí wọ́n ronú dáadáa lórí ìkìlọ̀ yìí kí wọn tó gba iyàrá tàbí lọ̀ọ́ gbafẹ́ nílé ìtura tó bá lókìkí ní Nàìjíríà.

Wọ́n sì tún fi nọ́mbà ẹ̀rọ ìléwọ́ tí wọ́n lè pè nígbàkúùgbà tí wọ́n bá wà nínú ìṣòro léde.

Bákan náà ni ìjọba Améríkà tún kìlọ̀ fáwọn ọmọ ilẹ̀ náà láti máa wo àyíká wọ́n fínífíní láwọn ilé-ìtura tó lààmì-laaka kí wọ́n sì tún tẹlé gbogbo ìlànà tí ìjọba là kalẹ̀ fún wọn lórí àbẹ̀wò sí Nàìjíríà.

Kàyééfì ! Àwọn agbébọn tú olórí Ìjọba Guinea tẹ̀lẹ̀rí sílẹ̀ .

Fẹ́mi Akínṣọlá

Kójú má ríbi, gbogbo ara lòògùn rẹ̀ , ní báyìí, àwọn agbébọn kan ti yabo ọgbà ẹ̀wọ̀n, wọ́n sì ti tú olórí ìjọba ológun tẹ́lẹ̀ rí lórílẹ̀ èdè Guinea, Moussa Dadis Camara sílẹ̀ kúrò ní àhámọ́ tó wà.

Adájọ́ àgbà lórílẹ̀ èdè náà ló fi dí ọ̀rọ̀ náà múlẹ̀ lọ́jọ́ Sátidé.

Òwúrọ̀ ọjọ́ Sátidé tí ìkọlù wáyé ní ọgbà ẹ̀wọ̀n tí Camara wà, tí wọ́n sì tú Ọ̀gágun àgbà náà àti èèyàn mẹ́ta mìíràn sílẹ̀ .

Camara àti àwọn mẹ́ta yòókù ló wà lọ́gbà ẹ̀wọ̀n lórí ẹ̀sùn pé wọ́n lọ́wọ́ nínú ikú èèyàn tótó àádọ́jọ ní iye nínú ìfẹ̀hónúhàn kan tó wáyé lọ́dún 2009.

Gbogbo ẹnu ibodè orílè-èdè Guinea ló ti wà ní títì pa báyìí nítorí àwọn afurasí náà.

Adájọ́ àgbà lórílẹ̀èdè náà, Charles Alphonso Wright ló kéde ìṣẹ̀lẹ̀ ọ̀hún lórí Rédíò lọ́jọ́ Sátidé.

A ti ṣetán àti dá $150m tí Abacha jí kó padà fún Nàìjíríà – Ìjọba France

Fẹ́mi Akínṣọlá

Òkú ọ̀run kò yé nawọ́ àánú sí Orílẹ̀ yìí láti bíi ọdún díẹ̀ sẹ̀yìn. Òmíràn tún ni ti Orílẹ̀-èdè France yìí tí wọ́n ti ṣetán láti dá owó tí iye reẹ̀ tó àádọ́jọ mílíọ̀nù pọ́ùn padà fún ìjọba Nàìjíríà, èyí jẹ́ lára owó tí Ààrẹ Ológun Nàìjíríà nígbà kan rí, Sani Abacha jí kó lọ síbẹ̀.

Agbẹnusọ Ààrẹ Tinubu, Ajuri Ngelale, ló fi ọ̀rọ̀ náà léde nínú àtẹ̀jáde kan.

Ngelale ní Ààrẹ Bola Tinubu ti kan sáárá sí ìjọba France fún ìgbésẹ̀ láti dá owó náà padà fún Nàìjíríà.

Lásìkò tó ń gbàlejò Mínísítà oríleẹ̀-èdè France fún ileẹ̀ òkèèrè àti ilẹ̀ Yuroopu, Catherine Colonna, Ààrẹ Tinubu kan sárá látàrí ìrẹ́pọ̀ àti ìbáṣepọ̀ tó gún régé tó ń wáyé láàrin oríleẹ̀-èdè méjèèjì, èyí tó ń wáyé lẹ́yìn àbẹ̀wò rẹ̀ sí France.

Tinubu ní “Adúpẹ́ lọ́wọ́ yín fún dídá owó tí Abacha jí padà, a mọ rírì ìfọwọ́sowọ́pọ̀ yín lórí dídá owó Nàìjíríà padà.

“A ó lo owó náà fún ìdàgbàsókè Nàìjíríà .”

NLC dúnkokò ìyanṣẹ́lódì tí ìjọba kò bá yọ kọmíṣọ́nà ọlọ́pàá kan

Fẹ́mi Akínṣọlá

Ó jọ pé fànfà tó wà láàrin ìjọba Orílẹ̀ yìí àti ẹgbẹ́ òṣìṣẹ́ kò tí ì jẹ rodò rárá o bí ẹgbẹ́ òṣìṣẹ́ ilẹ̀ Nàìjíríà, Nigeria Labour Congress àti akẹgbẹ́ rẹ̀, Trade Union Congress, TUC ti kéde pé àwọn yóò bẹ̀rẹ̀ ìyanṣẹ́lódì bẹ̀rẹ̀ láti ọjọ́rú ọjọ́ kẹjọ oṣù Kọkànlá ọdún 2023.

Ohun tí wọ́n ń bèèrè fún ni pé kí ìjọba yọ ọ̀gá ọlọ́pàá ìpínlẹ̀ Imo kúrò ní ipò tó wà àti abẹ́ṣinkáwọ́ ìjọba ìpínlẹ̀ náà tí wọ́n lọ́wọ́ nínú bí wọ́n ṣe fìyà jẹ ààrẹ NLC, Joe Ajaero ní ìpínlẹ̀ náà.

Ìpè yìí ló ń wáyé lẹ́yìn tí àwọn kan ṣe ìkọlù sí ààrẹ NLC, Joe Ajaero ní ìpínlẹ̀ Imo lásìkò tí wọ́n ń gbèrò láti ṣe ìwọ́de tako ìjọba ìpínlẹ̀ látàrí gbèsè owó oṣù tí wọ́n jẹ àwọn òṣìṣẹ́..

Igbákejì ààrẹ NLC, Adewale Adeyanju sọ fún àwọn akọ̀ròyìn ní ìlú Abuja ohun tó le yẹ ìyanṣẹ́lódì náà kò sí àyàfi tí ìjọba bá dáhùn gbogbo ìbéèrè àwọn lórí ìyà tí wọ́n fi jẹ Ajaero.

NLC ní ọjọ́ márùn-ún ni àwọn fún ìjọba láti dáhùn ìbéèrè àwọn bẹ̀rẹ̀ láti ọjọ́ Ẹtì, ọjọ́ kẹta oṣù Kọkànlá.

Wọ́n ní bí ìjọba kò bá dáhùn ìbéèrè àwọn dandan ní kí àwọn bẹ̀rẹ̀ ìyanṣẹ́lódì lọ́jọ́rú.