Ọpẹ́ o! Àwọn tí wọ́n jí gbé l’Eruku gba ìdándè- Ààrẹ Bola Tinubu

Fẹ́mi Akínṣọlá

Àwọn àgbà sọ pé àwárí ni obìnrin wá nnkan ọbẹ̀.
Ààrẹ orílẹ̀èdè yìí, Bola Ahmed Tinubu, ti kéde pé àwọn èèyàn méjìdínlógójì (38) tí àwọn ajínigbé ji gbé ní ṣọ́ọ̀ṣì CAC Òkè-Ìṣẹ́gun, níìpínlẹ̀ Kwara, ti gba òmìnira.

Irọlẹ ọjọ Aiku, ọjọ kẹtalelogun, oṣu Kọkanla ọdun 2025 ni Aarẹ Tinubu kede bẹẹ loju opo X rẹ.

Nigba to n ṣalaye itusilẹ naa, Aarẹ Tinubu sọ pe :

“Ẹ o ranti pe mo fagile irinajo mi lọ sibi ipade G20 to yẹ ko waye lorilẹede South Africa, lati le mojuto aabo nile.

“Ọpẹ fun awọn ẹṣọ alaabo wa lati bii ọjọ meloo sẹyin, gbogbo awọn olujọsin 38 ti wọn ji gbe ni Eruku, ipinlẹ Kwara ni wọn ti ri idande bayii.”

Bakan naa ni Aarẹ fi kun un pe mọkanlelaaadọta (51) ninu awọn akẹkọọ ti wọn ji gbe nile ẹkọ awọn Katoliiki nipinlẹ Niger ni wọn ti pada sile .

“Mo n tọpinpin bi eto aabo ṣe n lọ kaakiri orilẹede Naijiria , mo si n gba iroyin nipa bo ṣe n lọ”

Gẹgẹ bo ṣe wi, Tinubu ni oun ko ni i sinmi lori eto aabo, o ni gbogbo ọmọ Naijiria lo ni ẹtọ si aabo to peye.
Labẹ iṣakoso oun si ree, oun yoo ri i pe oun da aabo bo awọn ọmọ Naijiria bo ṣe yẹ

Ìjo̩ba àpapò̩ ti ilé-ìwé mó̩kànlélógójì nítorí ààbò

Yínká Àlàbí

Ijo̩ba apapo̩ ti Naijiria ti awo̩n ile iwe ijo̩ba mo̩kanlelogoji(41) nitori aabo to me̩he̩ ni awo̩n ile̩ Hausa.
Ikilo̩ to gbopo̩n bii awo̩ Erin te̩le as̩e̩ ijo̩ba apapo̩ naa, ijo̩ba kilo̩ fun gbogbo awo̩n olori ile iwe naa pe omimi kankan ko gbo̩do̩ mi alaale̩ ijo̩ba naa.
Hajia Binta Abdulkadir to je̩ dire̩kito̩ Se̩ko̩ndiri agba fun ijo̩ba apapo̩ lo fi iwe naa ranse̩ si gbogbo “Federal Unity Colleges.”
Awo̩n ile iwe naa ni –
Federal Government Girls College (FGGC) Minjibir; Federal Technical College (FTC) Ganduje; FGGC Zaria; FTC Kafanchan; FGGC Bakori; FTC Dayi; FGC Daura; FGGC Tanbuwal; FSC Sokoto; FTC Wurnol FGC Gusau; FGC Anka; FGGC Gwandu; FGC Birnin Yauri; FTC Zuru; ati FGGC Kazaure.
Awo̩n to ku ni FGC Kiyawa; FTC Hadejia; FGGC Bida; FGC New-Bussa; FTC Kuta-Shiroro; Federal Government Academy (FGA) Suleja;
FGC Ilorin; FGGC Omuaran; FTC Gwanara; FGC Ugwolawo; Ara wo̩n ni FGGC Kabba; FTC Ogugu; FGGC Bwari; FGC Rubochi; FGGC Abaji; FGGC Potiskum; FGC Buni Yadi; FTC Gashua; FTC Michika; FGC Ganya; FGC Azare; FTC Misau; FGGC Bajoga; FGC Billiril àti FTC Zambuk.

Is̩é̩ pò̩ fún akó̩nimò̩ó̩gbá Super Eagles – Okocha

Yínká Àlàbí

Agbábọ̀ọ̀lù te̩le̩ rí fun iko̩ Super Eagles, Austin Okocha, ti kéde pé ohun tí ẹgbẹ́ orílẹ̀-èdè Nàìjíríà gbọ́dọ̀ tún ṣe kí wọ́n lè ṣàṣeyọrí ní AFCON 2025 ni àìle duro sori o̩wo̩ kan, nínú eré wọ́n.
Ó sọ pé ìkọ̀ ẹgbẹ́ náà ṣi ń bà a lórí ìkùnà tí wọ́n ṣe ní World Cup 2026, níbi tí wọ́n ti ṣe idije mẹ́wàá, wọ́n ṣẹ́gun mẹ́rin, wọ́n ta o̩mi márùn-ún, wọ́n sì padanu idije kan. Wo̩n padanu idije pe̩lu orileede Benin. O̩mi ti wo̩n gba pe̩lu orileede Lesotho àti Zimbabwe lo mú kí ọ̀pọ̀ o̩mo̩ Naijiria ko o̩kan kuro lara wo̩n.
Nígbà tí wọ́n parí pe̩lu ipo keji lẹ́yìn South Africa, wọ́n padanu tikẹ́ẹ̀tì taara sí World Cup.
Iko̩ Super Eagles tun padanu anfani keji to tun yo̩ju fun awo̩n to ba fidi re̩mi, eyi ni wo̩n n pe ni “play-off”.
Ní ti AFCON 2025 ní Morocco, Super Eagles wà ní ẹgbẹ́ kan pẹ̀lú Tunisia, Uganda àti Tanzania, wọ́n sì ní ireti pé Eric Chelle yóò ko wo̩n de ile̩ ileri.

A ò gbọ́ ohunkóhun látọ̀dọ̀ àwọn tó jí akẹ́kọ̀ọ́ 315 gbé ní ilé ẹ̀kọ́ St Mary’s – CAN

Fẹ́mi Akínṣọlá

Ẹgbẹ́ ọmọlẹ́yìn Kristi ní Nàìjíríà, Christian Association of Nigeria (CAN) tẹ̀ka ìpínlẹ̀ Niger ti jiyàn ìròyìn kan tó gbòde wí pé àwọn agbébọn tó jí àwọn akẹ́kọ̀ọ́ àti olùkọ́ 315 gbé ní ilé ẹ̀kọ́ St. Mary’s Catholic Primary and Secondary Schools, Papiri, ìpínlẹ̀ Niger ń bèèrè fún bílíọ̀nù mẹ́ta náírà gẹ́gẹ́ bí owó ìtúsílẹ̀.

Alága CAN ìpínlẹ̀ Niger, Ẹni ọ̀wọ̀ Bulus Dauwa Yohanna ló fi ìròyìn náà léde lọ́jọ́ Àbámẹ́ta.

Yohanna ní àwọn agbébọn náà kò ì tíì kan sí ẹnikẹ́ni lórí àwọn akẹ́kọ̀ọ́ àtàwọn olùkọ́ tí wọ́n jí gbé náà.

Ó ní lóòótọ́ ni onírúurú ìròyìn ti gbilẹ̀ lórí ayélujára èyí ló sì ṣokùnfà tí àwọn fi ń gbé àtẹ̀jáde síta lóòrèkóòrè.
Bákan náà ló fi kun pé iye èèyàn tí àwọn agbébọn náà jí gbé nílé ẹ̀kọ́ ọ̀hún jẹ́ 315 – àwọn akẹ́kọ̀ọ́ 303, àwọn olùkọ́ 12 – lòdì sí iye èèyàn 227 tí wọ́n ti kọ́kọ́ kéde pé àwọn agbébọn náà gbé.

Bíṣọ́ọ̀bù náà sọ pé lẹ́yìn tí àwọn kúrò ní Papiri, tí àwọn bẹ̀rẹ̀ sí ní kàn sáwọn èèyàn ni àwọn ri pé gbogbo àwọn akẹ́kọ̀ọ́ tí àwọn rò wí pé wọ́n móríbọ́ ló jẹ́ pé wọ́n wà ní àkàtà àwọn ajínigbé náà.

Ó ní àwọn ṣàwárí rẹ̀ pé àwọn akẹ́kọ̀ọ́ méjìléláàádọ́rùn-ún (88) míì ṣì wà ní àkàtà àwọn ajínigbé náà.

Lórí ọ̀rọ̀ pé ìjọba ti ṣèkìlọ̀ fáwọn ilé ẹ̀kọ́ lórí ìkọlù àwọn agbébọn náà, Yohanna ní àwọn kò gba ìwé ìkìlọ̀ kankan yálà láti ọ̀dọ̀ ìjọba tàbí àwọn ẹ̀ṣọ́ ààbò.

Ìyàwó parọ́ mọ́ ọkọ pé ó bà ọmọ àwọn obínrin lò pọ̀

Fẹ́mi Akínṣọlá

Ṣé wọ́n ní olóòtọ́ kìí kú sí ipò ìkà.
Òrọ̀ ti bẹ́yìn yọ fún ìyàwó ilé kan ní ìpínlẹ̀ Enugu, ẹni tí orúkọ rẹ̀ ń jẹ́ Chisom, tó fi ẹ̀sùn kan ọkọ rẹ̀ pé ó bá àwọn ọmọ àwọn obìnrin méjì lò pọ̀, tí ẹ̀sùn ọ̀hún sì padà jẹ́ irọ́ lásán.

Nigba to n fidi iṣẹlẹ naa mulẹ, Alukoro ọlọpaa ipinlẹ Enugu, SP Daniel Ndukwe, ṣalaye pe Chisom fi ẹsun ifipaba awọn ọmọ ti ọjọ ori wọn jẹ marun-un ati mẹta lo pọ, kan baba wọn, Ozioma Okonkwo.

Eyi lo fa a ti awọn ọlọpaa fi mu baba naa si ahamọ, bo tilẹ jẹ pe o n sunkun kikoro ninu fidio ti wọn ti mu un pẹlu ṣẹkẹsẹkẹ lọwọ, o ni oun ko ṣe ohun ti iyawo oun sọ fun ọlọpaa.

Awọn ọlọpaa bẹrẹ iwadii lẹyin ti wọn ti gbe ọkọ naa ju si ahamọ, iwadii naa lo si jẹ ki wọn mọ pe ko si ẹri kan to fẹsẹ mulẹ pe ẹni to wa lahamọ naa ṣẹ loootọ.
Lọjọ kẹẹẹdọgbọn, oṣu Kẹwaa ọdun 2025 ni ileeṣẹ ọlọpaa ipinlẹ Enugu, gba ifisun lati ọdọ Chisom, ẹni ọdun mọkandinlọgbọn (29).

O ṣalaye fun wọn pe ọkọ toun bi awọn ọmọ mẹta fun (ọkunrin kan, obinrin meji) n ba awọn ọmọbinrin naa ti ọjọ ori wọn ko ju marun-un ati mẹta lo, ṣe iṣekuṣe.

Obinrin naa fi kun un pe ọkọ oun ni ko jẹ koun tu aṣiri naa tipẹ, nitori o leri lati pa oun boun ba sọ fun ẹnikẹni.

Eyi ni awọn ọlọpaa bẹrẹ iwadii lorii rẹ, lẹyin ti wọn ti gbe ọkọ ju si ahamọ.
Iwadii pada fidi ẹ mulẹ, pe akoba lasan ni ẹsun ti Chisom n ka si ọkọ rẹ lẹsẹ.

Alukoro ọlọpaa Enugu sọ pe iwadii awọn fi han, pe 2024 si 2025 ti Chisom fẹsun iṣekuṣe naa kan ọkọ, lo ti funra rẹ ko awọn ọmọdebinrin ọhun lọ si ipinlẹ Imo, lati Enugu.

Awọn ọmọ ko tilẹ si lọdọ baba wọn lasiko ti iya n fẹsun naa kan baba.

Bakan naa, akọbi wọn to jẹ ọkunrin, ọmọ ọdun meje, ṣalaye fun awọn ọlọpaa pe iya awọn lo kọ oun ati awọn aburo oun obinrin lati purọ mọ baba awọn.

Lẹyin ti iwadii ọlọpaa ti fi han pe irọ ni ẹsun ti Chisom fi kan ọkọ rẹ, wọn fi ọwọ ofin gbe oun naa.

Wọn gbe e lọ sile ẹjọ majisreeti ipinlẹ Enugu, lori ẹsun meji to rọ mọ ibanilorukọjẹ ati sisọ ohun ti ko ri bẹẹ.

Laaarin asiko naa, Chisom gbiyanju lati fi opin si ẹjọ to n lọ lọwọ, ati iwadii ọlọpaa, ṣugbọn wọn ko gba fun un.

Kootu fi aaye beeli silẹ fun un, wọn si sun igbẹjọ siwaju.

Bi ẹnikẹni ba jẹbi ẹsun ibanilorukọjẹ ni Naijiria, ijiya rẹ ni ẹwọn ọdun kan tabi meji pẹlu owo itanran.

Ẹnikẹni ba si to eke lorilẹede yii, ẹwọn ọdun mẹrinla gbako ni ijiya rẹ.

Ìdí tí Sheikh Gumi ṣe ń pè fún bíbá àwọn agbébọn ṣe ìpàdé

Fẹ́mi Akínṣọlá
Àwọnà àgbà sọ pé ẹbọ tó nípọn ló tọ́ kí ẹdá máa rú, látàrí àwọn ọ̀rọ̀ tó máa ń jáde láti ẹnu wa.

Lópin ọ̀sẹ̀ tó kọjá yìí, ọ̀pọ̀ ọmọ Nàìjìríà ló ń sọ pé ìjọba àpapọ̀ fi ọwọ́ òfin mú gbajúmọ̀ onímọ̀ ẹ̀sìn Islam nnì, Sheikh Ahmad Mahmud Abubakar Gumi, lórí bí wọ́n ṣe ní ó mọ̀ nípa ìkọlù àwọn agbébọn tó ń wáyé lémọlémọ lórílẹ̀èdè Nàìjìríà.

Ohun to fa a ti wọn fi n pe fun fifi ọwọ ofin mu Gumi ko ṣẹyin bi Alfa naa ṣe n beere fun biba awọn agbebọn ṣepade alaafia.

Ṣugbọn Sheikh Gumi funra rẹ ti sọ pe ẹru ko ba oun, o ni bijọba tilẹ mu oun fun biba awọn agbesunmọmi ṣepade, to ba ti jẹ ki alaafia le jọba loun n wa, ko si wahala kankan.

Tẹ o ba gbagbe, ọpọ igba ni Gumi ti pe fun pe kijọba ba awọn agbebọn naa ṣepade.

O ni eyi nikan ni ọna abayọ si iṣoro eto aabo, yatọ si ki ijọba maa fi ipa koju wọn.
Nigba to n ṣalaye bo ṣe nira to lati ri awọn agbebọn naa ba ṣepade, eyi ti Sheikh Gumi ti ṣe ri, o ni ewu kekere kọ ni awọn maa n la kọja bawọn ba wọgbo lọ lati ri wọn.

Loju opo Facebook rẹ, Gumi sọ pe awọn to ni ki ijọba mu oun ko mọ nnkan kan bii awọn agbebọn to n daamu ilu naa ni

“Bi wọn ba mọ ewu ti a maa n dojukọ lati ri awọn agbebọn yii ni, wọn a maa yìn wa ni, dipo bi wọn ṣe n tẹmbẹlu wa.”
Bẹẹ ni Alfa Gumi wi.

Lori idi ti ọrọ awọn agbebọn ṣe maa n mumu laya rẹ lọpọ igba, Sheikh Gumi ṣalaye pe:

“Awa eeyan Ariwa ni ọrọ yii kan ju, awa ni wọn si n ṣe ijamba fun ju. Wọn ko jẹ ka lọ soko, wọn si tun n le awọn miran kuro niluu wọn.

“Fun idi eyi, a ko le kawọ gbera ka maa wo, bi a ba n woran, a ko ṣe ohun to tọ fun ilu wa ati ijọba. ”

” Nitori ẹ la ṣe maa n wọgbo lọ pẹlu awọn oṣiṣẹ ijọba, ṣugbọn awọn eeyan ko mọ pe a n ṣiṣẹ pọ pẹlu ijọba.

“Nitori ẹ lo ṣe n jọ bii pe a n ba awọn agbebọn dowo pọ loju wọn. A n gbiyanju lati fi aṣiṣe wọn han wọn ni, ka si kọ wọn lẹkọọ, nigba ti a ti mọ pe wọn ko ni ẹkọ ẹsin.”

Bẹẹ ni Sheikh Gumi ṣalaye.

Bi iṣoro ai si aabo yii yoo ba wa sopin ni Naijiria, Gumi sọ ọna abayọ si oju opo Facebook rẹ:

“Ọna kan ṣoṣo lati fopin si igbesunmọmi ni lati kọ awọn agbebọn naa lẹkọọ, ka fi igbagbọ kọ wọn pẹlu ireti ohun rere.”

Akẹ́kọ̀ọ́ àti olùkọ́ 227 ni wọ́n jígbé ní ilé ẹ̀kọ́ St Mary – Àjọ CAN

Fẹ́mi Akínṣọlá

Alága ẹgbẹ́ àwọn ọmọlẹ́yìn Kristẹni, Christian Association of Nigeria, CAN tẹ̀ka ìpínlẹ̀ Niger, Ẹni ọ̀wọ̀ Bulus Dauwa Yohanna ti sọ pé èèyàn 227, tó fi mọ́ àwọn akẹ́kọ̀ọ́ àtàwọn olùkọ́ láwọn ajínigbé tó ṣe ìkọlù sí ilé ẹ̀kọ́ St Mary Catholic Schools, Papiri ní ìjọba ìbílẹ̀ Agwara ní ìpínlẹ̀ náà ni wọ́n jí gbé lọ.

Ẹni ọ̀wọ̀ Yohanna nínú àtẹ̀jáde kan tí agbẹnusọ rẹ̀ Daniel Atori fi léde sọ pé òun ṣe àbẹ̀wò sí ilé ẹ̀kọ́ náà níbi tí òun ti ṣèpàdé pẹ̀lú àwọn òbí àwọn akẹ́kọ̀ọ́ náà.

Ó ní òun ṣe àrídájú rẹ̀ fáwọn òbí àwọn ọmọ náà pé àwọn ń ṣiṣẹ́ pẹ̀lú ìjọba àtàwọn ẹ̀ṣọ́ ààbò láti ṣe àwárí àwọn ọmọ náà àti láti láti gbà wọ́n sílẹ̀ láyọ̀ àti àlááfíà.

“Nínú àkọ́sílẹ̀ tí a rí, àwọn akẹ́kọ̀ọ́ 215 àtàwọn olùkọ́ 12 láwọn ajínigbé náà jí gbé lọ.”

Ó fi kun pé àwọn akẹ́kọ̀ọ́ kan móríbọ́ lásìkò ìkọlù ọ̀hún, tí àwọn òbí sì ti ń lọ mú àwọn ọmọ wọn nítorí wọ́n máa ti ilé ẹ̀kọ́ náà pa fún ìgbà kan ná.

Bákan náà ló rọ àwọn èèyàn láti ṣe sùúrù, kí wọ́n sì máa gbàdúrà fún ìtúsílẹ̀ àwọn akẹ́kọ̀ọ́ náà láìpẹ́ ọjọ́.

Ìjọba àpapọ̀, àwọn ìpínlẹ̀ gbé ilé ẹ̀kọ́ tìpa nítorí ìkọlù àwọn ajínigbé

Fẹ́mi Akínṣọlá

Ṣé wọ́n ní n tí a kò bá fẹ́ kò bájẹ́, ó ní bí a ti i ṣe é.
Ìjọba àpapọ̀ àtàwọn ìpínlẹ̀ kan lẹ́kùn àríwá Nàìjíríà ti pàṣẹ gbígbé àwọn ilé ẹ̀kọ́ kan tìpa látàrí ìpèníjà ààbò àti báwọn ajínigbé ṣe ń jí àwọn akẹ́kọ̀ọ́ gbé.

Bí ìjọba àpapọ̀ ṣe gbé àwọn ilé ẹ̀kọ́ mọ́kànlélógójì tìpa náà ni àwọn gómìnà ní ìpínlẹ̀ Kwara, Plateau, Niger, Benue àti Katsina náà ti dá ètò ẹ̀kọ́ dúró láwọn ilé ẹ̀kọ́ kan fún ìgbà kan ná.

Ní ọjọ́ Ẹtì, ọjọ́ Kọkànlélógún, oṣù Kọkànlá, ọdún 2025 ni inú fu àyà fu tún bẹ̀rẹ̀ nígbà tí àwọn agbébọn tún ṣe ìkọlù sí ilé ẹ̀kọ́ St Mary Catholic School ní ìlú Papiri, ìjọba ìbílẹ̀ Agwara, ìpínlẹ̀ Niger.

Níbi ìkọlù náà ni àwọn ajínigbé ọ̀hún ti jí àwọn akẹ́kọ̀ọ́ 215 àtàwọn olùkọ́ méjìlá gbé lọ.
Ìkọlù àwọn agbébọn yìí ló ń wáyé lẹ́yìn ọjọ́ mẹ́rin tí wọ́n jí àwọn akẹ́kọ̀ọ́ mẹ́rìndínlọ́gbọ̀n gbé lọ ní ilé ẹ̀kọ́ Government Girls Comprehensive Secondary Secondary School, Maga ní ìpínlẹ̀ Kebbi.

Bákan náà ló ń wáyé lẹ́yìn ọjọ́ kejì táwọn agbébọn ṣèkọlù sí ilé ìjọsìn CAC ní ìlún Eruku, níbi tí wọ́n ti jí ọ̀pọ̀ olùjọsìn gbé lọ táwọn agbébọn náà sì ti ń bèèrè fún ogún mílíọ̀nù náírà gẹ́gẹ́ bí owó ìtúsílẹ̀ fún ẹnìkọ̀ọ̀kan iye èèyàn mẹ́tàdínlógójì tí wọ́n jí gbé.

Àwọn ìkọlù yìí ló mú kí ìjọba àpapọ̀ àtàwọn ìjọba ìbílẹ̀ láti wá ọ̀nà láti mú àdínkù bá àwọn ìjínigbé yìí.

Ìjọba àpapọ̀ ti pàṣẹ pé kí wọ́n ti àwọn ilé ẹ̀kọ́ tí wọ́n máa ń pè ní unity school tìpa láti dènà ìkọlù àwọn agbébọn yìí.

Àtẹ̀jáde kan tí adarí ètò ẹ̀kọ́ girama ní iléeṣẹ́ tó ń rí sí ètò ẹ̀kọ́, Binta Abubakar ni wọ́n ti kéde ìgbésẹ̀ náà.

Lára àwọn ilé ẹ̀kọ́ tó máa wà ní títìpa ni FGGC Minjibir; FGA Suleja; FTC Ganduje; FGGC Zaria; FTC Kafanchan; FGGC Bakori; FTC Dayi; FGC Daura; FGGC Tambuwal; FSC Sokoto; FTC Wurno; FGC Gusau; FGC Anka; FGGC Gwandu; FGC Birnin Yauri; FTC Zuru; FGGC Kazaure; FGC Kiyawa; FTC Hadejia; FGGC Bida; FGC New Bussa; FTC Kuta Shiroro.

Àwọn míì ni FGC Ilorin; FGGC Omu Aran; FTC Gwanara; FGC Ugwolawo; FGGC Kabba; FTC Ogugu; FGGC Bwari; FGC Rubochi; FGGC Abaji; FGGC Potiskum; FGC Buni Yadi; FTC Gashau; FTC Michika; FGC Ganye; FGC Azare; FTC Misau; FGGC Bajoga; FGC Biliri; àti FTC Zambuk.
Ìjọba ìpínlẹ̀ Niger náà ti kéde gbígbé àwọn ilé ẹ̀kọ́ táwọn akẹ́kọ̀ọ́ máa ń sun ibẹ̀ ní ẹkùn Niger North tìpa fún ìgbà kan ná.

Ìkéde yìí ni wọ́n gbé jáde nínú àtẹ̀jáde tí akọ̀wé ìjọba, Alhaji Abubakar Usman fi síta lọ́jọ́ Ẹtì.

Bákan náà ni ìjọba ìpínlẹ̀ Kwara tí kéde títi àwọn ilé ẹ̀kọ́ pa ní ìjọba ìbílẹ̀ mẹ́rin ìyẹn ní Isin, Irepodun, Ifelodun àti Ekiti níbi tí ìkọlù àwọn agbébọn ti ń wáyé lemọ́lemọ́.

Ìpinnu yìí ló ń wáyé nínú ìkéde tí alága ẹgbẹ́ àwọn olùkọ́ ìpínlẹ̀ Kwara, Yusuf Agboola fi síta.

Bẹ́ẹ̀ náà ni ìjọba ìpínlẹ̀ Plateau kéde títi àwọn ilé ẹ̀kọ́ alákọ̀ọ́bẹ̀rẹ̀ káàkiri gbogbo ìpínlẹ̀ náà nítorí ètò ààbò tó mẹ́hẹ.

Agbẹnusọ ètò ẹ̀kọ́ káríayé ní ìpínlẹ̀ náà, Richard Jonah sọ pé ìjọba gbé ìgbésẹ̀ náà láti wà ní ojú lalákàn fi ń ṣọ́rí nítorí ìkọlù tó ń wáyé láwọn ìpínlẹ̀ míì.

Ó ní àwọn gbé ìgbésẹ̀ náà láti dènà irúfẹ́ ìkọlù bẹ́ẹ̀ ní ìpínlẹ̀ Plateau.

Ní ìpínlẹ̀ Katsina, ìjọba ti pàṣẹ pé kí wọ́n gbé gbogbo àwọn ilé ẹ̀kọ́ tó jẹ́ ti ìjọba tìpa títí di ìgbà kan ná.

Kọmíṣánnà ètò ẹ̀kọ́ ní Katsina, Yusuf Jibia sọ fún àwọn akọ̀ròyìn lọ́jọ́ Ẹtì pé ìgbésẹ̀ náà ń wáyé láti dá ààbò bo àwọn akẹ́kọ̀ọ́.

Ó ní bí ó tilẹ̀ jẹ́ pé àwọn akẹ́kọ̀ọ́ náà ń ṣe ìdánwò lọ́wọ́, dídá ààbò bo ẹ̀mí àti dúkìá ṣe pàtàkì, tí àwọn sì mú ní òkúkúdùn.

Jibia fi kun pé àwọn gbé ìgbésẹ̀ fún ìgbà díẹ̀ ná láti ṣe àgbéyẹ̀wò ètò ààbò ìpínlẹ̀ náà.

Ẹ̀wẹ̀, agbẹnusọ ìjọba ìpínlẹ̀ Kebbi, Ahmed Idris sọ pé ìjọba ìpínlẹ̀ Kebbi ti pọn kún ètò ààbò àmọ́ wọn kò ní ti àwọn ilé ẹ̀kọ́ pa.

Idris ní bíi ọ̀sẹ̀ mẹ́ta sí mẹ́rin ló kù fún àwọn akẹ́kọ̀ọ́ láti parí sáà àkọ́kọ́ tí wọ́n ń ba lọ lọ́wọ́ àti pé ètò ààbò tí wọ́n ti là kalẹ̀ yóò jẹ́ kí ìtẹ̀síwájú bá ètò ẹ̀kọ́.

Àdánu ńla ni ikú Olúṣẹ́gun Awólọ́wọ̀ jé̩ fún Naijiria lapapo̩ – Akpabio

Yínká Àlàbí

Ààrẹ Ilé Igbimo̩ Asòfin, Godswill Akpabio, ti sọ pé ikú olóògbé Olúṣẹ́gun Awólọ́wọ̀ Jnr., ọmọ bàbá ńlá idílé Awólọ́wọ̀, jẹ́ nnkan buruku fún ile̩ Yorùbá àti orílẹ̀-èdè Nàìjíríà.
Ní ìkéde tí aṣojú rẹ̀ fún ìrọ̀yìn, Jackson Udom, fi síta, Akpabio sọ pé ìròyìn ikú ọ̀rẹ́ àti arákùnrin rẹ̀ yìí wá sí i lojijì ó sì dùn gan-an.
Ó sọ pé a kò lè béèrè lọ́wọ́ Olúwa nípa ìpinnu rẹ̀, torí Ọlọ́run ló mọ ìgbà tá a bí ènìyàn àti ìgbà tí yóò lọ.
Ó se ibanike̩dun pẹ̀lú gbogbo idílé Awólọ́wọ̀ ní Ikènné, Gómìnà Dàpọ̀ Abíọ́dún àti ará Ogun State lórí àìníye yìí. Ó tún fi e̩dun ọkàn rẹ̀ hàn fún ìyàwó àti ọmọ tí Olúṣẹ́gun fi sílẹ̀.
Akpabio ṣàfikún pé Olúṣẹ́gun jẹ́ agbẹjọ́rò ọlọ́gbọ́n, ọkọ àti baba onírẹ̀lẹ̀, tí ìrántí iṣẹ́ rere rẹ̀ yóò tẹ̀síwájú.
Láti orúkọ àwọn ènìyàn Akwa Ibom North West àti Ilé Asòfin Kẹwàá, ó gbàdúrà pé kí Ọlọ́run fún un ní ìsinmi aláfíà, kí ó sì fún idílé àti ọ̀rẹ́ rẹ̀ ní agbára láti ní sùúrù.
Ó parí o̩ro̩ re̩ pé kí Ọlọ́run fun idílé Awólọ́wọ̀ ní agbára ati okun láti gbà adanun nla ti ko se fowo ra yii. Ki Eledua si jo̩wo̩ ba wa te̩ e̩ si afe̩fe̩ rere.