- Ìrọ̀lóyè Ghandi ti dá ògo àti orúkọ rere ìdílé wa padà – Ìdílé Laoye
Ìrọ̀lóyè Ghandi ti dá ògo àti orúkọ rere ìdílé wa padà – Ìdílé Laoye
IKÚ Ò MẸWÀ
Hafsat Olúwatóyìn aya Sanni
*IKÚ Ò MẸWÀ*
Ìlẹ̀kẹ̀ já tòun tòwú
Ọ̀pẹ nàró kádún
A ò rónkọ
Ẹnu dẹ̀ẹ̀rẹ̀ kalẹ̀
A ò róùn pèdè
Ahéré padà rẹ́yìn olóko
Ọkọ́ àgbẹ̀ la fi bàṣírí àgbẹ́
Òṣùpá wọ̀òkùn
Ìràwọ̀ já
Ìyẹ́ lá rí
A wòréré tí tí tí
Ìríran jìngòdò
A ò rábọ̀ ẹyẹ
Gbàgọ̀dọ̀ já
Ìṣu àgbẹ̀ ṣòfò
Apẹ́ fọ́
Ẹ wo bójú omi ṣe pọ́n olóko.
Ẹ má ràròkàn pẹ́ títí
Ẹ má barajẹ́ kánrin
Òòrùn tó kù yí
Ó tó sàtúnṣe ìgbààìmọ̀
Àgbáyéju ò ì gbẹ̀bí
Ká tètè dẹrù níwọ̀n
Wọn kìí sọni lálède
Kóówá ni yóó lòwà ẹ̀sìn tú ti ẹ̀ fóníbodè ní gbàgede.
Àtúnṣe ìwà kò sí níbojì.
Sánni ti lọ
Èmi wà
Ìwọ ń bẹ
Kín la á fi ròyìn mi?
Kín la á fi ròyìn rẹ?
Fẹ́mi Akínṣọlá
Adeleke fagi lé ìrìnàjò sí Òkè-Òkun fáwọn lọ́gàálọ́gàá lẹ́nu iṣẹ́ ní ìpínlẹ̀ Ọ̀ṣun
Adeleke fagi lé ìrìnàjò sí Òkè-Òkun fáwọn lọ́gàálọ́gàá lẹ́nu iṣẹ́ ní ìpínlẹ̀ Ọ̀ṣun
Fẹ́mi Akínṣọlá
Ọ̀rọ̀ ti di sọ́wóná báyìí o, bí Gómìnà ìpínlẹ̀ Ọ̀ṣun, Sẹ́ẹnétọ̀ Ademọla Adeleke, ti pàṣẹ pé títí tí ọdún 2023 tí a wà yìí yóò fi parí, kò sí ọ̀gá àgbà nínú iṣẹ́ ìjọba ìpínlẹ̀ náà tó gbọdọ̀ rin-ìrìnàjò lọ sí òkè-òkun.
Ó ní ìgbésẹ yìí wáyé láti dín owó tí ijọba ń ná kù, kí ìjọba sì lè gbájú mọ́ àwọn iṣẹ́ àkànṣe tó yẹ láti ṣe, nítorí ìrètí àwọn aráàlú pọ̀ látọ̀dọ̀ ìjọba.
Lásìkò ìpàdé àwọn ọmọ ìgbìmọ̀ aláṣẹ ẹlẹ́ẹ̀kejì irú ẹ tó wáyé nílùú Oṣogbo, lọjọ Tọ́sìdeè, ní Gómìnà ti ṣàlàyé pé gbogbo àwọn lọ́gàálọ́gàá náà ni wọ́n ní iṣẹ́ pàtàkì láti ṣe pẹ̀lú àwọn ìgbìmọ̀ aláṣẹ lórí àgbékalẹ̀ ètò ìṣúná ọdún tó ń bọ̀.
Adeleke sọ síwájú pé ṣe ni kí àwọn lọ́gàálọ́gàá náà máa darapọ̀ mọ́ ìpàdé Òkè-òkun tí wọ́n bá ní nípasẹ̀ ìkànnì ayélujára.
Ó ní tí irú ìpàdé bẹ́ẹ̀ bá wáá jẹ́ pàjáwìrì, tó sì pọn dandan fún irú ọ̀gá bẹ́ẹ̀ láti lọ, wọ́n ní láti gba àṣẹ latọdọ Gómìnà fúnra rẹ̀.
Bákan náà ni Adeleke tún sọ fún olórí àwọn òṣìṣẹ́ ìjọba ìpínlẹ̀ Ọ̀ṣun níbi ìpàdé náà láti ṣe àkọsílẹ ojúṣe àwọn kọmíṣánnà àti àwọn olùdámọ̀ràn pàtàkì fún Gómìnà.
Adeleke pàṣẹ pé, láti àsìkò náà lọ, àwọn olùdámọ̀ràn pàtàkì gbọdọ̀ kọkọ máa fún àwọn Akọ̀wé-àgbà ní lẹ́tà tí wọ́n bá fẹ́ẹ́ fi ránṣẹ́ sí kọmíṣánà iléeṣẹ́ tí wọ́n wà.
Ó ní eléyìí yóó dènà ìwà ‘emi-ju-ọ, iwọ-o-ju-mi láàrin àwọn kọmíṣánnà àtàwọn olùdámọ̀ràn pàtàkì.
Ilé aṣòfin Òndó sì ń dọdẹ yíyọ igbákejì Gómìnà nípò
Ilé aṣòfin Òndó sì ń dọdẹ yíyọ igbákejì Gómìnà nípò
Fẹ́mi Akínṣọlá
Egbìnrìn ọ̀tẹ̀,bí wọ́n ṣe n pàkan lòmíràn n rú tú ú.
Ilé aṣòfin ìpínlẹ̀ Òndó ti kọ ìwé ìpè tuntun ránṣẹ́ sí adájọ́ àgbà ìpínlẹ̀ náà, adájọ́ Olusegun Odusola, pé kó ṣe àgbéǹde ìgbìmọ̀ tí yóó tọpinpin ẹ̀sùn aṣemáṣe tí wọ́n fi kan ìgbákejì Gómìnà, Ọ̀gbẹ́ni Lucky Aiyedatiwa.
Ìwé náà ti olórí ilé, Olamide Oladiji buwọ́lù, ṣàlàyé pé ilé tẹ̀síwájú láti gbé ìgbésẹ̀ yíyọ ìgbákejì Gómìnà náà lẹ́yìn tí gbèdéke àṣẹ tí ilé ẹjọ́ gíga gbé kalẹ̀ wá sí òpin.
Ìwé náà sọ pé ”Lọ́jọ́ kẹta oṣù kẹwàá ni ilé bèèrè pé kí Olúwa mi ó ṣe àgbéǹde ìgbìmọ̀ ẹlẹ́ni méje, tí yóó ṣe àgbéyẹ̀wò ẹ̀sùn aṣemáṣe tí ilé fi kan Lucky Aiyedatiwa, ni ìbámu pẹ̀lú ìwé òfin Nàìjíríà .”
Ó fi kún un pé, adájọ́ àgbà ìpínlẹ̀ náà ló ti fi àákè kọrí tẹ́lẹ̀ pé òun kò ní gbé ìgbésẹ̀ kankan lórí àgbékalẹ̀ ìgbìmọ̀ oluwádìí náà, bí wọn kò bá yanjú àṣẹ tí ilé ẹjọ́ gíga ti pa ṣaájú nípa ìgbésẹ náà.
Àmọ́ ó ní ní báyìí tí gbèdéke lórí àṣẹ tí ilé ẹjọ́ gíga gbé kalẹ̀ ti wá kọjá, ilé aṣòfin ní àsìkò ti tó, bẹ́ẹ̀ sì ni ààyè wà kí adájọ àgbà ṣe àgbékalẹ̀ ìgbìmọ̀ ìwádìí yìí.
Ìgbésẹ̀ tí ilé aṣòfin fẹ́ gúnlè báyìí ń wáyé lẹyìn bí ọ̀sẹ̀ kan tí ilé kéde pé àwọn ti káwọ rọ̀ lórí ìyọni nípò igbákejì Gómìnà lẹ́yìn tí àwọn olórí ẹgbẹ́ òṣèlú All Progressives Congress APC dá si ọ̀rọ̀ ọ̀hún.
Dókítà Olaleye, tó fipá bá ọmọdé lòpọ̀, rí ẹ̀wọ̀n gbére he
Dókítà Olaleye, tó fipá bá ọmọdé lòpọ̀, rí ẹ̀wọ̀n gbére he
Fẹ́mi Akínṣọlá
Èèyàn tó n yọ́lẹ̀ dà, ohun abẹ́nú a máa yọ́rú u wọn ṣe.
Ilé -ẹjọ́ tó gbọ́ ẹjọ́ nípa ìbánilòpọ̀ tó ń jókòó nílùú Ikeja ti rán Dókítà Ilé-iṣẹ́ Optima Cancer Care Foundation kan, Olufemi Olaleye lọ sí ẹ̀wọ̀n gbére fún ẹ̀sùn pé ó fipá bá àbúrò Ìyàwó rẹ̀ lòpọ̀. tó sì tún fi fi nǹkan ọmọkùnrin rẹ̀ síi lẹ́nu.
Adájọ́ Rahman Osodi ló gbé ìdájọ́ náà kalẹ̀ lẹ́yìn tó jẹ́ kó di mímọ̀ pé ó jẹ̀bi ẹ̀sùn tí wọ́n fi kàn án pé ó bá ọ̀dọ́mọbìnrin, ọmọ ọdún mẹ́ẹ̀ẹ́dógún lòpọ̀, tó sì tún já ìbàlé rẹ̀.
Adájọ́ ní Dókítà kùnà láti fi ẹ̀rí hàn pé kò jẹ̀bi àti pé gbogbo ẹ̀rí tó wà ní ilé ẹjọ́ fihàn pé ó jẹ̀bi ẹ̀sùn ọ̀hún.
Olaleye ní Ìjọba ìpínlẹ̀ Èkó fẹ̀sùn méjì kan tó sì dá lórí pé ó fipá bá àbúrò ìyàwó rẹ̀ lòpọ̀.
Ṣaájú ni Olaleye ní òun kò jẹ̀bi ẹ̀sùn tí wọ́n fi kan òun lọ́jọ́ Kẹẹ̀ẹ́dọ́gbọ̀n oṣù kọkànlá ọdún 2022.
Agbẹjọ́rọ̀ fún ìjọba, Babajide Martins ní láàrin oṣù Kejì ọdún 2020 sí oṣù kọkànlá ọdún 2021 ni Dókítà dá ẹ̀ṣẹ̀ náà.
Ó ní ìṣẹlẹ̀ náà wáyé ní ojúlé kẹtàdílógún, ní àgbègbè Layi Ogunbambi, Maryland ní ìpínlẹ̀ Èkó.
Wọ́n fi ẹ̀sùn kan Olaleye pé ó fipá bá ọmọ ọdún mẹ́ẹ̀ẹ́dógún lòpọ̀, ẹni tí í se àbúrò ìyàwó rẹ̀, tó sì já ìbàlé ọ̀dọ́bínrin ọ̀hún, ní ìlànà tí kò bá òfin mu.
Bákan náà ni wọ́n fẹ̀sùn kan Olaleye pé ó fi tipá fi nǹkan ọmọkùnrin rẹ̀ sí ọmọ náà lẹ́nu.
IIé-ẹjọ́ tó ga jù lọ tèsíwájú lórí àwọn ẹ̀sùn tuntun t’Atiku fi kan Tinubu
IIé-ẹjọ́ tó ga jù lọ tèsíwájú lórí àwọn ẹ̀sùn tuntun t’Atiku fi kan Tinubu
Ọrẹ Òtítọ́jù
Ṣé wọ́n ní bí ọ̀rọ̀ ńlá kò bá tíì tán,èèyàn ńlá kò ní-ín sinmi àròyé n lọ̀rọ̀ dà báyìí
Bí ọ̀gọ̀ọ̀rọ̀ èèyàn ṣe ń fojú sọ́nà, tí gbogbo inú kóòtù sì pa rọrọ láti gbọ́ ibi tí ìdájọ́ yóó forí sọ lórí ẹjọ́ kò-tẹ́-mi-lọ́rùn tí Alaaji Atiku Abubakar, olùdíje fúnpò Ààrẹ lábẹ́ àsìá ẹgbẹ́ òṣèlú Peoples Democratic Party (PDP), nínú ètò ìdìbò gbogbogboo tó wáyé lóṣù Kejì, ọdún 2023 yìí, pè ta ko Ààrẹ Bọla Ahmed Tinubu, láti ẹgbẹ́ All Progressives Congress (APC), síwájú ilé-ẹjọ́ tó ga jù lọ nílẹ̀ wa, to wa niluu Abuja, àwọn adájọ́ náà ti gbé ìpinnu wọ́n kalẹ̀, wọ́n láwọn kò tí ì lè ṣe ìdájọ́ ojú-ẹsẹ̀ lórí atótónu àti àwíjàre olùpẹ̀jọ́ àti olùjẹ́jọ́, pàápàá lórí ẹ̀bẹ̀ tí Atiku tún bẹ̀ wọ́n pé kí wọ́n gba àwọn ẹ̀sùn tuntun tóun lọ̀ọ́ gbà nílẹ̀ Amẹ́ríkà lòdì sí Tinubu wọlé, wọ́n láwọn yóó gbé ìdájọ́ àwọn kalẹ̀ tó bá yá.
Eyi waye nigba ti Onidaajọ Inyang Okoro n ka ipinnu igbimọ onidaajọ naa sawọn eeyan leti lọjọ Aje, Mọnde, ọjọ kẹtalelogun, yii.
Ṣaaju lawọn adajọ naa ti kọkọ ke si awọn lọọya to ṣoju ọkọọkan olupẹjọ ati olujẹjọ lati yẹ iwe ẹsun ati awijare koowa wọn, eyi ti igbimọ to n gbọ awuyewuye lori ẹsun to su yọ nibi idibo aarẹ, iyẹn Presidential Election Petition Tiribunal to ti kọkọ ṣedajọ lori ẹjọ naa fi ṣọwọ si wọn.
Wọn si ni ki awọn lọọya naa buwọ luwe lati fara mọ alaye, awijare ati atotonu koowa wọn, boya o peye, eyi ti ọkọọkan wọn ṣe bẹẹ.
Awọn adajọ naa tun tẹti bẹlẹjẹ si ẹbẹ pataki kan ti Amofin agba Chris Uche, to jẹ agbẹjọro Atiku Abubakar bẹ ọba awọn kootu naa pe ki wọn tẹwọ gba awọn ẹsun tuntun toun ko wa, eyi to da lori bi wọn ṣe ni Tinubu yiwee, o ṣe ayederu sabukeeti, o si purọ labẹ ibura.
O lonibaara oun rọ ile-ẹjọ lati wo awọn ẹsun ati ẹri wọnyi, ki wọn wo bo ṣe tẹwọn to, ki wọn si ṣedajọ ododo. O ni adura onibaara oun, iyẹn Atiku, ni pe kile-ẹjọ giga ju lọ yẹ aga mọ ọn nidii, ki wọn si da a lẹbi, pe ko kunju oṣuwọn lati waa dije tabi wa nipo aarẹ.
Àmọ́, isọrọ-nigbesi, loju-ẹsẹ lawọn lọọya olujẹjọ, ìyẹn Amofin àgbà Abubakar Mahmoud, to ṣoju fún àjọ elétò ìdìbò ilẹ wa, Independent National Electoral Commission (INEC), ati Amofin àgbà, Olóyè Wọle Ọlanipẹkun, tó ṣojú fún Ààrẹ Bọla Tinubu, àti Amofin àgbà Akin Olujimi, tóun dúró fún ẹgbẹ́ òṣèlú All Progressives Congress (APC, ti nawọ soke, ti wọn si ta ko ẹbẹ Atiku, wọn ni kile-ẹjọ naa ma ṣe gba awọn ẹsun tuntun wọnyi wọle, tori ẹsun ti ko lẹsẹ nilẹ, ti ko si nitumọ ni. Eyi lawọn agbẹjọro naa ṣe fa-n-fa-a mọ ara wọn lọwọ tile-ẹjọ náà fi lọ fún ìsinmi ráńpẹ́.
- Nígbà tíjokòó bẹ̀rẹ̀ padà, àwọn adájọ́ ọ̀hún fẹnu kò pé àwọn máa lọ̀ọ́ yiiri gbogbo ẹ̀bẹ̀ àti àwíjàre wọ̀nyí wò, àwọn yóó sì gbé ìdájọ́ kalẹ̀ tó bá yá.
Ọwọ́ ọlọ́pàạ́ ìpínlẹ̀ Ògùn tẹ ọkùnrin tó fipá bá wòlíìbìrin láṣepọ̀ ní ṣọ́ọ̀ṣì
Ọwọ́ ọlọ́pàạ́ ìpínlẹ̀ Ògùn tẹ ọkùnrin tó fipá bá wòlíìbìrin láṣepọ̀ ní ṣọ́ọ̀ṣì
Fẹ́mi Akínṣọlá
Ìwé mímọ́ sọ pé bí òpin ayé bá kù dẹ̀dẹ̀, onírúurú ìṣẹ̀lẹ̀ à gbọ́ ṣe hàà ni yóó ṣẹ̀lẹ̀ ọ̀kan ni èyí, tí Iléeṣẹ́ ọlọ́pàá ìpínlẹ̀ Ògùn ṣẹ̀rí ẹ̀ pé ọwọ́ àwọn ti tẹ ọkùnrin, ẹni ogójì ọdún kan, Lekan Sunday, ti wọ́n fi ẹ̀sùn kan pé ó f’ipá bá wòlíì obìnrin láṣepọ̀ nínú ṣọ́ọ̀ṣì.
Ọ̀sẹ̀ tó kọjá ni wọ́n sọ pé Sunday f’ipá bá wòlíì obìnrin náà láṣepọ̀ nínú ṣọ́ọ̀ṣì rẹ̀, tó wà ládugbó Ilogbo Adu, Kemta nílùú Abẹokuta, kí ọwọ́ tó tẹ̀ ẹ́ .
Ojú oorun ni wọ́n sọ pé ìyá wòlíì náà wà nígbà tí Sunday fi digun wọ ṣọ́ọ̀ṣì ọ̀hún pẹ̀lú àwọn nǹkan ìjà, kí ó tó fi tipátipá ṣí ìyá wòlíì náà láṣọ wò lẹ́yìn tó ti dúnkookò mọ́ ọ.
Ìròyìn tó tẹ wá lọ́wọ́ sọ pé ní ṣe ni Sunday yọ ọ̀bẹ sí obìnrin náà, tó sì fi halẹ̀ mọ́ ọn pé bí kò bá gbà nǹkan tóun wá ṣe, òun yóò gun pa.
Ìyá wòlíì náà pariwo ìbosi ará àdúgbò títí láì sí ẹni tó gbọ́ ariwo rẹ̀ rárá.
Nígbà tó ń f’ìdi ìròyìn ọhún múlẹ̀, agbẹnusọ ọlọ́pàá ìpínlẹ̀ Ògùn, Ọmọlọla Odutọla sọ pé iṣẹ́ bíríkìlà ni Sunday ń se lágbègbè Kemta.
Odutọla ní wòlíì náà dá Sunday mọ̀ dáadáa, bí ó tilẹ̀ jẹ́ wí pé alẹ́ ló fi lọ ká a mọ́ ṣọ́ọ̀ṣì láti ṣe iṣẹ́ ibi náà,
Alukoro iléeṣẹ́ ọlọ́pàá ni ìpínlẹ̀ Ògún náà ṣàlàyé síwájú síi pé ní kété tí ọwọ́ àwọn agbófinró ti tẹ̀ ẹ́, ní ìwádìí ti bẹ̀rẹ̀, kó tó di pé àwọn f’ójú rẹ̀ ba ilé-ẹjọ́.
Ní ìpínlẹ̀ Bayelsa, Ilé-ẹjọ́ wọ́gilé olùdíje Gómìnà APC níbò kù fẹ́ẹ́rẹ́fẹ́
Ní ìpínlẹ̀ Bayelsa, Ilé-ẹjọ́ wọ́gilé olùdíje Gómìnà APC níbò kù fẹ́ẹ́rẹ́fẹ́
Ọrẹ Òtítọ́jù
Bí kò ṣe ju oṣù kan péré lọ mọ́, tí ètò ìdìbò sípò Gómìnà yóò wáyé ní ìpínlẹ̀ Bayelsa, ilé-ẹjọ́ gíga kan tó fìkàlẹ̀ sílùú Abuja ti wọ́gi lé olùdíje fúnpò Gómìnà ìpínlẹ̀ ọ̀hún lábẹ́ àsìá ẹgbẹ́ òṣèlú All Progressives Congress, APC, Ọ̀gbẹ́ni Timipre Sylva, wọn ní kò lẹ́tọ̀ọ́ láti sọ póun ń díje, kò sì kúnjú òṣùwọ̀n láti dupò ọ̀hún.
Onídàájọ Donaltus Okorowo, ló pàṣẹ lọjọ Ajé, ọjọ́ kẹsan-an, oṣù Kẹwàá, ọdún 2023 yìí, pé kí àjọ elétò ìdìbò ilẹ̀ wa, Independent National Electoral Commission, INEC, pa orúkọ olùdíje ọhún rẹ̀ nínú ìwé ìdìbò, kí wọn sì yọ ọ kúrò lára àwọn olùdíje lẹyẹ-o-sọka.
Ìdájọ́ yìí wáyé látàrí ẹjọ́ tí ọmọ ẹgbẹ́ APC ìpínlẹ̀ ọhún kan, Domosueyefa Kosomo pe loṣu Kẹfa ọdun yii, tako iyansipo Sylva ninu eto idibo abẹlẹ APC ti wọn ṣe loṣu kẹrin ọdun yii, olupẹjọ naa ni Sylva ti APC fa kalẹ yii ko lanfaani lati dije fun ipo gomina ipinlẹ naa mọ, nitori wọn si ṣebura wọle fun un sipo gomina lẹẹmeji ọtọọtọ labẹ iwe ofin ilẹ wa, iyẹn constitution, ti ọdun 1999 ta a n lo.
Lásìkò igbẹjọ, agbẹjọro olupẹjọ, Amofin-agba Abiọdun Amuda-Kannike ṣàlàyé pé ẹẹmeji ọtọọtọ ni wọ́n ti búra wọlé fún Sylva sípò Gómìnà náà, kò sì lè díje wọlé fúnpò kan náà yìí lẹẹkẹta tó fẹ́ ṣe yìí, torí ṣíṣe bẹ́ẹ̀ yóò lòdì sí òfin tó wà ní isọri kejilelọgọrin, apa akọkọ iwe ofin ilẹ wa.
Ó ṣàlàyé pé ọjọ́ kẹrinla, oṣù Kẹrin, ọdún 2007 ni àwọn aráàlú Bayelsa kọkọ dìbò fún olùdíje yìí, lábẹ́ ẹgbẹ́ òṣèlú Peoples Democratic Party, PDP, to wa nigba yẹn, to si yege ibo ọhun, wọn bura fun lọjọ kọkandinlọgbọn, oṣu Karun-un, ọdun naa gẹgẹ bii gomina.
Àmọ́, lọjọ kẹẹẹdogun, oṣù Kẹrin ọdún tó tẹle e, ìyẹn 2008, ilé-ẹjọ́ ko-tẹ-mi-lọrun ti ẹjọ́ awuyewuye ẹsùn ìbò máa ń pẹkun si nígbà náà, yọ Slyva dànù, wọn ni ibo to gbe e wọle mẹhẹ, wọn sì pàṣẹ àtúndì ìbò latokedelẹ.
Àtúndì ìbò mí-ìn wáyé lọjọ kẹrinlelogun, oṣù Karùn-ún ọdún 2008 ọ̀hún, Sylva yii ló tún wọlé lẹẹkeji, tí wọ́n sì bura fún-un lọjọ kẹtadinlọgbọn, oṣù Karùn-ún lẹẹkeji, ipò yìí lo si wà títí di ọjọ́ kẹtadinlọgbọn oṣù Kínní ọdún 2012 tí sáà ọdún mẹrin rẹ̀ pé.
Olupẹjọ yìí ní òun fẹ́ kí ilé-ẹjọ́ wo ìṣẹlẹ̀ yìí lójú ìlà ohun tí òfin sọ pé wọ́n kò lè búra fún ẹni kan fún ipò kan náà ju ìgbà méjì lọ.
Nígbà tí Onídàájọ Okorowo ń gbé ìdájọ
rẹ̀ kalẹ̀, ó ní fifa tí APC fa Sylva kalẹ̀ gẹ́gẹ́ bíi olùdíje wọ́n tako òfin yìí, nítorí tó bá wọlé ìbò, yóò di ẹẹmẹta nìyẹn tí wọ́n ń dìbò yàn an sípò kan naa, ti wọ́n yóò sì máa búra fún un sípò Gómìnà, eyi tí kò bofin mu. Torí ẹ, ó wọgi le Mínísítà lórí ọrọ̀ epo rọbi tẹlẹri náà, ó ní kò kúnjú ìwọn láti dupò
Títí dàsìkò tá a fi ń kó ìròyìn yìí jọ, kò tíì dájú bóyá Sylva yoo pẹjọ ko-tẹ-mi-lọrun lórí èyí, tàbí ẹgbẹ́ APC yoo gbé ìgbésẹ̀ mí-ìn. Ọjọ́ kọkànlá oṣù Kọkànlá ọdún yìí ni ètò ìdìbò tuntun yóò wáyé ní ìpínlẹ̀ Bayelsa.
Àwọn tó pa ọkùnrin tó ni otẹẹli Water ti jẹ́wọ́ bí wọ́n ṣe gbẹ̀mí ẹ̀
Àwọn tó pa ọkùnrin tó ni otẹẹli Water ti jẹ́wọ́ bí wọ́n ṣe gbẹ̀mí ẹ̀
Fẹ́mi Akínṣọlá
Àṣé lóòótọ́ ni pé ẹgbẹ̀rún Sàámú kò lè sá mọ́ Ọlọ́run lọ́wọ́, èyí ló se rẹ́gí ìṣẹlẹ̀ bí ọwọ́ ṣe tẹ àwọn ọ̀rẹ́ méjì kan tí wọ́n jingíri nínú ìbálòpọ̀ eléèyàn mẹ́ta tàbí jù bẹ́ẹ̀ lọ, tí wọ́n ṣekú pa Adeniyi Ojo, ọkùnrin tó ni òtẹ́ẹ̀lì kan tí wọ́n ń pè ní Water View, tó wà lágbègbè GRA, nílùú Ìlọrin, ní ìpínlẹ̀ Kwara.
Bíi àjẹ́ tó jẹ èèpo ọ̀bọ̀ làwọn afurasí ọ̀hún,
Joseph Joy Adama, àti Vandora Davies Ọrẹoluwa Favour, ti
ń kà báyìí, lẹ́yìn tọ́wọ́ tẹ̀ wọ́n ní Mowe Ibafo, ní ìpínlẹ̀ Ogun, tí wọ́n sá lọ lẹ́yìn tí wọ́n hùwà burúkú yìí.
Alukoro iléeṣẹ́ ọlọ́pàá àpapọ̀ nílẹ̀ wa, ACP Olumuyiwa Adejọbi, ló ṣàfihàn àwọn ọ̀daràn méjèèjì yìí pẹ̀lú àwọn afurasí mìíràn nílùú Abuja. Ó ní lọ́jọ́ kẹfà, oṣù Kẹwàá, ọdún yìí, lọwọ́ tẹ̀ àwọn afurasí méjèèjì, Adama àti Favour, tí wọ́n jẹ́ akẹ́kọ̀ọ́ ilé-ẹ̀kọ́ Gbogbonìse tìpínlẹ̀ Kwara (Kwara State Polytechnic), lórí ọ̀rọ̀ tó ní í ṣe pẹ̀lú ikú Ọ̀gbẹ́ni Adeniyi Ojo, tó ni òtẹ́ẹ̀lì Water View, n’llọrin.
Ó ṣàlàyé pé lẹ́yìn táwọn afurasí yìí ní ìbálòpọ̀ pẹ̀lú olóògbé tán, tí wọ́n bèèrè owó lọ́wọ́ rẹ̀, bọ́yá ìyẹn kò tètè fún wọn, ni wọ́n bá rọ ọ́ lọ́tí yó kí wọ́n lè rí i jà lólè, nìyẹn bá gba ibẹ̀ kú.
Nígbà tí ọ̀kan nínú wọn, Adama, ń bá àwọn oníròyìn ṣọ̀rọ̀, ó ní òun àti Adeniyi ti máa ń bá ara àwọn ní àṣepọ́ ọjọ́ ti pẹ́, ó ní oníbàárà òun ni, ṣùgbọ́n lọ́jọ́ tí ìṣẹ̀lẹ̀ burúkú náà wáyé, àwọn lọ sí òtẹ́ẹ̀lì rẹ̀ láti lọ̀ọ́ jà á lólè ni, nígbà tí kò fẹ́ gbà lẹ́rọ̀ làwọn rọ ọ́ lọ́tí yó, táwọn sì jí fóònù àti àwọn ẹrù rẹ̀ mìíràn kó lọ káwọn tóó padà gbọ́ pé ó ti kú.
Ẹ máà pín owó rìbá yín kàn mí, ọ̀gá àgbà ọlọ́pàá kìlọ̀ f’áwọn ọlọ́pàá
Ẹ máà pín owó rìbá yín kàn mí, ọ̀gá àgbà ọlọ́pàá kìlọ̀ f’áwọn ọlọ́pàá
Fẹ́mi Akínṣọlá
Ṣé wọ́n ní ọlọ́tọ̀ ní tòun ọ̀tọ̀, Ọ̀gá àgbà iléeṣẹ́ ọlọ́pàá orílẹ-èdè Nàìjíríà, Kayode Egbetokun ti fi ọ̀rọ̀ léde pé òun kò retí kí ọlọ́pàá kankan pín owó kan òun pẹ̀lú àlàyé pé ojúṣe tí òfin là kalẹ̀ fún iléeṣẹ́ ọlọ́pàá nìkan ló yẹ kó jẹ wọ́n lógún.
Igbákejì ọ̀gá àgbà iléeṣẹ́ ọlọ́pàá láti ẹkùn ikọkanla tó jẹ́ iṣẹ́ náà lásìkò àbẹwò sí olú iléeṣẹ́ ọlọ́pàá tó ń bẹ nílùú Ìbàdàn, olú ìlú ìpínlẹ̀ Ọ̀yọ́ l’Ọ́jọ́rú, Paul Ojeka Odama pàrọwà si gbogbo òṣìṣẹ́ iléeṣẹ́ ọlọ́pàá láti dẹ́kun gbogbo ìwà tí ó lè ta ẹrẹ bá aṣọ àlà iléeṣẹ́ náà.
Ó ní, “Iṣẹ́ tí ó lọ́lá nínú ni iṣẹ́ ọlọ́pàá, tí ó sì dúró fún ìdájọ́ òdodo àti àlàáfíà. Agbófinró tuntun ti wọ ìlú, òun sì ni ọ̀gá àgbà tuntun fún iléeṣẹ́ ọlọ́pàá. Gbogbo ìgbà sì ló máa ń fi ikorira hàn sí ìwà àjẹbánu.
Àpẹrẹ rere ló máa ń jẹ́ ní gbogbo ibi tí ó bá ti ṣiṣẹ́. Àkọsílẹ̀ àwọn ìwà náà ń bẹ n’íìpínlẹ̀ Kwara níbi tó ti ṣiṣẹ́ gẹ́gẹ́ bíi Kọmísánà àjọ ọlọ́pàá àtí àwọn ibòmíì tí ó ti ṣiṣẹ́.”
Ọlọ́pàá tó bá mọ nǹkan tó ń ṣe kò ní báwọn gba r’íbà – Ọ̀gá àgbà ọlọ́pàá Nàìjíríà ṣe àlàyé pé iṣẹ́ ni wọ́n rán gbogbo ọlọ́pàá láti ṣe n’ígboro, bẹ́ẹ̀ sì ni kìí ṣe láti pa owó wọlé fún ẹnikẹ́ni gẹ́gẹ́ bí òfin orílẹ-èdè Nàìjíríà ti ọdún 1999 ṣe làá kalẹ.
Ọ̀gá àgbà iléeṣẹ́ ọlọ́pàá ní òṣìṣẹ́ àjọ náà tí ó bá mọ ohun tí ó ń ṣe kò ní bá wọn gba owó ìbọ̀bẹ́ lọ́wọ́ ọlọ́kadà tàbí awakọ̀ kankan.
Ó ní ìwà ìbàjẹ́ tí ó gbudọ̀ dópin ni bí awakọ̀ ṣe ń gba owó lọ́wọ́ èrò ọkọ̀ láti fún ọlọ́pàá tó dènà ọkọ̀ nítorí owó ẹ̀yìn.
Egbetokun ní gbogbo òṣìṣẹ́ iléeṣẹ́ ọlọ́pàá ló gbudọ̀ ṣe iṣẹ́ wọn pẹ̀lú ìbẹrù Ọlọ́run kí wọ́n sì tẹ̀lé òfin ìjọba lẹ́nu iṣẹ́ wọn.
Bákan náà ló ké sí àwọn ọlọ́pàá láti ṣọ́ra fún irúfẹ́ ìròyìn tí wọ́n ń pín kiri lórí ayélujára. Ó ní wọ́n gbúdọ̀ ṣe àyẹ̀wò fínífíní kí wọ́n tó pín ohunkóhun kiri lórí ìtàkùn àgbáyé.
Ọ̀gá àgbà iléeṣẹ́ ọlọ́pàá tún mẹ́nuba pàtàkì ìmúra àwọn ọlọ́pàá àtí bí wọ́n ṣe ń wọ aṣọ wọn lẹ́nu iṣẹ́ àti nígbà tí wọ́n bá ṣíwọ́ iṣẹ́, nítorí ìrínisí ni ìṣenilọ́jọ̀.
Tẹ́lẹ̀rí ni ìròyìn má a ń lọ káàkiri wí pé àwọn òṣìṣẹ́ ọlọ́pàá kan ti wọ́n ń hùwa ìbàjẹ́ n’ígboro tí wọ́n sì ń gba owó lọ́nà àìtọ́ ní àwọn ọ̀gá tí wọ́n n fi owó ọ̀hún jíṣẹ́ fún.
Ọ̀rọ̀ tí ọgá àgbà iléeṣẹ́ ọlọ́pàá fi léde fi hàn gbangba wí pé irú ìwà bẹ́ẹ̀ kò ní wáyé nínú ìṣàkóso tuntun yìí.
