Ìjọba ìpínlẹ̀ Ọ̀yọ́ fẹ́ẹ́ bẹ̀rẹ̀ ayẹyẹ ọdún eégún ọlọ́dọọdún

Fẹ́mi Akínṣọlá

Àwọn àgbà bọ̀ wọ́n ní tẹni n tẹni, ìran ọlọ́jẹ̀ ló lẹ̀kún, olórò ló lawo.
Yàtọ̀ sí ọdún eégún tó máa ń wáyé lọdọọdun lásìkò tó yàtọ síra wọn nílùú kan sikeji káàkiri ìpínlẹ̀ Ọ̀yọ́, ìjọba Gómìnà Ṣeyi Mákindé ti pinnu láti ní ọdún eégún kan lọtọ tí yóó jẹ́ tìjọba.

Gbogbo àwọn atọkùn eégún tá a mọ̀ sí Alágbàáà jákè -jàdò ìpínlẹ̀ Ọ̀yọ́ ni wọ́n ti fara mọ́ ìpinnu ìjọba yìí nínú ìpàdé tí àwọn aṣojú ìjọba ṣe pẹ̀lú wọn l’Ojọbọ, ọjọ́ kẹta, oṣù kẹjọ, ọdún 2023 yìí.

Nígbà tó ń kéde ìpinnu ọhún fún gbogbo ayé gbọ́, Kọmiṣanna fétò ìròyìn, àṣà àti irinna afẹ níìpìnlẹ̀ Ọ̀yọ́, Ọ̀mọ̀wé Wasiu Ọlatubọsun, sọ pé ìjọba yóò ya ọjọ́ kan sọ́tọ̀ fún ọdún eégún, níbi tí gbogbo eégún ìpínlẹ̀ náà yóó ti máa dá àwọn lárayá, níbì kan náà, lọ́jọ́ kan náà.

Gẹ́gẹ́ bó ṣe sọ, “ Kí àwọn eégún máa fi eré dá àwọn èèyàn láyayá jẹ́ nǹkan ọ̀tun, èyí tí kò tí ì sírú ẹ̀ níbi kan rí lórílèdè yìí. Èyí yóò ṣàfihàn wa gẹ́gẹ́ bíi àwòṣe rere fáwọn ìpínlẹ̀ yòókù gẹ́gẹ́ bíi àkọmọ̀nà ìpínlẹ̀ yìí tó sọ pé

“Ajíṣe bíi Ọ̀yọ́ là á rí …”

“ Ṣíṣe irú nǹkan báyìí yóò jẹ́ ọ̀nà tí owó yóò fi máa wọlé sápò ìjọba, nítorí àwọn arìnrìn-àjò afẹ́ yóó lè máa kó owó wọn wá láti wòran àwọn eégún láti ilẹ̀ òkèèrè káàkiri”.

Yàtọ̀ sí pé gbogbo àwọn alágbàáà tó wà níbi ìpàdé ọhún ni wọ́n fara mọ́ ìpinnu ìjọba náà, gbogbo wọn ni wọ́n ti ṣèlérí pé àwọn yóó ṣàtìlẹ́yìn fún ìjọba lórí ìpinnu náà.

Bàbá ogójì ọdún tó fipá bá ọmọ ọdún mẹ́ta lò pọ̀ ti rẹ́wọ̀n he

Fẹ́mi Akínṣọlá

Èèyàn tó bá ṣe ohun tẹ́nìkan kò ṣe rí, kò láìfì kójú onítọ̀hún ó rí n tẹ́nìkan kò rí.
Ṣé wọ́n ní ràdàràdà kìí báwọn lágbà,nì báyìí,wọ́n ti wọ́ Ọ̀gbẹ́ni Abdulahi Lawal, ẹni ogójì ọdún lọ iwájú Onídàájọ A.B Olagbegi Adelabu, tilé-ẹjọ́ Májísírétí kan tó wà nílùú Ikorodu, ní ìpínlẹ̀ Èkó. Ẹsùn tí wọ́n fi kàn án ni pé ó fipá bá ọmọ ọdún mẹ́ta kan tó jẹ́ ọmọ aráalé rẹ̀ sùn.

Ọlọ́pàá olùpẹ̀jọ́, Abilékọ Ọlawumi Ọsinbajo, tó fojú Lawal balé-ẹjọ́ sọ pé inú oṣù Kẹfà, ọdún yìí, ní Lawal hùwà rádaràda náà l’Ójúlé kẹẹ̀ẹ́dọ́gbọ̀n, Òpópónà Owutu, lágbègbè Agric, nílùú Ikorodu, ní ìpínlẹ̀ Èkó.

Ó ní ṣe ni Lawal gbé ọmọ ọdún mẹ́ta ọ̀hún wọnú yàrá rẹ̀ lákòókò tó ń bá a ṣeré lọ́wọ́ níwájú òbí rẹ̀, tó sì fipá bá a sùn.

Nígbà tí màmá ọmọ ọhún ń wá a káàkiri, tó sì ń pariwo rẹ̀ lọmọ náà jáde nínú yàrá Lawal, tí ẹjẹ́ sì wà lára aṣọ rẹ̀ yánna- yànna

Lójú-ẹ̀sẹ̀ ní màmá ọmọ ọ̀hún ti lọọ fọ̀rọ̀ náà tó àwọn ọlọ́pàá agbègbè náà létí, tí àwọn agbófinró yìí sì lọọ fọwọ́ òfin mú un nílé rẹ̀.

Gbogbo ẹsùn tí ọlọ́pàá náà fi kàa Lawal pátá ló ní òfin ìlú Èkó kò fààyè gbà rárá.

Adájọ́ ilé-ẹjọ́ náà, Abilékọ A.B Olagbegi, kò tiì tẹ́tí gbọ́ ẹ̀bẹ̀ rẹ̀ rárá. Ó ní kí wọ́n lọ̀ọ́ gbà àmọ̀rán wà lórí ẹjọ́ náà lọdọ àjọ kan tó ń gba ilé-ẹjọ́ nímọ̀ràn, ‘Lagos State Directorate Of Public Prosecution’ DPP.

Bákan náà ló ní kí wọ́n lọ̀ọ́ jù ú sọ́gbà ẹ̀wọ̀n Kiríkirì tó wà nílùú Èkó, títí ìgbẹ́jọ́ máa fi wáyé.

Ó sún ìgbẹ́jọ́ sọ́jọ́ kẹrìnlá, oṣù Kẹsàn-án, ọdún 2023 yìí.

Àwọn ọmọ-ọwọ́ nìkan ni ọyàn mímu wà fún – ìyàwó Mákindé

Fẹ́mi Akínṣọlá

Ṣé Yorùbá bọ̀ wọ́n ní ẹ̀là lọ̀rọ̀ bí a ò bá làá , kìí yéni ní báyìí,Ìyàwó Gómìnà ìpínlẹ̀ Ọ̀yọ́, Abilekọ Tamunominini Makinde, ti ṣàpèjúwe ọyàn gẹ́gẹ́ bíi oúnjẹ tó dáa, tó dùn, tó ṣara lóore, tó sì dáa fún gbogbo èèyàn láti máa mu.

Àmọ́ ṣáá, àwọn ọmọ ọwọ́ nìkan níyàwó Gómìnà yìí tọ́ka sí gẹ́gẹ́ bíi ẹni tó nílò oúnjẹ aṣara lóore náà.

Níbi ètò ọlọ́dọọdún tí wọ́n fi ṣàmí ayẹyẹ fífún ọmọ lọ́yàn lo ti sọ̀rọ̀ náà n’Íbàdàn, l’Ójọ́bọ, ọjọ́ kẹta, oṣù Kẹjọ, ọdún 2023 yìí.
Nígbà tó n sọ pàtàkì fífún ọmọ lọ́yàn nìkan fún àwọn obìnrin, Abilékọ Mákindé fìdí ẹ̀ múlẹ̀ pé ọyàn loúnjẹ tó dáa jù tí ìkókó gbọdọ̀ mu láìjẹ oúnjẹ mí-ìn rárá láàrin oṣù mẹ́fà àkọ́kọ́ tí wọ́n bí i sáyé.

Àkòrí ayẹyẹ tọdúun yìí ló dá lórí bí àwọn òṣìṣẹ́ ṣe lè máa fún ọmọ wọn lọ́yàn dáadáa.

Ó ṣàpèjúwe omi ọyàn gẹ́gẹ́ bíi omi tó mọ́, tó sì jẹ́ oúnjẹ aṣaralóore tó dáa jù fáwọn ọmọ ọwọ́.

O wáá dúpẹ lọ́wọ́ Gómìnà ìpínlẹ̀ náà, Ẹnjinnia Ṣeyi Mákindé, fún bó ṣe ń sàtìlẹyìn fún àwọn obìnrin àtàwọn ọmọdé ní ìpínlẹ̀ náà.

“Iléeṣẹ́ tí wọ́n ti n fọ epo ní Port Harcourt yóó bẹ̀rẹ̀ iṣẹ́ nínú oṣù Kejìlá”

Ọrẹ Òtítọ́jù

Ààrẹ Nàìjíríà, Bọla Tinubu ti ṣèlérí láti parí àtúnṣe iléeṣẹ́ ìfọpo tó wà nílùú Portharcourt kí ọdún 2023 tó parí.

Eyi jẹyọ lẹyin ti ipade waye laarin aarẹ atawọn aṣiwaju ẹgbẹ oṣiṣẹ lorilẹede Naijiria.

Agbenusọ Tinubu, Dele Alake lo fi ọrọ naa lede lẹyin ipade bonkẹlẹ naa to waye niluu Abuja.

Alake fi kun pe Aarẹ Tinubu ṣeleri fun awọn adari oṣiṣẹ ọhun pe ijọba yoo ṣatunṣe ileeṣẹ ti wọn ti n fọ epo to wa niluu Port Harcourt, yoo si bẹrẹ iṣẹ ninu oṣu Kejila, ọdun 2023 yii.

Amọ ko tii si ẹni lee sọ boya eyi yoo to fun awọn oṣiṣẹ ni idaniloju ati ṣẹwele iyanṣẹlodi wọn.

Alake sọ pé “lẹ́yìn ìpàdé tí wọ́n ṣe pẹ̀lú Ààrẹ àti ìgbàgbọ́ wọn nínú rẹ̀ pé yóó ṣe àgbéyẹ̀wó àwọn ohun tí wọn gbé wá síwájú rẹ̀, wọ́n ti gbà láti wá ọ̀nà míì láti jíròrò pẹ̀lú ìjọba lórí àwọn ohun tí wọ́n n bèèrè láti ọjọ́ pípẹ́ wá.”

Oyè á mọ́rí ,Ganduje di alága tuntun fún APC

Ọrẹ Òtítọ́jù

Gómìnà àná ní ìpínlẹ̀ Kano, Abdullahi Ganduje ti di alága ẹgbẹ́ òṣèlú All Progressive Congress, APC lórílẹ̀èdè Nàìjíríà.

Ni Ọjọbọ ni igbimọ apapọ ẹgbẹ oṣelu APC dibo yan Ganduje gẹgẹ bii alaga tuntun.

Bakan naa ni wọn tun dibo yan agbẹnusọ tẹlẹ fun ile aṣofin agba, Sẹnetọ Ajibọla Bashiru lati ipinlẹ Ọṣun gẹgẹ bi akọwe agba ẹgbẹ oṣelu naa.

Ipade igbimọ to ga julọ lẹgbẹ oṣelu naa waye nilu Abuja.
Ganduje ṣeleri lati rii daju pe ilana eto tiwantiwa ri ẹsẹ walẹ laarin ẹgbẹ oṣelu naa lasiko oun.

O wa ṣeleri iwe iforukọsilẹ igbalode fun awọn ọmọ ẹgbẹ naa ati pe oun yoo mojuto akoso eto idibo ati binukonu laarin awọn ọmọ ẹgbẹ oṣelu naa.

Ààrẹ Bọla Tinubu àti igbákejì rẹ̀, Kashim Shettima, àwọn gómìnà lábẹ́ àṣìá ẹgbẹ́ òṣèlú ọ̀hún àtàwọn igi nla ẹgbẹ́ òṣèlú náà wà níkàlẹ̀ lásìkò tí wọ́n dìbò yan Ganduje.

Ìjọba fòfin de Tiktok lílò

Fẹ́mi Akínṣọlá

Orílẹ̀ èdè Senegal ti darapọ̀ mọ́ àwọn orílẹ̀ èdè tí wọ́n ti fòfin dé lílò Tiktok gẹ́gẹ́ bí àwọn orílẹ̀ èdè kan ti ṣe ṣáájú.

Mínísítà fétò ìbáraẹnisọ̀rọ̀ orílẹ̀ èdè Senegal, Moussa Bocar Thiam ní àwọn ti ṣe àwárí rẹ̀ pé Tiktok ní àwọn tó máa ń pín ọ̀rọ̀ òdì àtàwọn ọ̀rọ̀ tó le dá wàhálà sílẹ̀ ní orílẹ̀ èdè náà máa ń lò.

Thiam ní àwọn kò ní fi ààyè gba áàpù tó le da omi àláfíà ìlú náà rú.

Ṣáájú ni ìbẹ̀rẹ̀ ọ̀sẹ̀ yìí ni ìjọba Senegal ti kọ́kọ́ dẹnu ayélujára orílẹ̀ èdè náà kọlẹ̀ tí mínísítà ọ̀hún sì ti ṣèkìlọ̀ fáwọn ènìyàn láti tẹ̀lé òfin ọ̀hún.

Àmọ́ ọ̀pọ̀ àwọn ènìyàn ló ṣì ń ní àǹfàní láti lo ayélujára wọn ṣùgbọ́n ojú òpó náà kò já gaara.

Àwọn ènìyàn tó lé ní mílíọ̀nù mẹ́wàá ló ń ṣàmúlò ayélujára ní Senegal èyí tó jẹ́ ìdá méjìdínlọ́gọ́ta àwọn ènìyàn tó wà ní orílẹ̀ èdè náà.

Orílẹ̀ èdè Jordan náà ti fòfin de lílò Tiktok látàrí wáhàlá tó bẹ́ sílẹ̀ ní orílẹ̀ èdè ọ̀hún lẹ́yìn tí àlékún bá owó epo bẹntiróòlù.

Láti ọjọ́ Kẹrìndínlógún oṣù Kejìlá ọdún 2022 ni orílẹ̀ èdè náà ti gbégi dí lílo áàpù Tiktok láti ṣe àmójútó ìwọ́de tó lé ní ọ̀sẹ̀ kan tó wáyé ní orílẹ̀ èdè ọ̀hún nítorí àlékún owó epo.

Adarí ètò ààbò Jordan sọ lórí Facebook pé ẹ̀ka tó ń rí sí ìwà ọ̀daràn lórí ayélujára gbàgbọ́ pé àwọn ènìyàn ti ṣe àmúlò Tiktok lọ́nà tí kò tọ́.

Wọ́n ní àwọn kò ní fi ààyè gba gbígbé àwọn fídíò tó ń pè fún ìdàlúrú àti wàhálà láàyè ní orílẹ̀ èdè náà.

Ó ní ẹ̀ka náà ń ṣe àmójútó àwọn nǹkan tó ń jáde lórí ayélujára pàápàá lórí àwọn ìpèdè tó le dá wàhálà sílẹ̀.

Àwọn tó ń ṣàmúlò áàpù náà ní ìjọba Jordan kàn mọ̀-ọ́n-mọ̀ fẹ́ pa àwọn lẹ́nu mọ́ láti má pariwo wàhálà tó ń ló ní orílẹ̀ èdè náà síta.

Yàtọ̀ sí Jordan, àwọn orílẹ̀ èdè tó tún ti fòfin de lílo Tiktok ni Canada, Amẹ́ríkà, India, Taiwan, Pakistan, Afghanistan àti Iran.

Akẹ́kọ̀ọ́ mẹ́ta tó fipábánilòpọ̀ rí ẹ̀wọ̀n he

Fẹ́mi Akínṣọlá

Ilé ẹjọ́ gíga ìpńlẹ̀ Kwara tó fi ìlú Ilorin ṣe ibùjókòó ti ran àwọn akẹ́kọ̀ọ́ mẹ́ta kan lẹ́wọ̀n fẹ́sùn wí pé wọ́n fipá bá pá ìbátan ọ̀kan nínú wọn lòpọ̀.

Adájọ́ Adenike Akinpelu ní ilé ẹjọ́ fìdí rẹ̀ múlẹ̀ pé àwọn ènìyàn náà jẹ̀bi ẹ̀sùn méjì tí wọ́n kà sí wọn lọ́rùn.

Ní agbègbè Adangba, ìjọba ìbílẹ̀ Ilorin East ni ìṣẹ̀lẹ̀ ìfipábánilòpọ̀ náà ti wáyé.

Àwọn mẹ́tẹ̀ẹ̀ta, Omotosho Yahaya, Mustapha Ahmed àti Mustapha Ridwan ni wọ́n jẹ́ akẹ́kọ̀ọ́ ilé ẹ̀kọ́ gíga kan ní ìpínlẹ̀ Kwara.

Ìròyìn ní Yahaya ló ránṣẹ́ pé àwọn ọ̀rẹ́ rẹ̀ méjì láti wá fipá bá arábìnrin náà lòpọ̀ nígbà tó wà nínú ilé pẹ̀lú rẹ̀.

Adajo Akinpelu sọ àwọn afurasí mẹ́tẹ̀ẹ̀ta náà sẹ́wọ̀n ọdún márùn-ún fẹ́sùn ìfipábánilòpọ̀ àti ẹ̀wọ̀n ọdún méjì mìíràn fẹ́sùn lílẹ̀dí àpòpọ̀ láti fi hu ìwà àìda.

Bákan náà ni ilé ẹjọ́ tún ní kí wọ́n san owó ìtanràn ẹgbẹ́rùn lọ́nà àádọ́ta náírà ẹnì kọ̀ọ̀kan wọn.

Adájọ́ ní fúnra àwọn mẹ́tẹ̀ẹ̀ta ni wọ́n jẹ́wọ́ ẹ̀ṣẹ̀ tí wọ́n ṣẹ̀ àti pé sísọ wí pé arábìnrin tí wọ́n bá lòpọ̀ náà jẹ àwọn lówó jẹ́ ọ̀nà láti fẹ́ sá fún ìjìyà ẹ̀ṣẹ̀ wọn ni.

Nígbà tó ń sọ̀rọ̀ lórí ìgbẹ́jọ́ náà, olùpẹjọ́, Muslimat Suleiman láti iléeṣẹ́ ètò ìdájọ́ ìpínlẹ̀ Kwara ní ìdájọ́ náà dùn mọ́ àwọn pé àwọn afúrasí náà kojú ìyà ẹ̀ṣẹ̀ wọn.

Atótónu parí, ìdájọ́ ló kù – ìgbìmọ̀ tó ń gbọ́ ẹ̀hónú ìbò Ààrẹ

Fẹ́mi Akínṣọlá

Ìgbìmọ̀ tó ń gbọ́ ẹ̀hónú ìbò Ààrẹ lorilẹede Nàìjíríà ní gbogbo atótónu tó yẹ kó wáyé lórí ẹjọ́ tí olùdíje sípò Ààrẹ lẹ́gbẹ́ òṣèlú Peoples Democratic Party, PDP, Alhaji Atiku Abubakar pè tako ìjáwé olúborí Tinubu ti parí.

Ìgbìmọ̀ adájọ́ ẹlẹ́ni márùn-ún náà ni gbogbo ètò ìgbẹ́jọ́ ti parí lẹ́yìn tí wọ́n ka àwọn àkọ́ọ́lẹ̀ tí àwọn olùpẹjọ́ pè níbi ìjókòó ìgbẹ́jọ́ tó wáyé lọ́jọ́ Ìṣẹ́gun, ọjọ́ Kìíní, oṣù Kẹjọ ọdún 2023.

Alága ìgbìmọ́ ọ̀hún, Adájọ́ Haruna Tsamani sọ wí pé ìgbìmọ̀ oludajọ náà yóò fi ọjọ́ ìdájọ́ ti wọn ba yan to gbogbo ìlú létí ní kété tí wọ́n bá ti fẹnukò lórí rẹ̀.

Atiku Abubakar ń pe ẹjọ́ tako bí àjọ elétò ìdìbò Nàìjíríà, Inec ṣe kéde Bola Tinubu gẹ́gẹ́ bí olúborí ìdìbò Ààrẹ tó wáyé loṣu Kejì ọdún 2023.

Bákan náà ni olùdíje lẹ́gbẹ́ òṣèlú Labour Party, Peter Obi náà ní òun kò gbà pé Tinubu ló gbégbá orókè níbi ètò ìdìbò náà.

Wọ́n ń fẹ̀sùn kàn pé màgòmágó wà nínú ètò ìdìbò náà tí wọ́n sì ń rọ ilé ẹjọ́ láti wọ́gilé ìdìbò ọ̀hún, kí INEC gba ìwé ẹ̀rí mo yege tí wọ́n ti ṣáájú fún Tinubu kúrò lọ́wọ́ rẹ̀.

Ṣaájú ni ìgbìmọ̀ náà ti ní kí gbogbo àwọn olùpẹjọ́ ìyẹn Atiku Abubakar àti Peter Obi tẹgbẹ́ òṣèlú Labour Party wá sọ gbogbo ohun tí wọ́n bá ní lọ́jọ́ Ìṣẹ́gun.

Ìjọba mi kò káwọ́ gbera látàrí ìpèníjà tí àwọn ènìyàn ń kojú lọ́wọ́lọ́wọ́–Ààrẹ Tinubu

Fẹ́mi Akínṣọlá

Ṣe àwọn àgbà bọ̀, wọ́n ní ọmọ onílùú tòótọ́ kò ní-ín fẹ́ kó tú, àti pé ohun a fẹ̀sọ̀ mú kìí bàjẹ́,ohun a bá fagbára mú koko ní-ín leí alẹ́.
Ní ọjọ́ Ajé ni Ààrẹ Orílẹ̀ yìí Tinubu bá àwọn ọmọ Nàìjíríà sọ̀rọ̀ lórí àwọn ìpèníjà tí àwọn ènìyàn ń kojú l’ati ìgbà tí wọ́n ti yọ ìrànwọ́ orí epo bẹntiróòlù.

Àwọn kókó ohun tí ọ̀rọ̀ rẹ̀ dá lé lórí ni ètò ọrọ̀ ajé, ẹ̀kọ́ àtàwọn nǹkan mìíràn.

Tinubu ní òun mọ́ gbogbo ìdojúkọ tí àwọn ènìyàn ń kojú báyìí láti ìgbà tí wọ́n ti yọ ìrànwọ́ orí bẹntiróòlù.

Ààrẹ ní ìjọba òun kò sùn tí àwọn sì ń gbé gbogbo ìgbésẹ̀ tó yẹ láti mú ìdẹ̀kùn bá àwọn ènìyàn.

Ó ṣàlàyé pé ìjọba òun ti ń ṣiṣẹ́ pọ̀ pẹ̀lú àwọn ìjọba ìpínlẹ̀ àti ti ìbílẹ̀ láti ri dájú pé gbogbo ẹ̀ka ni ìrọ̀rùn ti wáyé.

Ìpèsè iṣẹ́
Tinubu ní ìjọba òun ti ya ₦75bn kalẹ̀ láti pèsè iṣẹ́ tó dára fún àwọn ènìyàn àti pé láàárí oṣù Keje ọdún 2023 sí oṣù Kẹta ọdún 2024 ni yóò wáyé.

Ó ní èròńgbà àwọn ni láti pèsè ẹ̀yáwó bílíọ̀nù kan náírà fáwọn iléeṣẹ́ márùndíndínlọ́gọ́rin láti bẹ̀rẹ̀ òwò tó máa mú ìgbéga bá okoòwò wọn àti ìpèsè iṣẹ́ fún àwọn ará ìlú.

Bákan náà ló sọ wí pé àwọn yóò tún pèsè owó ₦125bn fún àwọn olókoòwò kékeré láti fi mú kí ẹ̀ká yìí gbèrú síi.

Ìpèsè oúnjẹ
Ààrẹ tún ṣàlàyé pé láti lè ri dájú pé oúnjẹ pọ̀ lọ́pọ̀ yanturu ní orílẹ̀ èdè Nàìjíríà, Tinubu ní àwọn ti ń bá àwọn àgbẹ̀ sọ̀rọ̀ lórí ọ̀nà tí wọ́n máa gbà láti pèsè ọúnjẹ tó máa pọ̀ fún ará ìlú.

Ó ní òun ti pàṣẹ pé kí wọ́n bẹ̀rẹ̀ sí ní pín àwọn oúnjẹ wooro tó tó ẹgbẹ̀rún lọ́nà ìgbà sáwọn ìdílé káàkiri orílẹ̀ èdè Nàìjíríà.

Bákan náà ló ní àwọn tún ti bẹ̀rẹ̀ sí ní pín ajílẹ̀ fáwọn àgbẹ̀ àti pé igba bílíọ̀nù náírà nínú ẹ̀yáwó tí àwọn fẹ́ gbà ni àwọn máa dà sí ètò ọ̀gbìn.

Ìpèsè ọkọ̀
Tinubu ní lára àwọn ìgbésẹ̀ tí ìjọba òun ń gbé ni ìpèsè ọkọ̀ kí lílọ bíbọ̀ àwọn ènìyàn le túnbọ̀ máa rọrùn síi.

Ó ní àwọn ń gbèrò láti ná ọgọ́rùn-ún bílíọ̀nù náírà láti fi ra àwọn ọkọ̀ 3,000 sí ìjọba ìpínlẹ̀ àti ìbílẹ̀ láti máa fi gbé àwọn ènìyàn ní owó pọ́ọ́kú.

Ó ní àwọn ọkọ̀ náà ni èyí tó má máa lo afẹ́fẹ́ gáàsì dípò epo bẹntiróòlù àti pé àwọn máa bá àwọn iléeṣẹ́ ọlọ́kọ̀ dòwò pọ̀ láti mú ètò náà wá sí ìmúṣẹ.

Àlékún owó oṣù àwọn òṣìṣẹ́
Ààrẹ tún ṣàlàyé pé àwọn ti ń bá àwọn ẹgbẹ́ òṣìṣẹ́ jíròrò láti sọ̀rọ̀ lórí owó oṣù tó kéré jùlọ fáwọn òṣìṣẹ́.

Ó ní kété tí àwọn bá ti fẹnukò lórí iye tí owó náà yóò jẹ́ ni àwọn yóò gbé àbá ìsúná síwájú ilé aṣòfin kí àwọn lè bẹ̀rẹ̀ sísan rẹ̀ lẹ́sẹ̀kẹsẹ̀.

Bákan náà ló kan sáárá sí àwọn òṣìṣẹ́ pé àlékún ń bọ̀ lórí owó oṣù wọn láìpẹ́, pé kí wọ́n fi ọkàn balẹ̀ tó sì tún yin àwọn ilé iṣẹ́ aládani tó ti mú àlékún bá owó oṣù àwọn òṣìṣẹ́ wọn.

Ètó ẹ̀kọ́
Tinubu tún tẹ̀síwájú pé òun máa mú ìlérí òun ṣẹ nípa pípèsè ètó ẹ̀kọ́ tí kò ní gun àwọn ènìyàn lápá.

Ó ní ìjọba òun máa ṣe àrídájú rẹ̀ pé kò sí akẹ́kọ̀ọ́ kankan tí yóò pa ètò ẹ̀kọ́ rẹ̀ tì nítorí àìsí owó tí yóò fi tẹ̀síwájú nítorí ẹ̀yáwó máa wà fún àwọn akẹ́kọ̀ọ́ ni gbogbo ìpele.

Tinubu sọ ní ìkẹyìn ọ̀rọ̀ rẹ̀ pé bí nǹkan yóò bá dára yóò kọ́kọ́ le ní ìbẹ̀rẹ̀ àti pé àsìkò tí nǹkan yóò le ni a wà yìí àmọ́ ìdẹ̀kùn ti dé tán.

Ó ní ó dá òun lójú pé àsìkò tí ohun gbogbo yóò dẹrùn fún àwọn ọmọ Nàìjíríà ni a ti dé báyìí.

Mo ṣèsì lo ATM oníbàárà gba owó ni ẹ màrún-ún ọ̀tọ̀ọ̀tọ̀ – Òṣìṣẹ́ Banki tẹ́lẹ̀rí

Fẹ́mi Akínṣọlá

Kólékólé dasóde, jàgùdà jẹ baálẹ̀ ọjà.Òṣìṣẹ́ báńkì tẹ́lẹ̀rí, Uchenna Emmaunel ti jẹ́wọ́ pé òun sèèsì lo káàdì ìgba owó tí a mọ̀ sí ATM tó jẹ́ ti oníbàárà báńkì tó ń bá ṣiṣẹ́ gba owó ní ẹ̀marùún ọ̀tọ̀ọ̀tọ̀.

Afurasí ọhún tú pẹrẹpẹ́rẹ̀ ọ̀rọ̀ lọ́jọ́ Ẹtì lásìkò tí iléeṣẹ́ Ọlọ́pàá níìpínlẹ̀ Ondo ń ṣàfihàn rẹ̀ nílùú Àkúrẹ́ pẹ̀lú àwọn afurasí mìíràn.

Nínú Àlàyé rẹ̀, ó ní òun gba owó jáde pẹlú káàdì náà ní ìgbà márùn láti ra nǹkan tí àpapọ rẹ̀ jẹ́ ẹgbẹ̀run márùndínlógójì náírà.

Ó tẹ̀síwájú pé POS tí òun lò láti fi gba owó nínú àpò owó oníbàárà ni òun ti dá a bí ọgbọ́n sí, tí ẹnikẹ́ni kò sì lè fura.

Ó ṣàlàyé síwájú: ” Mo sèsì lo káàdì owó oníbàárà láti fi ra nǹkan láti iléeṣẹ́ kan

“Mo rò pé Káàdì mi ni

“Wọ́n bi mi pé báwo ni mo se mọ nọ́mbà àti píìnì ìgba owó oníbàárà náà, mo ní mo lo nọ́mbà témi.

“POS tí a lò fi gba owó náà jáde lè gba owó jáde láì nílò nọmba tí a mọ̀ sí Pin káàdì náà.”