Àwọn alága ìjọba ìbílẹ̀ Oyo tako ìdájọ́ ilé ẹjọ́ tó ga jùlọ, wọ́n ní kí owó àwọn wà lápò ìjọba ìpínlẹ̀

Fẹ́mi Akínṣọlá
Báyìí làá ṣe nílé e wa, èèwọ̀ ibòmí-ìn ni, èyí ló bí n tí Ìjọba ìpínlẹ̀ Ọ̀yọ́ sọ pé láá ,òun kọ ìdájọ́ ilé ẹjọ́ gíga kan tó pàṣẹ pé ìjọba ìpínlẹ̀ àti ìjọba ìbílẹ̀ kò gbọdọ̀ máa lo àpò ìṣúná kan náà mọ́.

Ṣaaju ni gomina Seyi Makinde ti kọkọ bu ẹnu atẹ lu idajọ ọhun, to si sọ pe kii ṣe ijọba apapọ ni yoo maa la le awọn ipinlẹ lọwọ lori bi wọn ṣe maa na owo wọn.

Eyi lo n waye lẹyin ti adajọ agba Naijiria, Lateef Fagbemi (SAN) pe ẹjọ lori ọrọ ọhun lọna ati fun awọn alaga ijọba ibilẹ lominira lati maa na owo wọn bo ba ṣe wu wọn.

Idajọ ile ẹjọ to ga julọ naa sọ pe ijọba ipinlẹ ko lagbara labẹ ofin lati maa ṣakoso owo ti ijọba ibilẹ yoo maa na fun atunṣe ilu.

O ni iwa naa ko ba ofin mu rara.

Wayi o, iroyin to n tẹ wa lọwọ ti sọ pe gbogbo awọn alaga ijọba ibilẹ to wa nipinlẹ Oyo ti fẹ yapa kuro ninu ALGON, lọna ati ṣatilẹyin fun Makinde.

Ninu atẹjade kan ti adari awọn alaga ijọba ibilẹ Oyo, Sikiru Sanda fi lede, o ni gbogbo wọn fọwọ si ohun ti Makinde ba sọ ati igbesẹ to ba gbe lori ọrọ naa.

Eredi igbesẹ awọn alaga ọhun, gẹgẹ bi wọn ṣe sọ ni pe Makinde jẹ adari rere to fi apẹrẹ rere silẹ, o si ti ṣe ọpọ aṣeyọri lati igba to ti gori alefa gomina.

Awọn alaga naa tun ti fẹnuko lati da ẹgbẹ tuntun mii silẹ, eyii ti kii ṣe ara ALGON, lọna ati tẹsiwaju iṣẹ wọn ni sinsin araalu.

Òfin fààyè gba ìwọ́de ita gbangba, àmọ́ a ò lè gbà kí dukia ìlú ó bàjẹ́-Ìjọba Èkó

Fẹ́mi Akínṣọlá

Ọ̀kan pàtàkì lára ọmọ ẹgbẹ́ òṣèlú APC níìpínlẹ̀ Èkó, tó tún jẹ́ Akọ̀wé fúnjọba ìpínlẹ̀ náà, Abilékọ Abimbọla Salu-Hundeyin, ní àwọn èèyàn lẹ́tọ̀ọ́ lábẹ́ òfin orílèèdè yìí láti ṣèwọ́de ìta gbangba láti fẹ̀hónú hàn sóhun tí kò bá tẹ́ wọn lọ́rùn láàrin ìlú, ṣùgbọ́n kì í ṣe pé kí wọ́n fi dá wàhálà sílẹ̀.

O ni ijọba ipinlẹ Eko ko ni i faaye gba pe ki awọn oni-jagidi-jagan kan waa fọrọ iwọde ita gbangba naa kẹwọ lati doju ija kọ ijọba ipinlẹ gẹgẹ bo ṣe waye nigba EndSARSlọdun 2020, ti wọn da ijọba ipinlẹ Eko ni gbese nla lasiko naa.

O rọ awọn eeyan ipinlẹ Eko pe bi wọn ba tiẹ maa ṣewọde ọhun, ki wọn ṣe e pelu suuru, ki awọn ọmọ ganfe ma ja a gba mọ wọn lọwọ. O ni ki wọn ri i daju pe ọrọ iwọde ita gbangba naa ko di eyi to maa di yanpọnyanrin, ti gbogbo ẹ aa fi dojuru, ti ọrọ yoo si waa di bo o lọ o yago fun mi gẹgẹ bo ṣe ti waye lasiko tawọn ọdọ orileede yii n ṣewọde ita gbangba ti wọn pe ni EndSARS lọdun 2020.

Abilekọ Abimbọla sọrọ naa di mimọ ni Alausa, niluu Ikeja, l’Ọjọbọ, Tọsidee, ọjọ kẹẹẹdọgbọn, oṣu Keje, ọdun yii, lasiko to n ba awọn oniroyin sọrọ.

O ni, ‘‘Ipinlẹ Eko ko jẹ ẹnikẹni lowo ifẹyinti rara, gbogbo awọn to fara ṣiṣẹ sin ijọba ni wọn ti gba ẹtọ wọn patapata bayii. Bo o ba ṣiṣẹ pẹlu ijọba Eko, loju-ẹsẹ to o ba ti fẹyinti la ti maa ṣeto owo rẹ fun ọ lai si wahala kankan nibẹ. Gbogbo ọna nijọba n gba lati sọ aye dẹrun fawọn araalu rẹ. ‘’Ohun ti mo n sọ ni pe gbogbo eeyan pata ni wọn lẹtọọ labẹ ofin lati ṣewọde bi wọn ba fẹ, ṣugbọn eyi ti wọn maa ṣe lati fi da rogbodiyan silẹ laarin ilu la ta ko. Igbe aye idẹrun ta a n gbe lorileede yii lo daa, iṣẹ idagbasoke to n waye kaakiri ilẹ wa, paapaa ju lọ, nipinlẹ Eko, ko gbọdọ bajẹ. Ṣe lo yẹ ko maa tẹsiwaju si i, a ko nifẹẹ si ohunkohun to maa da wahala silẹ, paapaa ju lọ bi gbogbo nnkan ṣe n lọ deede lorileede wa bayii’’.

Ẹnikẹ́ni kò le dáwa l’ọ́wọ́ kọ́ láti málo gbàgede Eagles Square l’Abuja fún ìfẹ̀hónúhàn – Alákòso ìwọ́de.

Gbọ́láhàn Quseem

Ọ̀kan pàtàkì lára àwọn alakóso fún ètò ìwọ́de ìfẹ̀hónúhàn ‘ebi n pa wá,’ èyí tí ọmọ Nàìjíríà n gbèrò nínú oṣù Kẹjọ, ọdún yìí ti sọ pé ẹnikẹ́ni kò lè d’áwọn lọ́wọ́kọ́ láti málo gbàgede Eagle Square tó wà nílùú Abuja.

Ọgbẹni Damilare Adenola to je alakoso eto fun ẹgbẹ Take It Back Movement sọ eyi lọjọ Aiku to kọja nibi ifọrọwerọ to ṣe nile-iṣẹ kan.

Adenola sọ pe awọn ko ni adari tabi baba isalẹ kankan to n sagbatẹru ifẹhonuhan to fẹẹ waye, bi ko ṣe pe gbogbo ọdọ Naijiria ti ebi n pa ni wọn pawọpọ lati jade sita sọ ẹdun ọkan wọn.

Lati bi ọsẹ meloo sẹyin ni ariwo naa ti n lọ ni kikan-kikan ni’gboro pe awọn ọdọ fẹ korajọ lati ṣe iwọde ifẹhonuhan ilẹ Naijiria, nibi ti wọn ti n beere fun ayipada ninu eto ati ilana iṣejọba.

Ifẹhonuhan ọhun l’awọn eeyan ti n pariwo lori ikanni ayelujara kaakiri agbaye, ati pe gbogbo ipinlẹ to wa ni Naijiria lawọn ọdọ ati ara-ilu yo ti pejọ f’ẹhonuhan ọhun.

Ki ṣe ahesọ wi pe owo ounjẹ ati gbogbo nkan ti lọ soke, leyi to ṣoro fun ara-ilu lati mu ọwọ lọ sẹnu, iyẹn lati ‘gba ti ijọba ti kede yiyọ owo iranwọ ori epo ti a mọ si ‘subsidy’.

Adenola sọ pe dukia ijọba to wa fun lilo ara-ilu ni gbagede Eagle Square jẹ, to si ni Minisita fun ọrọ eto FCT, Nyesom Wike ko ni nkan meji to fẹ ṣe ju lati gba wọn laaye lọ.

Lọjọ kẹrindinlọgbọn, oṣu keje, ọdun ti a wa yi ni awọn ọdọ buwọ lu lẹta kan ti wọn fi ranṣẹ si Minisita Nyesom Wike, nibi ti wọn ti n beere fun anfaani lati lo gbagede Eagle Square fun eto ifẹhonuhan wọn.

Ṣugbọn ṣa, Minisita fun FCT, lọjọ Abamẹta to kọja sọ pe oun ko ti gba lẹta lati ọdọ ẹnikẹni tabi ẹgbẹ kankan wi pe awọn fẹ lo Eagle Square.

Ẹ forúkọ àti ìdánimọ̀ yín sílẹ̀ – Iléeṣẹ́ Ọlọ́pàá sọ fún àwọn olùfẹ̀hónúhàn

Fẹ́mi Akínṣọlá

Àwọn àgbà sọ pé orúkọ ọmọ ni ìjánu ọmọ,èyí ló mú kí Ọ̀gá àgbà pátá fún iléeṣẹ́ ọlọ́pàá orílèèdè Nàìjíríà, Kayode Egbetokun pe gbogbo àwọn tí wọ́n n gbèrò láti ṣe ìwọ́de ìfẹ̀hónúhàn tí yóó bẹ̀rẹ̀ lọ́jọ́ kínní, oṣù Kẹjọ láti tètè wá fi orúkọ àti ìdánimọ̀ wọn sílẹ̀.

Egbetokun lo sọrọ yii lọjọ Ẹti, ọsẹ yii lasiko to n ba awọn akọroyin sọrọ niluu Abuja, nibi to ti jẹ ko di mimọ pe awọn naa ti n gbaradi fun eto aabo to pe ye lori iwọde ọhun.

Ọga agba ọlọpaa sọ pe ki gbogbo ẹgbẹ, ajọ ati awọn to n gbero lati kopa ninu iwọde fi orukọ silẹ ni olu-ileeṣẹ ọlọpaa to ba sunmọ wọn, lati le mọ iru eeyan ti wọn jẹ.

O tẹsiwaju pe ẹtọ araalu ni lati fi ẹhonu wọn han nipa kikorajọ soju kan, ati pe wọn gbọdọ ṣe ẹ pẹlu alaafia lai si iwa jagidijagan.

“Awa naa fidi ẹtọ araalu labẹ ofin mulẹ nipa iwọde ifẹhonuhan alalaafia.

“Ṣugbọn ṣa, lati le daabo bo dukia ati ẹmi araalu, a rọ gbogbo awọn ẹgbẹ ti wọn n gbero lati kopa ninu iwọde ifẹhonuhan naa lati lọ fi orukọ ati idanimọ wọn silẹ lọdọ ọga ọlọpaa to wa ni ipinlẹ wọn, nibi ti iwọde yoo ti waye.

“Lati le ṣagbatẹru iwọde ifẹhonuhan alalaafia ti ko nii mu ipalara dani, ki wọn lọ fi awọn nnkan wọnyi silẹ: ipinlẹ ti wọn ti fẹẹ ṣe e ati ibi ti wọn yoo korajọpọ si; igba ati asiko ti wọn yoo fi ṣe e; orukọ ati idanimọ awọn adari olufẹhonuhan ati awọn alagbatẹru.”

O fi kun ọrọ rẹ pe awọn fẹẹ tete mọ awọn to n gbero lati da iwọde ọhun ru, lojuna lati le tete ko wọn pamọ.

Ẹ gbé ìjìyà nlá kalẹ̀ fún àwọn jẹgúdújẹrá olóṣèlú- Oluwo

Fẹ́mi Akínṣọlá

Ìlú tí òfin ò bá ti fi ìjìyà ẹ̀ṣẹ̀ rinlẹ̀, ìnira ló máa kó bá ìlú
Oluwo tìlú Ìwó níìpínlẹ̀ Ọ̀ṣun, Ọba Abdulrosheed Adewale Akanbi ti rawọ́ ẹ̀bẹ̀ sí gbogbo àwọn olùfẹ́hónúhàn láti dáwọ́ rẹ̀ dúró, àti pé kí wọ́n darí gbogbo ẹ̀dùn ọkàn wọn sórí ijiya ìjìyà fún gbogbo àwọn ọ̀bàyéjẹ́ tó di ipò òṣèlú mú.

Kabiyesi ni igbagbọ wa wi pe awọn janduku yoo ja iwọde ifẹhonuhan naa gba, ti wọn yoo si lo anfaani ọhun lati ba dukia ijọba jẹ.

Oluwo lo sọrọ yii ninu atẹjade ti akọwe iroyin rẹ, Alli Ibrahim fi sita laipẹ yii, nibi to ti n rọ ijọba apapọ lati gbe ijiya nla kalẹ fun gbogbo awọn jẹgudujẹra to wa nipo iṣakoso.

Siwaju sii ni Ọba Akanbi jẹ ko di mimọ pe lara awọn iṣoro to n dojukọ Naijiria ni iwa jẹgfudujẹra ti awọn to wa ni iṣakoso ti hu, to si ni ki awọn alufẹhonuhan dari ẹdun ọkan wọn sori ijiya to tọ fun gbogbo awọn to ọbayejẹ.

O loun gba pe eto iṣejọba awa-ara-wa faaye gba ifẹhonuhan, ṣugbọn kii ṣe nibi ti awọn oloṣelu ti n ṣakoso awọn janduku lati dabaru eto naa.

Bẹẹ lo ni ki awọn ọdọ tun ero wọn pa, ki wọn si ma ṣe gba awọn oloṣelu to jẹ ọta Naijiria laaye lati lo wọn fun iwa imọtara-ẹni nikan.

Ninu ọrọ rẹ, Oluwo sọ pe “ọpọ awọn ọdọ ọlọpọlọ pipe ni wọn ko ni iwe irinna lọ soke okun.

Ọpọ ni ko ni ile keji, ti wọn ko si ni mọlẹbi loke okun ti wọn le sare lọ ba.

Idi ree ti a fi gbọdọ sa gbogbo ipa ati agbara wa lati jẹ ki Naijiria duro.

Gẹgẹ bi ọba alaye si ilẹ yii, mo nigbagbọ pupọ ninu Naijiria.

Mo fi igbe aye irọrun silẹ ni Canada lati wa ko ipa temi ninu idagbasoke ati ilọsiwaju Naijiria.

Igbesẹ nla ni lati fi Canada silẹ wa jẹ ọba ni Naijiria.”

Oluwo ni oun ṣe eyi nitori pe oun nigbagbọ ninu ọjọ iwaju rere fun Naijiria.

Kabiyesi ọhun ni lati igba toun ti jọba loun ti ko ipa pupọ lati gbogun ti iwa jẹgudujẹra lagboole ọba.

“Ẹ jẹ ka fi iwa ọmọluabi ṣe gbogbo ohun ti a ba fẹ ṣe lati le jẹ ki awọn ti a yan sipo oṣelu ṣe daadaa. Abẹ atunto ni Naijiria wa bayii, ẹ ma ṣe ba a jẹ.

“Ipilẹ adojukọ Naijiria lo wọ lati ọdọ awọn oloṣelu to ti kọja.

Pupọ awọn orileede ni wọn gbe ijiya nla kalẹ fun awọn oloṣelu jẹgudujẹra, awọn ọdọ ni lati beere fun eyi.

“Aarẹ Bọla Ahmed Tinubu ni lati ṣiṣẹ lori eyi, ko si ṣe ohun ti ọmọ Naijiria n fẹ nipa gbigbogun ti awọn jẹgudujẹra.

Ilana yii ni yoo jẹ ki Naijiria dagbasoke, emi naa le kopa ninu ifẹhonuhan ni ilana alaafia,” Oba AbdulRasheed Akanbi lo sọ bẹẹ.

Ó rọ awọn araalu lati gbaruku ti awọn adari nipa adura lati ori aarẹ, to fi dori awọn gomina, sẹnetọ, awọn aṣoju-ṣofin titi de ori awọn alaga ijọba ibilẹ.

Ilé-iṣẹ́ ààrẹ fèsì sí pé Tinubu dá ‘subsidy’ orí epo padà torí ìwọ́de tó ń bọ̀

Fẹ́mi Akínṣọlá

Iléeṣẹ́ Ààrẹ Orílẹ̀ yìí ti fèsì sí àhesọ ọ̀rọ̀ tó lu orí ìtàkùn ayélujára pa pé Ààrẹ Bola Tinubu ti dá owó ìrànwọ́ orí epo bẹntiróòlù àti tàríìfù owó iná padà láti lè dá ìfẹ̀hónúhàn táwọn ọ̀dọ́ n gbèrò láti ṣe dúró.

Lọjọ Abamẹta ọjọ kẹtadinlọgbọn oṣu Keje yii ni atẹjade kan eyi to ṣalaye igbesẹ Tinubu lati da ifẹhonuhan to n bọ duro lu ori itakun ayelujara pa.

Àwọn olóṣèlú tó bá orílẹ̀ èdè Nàìjíríà jẹ́ ló ń ti àwọn èèyàn láti ṣe ìwọ́de – Sat Guru Maharaj-ji

Ọrẹ Òtítọ́jù

Asíwájú ẹsin ìjọ One Love Foundation nílùú Ìbàdàn, Sat Guru Maharaj-ji ti fi ọ̀rọ̀ léde wi pé ìwọ́de tí àwọn ọmọ Nàìjíríà ń gbèrò láti gùnlé bẹ̀rẹ̀ láti ọjọ́ kìíní oṣù kẹjọ ọdún yìí kìí ṣe fún ànfàní orílẹ-èdè yìí rárá.

Ninu atẹjade to fi sita nibi ipade awọn oniroyin to waye lọjọ Aje ninu ọgba ile ijọsin rẹ to n bẹ lopopona marosẹ Ibadan si Eko, Maharaj-ji ni awọn oloṣelu ti o ti ṣe akoso orilẹede yii tẹlẹri lo ṣe okunfa awọn ipenija to n waye lọwọlọwọ bayii, bẹẹ sini iwa ajẹbanu ti bẹrẹ lati ipasẹ awọn Oyinbo tofun orilẹede Naijiria ni ominira.

Aṣiwaju ẹsin naa ṣe alaye wi pe ohun ti o tọ ni ki awọn eeyan ilu ṣe iwọde lati fi ẹhonu han, ṣugbọn iwọde naa le di nnkan to mu ewu dani ti wọn ba ti ọwọ oṣelu bọ ọ.

O tẹsiwaju wi pe iwọde naa ko ni anfani kankan ti yoo ṣe fun ẹya Igbo, Yoruba ati gbogbo awọn ẹkun Guusu ilẹ adulawọ nitori akoba ti o le ṣe fun eto oṣelu ati ọrọ aje Najiria.

Maharaj-ji kede wi pe ko si agbara tabi omimi kan ti o le yọ arakunrin ati adari ohun, Aarẹ Bọla Tinubu nipo. O ni ohun ti Aarẹ nilo ni lati ṣe amulo agbara ifẹ ti o fi ṣe akoso ipinlẹ Eko ti gbogbo nnkan fi tuba, ti o si tuṣẹ fun gbogbo eeyan.

MTN ti gbogbo iléeṣẹ́ wọn pa káàkiri Nàìjíríà

Fẹ́mi Akínṣọlá

Iléeṣẹ́ ètò ìbáraẹnisọ̀rọ̀ MTN ti gbé àwọn ọ́fíìsì wọn tì pa káàkiri orílẹ̀ èdè yìí.

Ìwòye ni pé èyí kò ṣẹ̀yìn bí àwọn oníbàárà MTN ṣe yabo iléeṣẹ́ wọn lẹ́yìn tí MTN ti síìmù àwọn èèyàn lópin ọ̀sẹ̀.

Ọ̀pọ̀ àwọn èèyàn ló yabo iléeṣẹ́ MTN láti wá ọ̀nà láti ṣí síìmù wọn padà, tí àwọn mìíràn sì gbìyànjú láti já ẹnu ilẹ̀kùn wọlé.

MTN ní nítorí àwọn èèyàn náà kò so nọ́mbà ìdánimọ̀ wọn mọ́ síìmù wọn ló jẹ́ kí àwọn ti àwọn nọ́mbà náà.

Àmọ́ MTN ti ní àwọn ti ti gbogbo iléeṣẹ́ àwọn pa káàkiri orílẹ̀ èdè Nàìjíríà lọ́jọ́ Ìṣẹ́gun, ọgbọ̀n ọjọ́, oṣù Keje ọdún 2024.

Ojú òpó X wọn ni wọ́n fi ìkéde náà sí.

Ọnà tó lè fi jẹ ànfààní owó ìrànwọ́ okòwò N110bn tí ìjọba gbé kalẹ̀ fáwọn ọ̀dọ́ ní Nàìjíríà rè é o

Fẹ́mi Akínṣọlá

Ìjọba àpapọ orílẹ-èdè Nàìjíríà ti ṣe àgbékalẹ̀ ètò owó ìrànwọ́ ìdókòwò N110bn fún àwọn ọdọ tí wọ́n ní ilé-iṣẹ́ àti okoòwò kéékèèké, tí wọ́n pe orúkọ rẹ̀ ní Nigeria Youth Investment Fund.

Owo yii lo wa lati fi mu imogbooro ati ilọsiwaju ba iṣẹ ti awọn ọdọ yan laayo, gẹgẹ bi ajọ NOA to n ri si ilanilọyẹ ṣe sọ.

Ijọba apapọ gbe eto yii kalẹ lati fi gbogun ti airi iṣẹ ṣe laarin awọn ọdọ, to jẹ pataki ipenija to n koju awọn araalu.
Ọjọ ori: Ẹnikẹni to ba fẹẹ jẹ anfaani owo eto yii gbọdọ wa laarin ọdun mejidinlogun si ogo ọdun. Ẹni ti ko ba tii pe ọdun mejidinlogun, tabi ti ọjọ ori rẹ ti kọja ogoji ọdun ko lanfaani sii.

Orileede: Akopa gbọdọ jẹ ojulowo ọmọ bibi ilẹ Naijiria.

Idanimọ: Akopa gbọdọ ni nọmba idanimọ ti a mọ si NIN, eyi to n ṣiṣẹ.

Agbekalẹ okoowo: Ẹni to ba fẹẹ jẹ anfaani gbọdọ ni agbekalẹ ilana iṣẹ tabi okoowo to fẹẹ ko owo le lori, ati ọna ti yoo gba lati fi mu imugbooro ba iṣẹ tabi okoowo naa, eyi to si gbọdọ wa ni ẹkunrẹrẹ.

Ọna to ja geere lati ye gbogbo akopa ni wọn gbe ilana lati fi orukọ silẹ naa gba, to si wa ni ṣisẹ-n-tẹle.

Iforukọsilẹ: Akopa gbọdọ fi orukọ ara rẹ, adirẹsi rẹ ati ohun gbogbo to nii ṣe pẹlu okoowo rẹ silẹ, lori ayelujara https://www.fmyd.gov.ng/nyif_application.

Lẹyin iforukọsilẹ yii, akopa gbọdọ tun fi ilana eto iṣẹ tabi okoowo rẹ lẹkunrẹrẹ silẹ; bi apẹẹrẹ, erongba rẹ, eto iṣuna, bi okoowo rẹ yoo ṣe ṣe daadaa laarin ọja to yan laayo, to fi mọ awọn ilana ti yoo gbe e gba lati maa pawo wọle deede.

Akopa gbọdọ fi awọn iwe ati kaadi to ṣe koko silẹ loju opo ayelujara ọhun, bii kaadi idanimọ NIN, nọmba idanimọ ti banki (BVN), ile-ẹkọ ti o lọ, iwe ẹri okoowo rẹ lọdọ ijọba apapọ (CAC Document), ijọba ibilẹ, ẹgbẹ aladugbo (CDA certificate) ati bẹẹbẹẹlọ.

Awọn iwe miran ni akọsilẹ lẹkunrẹrẹ lori ilana ti o fẹẹ gbe okoowo rẹ gba lati le jẹ ko ṣe daadaa laarin awọn akẹgbẹ rẹ, eyi ti ko gbọdọ ju abala oju iwe marun-un (5pages) lọ.

Bakan naa ni akopa tun gbọdọ ni oniduro meji ọtọọtọ ti yoo fi orukọ wọn silẹ loju opo ayelujara yii.

Akopa yoo fi orukọ oniduro meji silẹ, to fi mọ adirẹsi wọn, iṣẹ ti wọn n ṣe, imeeli, ibi ti wọn ti n ṣiṣẹ ati ipo ti wọn di mu silẹ.

Lẹyin ti akopa ba ti ṣe eyi tan, o tun gbọdọ pada lọ ṣe ayẹwo awọn ohun ti o fi silẹ lẹkunrẹrẹ lati mọ boya o pe tabi o ku diẹ kaato, ki o to fi ranṣẹ.

Mọ daju pe ko si atunṣe kankan mọ, lẹyin ti o ba ti fi ranṣẹ.

Iṣẹ́ tíátà ni kò jẹ́ kí n kàwé – Ibrahim Chatta

Fẹ́mi Akínṣọlá

Gbajúmọ̀ òṣèré sinimá ti ilúmọọka jákèjádò àgbáyé ni Ibrahim Chatta. Gẹ́gẹ́ bí ó ṣe sọ nínú ifọrọwanilẹnuwo yìí, Ọmọ Tapa ni bàbá rẹ̀, ìyá rẹ̀ sì wá láti ìlú Mọdakẹkẹ ni ìpínlẹ̀ Ọ̀ṣun.

Gẹ́gẹ́ bí ọrọ̀ rẹ̀, ó ní láti kékeré lòun ti mọ pé iṣẹ́ òṣèré tíátà lòun yóó ṣe jẹun, láti ìgbà náà wá lòun sì ti gbájúmọ́ ní ṣàn án.

Ibrahim Chatta ni Iṣẹ tiata ti gba ọpọlọpọ nnkan sọnu lọwọ oun. Lara rẹ si ni lilọ si ile ẹkọ.

O ni lọpọ igba nigba ewe oun lawọn obi oun maa n ro wi pe ile ẹkọ loun wa, amọṣa to jẹ wi pe ode ere loun morile.

“Awọn obi mi maa n ro pe ile ẹkọ ni mo wa, ṣugbọn mo ti tẹle awọn onitiata lọ nitori mo maa n ṣe ere tiata alarinjo nigba naa.”

Gẹgẹ bi ọrọ rẹ, iṣẹ are to wa nigba naa ni Arinjo eyi tawọ oyinbo n pe ni, “Travel Theater” ki ere to yirapada si sinima to wa lode oni.

“Mi o pari ileẹkọ girama, mi o ni iwe ẹri iwe mẹwaa ṣugbọn mo n ṣe eto ẹkọ agbelegboye.”

Gbajumọ elere itage naa tun ṣalaye pe funra oun loun kọ ara oun ni ede oyinbo bẹẹni ko si iwe ti oun ko le ka.

Lọdun 1985, iyẹn ọdun mọkandinlogoji sẹyin, ni Ibrahim Chatta bẹrẹ iṣẹ ere tiata.

O ni nigba naa, nibikibi ti awọn ba gbe ere lọ, awọn a ti tete maa ba awọn ọmọ olounjẹ ati alata bẹẹbẹẹ dọrẹpọ nitori lasiko ti ebi ba n pa wọn, awọn wọnyi lawọn maa n gbara le lati ye niagba naa.

O ni gẹgẹ bi elere, eeyan gbọdọ mọ gbogbo nnkan nitori pe elere nilo ọpọlọpọ nnkan yala lerefe tabi ni ijinlẹ.

Ọpọ lo maa n wi pe, eekan onitiata yii ti yẹ ko ti gba ọpọ ami ẹyẹ ti awọn ti wọn wo pe wọn ko dangajia to lagbo oṣere ti gba.

Awọn ololufẹ Chatta a tilẹ maa sọ pe iye oriyin to n gba kere si ipa to ni lagbo oṣere lorilẹede Naijiria lọ.

O ni oun ko gbagbọ pe oun dara ju alare kan lọ nitori pe, gẹgẹbi ọrọ rẹ, “gbogbo alare ni maa n daa loju emi.”

O ni ọpọ awọn ami ẹyẹ ti wọn ti gbe kalẹ ti awọn ololufẹ oun maa n wo pe wọn o ti fun oun ni ami ẹyẹ ko dede ri bẹẹ, “emi ni mi o fi sinima mi silẹ fun ayẹwo ami ẹyẹ naa.”