Akẹ́kọ̀ọ́ ilé-ẹ̀kọ́ girama mẹ́fà rí ẹ̀wọ̀n he

Fẹ́mi Akínṣọlá

Àwọn àgbà sọ pé,ẹni bá ṣe ohun tẹ́nìkan ò ṣe rí, kò sí n tó burú, bí ojú u rẹ̀ bá rí n tẹ́nìkan ò rí. Àsamọ̀ yìí ló lọ pẹ̀lú bí à Nlwọn akẹ́kọ̀ọ́ mẹ́fà tí wọ́n lọ́wọ́ nínú ikú olùkọ́ wọn kan ní orílẹ̀ èdè France ti rí ẹ̀wọ̀n he.

Ní ọdún 2020 ní ìṣẹ̀lẹ̀ náà wáyé ní orílẹ̀ èdè France níbi tí àwọn kan ti gé orí olùkọ́, Samuel Paty fẹ́sùn wí pé ó fi àwòrán ẹ̀fẹ̀ Ànọ́bì hàn ní yàrá ìkẹ́kọ̀ọ́.

Ní ìwájú ilé ẹ̀kọ́ tó ti ń ṣiṣẹ́ olùkọ́ ni wọ́n pa Paty sí.

Ilé ẹjọ́ ní ọ̀kan lára àwọn akẹ́kọ̀ọ́ náà jẹ̀bi pé ó parọ́ nǹkan tó ṣẹlẹ̀ ní kíláàsì gan-an, tí wọ́n sì ní àwọn yòókù jẹ̀bi ẹ̀sùn pé wọ́n tọ́ka Paty sí ẹni tó pa á.

Ẹ̀wọ̀n oṣù mẹ́rìnlá sí ọdún méjì ni ilé ẹjọ́ dá àwọn akẹ́kọ̀ọ́ náà.

Ọ̀kan lára àwọn akẹ́kọ̀ọ́ náà tó jẹ́ obìnrin ni wọ́n ní ó sọ fún àwọn òbí rẹ̀ pé Paty lé gbogbo àwọn akẹ́kọ̀ọ́ tó jẹ́ mùsùlùmí kúrò ní yàrá ìkẹ́kọ̀ọ́ kó tó fi àwòrán náà hàn.

Àmọ́ ìwádìí ní ọmọbìnrin náà kò sí ní kíláàsì lọ́jọ́ tí ìṣẹ̀lẹ̀ náà wáyé tí ilé ẹjọ́ sì ní ó jẹ̀bi irọ́ pípa àti pé ó sọ àwọn nǹkan tó da omi àláfíà rú.

Àwọm márùn-ún yòókù, tí ọjọ́ orí wọn wà láàárín ọdún mẹ́rìnlá sí mẹ́ẹ̀dógún lásìkò tí ìṣẹ̀lẹ̀ náà wáyé, ni ilé ẹjọ́ ní wọ́n jẹ̀bi pé wọ́n fi olùkọ́ náà sínú ewu.

Ẹni tó ṣekúpa olùkọ́ náà, Abdoullakh Anzorov, ọmọ ọdún méjìdínlógún ni àwọn ọlọ́pàá yìbọn pa lásìkò ìṣẹ̀lẹ̀ náà.

Sáàkejì mi yìí , iná mọ̀nàmọ́ná yóó dúróore – Dapo Abiodun

Fẹmi Akinsola

Sé wọ́n ní ohun tó bá n dunni,n náà ní-ín pọ̀lọ́rọ̀ ẹni. Gómìnà Dapo Abiodun ti ìpínlẹ̀ Ògùn ti ní òun yóó sa akitiyan láti ríi pé ìṣòro iná mọ̀nàmọ́ná dópin kí òun tó kúrò ní ìṣèjọba gẹ́gẹ́ bí i Gómìnà.

Abiodun, ẹni tí ilé ẹjọ́ kòtẹ́milọ́rùn kéde pé òun ló jáwé olúborí nínú ètò ìdìbò Gómìnà tó kọjá, sọ fún iléeṣẹ́ Channels TV pé òun ṣetán láti se ju bí òun sese tẹ́lẹ̀ lọ ní ìpínlẹ̀.

“Èròngbà mi fún ọdún mẹ́rin sáà kejì yìí ni láti rí i pé iná mọ̀nàmọ́ná kò sẹ́jú mọ́ ní ìpínlẹ̀ Ogun kí ń tó kúrò ní ìṣèjọba.”

Gẹ́gẹ́ bí ó se ṣàlàyé ó ní ìjọba òun yóò bẹ̀rẹ̀ sí ní má a tún àwọn ilé ẹ̀kọ́ ìjọba ṣe fún ìgbáládùn àwọn akẹ́kọ̀ọ́ káàkiri ìpínlẹ̀.

“Ó tó ẹgbẹ̀rún kan ilé ẹ̀kọ́ tí a ti tún kọ́, tí a dẹ̀ tún se àtúnṣe sí wọn láàrin ọdún mẹ́rin.”

Ó fikún pé ìṣèjọba òun ti ṣe àtúnṣe àwọn ojú pópónà, kíkọ́ ilé ìwòsàn àti pípèsè iṣẹ́ fún àwọn ọ̀dọ́.

Bákan náà Gómìnà tún fi ogun rẹ̀ gbárí pé ìpínlẹ̀ Ògùn lè dá dúró láì gba owó lọ́wọ́ ìjọba àpapọ̀ nítorí bí ọrọ̀ ajé ṣe ń gbòòrò si ní ìpínlẹ̀ náà.

“Ó dá mi lójú pé ẹ mọ̀ pé ìpínlẹ̀ Ògùn ló ń léwájú nínu àwọn ohun àmúṣajé wọn.

Ìjọba àpapọ̀ kọ̀ faramọ́ bówó gáàsì ìdáná ṣe
gbẹ́nu ókè

Fẹmi Akinṣọlá

Ìjọba àpapọ̀ ilẹ̀ Nàìjíríà ti kọminú lórí owó gọbọi tí aráàlú ń ra gáàsì ìdáná, léyì í tó ti mú kí wọ́n gbé ìgbìmọ̀ kan kalẹ̀ láti ṣètò bí owó orí gáàsì ìdáná yóò fi wálẹ̀ láàrin ọ̀sẹ̀ kan ti kò sì níí sí ìdíwọ́ fún ìpèsè rẹ̀.

Mínísítà abẹ́lé fọ́rọ̀ epo rọ̀bì (tó ń mójú tó ọ̀rọ̀ gáàsì), Ekperikpe Ekpo, n ló ti dá sí àwọn ìpèníjà tó ń dojú kọ ìpèsè gáàsì náà àti oye tí wọ́n n tà á nígboro.

Olùrànlọ́wọ́ lórí ètò ìròyìn fún Mínísítà ọ̀ún, Louis Ibah, n lo wí pé bí owó kílò gáàsì kan ṣe fò sókè láti ẹẹdẹgbẹrin náírà sí ẹẹdẹgbẹrun náírà bí oye tó kéré jù láwọn agbègbè kan ló mú kí Mínísítà náà ó dá sí ọ̀rọ̀ náà.

Ìròyìn fi yé ni pé owó orí kílò kan gáàsì ti ń rá bàbà láàrin ẹgbẹ̀fà náírà sókè láwọn agbègbè kan.

Ibah ṣàlàyé nínú àtẹ̀jáde tó fi síta pé, lára àwọn kókó tó mú kí owó gáàsì ìdáná ó gbẹ́nusókè ni ọwọ́n gógó dọ́là àti bí àwọn tó n ta gáàsì nígboro kò ṣe ríi gbà tó látọwọ́ àwọn tó n pèsè rẹ̀.

Àwọn lọ́gàálọ́gàá níléeṣèẹ́ ìwapo bíi Chevron, NMDPRA àti NNPCL ló péjú síbi ìpàdé tí Mínísítà náà pè ní olú iléeṣẹ́ àjọ NNPC l’Abuja.

Mínísítà náà tó wòye pé Nàìjíríà ní ànító àti àníṣẹ́kù àlùmọ́ọ́nì gáàsì wí pé bí àwọn iléeṣẹ́ ìwakùsà gáàsì àti epo rọ̀bì ṣe mú ṣíṣu gáàsì lóṣùká lọ òkè-òkun láì ṣe ìpèsè tí yóò kájú lílò rẹ̀ nílẹ̀ yí ni kò bójú mu tó.

Èyí ló mú kí Mínísítà náà ó gbé ìgbìmọ̀ kan dìde tí ọ̀gá-àgbà iléeṣẹ́ NMDPRA, Farouk Ahmed, yóó jẹ́ Alága rẹ̀, láti wo sàkun bí ìpèsè gáàsì lọ́pọ́ yanturu láàrin ìlú yóó ṣe wáyé láàrin ọ̀sẹ̀ kan tí owó rẹ̀ yóó sì wálẹ̀ dáadáa.

Ààrẹ Tinubu dá sí aáwọ̀ láàrin Akeredolu àti Aiyedatiwa

Fẹ́mi Akínṣọlá

Bí kò bá sí ìyípadà kankan ó ṣeéṣe kí Ààrẹ Bọla Ahmed Tinubu ti yanjú aawọ tó ń wáyé láàrin Gómìnà ìpínlẹ̀ Òǹdó, Arakunrin Rotimi Akeredolu àti igbákejì rẹ̀, Lucky Aiyedatiwa.

Ojútùú sí ọ̀rọ̀ yí kò ṣẹ̀yìn ìpàdé kan tí Ààrẹ ṣe nílé ìjọba lAbuja lálẹ́ ọjọ́ Ẹtì ọ̀sẹ̀ yìí níbi tí Ààrẹ ti ní kí àwọn tí ọ̀rọ̀ náà gbérù gba àlàáfíà láàyè.

Níbi ìpàdé náà la ti rí Abẹnugan ilé ìgbìmọ̀ aṣòfin Òǹdó, Ọladiji Ọlamide, igbákejì Gómìnà Òǹdó, Lucky Aiyedatiwa, Alága ẹgbẹ́ òṣèlú APC Abdullahi Umar Ganduje.

Níbi ìpàdé yí sì ni olórí ilé aṣòfin ìpínlẹ̀ náà ti kéde pé àwọn ti dáwọ ìgbésẹ̀ àti yọ Aiyedatiwa nípò dúró.

Èyí wáyé lẹ́yìn àfẹnukò wọn níbi ìpàdé náà tó gbà wọ́n tó wákàtí mẹ́fà.

Abẹnugan ilé ìgbìmọ̀ aṣòfin Òǹdó tó ka àbájáde ìpàdé àlàáfíà náà se , tí àwọn akọroyin ṣàlàyé pé, ’’Àkọ́kọ́, a máa gba àlàáfíà láàyè, ìkejì, a kò ní í túlé ká mọ, igbákejì Gómìnà yóó máa bá iṣẹ́ lọ gẹ́gẹ́ bí àfẹnukò ilé aṣòfin ’’

Yàtọ̀ sí pé Ààrẹ ní kí wọ́n dáwọ ìyọni nípò igbákejì Gómìnà Aiyedatiwa dúró, Ààrẹ tún pàṣẹ pé kí Aiyedatiwa máa bá ìṣàkóso ìpínlẹ̀ náà lọ títí tí Gómìnà Akérédolú yóó fi padà sípò.

Bẹ́ẹ̀ náà ló sọ pé kí wọ́n kó gbogbo àwọn ọlọ́pàá tí wọ́n kó dí ẹnu ọnà ilé aṣòfin kúrò ní kíákíá.

Ìyanjú aáwọ̀ yí lọ́jó Ẹtì wáyé lẹ́yìn nǹkan bí ọjọ́ méjì tí àwọn àgbààgbà ipinlẹ Ondo késí aarẹ pe ki o tara dásí ọ̀rọ̀ awuyewuye Ondo yìí kí ó má baà fa ìdẹnukọlẹ̀ ìṣèjọba.

Wọ́n tún késí adarí ẹgbẹ́ òṣèlú APC kí wọ́n ṣe ìtọ́sọ́nà fáwọn tí ọ̀rọ̀ kan kí oníkálùkù baà lè tọwọ́ ọmọ rẹ̀ bọ aṣọ.

Nínú ìwé tí wọ́n kọ sí Ààrẹ, àwọn tó ṣagbátẹrù ọ̀rọ̀ yí, Reuben Fasoranti àti akọ̀wé Bakkita Bello rọ àwọn ilé aṣòfin láti má ṣe yọ Gómìnà tàbí igbákejì rẹ̀ nípò.

Láti ìgbà tí Gómìnà Akeredolu padà dé láti ìrìnàjò níbi tó ti lọ gba ìtọjú ni wàhálà ti bẹ̀ sílẹ̀ ní ìpínlẹ̀ Òǹdó.

Ọ̀sẹ̀ àkọ́kọ́ nínú oṣù kẹ̀sán ni Akeredolu padà dé sí Nàìjíríà lẹ́yìn oṣù mẹ́ta tó sì ti ń ṣe àkóso ìjọba láti ìlú Ìbàdàn tíí ṣe olú ìlú ìpínlẹ̀ Ọ̀yọ́.

Ọmọ lánlọọ̀dù gún ayálégbé baba rẹ̀ pa

Ọrẹ Òtítọ́jù

Ẹni bá pe soso,ó di dandan kí ó rí soso
lọ̀rọ̀ dà báyìí,bí àwọn ọlọ́pàá téṣàn agbègbè Ilajẹ-Ajah, ní ìpínlẹ̀ Èkó, ṣe ń wá Ọ̀gbẹ́ni Taiwo Adebayọ, ọmọ bàbá onílé kan tó wà l’Ójúlé kẹrìnlélógún, Òpópónà Adewumi, nílùú Ilajẹ-Ajah. Ẹ̀sùn táwọn ọlọ́pàá fi kàn án ni pé ó gún Olóògbé Shina Oluwaṣẹgun tí í ṣe ọ̀kan lára àwọn ayálégbé bàbá rẹ̀ pa nítorí ààyè ìgbọ́kọ̀sí táwọn méjèèjì ń jà sí

Oun tí a gbọ́ ni pé ní àsálẹ ọjọ́ Àìkú, ọjọ́ kọkàndílógún, oṣù Kọkànlá yìí, ni Taiwo lọ jí olóògbé náà lẹ́yìn tó ti sùn lẹyin tó dé láti ẹnu iṣẹ́ dẹrẹba ọkọ akerò tó ń ṣe lágbègbè náà pẹ̀lú mọto kórópe rẹ̀ kan. Ohun tí Taiwo ń fẹ́ lọ́wọ́ olóògbé náà ni pé kó wáá gbé mọ́tò kórópe tó fi ń ṣiṣẹ́ kúrò níbi tó páàkì rẹ si, wọn ni ibi to gbe e si ko bojumu. Ṣugbọn nigba ti oloogbe maa debi to paaki mọto rẹ si o ri i pe ibi gan-an toun maa n paaki ọkọ oun si lati aimọye oṣu sẹyin naa lo wa. Gbogbo akitiyan oloogbe lati sọ fun ọmọ baba lanlọọdu rẹ pe oun ko kọja aaye oun ni ko wọ ọ leti rara, to si faake kọri pe afi ko gbe mọto rẹ kuro nibi to wa. Bi oloogbe ṣe wọnu mọto naa lati wa a kuro ni Taiwo bá tún yọ ọbẹ aṣóóró kékeré kan to wa lapo rẹ jade, to si bẹrẹ si i fi gun olóògbé yánnayànna ni gbogbo ara.

Ọgbẹni Matthew toun náà jẹ́ ọ̀kan lára àwọn ayalegbe ibi tí ìṣẹ̀lẹ̀ náà ti wáyé sọ pé niṣoju oun niṣẹlẹ ọhun fi waye, ati pe ariwo lasan lawọn mejeeji n pa mọ ara wọn telẹ, nigba to ya ni oloogbe ba gbiyanju lati gbe mọto rẹ kuro nibi to n bi Taiwo ninu, láì mọ pé ọbẹ wà lọ́wọ́ Taiwo, tó sì fi gún un pa.

Ọgbẹni Shonibarẹ Faid tí í ṣe ẹgbọn olóògbé náà loun gba ipe pajawiri kan ni, nigba toun si maa dele taburo oun n gbe, ṣe loun ba a ninu agbara ẹjẹ to ti ku silẹ, ati pe mọṣuari ileewosan ‘Mainland Hospital, to wa niluu Yaba, nipinlẹ Eko lawọn gbe e lọ.

Ó ní, ‘‘Mo ti lọọ fiṣẹlẹ náà tó àwọn ọlọ́pàá agbègbè ibi tí àbúrò mi ń gbé létí, mo ṣalaye gbogbo ohun tawọn eeyan sọ fun mi nipa iṣẹlẹ to gbẹmi rẹ fun wọn pata. O yẹ ka ti lọọ ṣeto isinku rẹ ni ilana ẹsin Islaamu, ṣugbọn awọn ọlọpaa lo ni ka duro na, kawọn ṣayẹwo sara oloogbe naa lati mọ koko ohun to pa a.

Ohun tó ń bí mi nínú nípa ọrọ̀ ọ̀hún ni pé àwọn kọọkan tọrọ náà ṣoju wọn sọ pé ṣe niya to bi ọdaran náà, ìyẹn ìyàwó lanlọọdu, ń sọ fọmọ rẹ̀ pé kó tẹra mọ́ bó ṣe ń gún olóògbé títí tó fi kú.

Àti ìyàwó onílé tí í ṣe ìyá tó bí Taiwo, àti àwọn aráalé gbogbo ni wọ́n ti sá lọ báyìí, ìbẹrù pé káwọn ọlọ́pàá má wàá kó gbogbo wọn fóhun tí wọn kò mọ̀ nípa rẹ̀ tàbí káwọn ọdọ àdúgbò tínú ń bí wáá kojú ìjà sí wọn ló fà á tí wọ́n fi sá kúrò nílé báyìí.

Mo mọ ẹni tó pa ẹ̀gbọ́n mi–Àbúrò Mohbad

Fẹ́mi Akínṣọlá

Bí ọ̀rọ̀ ńlá kò bá tíì tán,èèyàn ńlá ò ní-ín sinmi.
Adura Alọba, tí í ṣe àbúrò àti ọmọ tí wọ́n bí lé olóògbé Ilerioluwa Alọba, táwọn èèyàn mọ̀ sí Mohbad, ti dárúkọ ẹni tó ní ó dá òun lójú pé ó pa bọ̀ọ̀dá òun.

Níwájú àwọn ìgbìmọ̀ tí wọ́n ń wádìí ikú tó pa Mohbad, nílé-ẹjọ́ tó wà ní agbègbè Ita-Ẹlẹwa, Ikorodu, ní ìpínlẹ̀ Èkó, ni Adura ti là á mọ́lẹ̀ pé ọ̀rẹ́ àti kékeré ni ẹgbọn òun, àti ẹni tí wọ́n ń pè ní Primeboy, tó gbẹ̀mí Mohbad.

“Àbúrò Mohbad gangan ni mi. Ọmọ ogún ọdún ni èmi. Òun ni ọmọ ẹlẹ́ẹ̀kejì, nígbà ti èmi jẹ́ ẹlẹ́ẹ̀kẹta. Ọ̀dọ̀ ẹ̀gbọ́n mi àtìyàwó rẹ̀ ni mo ń gbé. Wọ́n máa ń jà gan-an nínú ilé, lọ́pọ̀ ìgbà sì níyì, bàbá mi ló máa ń wá bá wọn yanjú ẹ. Wọ́n tún ja ìjà kan ṣaájú eré tí Mohbad ṣe kẹ́yìn nílùú Ikorodu, àmọ́ èmi ò sí níbẹ̀ nígbà tóun àti Primeboy ń jà. Wumi ló padà sọ fún mi pé wọ́n jà. Tí wọn bá ní kí n mú olórí afurasí lórí ẹni tó pa ẹ̀gbọ́n mi, Primeboy ni.

“ Bó tilẹ̀ jẹ́ pé mi ò sí níbẹ̀ lásìkò tí wọ́n jà, gbogbo bi ọ̀rọ̀ ṣe lọ ni Wumi ṣàlàyé fún mi pátá, mo sì gbà á gbọ́ . Nígbà tá a délé lẹ́yìn eré tó lọ ṣe, ìsàlẹ̀ lèmi wà nígbà tí gbogbo wọn ti gòkè lọ. Nígbà tó yá tí mo fẹ́ lọ fún ẹ̀gbọ́n mi ní fóònù rẹ̀ nínú yàrá rẹ̀, orí ariwo àti àríyànjiyàn ni mo bá àwọn àtìyàwó wọn nítorí fìsà Canada.

“ Kí nọ́ọ̀sì tó wá rárá, gágá ni ara bọ̀ọ̀dá mi yá, bó tilẹ̀ jẹ́ pé mo rí ipa ẹ̀jẹ̀ ní ẹgbẹ́ ìgúnpá rẹ̀ lọ́jọ́ Túsìdeè. Èmi ni mo ṣe Indomie tí gbogbo wá jẹ lọ́jọ́ náà. Lórí ọ̀rọ̀ pé ẹ̀gbọ́n mi ní àrùn ọpọlọ, irọ́ pátá gbáà ni o. Kokooko lara rẹ̀ le, kò sì sí ọ̀rọ̀ pé ó ti ní gán-án-gàn-àn-gán rí. Primeboy ló pa ẹ̀gbọ́n mi o”.

Atótónu Adura, àbúrò Mohbad nìyí níwájú àwọn tó n ṣèwádìí ikú ẹ̀gbọ́n rẹ̀.

A máa kàńpá fún INEC láti máa fi èsì ìbò sórí ayélujára – Ilé aṣòfin àgbà

Fẹ́mi Akínṣọlá

Ìgbìmọ̀ tó ń rí sí ètò ìdìbò nílé aṣòfin àgbà Nàìjíríà ti ní àwọn máa gbé òfin kalẹ̀ láti pọ́n ní dandan fún àjọ tó ń rí sí ètò Nàìjíríà, INEC láti máa fi èsì ìbò sórí ayélujára lásìkò ìbò.

Alága ìgbìmọ̀ náà, Aṣòfin Sharafadeen Alli ló sọ̀rọ̀ náà lásìkò tó ń bá Iléeṣẹ́ ìròyìn Channels TV sọ̀rọ̀ lọ́jọ́ Ìṣẹ́gun.

Alli ní òfin tó wà nílẹ̀ báyìí kò ṣe é ní dandan fún INEC láti máa fi èsì ìbò sórí ayélujára àmọ́ tí àwọn ti ń gbèrò láti yí òfin náà padà.

Ó ní ọ̀kan lára ètò tí ìgbìmọ̀ àwọn fẹ́ gbájúmọ́ nìyí tó fi mọ́ àwọn ọ̀rọ̀ tó jọ mọ́ ètò ìdìbò mìíràn.

Ó fi kún un pé àwọn tún ń mójútó láti ri pé gbogbo ẹ̀sùn tó máa ń wáyé ṣáájú ètò ìdìbò ni ilé ẹjọ́ yanjú kí ètò ìdìbò gangan tó wáyé.

Aṣòfin náà ni èyí máa mú àdínkù bá bí àwọn awuyewuye tó yẹ kó ti parí ṣáájú ètò ìdìbò ṣe máa ń wólẹ̀.

Bákan náà ló fi kun pé àwọn tún ń gbèrò láti rí pé gbogbo ẹ̀hónú tó ń wáyé lẹ́yìn ìdìbò ni ilé ẹjọ́ parí ṣáájú kí wọ́n tó búra wọlé fún ẹni tí ìlú bá yàn.

Ó ní èyí máa mú àdínkù bá bí ètò ìdìbò ṣe máa ń wáyé ní àwọn ìpínlẹ̀ kan lẹ́yìn ètò ìdìbò gbogbogbo.

Ó tẹ̀síwájú pé àwọn ohun èlò ẹ̀rọ̀ INEC ni àwọn tún ń gbèrò láti ṣe àmójútó rẹ̀ nítorí ohun ìyàlẹ́nu ló jẹ́ fún àwọn pé IReV kò ṣiṣẹ́ bó ṣe yẹ lásìkò ìbò tó kọjá.

Alli ni àwọn máa mójútó gbogbo àwọn nǹkan wọ̀nyí kí àsìkò ìbò mìíràn tó gbéra sọ.

Àwọn òsìṣẹ́ ilé ẹjọ́ gíga ìpínlẹ̀ Osun àtàwọn ọlọ́pàá gbéná wojú ara wọn

Fẹ́mi Akínṣọlá

Lónìí ọjọ́ kejìdínlógún, oṣù Kọkànlá ọdún 2023, laàkókò tí àwọn òṣìṣẹ́ ile ẹjọ́ gíga tí ìpínlẹ̀ Osun fẹ́ ṣe ìpàdé pọ pẹ̀lú àwọn Adájọ́ ni àwọn ọlọ́pàá da gáàsì tajútajú bolẹ̀

Bí àwọn òṣìṣẹ́ ilé ẹjọ́ gíga tí ìpínlẹ̀ Osun ṣe n ṣe ìfẹ̀hónúhàn láti má fi ààye gba Adájọ́ó Àgbà Adepele Ojo láti wọ ọ́fíìsì rẹ̀ ni ìṣẹ̀lẹ̀ náà wáyé.

Àwọn ọlọ́pàá fi gáàsì tajútajú lé àwọn òṣìṣẹ́ náà, ọ̀pọ̀ lára àwọn sì fara pa pẹ̀lú àwọn akọ̀ròyìn to lọ síbẹ̀ pẹlu.

Nígbà tí ẹnì to jẹ́ alága àwọn òṣìṣẹ́ ilé ẹjọ́ gíga náà, Olugbenga Olakunle Eludire ba àwọn akọ̀ròyìn sọ̀rọ̀ lórí ìṣẹ̀lẹ̀ náà, sọ pe ẹtọ awọn làwọn ń bèèrè fún.

Eludire ni “Ẹ̀tọ́ wa lawá bèèrè lọ́wọ́ Adájọ́ Àgbà Adepele Ojo tí àwọn èèyàn wa sì ṣe ìfehónúhàn lórí ẹ̀tọ́ àwọn.

Lójijì ni ọ̀gọ̀ọ̀rọ̀ àwọn ọlọ́pàá yà de tí wọ́n sì fi gáàsì tajútajú lé wa pẹ̀lú kòbókò tí ọ̀pọ̀ sì farapa yánnayànna.”

Eludire ni àwọn ìgbìmò kan lára àwọn Adájọ́ ló pè fún ìpàdé lórí ẹ̀tọ́ àwọn òṣìṣẹ́ náà kì àwọn ọlọ́pàá tó tẹ̀lé Adájọ́ àgbà Adepele tó fìyà jẹ ọ̀pọ̀lọpọ̀ nínú wọn.

“Oun tí àwa òṣìṣẹ́ bèẹrè lọ́wọ́ Adájọ́ Àgbà Adepele Ojo ni pé kó dá àwọn òṣìṣẹ́ tó tí fún ní ìwé ìdádúró lẹ́nu isẹ́ padà àti àwọn ẹ̀tọ́ wọn.”

Ní báyìí ẹni tó jẹ́ Alága fún àwọn òṣìṣẹ́ ilé ẹjọ́ gíga tí ipínlẹ̀ Osun, Olugbenga Olakunle Eludire tí kéde ìdasẹ́sílẹ̀ títí ìgbà tí Adájọ́ Àgbà Adepele Ojo yóó fi san gbogbo àwọn ẹ̀tọ́ wọn .

Toyin gbakú oníkú kú, ọmọ ẹgbẹ́ òkùnkùn ló ṣá a pa

Fẹ́mi Akínṣọlá

Yorùbá ní ole kò ní í ja àgbà ko má ṣe é lójú fìrí. Òwe yìí ló dífá fún owuyẹ kan tó sọ pé àwọn afurasí ọmọ ẹgbẹ́ òkùnkùn ló ṣekú pa akẹ́kọ̀ọ́ gbogbonìse tìjọba àpapọ̀ tó wà nílùú Ọffa, ní ìpínlẹ̀ Kwara, (Federal Polytechnic, Ọffa). Omidan Toyin Bamidele, tó wà ní HND1, lẹka tí wọ́n ti ń kọ nípa ìmọ nípa oúnjẹ (Food Technology), ni àwọn ìkà èèyàn kan ká mọ’nu ilé ẹ, tí wọ́n sì ṣá a pa síbẹ̀ .

Ọ̀kan lára àwọn tí ìṣẹlẹ náà ṣoju rẹ̀, ṣùgbọ́n tó ní ká má darukọ òun sọ pé ní nǹkan bíi aago mẹfa irọlẹ Ọjọ́bọ, ọjọ́ kẹrindinlogun, oṣù Kọkànlá yìí, làwọn afurasí ọmọ ẹgbẹ́ òkùnkùn ọ̀hún ya bo agbègbè Dapson, níbi tí Toyin ń gbé nílùú Ọffa, pẹ̀lú àdá, àáké àtàwọn ohun ìjà olóró lọkan-o-jọkan, tí gbogbo àwọn èèyàn tó rí wọn sì ń rọ gìlàgìlà fún ẹmi wọn pẹ̀lú àwọn ohun ìjà olóró tí wọ́n kó dání ọ̀hún.

A gbọ́ pé yàrá Toyin ni wọ́n gbà lọ tààrà, bí wọ́n ṣe fojú kàn án ni wọ́n bẹrẹ sí ṣá a láàáké àti ad àdá bíi ẹran Iléyá, nígbà tí ẹmi bọ lára rẹ̀ tán ni wọ́n tóó fi sílẹ̀ nínú àgbàrá ẹ̀jẹ̀, tí wọ́n sì sá lọ.

Ó ní wọ́n lò tó iṣẹju mẹẹẹdogun kí wọ́n tó kúrò nínú yàrá Toyin, nígbà tí àwọn ọmọ ẹgbẹ́ òkùnkùn ọ̀hún lọ tán làwọn tó ó wọ yàrá arẹwa obìnrin yìí, táwọn sì bá a nínú àgbàrá ẹ̀jẹ̀, tí wọ́n sì ti kun ún bíi ẹran.

Ẹni yìí ní èyí ló mú káwọn lọ fi ìṣẹ̀lẹ̀ náà tó àwọn aláṣẹ ilé-ẹ̀kọ́ náà létí kí wọ́n lè gbé ìgbéṣẹ tó tọ.

Ó tẹ̀síwájú pé Toyin jẹ́ ọ̀rẹ́bìnrin ọ̀kan lára olórí ọmọ ẹgbẹ́ òkùnkùn igun kan, ṣùgbọ́n nígbà tí wọ́n fẹ́ pa ìyẹn tó sá lọ ni wọ́n fi lọ pa ọ̀rẹ́bìnrin rẹ̀, Toyin Bamidele.

Wọ́n ní ó ti wà nínú àṣà àti ìṣe àwọn akẹ́kọ̀ọ́ Ọffa Poli, kí wọ́n máa para wọn lásìkò tí wọ́n bá ń ṣe ayẹyẹ ìkẹ́kọ̀ọ́-jáde, àti pé lọ́jọ́ Ajé, ọ̀ṣẹ tó kọjá yìí, ni wọ́n ṣe ayẹyẹ náà, tí wọ́n sì pa akẹ́ẹ̀kọ́ kan tóun náà jẹ́ ọ̀kan lára àwọn ọmọ ẹgbẹ́ òkùnkùn ọ̀hún síwájú géètì ilé-ẹ̀kọ́ yìí. Àwọn ọlọ́pàá ló padà lọ palẹ̀mọ́ òkú ọ̀hún.

Àwọn aláṣẹ iléẹ̀kọ́ náà ti fòfin de ayẹyẹ ìkẹ́kọ̀ọ́-jáde tí wọ́n tún máa ń lọ ṣe níta ilé-ẹ̀kọ́, kí wọ́n lè raaye pa ẹni tí wọ́n bá fẹ́ pa nínú wọn, nítorí pé lọ́jọ́ náà gan-an ni ọjọ́ ikú àwọn tí wọ́n bá fẹ́ pa máa ń pé.

Saheed Osupa kẹ́kọ̀ọ́ gboyè ìjìnlẹ̀ ní fásitì Ibadan lẹ́ni ọdún 52

Fẹ́mi Akínṣọlá

À ṣé òòtọ́ lọ̀rọ̀ àwọn àgbà pé, kò sí ìgbà táà dáṣọ, tá ò rílẹ̀ fi wọ́.Àṣamọ̀ yìí ló jọ ti gbajúgbajà akọrin Fuji, Akorede Babatunde Okunọla tí ọ̀gọ̀ọ̀rọ̀ èèyàn mọ̀ sí Saheed Oṣupa bi òun náà ti ṣe wà lára àwọn tó kẹ́kọ̀ọ́gboyè ní fásitì Ibadan, UI lọ́jọ́rú.

Saheed Oṣupa kẹ́kọ̀ọ́gboyè ìjìnlẹ̀ ìmọ̀ nípa ọ̀rọ̀ òṣèlú (Bsc Political Science) ó sì wà lára àwọn akẹ́kọ̀ọ́jáde Fásitì náà tí wọ́n gbé ọwọ́ oyè lé lórí níbi ayẹyẹ ìkẹ́kọ̀ọ́gboyè ilé ẹ̀kọ́ náà tó wáyé lọ́gbà Fásitì Ìbàdàn.

Gbajúmọ̀ akọrin náà bọ́ sí ojú òpó sítágíráàmù rẹ̀ láti fọnrere rẹ̀ fún gbogbo àgbáyé pé òun ti di bàbá olóyè tuntun lẹ́ka ètò ẹ̀kọ́.

Saheed Oṣupa tó jẹ́ ẹni ọdún méjìléláàdọ́ta ṣàlàyé nínú àtẹ̀jáde tó fi sí ojú òpó ayélujára rẹ̀ náà pé ìpele òṣùwọ̀n ìjááfá ìmọ̀ ẹ̀kọ́ Kejì tí òyìnbó ń pè ní Second Class Upper ni òun gbé jáde ní ilé ẹ̀kọ́ náà.

Ọdún 1987 ni Saheed Oṣupa jáde ilé ẹ̀kọ́ girama kí ó tó tẹ̀ síwájú lọ sí ilé ẹ̀kọ́ gbogbonìṣe Polytechnic Ibadan láti gba ìwé ẹ̀rí Ordinary National Diploma nínú ẹ̀kọ́ ìmọ nípa àkóso okoòwò (Business Administration lọ́dun 1992.

Saheed Osupa ń darapọ̀ mọ́ àwọn àgbààgbà òṣèré tí wọ́n ti padà lọ kẹ́kọ̀ọ́gboyè lẹ́yìn ọ̀pọ̀lọpọ̀ ọdún tí wọ́n ti fi àdàgbá ẹ̀kọ́ tì.