Ayedatiwa Gómìnà tuntun ìpínlẹ̀ Òǹdó, kéde àwọn tí yóó bá a ṣiṣẹ́ pọ̀

Fẹ́mi Akínṣọlá

Ó jọ pé òótọ́ ni ọ̀rọ̀ àwọn àgbà tó sọ pé ẹni tó ṣojú kò dà bíi ẹni tó ṣẹ̀yìn, bí Gómìnà ìpínlẹ̀ Òǹdó, Ọnarébù Lucky Orimisan Ayédatiwa, ti kéde odidi ọjọ́ mẹ́ta gbáko láti fi ṣọ̀fọ̀ ikú ọ̀gá rẹ̀, Arákùnrin Rótìmí Akérédolú, ẹni tó jáde láyé l’Ọ́jọ́rùú, ọjọ́ kẹtàdínlọ́gbọ̀n, oṣù Kejìlá, ọdún yìí.

Ayédatiwa ṣe ìkéde yìí lásìkò tí wọ́n ń búra fún un gẹ́gẹ́ bíi Gómìnà tuntun lọ́fíìsì ìjọba tó wà ní Alagbaka, nílùú Akurẹ, ní nǹkan bíi aago márùn-ún kọjá ìṣẹ́jú mẹrìnlá l’Ọjọrùú, ọjọ́ kẹtàdínlọ́gbọ̀n, oṣù Kejìlá, ọdún 2023.

Nínú ọ̀rọ̀ àpilẹ̀kọ rẹ̀ ní kété tó gba èèkù idà ìṣàkóso, Ayedatiwa ni pẹ̀lú ẹ̀dùn ọkàn lòun fi ń tẹ́wọ́gba iṣẹ́ ńlá tó yí kan òun nítorí ikú tó wọlé mú ọ̀gá òun lọ lójijì.

Ó ní òun bá gbogbo ẹbí Akérédolú, Ọlọ́wọ̀ tìlú Ọ̀wọ̀, Ọba Ajibade Gbadegẹsin Ogunoye, àti gbogbo èèyàn ìpínlẹ̀ Òǹdó pátápátá kẹ́dùn lórí ikú ẹni wọn tó lọ.

Lára àwọn tó wà ní kàlẹ̀ lásìkò ìbúra wọṣẹ́ ọ̀hún ni: Olórí ilé ìgbìmọ̀ aṣòfin ìpínlẹ̀ Òǹdó, Ọnarebu Ọlamide Ọladiji, Akọ̀wé ìjọba, Abilékọ Ọladunni Odu, Alága ẹgbẹ́ òṣèlú All Progressive Congress, ní ìpínlẹ̀ Òǹdó, Ade Adetimẹhin, àwọn ọmọ ìgbìmọ̀ aṣèjọba àtàwọn ọmọ ẹgbẹ́ APC.

Ó ní àdánù ńlá ni ikú Aketi jẹ́ fóun, nítorí láti ọdún 2012 ni àwọn ti jọ wà, ìyẹn lásìkò tó kọkọ gbé àpótí láti díje dupò Gómìnà, bó ṣe fìdí rẹmi nígbà náà ló ní kòdí àjọṣepọ̀ àwọn lọ́wọ́ rárá pẹ̀lú bí àwọn tún ṣe jọ ṣiṣẹ́ pọ̀ fún àṣeyọrí rẹ̀ lọ́dún 2016, tó sì jáwé olúborí gẹ́gẹ́ bíi Gómìnà fún ìgbà àkọ́kọ́ .

Ó ní ṣe làwọn jọ wà títí kó tóó wá mú òun gẹ́gẹ́ bíi igbákejì rẹ̀ lọdún 2020, lásìkò tó ń díje fún sáà kejì.

Gómìnà tuntun yìí ní kò sí àní -àní pé Aketi ti fipa rere lélẹ̀ pẹ̀lú ọ̀kan-ò-jọ̀kan àwọn iṣẹ́ àkànṣe tó ṣe ní ìpínlẹ̀ Òǹdó, tí òun náà sì ṣetán láti tẹ̀síwájú níbi tí ọ̀gá òun bá iṣẹ́ dé.

Ó rọ gbogbo àwọn èèyàn ìpínlẹ̀ Òǹdó láti ṣàtìlẹ́yìn fún òun, kí wọ́n sì tún máa gbàdúrà fún òun, kí iṣẹ́ náà baà lè túbọ̀ rọrùn láti ṣe.

Lẹ́yìn wákàtí díẹ̀ tí Gómìnà Lucky Ayedatiwa gba èèkù idà ìṣàkóso ìpínlẹ̀ Òǹdó ló ti kéde ìyànsípò àwọn èèyàn kan gẹ́gẹ́bí alábàáṣiṣẹ́pọ̀ rẹ̀.

Ní ìbámu pẹ̀lú àtẹ̀jáde tí Ìgbákejì olórí àwọn òṣìṣẹ́ ìpínlẹ̀ Òǹdó, Ọmọkùnrin Sẹgun, fi síta lálẹ́ Ọjọ́rùú, ọjọ́ kẹtàdínlọ́gbọ̀n, oṣù Kejiìlá, ọdún 2023 yìí, ó ní Gómìnà ti fọwọ́ sí ìyànsípò àwọn èèyàn wọ̀nyí, tí iṣẹ́ wọn sì gbọdọ̀ bẹ̀rẹ̀ lẹ́yẹ-ò-sọkà.

Àwọn márùn-ún tí wọ́n kéde ìyànsípò wọn ni: Ọmọọba Ebenezer Adeniyan, ẹni tí yóó jẹ́ Akọ̀wé ìròyìn tuntun fún Gómìnà Ayédatiwa, Ọ̀gbẹ́ni Smart Ọmọdunbi, Olùbádámọ̀ràn fún gómìnà lórí ọ̀rọ̀ òṣèlú, àti Abire Sunday Olugbenga, Olùrànlọ́wọ́ pàtàkì fún gómìnà lórí ọ̀rọ̀ ẹ̀rọ ayélujára.

Àwọn yòókù ni, Omidan Motunrayọ Oyedele, Olùrànlọ́wọ́ pàtàkì fún fọ́tò yíyà, àti Dókítà Temitayọ Iperepolu, ẹni tí yóó jẹ́ olùrànlọ́wọ́ pàtàkì fún Gómìnà nílé ìjọba.

Ghali Na’Abba,olórí àwọn aṣọ̀fin tẹ́lẹ̀, jáde láyé

Fẹ́mi Akínṣọlá

Baà kú làá dère, èèyàn ò sunwọ̀n láàyè.
Lásìkò tí ọ̀pọ̀ èèyàn ṣì ń dárò ikú Olóògbé Oluwarotimi Akérédolú tí i ṣe Gómìnà ìpínlẹ̀ Òǹdó, èyí tó ṣẹlẹ̀ láfẹ̀ẹ̀mọ́jú Ọjọ́rú, ọjọ́ kẹtàdílọ́gbọ̀n, oṣù Kejìlá, ọdún 2023 yìí, èèkàn olóṣèlú apá Òkè-ọya ilẹ̀ wa tó jẹ́ olórí àwọn ọmọléègbìmọ aṣojú-ṣòfin l’Abuja tẹ́lẹ̀, Alaaji Ghali Na’Abba, náà tún ti kí ayé pé ó dìgbòóṣe.

A gbọ́ pé òwúrọ̀ ọjọ́ Wẹ́sìdeè yìí kan náà ni ọkùnrin ẹni ọdún márùndínláàdọ́rin (65) yìí mí èémí ìkẹyìn ní ọsibítù kan nílùú Àbùjá, tí i ṣe olú-ìlú ilẹ̀ wa.

Gẹ́gẹ́ bí àwọn mọ̀lẹ́bí rẹ̀ ṣe sọ ọ́ di mímọ̀, wọ́n lo ti ṣe díẹ̀ tí àìsàn burúkú kan ti ń bá Na’Abba fínra, kí gbogbo ẹ̀ tó wáá já síkú yìí. Ìgbà kan wà tí wọ́n gbé bàbá náà lọ sílùú òyìnbó fún ìtọ́jú. Ọ̀pọ̀ oṣù ló sì fi wà lọhun-un, níbi tí wọ́n ti fún un ní ìtọjú tó péye, ìgbà tí ara rẹ̀ dá ṣáṣá ló padà sílé.

Àmọ́ lẹnu àìpẹ yìí ni àárẹ̀ mí-ìn tún ta lé olórí àwọn aṣòfin tẹ́lẹ̀rí yìí, èyí tó yọrí sí ikú rẹ̀.

Ẹ ò rántí pé ọmọ ẹgbẹ́ òṣèlú Peoples Democratic Party, ni Alagba Ghali Na’Abba, ọdún 1999 tí ètò òṣèlú dẹ̀mókírésì ẹlẹ́ẹ̀kẹrin bẹ̀rẹ̀ ni ọkùnrin náà gbáàpótí ìbò, tó sì wọlé sípò aṣojú-ṣòfin Kano Municipal Federal Constituency, nígbà tí Olóyè Oluṣẹgun Ọbasanjọ di Ààrẹ ilẹ̀ wa.

Gẹ́rẹ́ tí wọ́n yọ Olórí àwọn aṣojú-ṣòfin ìgbà náà, Salisu Buhari, nípò, lórí ọ̀rọ̀ ìwé ẹ̀rí Fásitì Toronto rẹ̀ tó jẹ́ ayédèrú ni Na’Abba di olórí àwọn aṣojú-ṣòfin, ó sì wà nípò náà láti 1999 títí di ọdún 2023, tí ètò ìdìbò mí-ìn wáyé.

Ilé ẹ̀kọ́ Fásitì Ahmadu Bello, tó wà ní Zaria, ni olóògbé yìí ti kẹ́kọ̀ọ́ nípa ìmọ̀ òṣèlú lọ́dún 1979.

Aláṣẹ Iléeṣẹ́ Crime Alert wẹ̀wọ̀n fún ẹ̀sùn jìbìtì

Fẹ́mi Akínṣọlá

Ẹ̀wọ̀n ò jọlé o, gbogbo
ìgbà tí a ó bá lò lókè èèpẹ̀, kí á má rógun ẹ̀wọ̀n láyé e wa.
Ní báyìí, Olùdásílẹ̀ ilé iṣẹ́ Crime Alert Security Network, ní Ìbàdàn, Olaniyan Gbenga Amos ti dèrò ọgbà ẹ̀wọ̀n lẹ́yìn tí Iléẹjọ́ tó n jókòó nílùú Ìbàdàn ní ó jẹ̀bi ẹ̀sùn jìbìtì.

Ẹ̀wọ̀n ọdún márùndínlọ́gọ́rin ni Adájọ́ Bayo Taiwo ti ilé ẹjọ́ gíga tó n jókòó nílùú Ibadan, gbé kalẹ̀ fún olùdásílẹ̀ iléeṣẹ́ Crime Alert Security Network, Olaniyan Gbenga Amos lórí ẹ̀sùn jìbìtì ọ̀hún.

Bẹ́ẹ̀ bá gbàgbé Olaniyan ni ọwọ́ àjọ EFCC tẹ ní ọdún 2020 lẹ́yìn tó lu ọ̀pọ̀ èèyàn ní jibiti owó ìdókòwò pẹ̀lú iléeṣẹ́ rẹ̀.

Ó se ìlérí pé òun yóó dá owó àti èlé orí owó padà fún àwọn tó bá dókoòwò ṣùgbọ́n ọ̀rọ̀ ò rí bẹ́ è, tí kò sí rí owó náà san padà.

Èsùn márùndínlógójì ni EFCC kà sí i ẹsẹ̀ Olaniyan níwájú iléẹjọ́.

Nínú àtẹ̀jáde tí agbẹnusọ EFCC, Dele Oyewale gbé síta lọ́jọ́ Ìsẹ́gun, ó ní Olaniyan àti iléeṣẹ́ rẹ̀, Detorrid Heritage Investment Limited ni wọ́n gbé lọ iléẹjọ́ ní ọjọ́ kẹrìnlá oṣù kejìlá ọdún 2023.

Ọdún tó kọjá , ẹlẹ́rìí àjọ EFCC, Juliet Odogu sọ fún ilé-ẹjọ́ pé ó tó igba níye àwọn èèyàn tí Olaniyan lù ní Jìbìtì owó tó tó àádọ́jọ mílíọ̀nù náírà.

Ó ní àwọn èèyàn san ẹgbẹ̀rún márùn un náírà si mílíọ̀nù mẹ́sàn án náírà fún Olaniyan lẹ́yìn tí wọ́n báa dòwòpọ̀.

Bákan náà ló se àfihàn ìwé àkọsílẹ̀ tí àwọn èèyàn náà fi san owó fún ileeṣẹ Olaniyan fún Ilé-ẹjọ́ dókòwò lẹ́yìn ọ̀sẹ̀ mẹ́fà.

Ó mà ṣe o, Gómìnà Rótìmí Akérédolú ti f’ayé sílẹ̀ o!

Fẹ́mi Akínṣọlá

Báa kú làá dère, èèyàn ò sunwọ̀n láàyè, ikú ti ṣíwọ́ ọ Gómìnà Akérédolú kúò ní dúníyàn.
Ohun tí a gbọ́ ni pé ìlú Èkó ni Gómìnà náà dákẹ sí l’Ọjọ́rùú, ọjọ́ kẹtadínlógún, oṣù yìí, lẹ́ni ọdún mẹ́tàdínáàádọ́rin.

Àrùn jẹjẹrẹ inú ẹ̀jẹ̀ ló ti dá Gómìnà náà gúnlẹ fún ìgbà pípẹ́. Bó tilẹ̀ jẹ́ pé wọ́n gbé e lọ sílùú Òyìnbó fún ìtọ́jú, inú oṣù Kẹsàn-án án ni wọ́n dá a padà wá sílé. Ilé rẹ̀ tó wà nílùú Ìbàdàn ni Arákùnrin sì wà láti ìgbà náà tí wọ́n ti ń tọjú rẹ̀.

Kìí ṣe pé ara Gómìnà náà ti yá tí wọ́n fi gbé e wá láti ìlú Òyìnbó, ṣùgbọ́n nítorí pé àìsàn tí kò ṣeé wò, àfi ìdásí Ọlọ́run nìkan, ló ń ṣe é ló jọ pé ó mú kí wọ́n máa gbé e bọ wá sílé láti Oke-Okun. Látìgbà náà ló ti wà ní ìpínlẹ̀ Ọ̀yọ́, tí kò sí lè padà sí ìpínlẹ̀ Òǹdó tó ti ń ṣèjọba.

Àìyá ara Arákùnrin ṣàkóbá fún ètò ìjọba ìpínlẹ̀ Òǹdó, nítorí pé kò gbé ìjọba fún igbákejì rẹ̀ nígbà tó kọkọ dé. Bó ṣe ti ìlú Òyìnbó dé ló ní ara òun ti yá, òun sì fẹ́ máa bá ìṣèjọba òun lọ. Ṣùgbọ́n àwọn tí wọ́n ń ṣàtìlẹ́yìn fún un ni wọ́n ń ṣe ìjọba náà, tí wọ́n sì ń fẹ̀sùn kàn wọ́n pè wọ́n ń fi ayédèrú ìbuwọlù Gómìnà gbé òbítíbitì owó jáde lásùn wọn ìjọba.

Láìpẹ́ yìí ni Gómìnà náà kọ̀wé sáwọn aṣòfin pé òun fẹ́ lọ gba ìtọjú nílùú Òyìnbó, èyí tó mú kó gbé ìjọba fún igbákejì rẹ̀, Lucky Ayedatiwa, pe kó máa bá ìṣàkóso ìjọba lọ, ìyẹn lẹ́yìn tí Ààrẹ Bọla Tinubu ti pàṣẹ fún un pé kò kọwe láti gbé ìṣàkóso ìjọba náà fún igbákejì rẹ̀.

Ṣùgbọ́n ipò tí ọkùnrin náà wà kò lè jẹ́ kí wọn gbé e lọ sílùú òyìnbó nítorí àìlera náà ti wọ̀ ọ lára gidigidi. Èyí la gbọ́ pé ó mú kí wọ́n gbé e lọ sí ọsibítù kan nílùú Èkó, tí wọ́n ti ń tọjú rẹ̀, kó tó di pé àìsàn náà le sí i, ti wọ́n sì ń wá gbogbo ọnà láti rí i pé ó rí ìtọjú gidi gbà, ṣùgbọ́n ó ṣe ni láàánú pé iléèwòsàn tí wọ́n kò dárúkọ náà ni Akérédolú padà dakẹ sí.

Àjọ̀dún ọdún Èṣù gbòde l’Ákùúrẹ́

Fẹ́mi Akínṣọlá

Ṣé wọ́n ní ìdálùú nì ṣèlú.
Àwọn oní ṣẹ̀ṣẹ kò mu ní kékeré ní Ìlú Àkúrẹ́ lọ́dún yìí papàá jùlọ àwọn eléṣù
bí wọ́n ṣe fi àfojúsùn àjọ̀dún ti ọdún yìí ṣe ìlanilọ́ye àti ìtanijí fún ará ìlú nípa nǹkan tí èṣù túmọ̀ sí àti ìyàtọ̀ tó wà láàrin Èṣù ọ̀dàrà tí Yorùbá àti Sátánì tí àwọn ẹlẹ́ṣìn kan mọ̀.

Àkòrí àjọ̀dún Èṣù ti ọdún yìí ni ‘A Walk with Èṣù ‘ ‘Ìrìnàjò pẹ̀lú Èṣù ’.

Aṣọ funfun làwọn oníṣẹ̀ṣe kó sí níbi àjọ̀dún náà pẹ̀lú oríṣiríṣi àkọlé bíi ” Esu is not Satan” “Èṣù Ọlá Ìlú” ” Láàlú Ògiri Òkò”.

Olórí awo ìlú Àkúrẹ́ olóyè Fayeye Fagbitẹ ló léwájú àwọn oníṣẹ̀ṣe ọ̀ún láti lọ bọ Èṣù tí Deji ti ìlú Àkúrẹ́ pẹ̀lú lílo epo, iyọ̀, ewúrẹ́, obì àti ọtí láti bọ èṣù lóríko náà.

Akọ̀wé àjọ ẹ̀sìn ifá Lágbayé, Akomolafe Wande sọ pé ọ̀pọ̀lọpọ̀ àwọn ọmọ Yorùbá kò mọ bí Èṣù ṣe jẹ́ torí pé nnkan tí wọ́n gbọ́ kìí ṣe ìtàn tó jẹ́ òtítọ́.

Ó ní èyí wáyé látàrí ìgbìyànjú àwon akónilẹ́rú láti máṣe fẹ́ kí òótọ́ nípa Èṣù ṣe àwon ọmọ yorùbá lánfàní.

Ọ̀gbẹ́ni Akọmọlafẹ sọ síwájú pé Èṣù ní agbára láti tú àwọn èèyàn sílẹ̀ yàtọ sí ìgbàgbọ́ ọ̀pọ̀ lóde òní.

“àwọn bàbá wá mọ bí wọ́n ṣe ń lo èṣù láti ṣe ọ̀pọ̀lọpọ̀ nǹkan. Èyí wá mú kí àwọn akónilẹ́rú tó wà pẹ̀lú ẹ̀sìn míràn gbìyànjú láti yí èrò àwọn ọmọ Yorùbá padà sí èyí tó ń rí Èṣù gẹ́gẹ́ bí ẹni aburú.

” Èṣù jẹ́ Ìránṣẹ́ pàtàkì fún elédùmarè tó sì má ń jíse fún elédùmarè tó dàbí ìlèkùn tó rí lé tósí ríta

Akọ̀wé àjọ ẹ̀sìn Ifa lágbayé náà tún tẹ̀síwájú láti ṣàlàyé pé Èṣù ló ń Pín ire ká gẹ́gẹ́ bí wọ́n ṣe ń pè é ní ọlá ìlú, òun náà ló máa ń mú ìṣòdodo wà.

Akomolafẹ wá pàrọwà fún àwọn èèyàn kí wọ́n tẹ̀lé ìṣẹ̀ṣe ilẹ̀ wa kí ilẹ̀ Yorùbá lè bọ́ ní oko ẹrú, kí ìdàgbàsókè sì lè sun àwọn èèyàn rẹ̀ bọ̀.

Àwọn ọmọ ìsọta da ọkọ̀ tó ń gbé oúnjẹ ọdún lọ sí ààfin Olúbàdàn lọ́nà, wọ́n pín-in m’ọ́wọ́

Fẹ́mi Akínṣọlá

Àwọn àgbà ní kéreré la tií pẹ̀ka ìrókò, bó bá dà
gbà tán, ẹbọ nlá ni yóó máa gbà.
Ó jọ pé àwọn jàǹdùkú ìgboro Ìbàdàn kò fẹ́ rí oúnjẹ tútù tí wọ́n ń gbé kọjá lọ nínú mọ́tò sójú mọ́ báyìí pẹ̀lú bí àwọn ọmọ ìṣọta kan ṣe tún dá ọkọ̀ bọ́ọ̀sì kan tó ń gbé oúnjẹ tútù lọ sáàfin Olúbàdàn lọ́nà, tí wọ́n sì pín oúnjẹ inú ẹ̀ mọ́ra wọn lọ́wọ́.

Ọkọ̀ bọ́ọ̀sì ọ̀hún, tó kún fún àpò ìrẹṣì, ààyè adìẹ àti ọ̀pọ̀lọpọ̀ kẹ́ẹ̀gì òróró, èyí tí wọ́n ń gbé lọ sáàfin Olúbàdàn tó wà lỌ́jà’ba, n’Ibadan, làwọn ọmọ ìṣọta náà da lọ́nà, tí wọ́n sì bo àwọn oúnjẹ inú ẹ̀ bíi ìgbà tí àwọn adìẹ bá bo ọkàabàbà tó dá sílẹ̀ nígbà tó kù díẹ̀ kí ọkọ̀ ọ̀hún, tó ń bọ̀ láti ọ̀nà Mapo, n’Ibadan, dé ààfin Olúbàdàn ọ̀hún.

Gẹ́gẹ́ báa ṣe gbọ́, oúnjẹ tí wọ́n fẹ́ pin fáwọn Mọ́gàjí ìlú Ìbàdàn gẹ́gẹ́ bíi ẹ̀bùn ọdún làwọn ọmọ ayé ṣe bẹ́ẹ̀ pín mọ́ra wọn lọ́wọ́ lọ́sàn-án gangan Ọjọ́bọ, ọjọ́ kọkànlélógún (21), oṣù Kejìlá, ọdún 2023 yìí.

Níṣe ni wọ́n fọ́ gbogbo gíláàsì ẹ̀gbẹ́ ọkọ̀ náà ki wọ́n lè ríbi kó gbogbo oúnjẹ tó wà nínú ẹ̀.

Tẹ́ ò bá gbàgbé, ní nǹkan bíi oṣù Méjì sẹ́yìn làwọn èèyàn ya bo ọkọ̀ kan tó ń gbé ìrẹsì kọjá lọ lágbègbè Iwo Road, n’Ibadan, tí wọ́n sì bẹ̀rẹ̀ sí i pín àwọn àpò ìrẹsì náà mọ́ ara wọn lọ́wọ́ kó tóó di pé dẹ́rẹ́bà tó wakọ̀ náà ṣíná fún ọkọ̀, tó sì ṣá lọ mọ́ wọn lọ́wọ́.

Nígbà tó ń fìdí ìṣẹ̀lẹ̀ yìí múlẹ̀, ọkàn nínú àwọn Mọ́gàjí ilẹ̀ Ìbàdàn, Mọ́gàjí Nurudeen Akinade, ẹni tó wà nínú ọkọ̀ tó gbé oúnjẹ náà lásìkò ìkọlù ọ̀hún ṣàlàyé pé méjìlá nínú àwọn ọmọ gànfe ọ̀hún lọwọ́ àwọn ọlọ́pàá ti tẹ̀ báyìí, nítorí loju-ẹsẹ tí ìṣẹ̀lẹ̀ ọhún ti wáyé làwọn ti lọ fi tó wọn létí ní téṣàn ọlọ́pàá tó wà ní Mapo, n’Ibadan.

Gẹ́gẹ́ bó ṣe sọ, “látìgbà tá a ti fi ìṣẹlẹ̀ yẹn tó àwọn ọlọ́pàá létí ni wọ́n ti mú díẹ̀ nínú àwọn afurasí olè náà, bẹ́ẹ̀ ni wọ́n tún ti rí díẹ̀ nínú wọn mú lónìí náà. Àwọn tọ́wọ́ ti tẹ̀ lórí ọ̀rọ̀ yìí ṣáà ti di méjìlá bí mo ṣe ń bá yín sọ̀rọ̀ yìí ”.

Ọwọ́ ọlọ́pàá tẹ ikọ̀ ẹ̀rùjẹ̀jẹ̀ adigunjalè ẹlẹ́ni márùn-ún kan

Fẹ́mi Akínṣọlá

Ṣé wọ́n ní ọjọ́ gbogbo ni tolè, ọjọ́ kan péré ni ti olóhun.
Ọ̀dọ̀ àwọn aláṣẹ iléeṣẹ́ ọlọ́pàá agbègbè Kurmi, ní ìjọba ìbílẹ̀ Bakori, ní ìpínlẹ̀ Katsina, làwọn ikọ adigunjale ẹlẹni márùn-ún kan tí wọ́n máa ń fìgbà gbogbo dààmú àwọn aráàlú náà wà báyìí. Àwọn tọwọ ti tẹ ni Ọgbẹni Sharhabilu Dahiru, ẹni ogún ọdún, Ọgbẹni Abubakar Tukur, ẹni ọdún mẹẹẹdọgbọn, Ọgbẹni Kasamanu Abdullah, ẹni ogún ọdún, Ọgbẹni Abdul Rahman Shu’aibu, ẹni ogún ọdún, àti Ọgbẹni Suleiman Sanusi, ẹni ogún ọdún. Ẹsùn tí wọ́n fi kan gbogbo wọn pátá ni pé wọ́n níbọn ìléwọ àgbélẹrọ lọwọ́ tí wọ́n fi máa ń ja àwọn aráàlú lólè nígbà gbogbo.

Oun tí a gbọ́ ni pé ọjọ́ pẹ́
táwọn ikọ̀ ẹlẹ́ni márùn-ún ọ̀hún ti ń lọ káàkiri ìgboro, pàápàá jù lọ lágbègbè Kakumi, ní ìjọba ìbílẹ̀ Bakori yìí kan náà, tí wọ́n sì máa ń jà wọn lólè, kọ́wọ́ tóó tẹ̀ wọ́n láìpẹ́ yìí.

Alukoro ilé iṣẹ́ ọlọ́pàá ìpínlẹ̀ náà, A.S.P Abubakar Sadiq Aliyu, tó fìdí ìṣẹ̀lẹ̀ ọhún múlẹ̀ fáwọn oníròyìn l’Ọ́jọ́rùú, ogúnjọ́, oṣù Kejìlá, ọdún yìí, sọ pé òwúyẹ kan ló wáá ta àwọn ọlọ́pàá agbègbè náà lólobó lọ́jọ́ Ìṣẹ́gun, ọjọ́ kọkàndínlógún, oṣù Kejìlá, ọdún yìí, táwọn sì lọ fọwọ́ òfin mú gbogbo wọn pẹ̀lú ìrànlọ́wọ́ àwọn ọdẹ àdúgbò.

Lára àwọn ohun ìjà olóró táwọn ọlọ́pàá gbà lọ́wọ́ àwọn ọ̀daràn ọ̀hún ni ìbọn AK-47 àtàwọn ohun ìjà olóró mìíràn.

Síwájú sí i, alukoro ní lójú-ẹsẹ̀ táwọn ti fọwọ́ òfin gba gbogbo wọn mú ni wọ́n ti jẹ́wọ́ fáwọn agbófinró pé lóòótọ́ làwọn máa ń lọ káàkiri ìlú láti ja àwọn èèyàn lólè.

Wọ́n láwọn máa tó parí ìwádìí nípa wọn, táwọn sì máa fojú gbogbo wọn balé-ẹjọ́, kí wọ́n lè fimú káta òfin.

Ẹ̀wọ̀n n rùn lóríi ọkùnrin yìí’ físà sílùú òyìnbó ló fi n lu jìbìtì l’Akurẹ

Fẹ́mi Akínṣọlá

Àwọn àgbà ní bí èèyàn bá n yọ́lẹ̀ ẹ́ dà, ohun aburú á máa yọ́wọn ṣe.

Ilé-ẹjọ́ Májísírètì kan tó fìkàlẹ̀ sílùú Akurẹ, ti ní kí baba àgbàlagbà kan, Daniel Adedọtun, ṣì lọ máa gbatẹ́gùn nínú ọgbà àtúnrọ ìwà tó wà ní Olokuta, lórí ẹ̀sùn fífi físà gbígbà lu ọ̀pọ̀lọpọ̀ èèyàn ní jìbìtì.

Bàbá ẹni ọdún mẹtalelọgọta ọ̀hún àtàwọn mí-ìn táwọn ọlọ́pàá ṣì ń wá báyìí ni wọ́n fẹsun kàn pé wọ́n fi ẹ̀tàn gba owó tó dín díẹ̀ ní mílíọ̀nù lọnà ogun Náírà (#19.7m) lọwọ́ àwọn èèyàn kan nílùú Akurẹ, lórí ọrọ̀ pé wọ́n fẹ́ bá wọn gba fisa ìlú òyìnbó laarin oṣu Kejì si Ikẹwaa, ọdun yii.

Lára ẹsùn mẹ́fà tí wọ́n kà sí bàbá yìí lọ́rùn nígbà tó ń fara hàn níwájú Onídàájọ Damilọla Ṣekoni, lọ́jọ́ Ẹtì, ọjọ́ kejìlélógún, oṣù Kejìlá yìí, ni ìgbìmọ̀-pọ̀ hùwà tó lòdì sófin, olè jíjà, fífi ọ̀nà èrú sọ nnkan oní nnkan di tẹni, fífi ẹ̀tàn gbowó lọ́wọ́ ẹni àti jìbìtì lílù.

Àwọn ẹ̀sùn yìí ni ọlọ́pàá agbèfọ́ba, Simon Wada, ní ó ta ko abala kín-ín-ní, ìlà kín-ín-ní àti ẹ̀kẹta, okoòlélẹ́ẹ̀dẹ́gbẹ́ta dín mẹ́rin (516) nínú ìwé òfin ìpínlẹ̀ Ondo ti ọdún 2006.

Wada ní owó tó tó mílíọ̀nù mẹ́sàn-án Náírà ni afurasí ọ̀hún fẹ̀tàn gbà lọ́wọ́ ọkùnrin kan ti orúkọ rẹ̀ ń jẹ́ Fọlayẹle, pẹ̀lú ìlérí pé òun fẹ́ ràn án lọ́wọ́ láti gba ìwé-ẹ̀rí tí yóó fi kẹ́kọ̀ọ́ ọ̀fẹ́ lórílẹ̀-èdè Amẹ́ríkà.

Jìbìtì mílíọ̀nù méje Náírà ni Abilékọ kan tí wọ́n porúkọ rẹ̀ ní Christianah Jombo, fi gbára ní tirẹ̀, èyí tó san fún afuarsí oníjìbìtì yìí láti bá a fi gba físà Amẹ́ríkà fún àbúrò rẹ̀ kan, Abilékọ Aderonkẹ Ayangbemi. Bẹ́ẹ̀ ló tún fọ̀nà èrú gba mílíọ̀nù márùn-ún àtààbọ̀ Náírà lọ́wọ́ Fẹmi Bayọde, lórí ọ̀rọ̀ ìlú òyìnbó yìí kan náà.

Níparí ọ̀rọ̀ rẹ̀, Wada ní òun fẹ́ kílé ẹjọ́ ṣì fi olùjẹ́jọ́ náà pamọ́ sọ̀gbá ìtúnirọ títí dìgbà tí ìmọràn yóò fi wá láti ọ́fììsì àjọ tó ń gba adájọ́ nímọ̀ràn.

Nígbà tó ń gbé ìpinnu rẹ̀ kalẹ̀, Onídàájọ Ṣekoni gba ẹ̀bẹ̀ agbèfọ́ba wọlé, lẹ́yìn èyí ló sún ìgbẹ́jọ́ mí-ìn sí ọjọ́ kọkàndínlọ́gbọ̀n, oṣù Kín-ín-ní, ọdún 2024

Adejumo Lewis ,
Ògbóntarìgì òṣèré tíátà, jáde láyé

Fẹ́mi Akínṣọlá

Àìsàn nìkan niè ẹ̀dá rí wò, kò séèyàn tó rí ti ọlọ́jọ́ ṣe .
Gbajúgbajà òṣèré tíátà, Dejumo Lewis tí jáde láyé.

Àgbà òṣèré náà lo ọgọ́rin ọdún ní dúníyàn.

Saidi Balogun, gbajúmò òṣèré tíátà ló kéde ìpapòdà Lewis lórí òpó ayélujára rẹ̀ lọ́jọ́ Sátidé.

Ó gbé fọ́nrán olóògbé náà síta, tó sì, sọ pé “Ód’ìgbà, kí Ọlọ́run tẹ́ ọ sáfẹ́fẹ́ rere, RIP”

Ohun tó ṣokùnfa ikú Lewis ni kò tí ì hàn sí aráyé báyìí.

Ọ̀pọ̀ àwọn òṣeré tíátà l’ọ́kùnrin àti l’óbìnrin ló bọ́ sórí ayélujára láti sàárò èèyàn wọn tó lọ.

Lewis jẹ́ gbajúmọ̀ òṣèré tíátà, ó kópa nínú eré sinimá ‘The Village Headmaster láti ọdún 1968 sí 1988, tó jẹ́ pé òun ló kópa gẹ́gẹ́ bíi Kábíyèsí nínú sinimá ọ̀hún

Àwọn sinimá mìíràn tó jẹ́ ti Lewis ni “A Place in the Stars” (2014), “Crossroads” (2020), and “Power of 1” (2018),

Aláṣẹ Iléeṣẹ́ Crime Alert wẹ̀wọ̀n fún ẹ̀sùn jìbìtì

Ọrẹ Òtítọ́jù

Olùdásílẹ̀ ilé iṣẹ́ Crime Alert Security Network, ní Ìbàdàn, Olaniyan Gbenga Amos ti dèrò ọgbà ẹ̀wọ̀n lẹ́yìn tí Iléẹjọ́ to n joko nílùú Ìbàdàn ni ó jẹ̀bi ẹ̀sùn jìbìtì.

Ẹwọn ọdún marindinlọgọrin ni Adajọ Bayo Taiwo ti ile ẹjọ giga to n joko niluu Ibadan, gbe kalẹ fun oludasilẹ ileeṣẹ Crime Alert Security Network, Olaniyan Gbenga Amos lori ẹsun jibiti naa.

Bẹ́ẹ̀ bá gbàgbé Olaniyan ni ọwọ́ àjọ EFCC tẹ ní ọdún 2020 lẹ́yìn tó lu ọpọ èèyàn ní jibiti owo ìdókòwò pẹ̀lú ileeṣẹ rẹ.

Ó se ìlérí pé òun yoo da owo ati ele ori owo pada fun awọn to ba dokowo sugbọn ọrọ gba ibo miiran jade, ti ko si ri owo naa san pada.

Ẹsun marindinlogogi ni EFCC ka si ẹsẹ Olaniyan niwaju ileẹjọ.

Nínú atẹjade tí agbẹnusọ EFCC, Dele Oyewale gbe sita lọjọ Isẹgun, o ni Olaniyan ati ileeṣẹ rẹ, Detorrid Heritage Investment Limited ni wọn gbe lọ ileẹjọ ni ọjọ kẹrinla oṣu kejila ọdun 2023.

Ọdún tó kọjá , ẹlẹrìí àjọ EFCC, Juliet Odogu sọ fún ilé-ẹjọ́ pé o tó igba ni iye àwọn èèyàn tí Olaniyan lu ní Jibiti ni owo to to aadọjọ milọnu naira.

Ó ní àwọn èèyàn san ẹgbẹrun márùn un náírà si milọnu mẹsan an naira fun Olaniyan lẹyin ti wọn ba dowopọ.

Bákan náà ló se àfihàn ìwé àkọsílẹ̀ tí àwọn èèyàn náà fi san owó fún ileeṣẹ Olaniyan fún Ilé-ẹjọ́.

Gẹ́gẹ́ bí EFCC se sọ, Olaniyan ni wọ́n tún fẹ̀sùn kàn pé ó gba mílíọ̀nù mẹ́ẹ̀ẹ́dógún náírà lọ́wọ́ Fadipe Ayorinde pẹ̀lú ìlérí pé yóó gba ìdá ọgbọ̀n pẹ̀lú owó tó fi dókòwò lẹ́yìn ọ̀sẹ̀ mẹ́fà.