Àwọn ọmọ ẹgbẹ́ òṣèlú PDP ń lépa ẹ̀mí-in wa- APC Osun fẹ̀sùn kàn

Fẹ́mi Akínṣọlá

Àwọn àgbààgbà ẹgbẹ́ òṣèlú All Progressives Congress, APC ní ìlú Ede, ìpínlẹ̀ Osun ti fẹ̀sùn kan ẹgbẹ́ òṣèlú Peoples Democratic Party, PDP ìlú Ede wí pé wọ́n ń lépa ẹ̀mí àwọn.

Àtẹ̀jáde kan látọwọ́ Muftau Oyewale àti àwọn àgbà ẹgbẹ́ òṣèlú APC mẹ́rìndínlọ́gbọ̀n mìíràn ní àwọn jàǹdùkú ẹgbẹ́ òṣèlú PDP yabo ilé ẹgbẹ́ àwọn tó wà ní ìlú Ede tó jẹ́ ìlú gómìnà Ademola Adeleke tí wọ́n sì bẹ̀rẹ̀ sí ní na àwọn tí wọ́n bá níbẹ̀.

Oyewale ní àwọn jàǹdùkú náà fẹ́ gba ẹ̀mí lọ́rùn àwọn ni àmọ́ orí ló kó àwọn yọ lọ́wọ́ wọn àmọ́ àwọn ènìyàn àwọn farapa yánnayànna.

Ó ní ìkọlù ọ̀hún kò ṣẹ̀yìn ìdájọ́ ìgbìmọ̀ tó ń gbọ́ ẹ̀hónú ìbò ìpínlẹ̀ Osun èyí tó kéde rẹ̀ pé gómìnà àná ní ìpínlẹ̀ náà, Gboyega Oyetola ló jáwé olúborí níbi ètò ìdìbò tó wáyé ní ìpínlẹ̀ Osun lọ́jọ́ Kẹrìndínlógún oṣù keje ọdún 2022.

Ó ṣàlàyé pé kò pẹ́ púpọ̀ tí adájọ́ kéde ìdájọ́ rẹ̀ tí àwọn jàǹdùkú fi bẹ̀rẹ̀ ìkọlù wọn, tí àwọn jàǹdùkú náà sì jó ilé ẹgbẹ́ àwọn tó wà ní Èdè South níná.

Bákan náà ló ní àwọn jàǹdùkú náà tún ṣe ìkọlù sí ilé ẹgbẹ́ APC tó wà ní Ede North tí wọ́n sì ba gbogbo nǹkan tó wà níbẹ̀ jẹ́.

Àwọn àgbààgbà náà ní ẹ̀ṣẹ̀ tí àwọn ṣẹ ẹgbẹ́ òṣèlú PDP kò kọjá bí àwọn ṣe gbé àkànṣe àdúrà kan kalẹ̀ lórí ìjáwé olúborí Oyetola ní Tribunal.

Àtẹ̀jáde náà tún fẹ̀sùn kàn pé àwọn ọmọ ẹgbẹ́ PDP náà tún ń dúnkokò mọ́ àwọn pé àwọn máa pa àwọn tí àwọn yóò sì tún dáná sun ilé àwọn.

Wọ́n wá rọ Iléeṣẹ́ ọlọ́pàá àti àwọn ẹ̀ṣọ́ ààbò mìíràn ní ìpínlẹ̀ Ọsun láti dá ààbò bo gbogbo àwọn ọmọ ẹgbẹ́ òṣèlú APC tó wà ní ìlú Ede nítorí inú fu àyà fu ni àwọn wà báyìí.

Bákan náà ni wọ́n rọ Iléeṣẹ́ ọlọ́pàá láti ṣèwádìí gbogbo ìkọlù tó wáyé sí àwọn ọmọ ẹgbẹ́ APC ní ìpínlẹ̀ náà lẹ́nu ìgbà tí ìdájọ́ Tribunal ti wáyé.

Wọ́n fi kun pé kìí ṣe ẹ̀ṣẹ̀ fún àwọn láti jẹ́ ọmọ ẹgbẹ́ APC nítorí gbogbo ènìyàn ìlú Ede kò lè jẹ́ PDP àti pé àwọn ọmọ ẹgbẹ́ PDP wà ní Iragbiji tó jẹ́ ìlú Oyetola.

“Kò sí ẹni tó ṣe ìkọlù sí àwọn ọmọ ẹgbẹ́ PDP to wà ní Iragbiji kódà nígbà tí INEC kéde pé Oyetola kọ́ ló wọlé ìbò kí wá ló dé tí àwa kò ní rímú mí nítorí a jẹ́ ọmọ ẹgbẹ́ APC ní Èdè?”

Nígbà tó ń fèsì sí ẹ̀sùn APC, alága ẹgbẹ́ òṣèlú PDP ní ìpínlẹ̀ Osun, dókítà Akindele Adekunle ní irọ́ pátápátá ni gbogbo ẹ̀sùn tí APC fi kan ọmọ ẹgbẹ́ àwọn.

Adekunle ní ìdààmú bá APC nítorí pé wọ́n fẹ́ jí ipò tí kìí ṣe ti wọn gbà lọ́wọ́ ẹgbẹ́ àwọn ni gbogbo irọ́ tí wọ́n ń pa.

Ó ní àwọn kò ní jàǹdùkú kankan tó ń ṣiṣẹ́ fún àwọn pé àwọn kò dàbí APC tó ń ti àwọn jàǹdùkú lẹ́yìn fún ọdún mẹ́rin tí wọ́n fi wà nípò.

Ọ̀gá àgbà CBN wí tẹnu ẹ̀ lórí owó naira tuntun,níwájú àwọn aṣòfin Orílẹ̀ yìí

Ọrẹ Òtítọ́jù

Gómìnà báńkì àpapọ̀ Orílẹ̀ yìí, CBN, Godwin Emefiele ti sọ pé àwọn ilé ìfowópamọ̀ yóó tẹ̀síwájú láti máa gba owó náírà àtijọ́ lẹ́yìn gbèdéke iye ọjọ́ tí wọ́n kéde ṣaájú.

Ṣaaju ni CBN ti kọkọ ṣe afikun gbedeke ti awọn araalu gbọdọ lọ paarọ owo atijọ si tuntun, lẹyin ti awọn araalu fariga latari iṣoro ti wọn dojukọ lati paarọ owo naa.

Amọ lasiko to yọju siwaju ile aṣojuṣofin lori ọrọ naa, gomina banki ọhun sọ pe awọn yoo ṣi maa gba owo atijọ ti akoko ti wọn kede lati paarọ owo ọhun ba ti kọja.

O ni bo tilẹ jẹ pe awọn eeyan ko le maa na owo naa lawujọ mọ, CBN yoo ṣi maa gba owo naa.

O ṣalaye fun awọ aṣofin naa pe oun tẹkọ leti lọ si oke okun ni ko jẹ ki oun kọkọ yọju si wọn lasiko ti wọn kọkọ kọwe pe oun.

Lẹyin naa lo rọ awọn aṣofin naa ki wọn gba ofin naira tuntun ọhun laaye lati mulẹ.

Nigba to n sọrọ lori eredi ti wọn ṣe tẹ owo tuntun, o ni ohun ti CBN n ṣe wa ni ibamu pẹlu bi aye ṣe n yi.

O fi kun pe iye owo to wa nigboro ko si ni ikawọ banki naa.

Emefiele tun ṣalaye pe wọn ko fẹ ki oloriojori maa gba owo to pọ ju lo jẹ ki wọn fi gbedeke le iye owo ti eeyan le gba lori ẹrọ ATM lojumọ kan.

O fi kun pe awọn mọ pe ilana tuntun lori gbedeke iye ti eeyan le gba lojumọ yoo pa awọn eeyan kan lara, amọ wọn ṣe ofin naa pẹlu erongba rere fun awọn araalu.

Àti pé ìlànà tuntun ọ̀hún yóó ran ìjọba lọ́wọ́ láti kojú ìṣòro ètò ààbò tó ń bá Orílẹ̀ yìí fínra

Àtubọ̀tán ayé! Idris fipá bá ẹlẹ́hàá lò pọ̀ nínú mọ́ṣálásí, kan n‘Íbàdàn

Fẹ́mi Akínṣọlá

Wọ́n ní tọ́ ọmọ ọ̀ rẹ sí ìlànà Ọlọ́run, kó má dà
gbà ya gànálugi.
Àwọn ẹgbẹ́ Mùsùlùmí lóríṣìíríṣìí ni wọ́n tú jáde lọ́jọ́ Ajé, ọgbọ̀ńjọ́, oṣù Kín-ín-ní, ọdún yìí láti fẹ̀hònù hàn nílùú Ìbàdàn, níìpínlẹ̀ Ọ̀yọ́ látàrí bí ọmọkùnrin kan tí wọ́n porúkọ rẹ̀ ní Idris, ṣùgbọ́n tí àlàjẹ́ rẹ̀ ń jẹ́ Késárì ṣe wọnú Mọ́ṣálásí kan lọ ní agbègbè Iwo Road, tó sì lọ̀ ọ́ fipá bá ẹlẹ́hàá tó wà nínú Mọ́ṣálásí ọ̀hún sun-un-run kòtọ́ lọ́jọ́ Àìkú, ọjọ́ kọkàndínlọ́gbọ̀n, oṣù Kín-ín-ní, ọdún yìí.

Ọmọ ọ̀kan nínú àwọn onímọ́tò ni wọ́n pe ọmọkùnrin tó yọ́ wọnú mọ́ṣáláṣí ọ̀hún, tó sì fipá bá obìnrin tó wà nínú aṣọ ẹ̀há lò pọ̀.

Ìbínú ọ̀rọ̀ yìí ni àwọn àgbààgbà ẹlẹ́sìn Mùsùlùmí nílùú Ìbàdàn, èyí tí gbajúmọ̀ oníwáàsí n-nì, Sheik Amúbíẹyá, darí ṣe fi ẹ̀hónú hàn ta ko ìwà ìtàbùkù sí ọmọlúàbí ọ̀hún .

Ìròyìn Òwúrọ̀ gbọ́ pé ọmọ bíbí inú ọ̀kan lára àwọn adarí ẹgbẹ́ onímọ́tò tí wọ́n ń pè ní Al-Majiri ni Idris. Ọwọ́ àwọn agbófinrí ti tẹ ọmọkùnrin ọ̀hún tó hùwà a kòtọ́ yìí, wọ́n sì ti mú un lọ sí ẹ̀ka iléeṣẹ́ ọ̀tẹlẹ̀múyẹ́ àwọn ọlọ́pàá, níbi tí wọ́n ti ń fọ̀rọ̀ wá a lẹ́nu wò.

Ohun tí àwọn ẹgbẹ́ Mùsùlùmí ọ̀hún ń bèèrè fún ni pé kí wọ́n má ṣe jẹ́ kí ọmọkùnrin náà lọ láì jìyà. Kí wọ́n fìyà tó tọ́ jẹ ẹ́ kó lè jẹ́ ẹ̀kọ́ fún àwọn tó bá tún ní-in lọ́kàn láti dánrú ẹ̀ wò.

Ẹlẹwọn mẹrinla gba ominira nipinlẹ Ogun.

Lati ọwọọ Adefunkẹ Adebiyi

Mẹrinla ninu awọn ẹlẹwọn ti wọn kaakiri ipinlẹ Ogun ni wọn gba ominira kuro lahaamọ lọjọ Iṣẹgun ọsẹ yii ti i ṣe ọjọ kọkanlelọgbọn, oṣu kin-in-ni ọdun 2023. Adajọ agba nipinlẹ Ogun, Mosunmọla Arinọla Dipẹolu lo sọ wọn di ominira pẹlu alaye pe ki wọn maa lọ ṣugbọn ki wọn ma dẹṣẹ mọ.

Ọgba ẹwọn Ọ̀bà, Ibara ateyi ti wọn n pe ni Borstal to wa l’Abẹokuta lawọn ẹlewọn naa ti gba itusilẹ, pẹlu eyi to wa n’Ijẹbu-Ode ti i ṣe ikẹrin wọn.

Adajọ agba Dipẹolu paṣẹ itusilẹ naa lasiko ti wọn n ṣeto kan to ni i ṣe pẹlu bi ọgba ẹwọn ṣe n kun akunfaya, eyi to waye ninu ọgba ile-ẹjọ nla ti wọn n pe ni Judiciary Complex to wa niluu Abẹokuta.

Awọn ẹlẹwọn to gba itusilẹ yii ti wa nibẹ lati ọdun 2015,2016 ati 2017. Awọn mi-in kan ṣaa wa nibẹ ni, wọn ko ti i foju ba ile-ẹjọ, eyi ti ko yẹ ko ri bẹẹ bi Adajọ Dipẹolu ṣe sọ.

Adajọ Dipẹolu ṣalaye pe itusilẹ toun fun awọn ẹlẹwọn naa wa ni ibamu pẹlu ẹtọ, nitori wọn ko le wa ninu ẹwọn fungba pipẹ bẹẹ lai foju bale-ẹjọ.

O fi kun un pe DPP, iyẹn Director Of Public Prosecution to yẹ ko maa fun kootu nimọran to yẹ lori igbẹjọ ko ṣe bẹẹ fawọn ẹlẹwọn yii.

Nibi tọrọ ọhun buru de, Adajọ agba fidi ẹ mulẹ pe ẹjọ tẹlomi-in tori ẹ wa lẹwọn latọdun mẹjọ sẹyin ko ni faili kan ṣoṣo, ko si akọsilẹ ti wọn yoo fi to iwe rẹ, iru ẹni bẹẹ si wa lọgba ẹwọn lai jade.

Eyi lo n fa a ti awọn ọgba ẹwọn ṣe n kun akunfaya bi Adajọ Dipẹolu ṣe wi.

Nigba ti awọn eto bi eyi ba si ti n waye, o ni anfaani kan ni lati din ero ku lawọn ọgba ẹwọn to wa nipinlẹ Ogun.

Awọn ẹsun bii igbimọpọ-ṣiṣẹ ibi, idigunjale,igbinyaju lati paayan,ijinigbe,ifipabanilopọ ati bẹẹ bẹẹ lọ ni awọn ti wọn gba idande yii lufin ẹ ti wọn fi dẹni ahamọ,nigba ti ori si ti ba wọn ṣe ti wọn ti gba ominira yii, Adajọ agba gba wọn nimọran pe ki wọn dẹkun iwa to le da wọn pada sọgba ẹwọn ti wọn ti kuro.

O ni ki wọn jẹ ọmọluabi, nitori a ki i ri ẹfọn i ta lẹẹmeji, bi wọn ba tun fi bọ sọwọ ofin lẹẹkan si i,anfaani bii eyi ko ni i tọ si wọn mọ ladajọ agba wi.

ent from Yahoo Mail on Android

Yóó ṣòro láti yí ìdàjọ́ náà padà nílé ẹjọ́ ọ kòtẹ́milọ́rùn

Fẹ́mi Akínṣọlá

Agbẹjọ́rò àgbà nílẹ̀ yìí Amòfin Fẹ́mi Fálànà ti ní yóó ṣòro láti yí ìdàjọ́ náà padà nílé ẹjọ́ ọ kòtẹ́milọ́rùn.

Fálànà sọ pé “Ohun tó yẹ kí àwọn olùdìbò lágbègbè yẹn ṣe ni kí wọ́n pe INEC lẹ́jọ́ pé àjọ náà fi ìbò o wọn ṣòfò.”

Gẹ́gẹ́ bíi ohun tó sọ, yóó ṣòro fún àwọn agbẹjọ́rò Adeleke láti yí ìdájọ́ tó wà nílẹ̀ padà tí wọ́n bá dé ilé ẹjọ́ kọ̀tẹ́milọ́rùn.

Ó ní “Bí mo ṣe ń wo ìdájọ́ yìí, mo gbàgbọ́ pé yóó ṣòro láti yí ìdájọ́ náà padà.”

“Orí INEC ló yẹ kí wọ́n ti fọ́ àgbọn ohun tó ṣẹlẹ̀.”

“Ó yẹ kí INEC padà lọ tún èrò rẹ̀ pa kí irúfẹ́ nǹkan báyìí má baà wáyé mọ́.”

“Nítorí tí irúfẹ́ nǹkan báyìí bá wáyé nínú ètò ìdìbò Ààrẹ, ó lè dá rúgúdù tí apá INEC fúnra rẹ̀ kò ní-ín ká.”

Ẹ̀wẹ̀, Ademola Adeleke tí ilé ẹjọ́ ní kí wọ́n gba ipò lọ́wọ́ ẹ̀ fún Oyetola ti sọ fún àwọn alátìlẹ́yìn rẹ̀ kí wọ́n má fa wàhálà kankan nítorí òun yóó gba ilé ẹjọ́ ọ kòtẹ́milọ́rùn lọ.

Àmọ ṣá, àwọn alátìlẹ́yìn rẹ̀ kan ti ṣe ìfẹ̀hónúhàn nílùú Osogbo lópin ọ̀sẹ̀.

Nínú dókítà 280 tí a ní, 199 wọn ló jẹ́ ayédèrú – Ìjọba Zamfara

Ọrẹ Òtítọ́jù

Gómìnà ìpínlẹ̀ Zamfara, Bello Matawalle ti sọ pé kò dín ní ayédèrú dókítà mọ́kàndínnígba (199) tó ń gba owó ìjọba láì ṣiṣẹ́.

Matawalle ló sọ ọ̀rọ̀ náà lásìkò tó ń bá àwọn akọ̀ròyìn sọ̀rọ̀ nílùú Maradun.

Gẹgẹ bii ohun ti gomina ọhun sọ, oṣoṣu ni ijọba n san owo fun ọ̀rìnlénígba (280) dokita ki aṣiri to tu pe dokita mọ́kànlélọ́gọ́rin (81) pere lo jẹ ojulowo ninu wọn.

O sọ siwaju si pe oun ti ṣe ipade pẹlu ẹgbẹ awọn oṣiṣẹ, NLC ipinlẹ naa lati ṣawari awọn mọ́kàndínnígba ayederu dokita ọhun lọna ati dẹkun irufẹ iwa bẹẹ lọjọ iwaju.

Matawalle ni aṣiri awọn ayederu oṣiṣẹ naa tu lẹyin ti awọn bẹrẹ iforukọsilẹ gbogbo oṣiṣẹ ipinlẹ ọhun nibi ti wọn ti n gba oju ati ika wọn silẹ.

Gomina naa sọ pe igbesẹ ọhun ko ṣẹyin afojusun ijọba lati bẹrẹ eto lati maa san ẹgbẹrun lọna ọgbọn naira, eyii to jẹ owo oṣu oṣiṣẹ to kere julọ.
O ni “Ni kete ti a sọ pe a fẹ bẹrẹ si n san ẹgbẹrun lọna ọgbọn naira owo oṣu oṣiṣẹ to kere julọ, a o kan le maa san owo naa bẹyẹn, oni awọn igbesẹ ti a gbọdọ tẹle.”

1. “Nigba ti a bẹrẹ iforukọsilẹ, a ṣakiyesi pe dokita 280 lo n gbowo oṣu lọwọ ijọba amọ dokita 81 pere ni a ni nipinlẹ Zamrafa.”

Báńkì àpapọ̀ Orílẹ̀ yìí kéde afìkún àsìkò tí owó àtijọ́ yóò kúró nílẹ̀

Ọrẹ Òtítọ́jù

Gómìnà Báńkì Orílẹ̀ yìí, Godwin Emefiele ti kéde pé ìjoba ti fi kún gbèdéke àsìkò tí wọn yóó kó owó àtijọ́ kúrò nílẹ̀ báyìí.

Emefiele ṣàlàyé pé lẹ́yìn ọ̀pọ̀lọpọ̀ ìpàdé pẹ̀lú Ààrẹ Muhammadu Buhari ni wỌ́n pinnu láti fi kún iye ọjọ́ tí wọn yóó kó owó náà kúò nílẹ̀ pátápátá.

Saaju ni wọn ti kede ọjọ kọkanlelọgbọn, oṣu kinni, ọdun 2023 gẹgẹ bi ọjọ to gbẹyin ṣugbọn bayii, wọn ti sun un siwaju di ọjọ kẹwaa, oṣu keji, ọdun 2023.

Emefiele dupẹ lọwọ Buhari fun atilẹyin to sẹ fun un lasiko to n gbe igbesẹ akọni yii .

Emefiele tun salaye pe o ti to ida 75% ninu ọgọrun un owo atijọ to ti wọle bayii

Ati pe oun gbe igbesẹ naa ki odiwọn iye nnkan ti owo naira le ra ati agbara rẹ le gbe pẹẹli sii ni.

O ni yoo tun dena agbara owo ti awon ajinigbe n gba bii owo itusilẹ ni eyi ti yoo ran awon oṣiṣẹ alaabo lọwọ lati maa ri wọn mu lasiko.

Ojọ kẹwaa, oṣu keji ọdun yii ni wọn ko ni le maa na owo atijọ mọ nigboro Naijiria.

Emefiele sọ pe awọn ti ri 1.9 tirillion ninu 2.7 trillion to ha sita gba wọle pada ni Naijiria bayii.

Emefiele sọ pe to ba tun ti di ọjọ kẹwaa, oṣu keji si ọjọ kẹtadinlogun, oṣu keji, ọdun 2023 yii ni awọn eeyan ṣi ni oore ọfẹ lati paarọ owo atijọ wọn si tuntun ni banki Naijiria apapọ ti a mọ si Central Bank of Nigeria.

Ọṣe kan ni CBN tun ya kalẹ lati ṣe paṣipaarọ owo naa titi yoo fi kasẹ nilẹ tan lẹyin asiko gbedeke tuntun yii

Ẹ gbájúmọ́ ohun tí ẹ ní fárá ìlú lásìkò ìpolongo ìbò dípò èébú—Afẹ́nifẹ́re

Fẹ́mi Akínṣọlá

Bí ètò ìdìbò gbogbogboò níbi tí àwọn ọmọ Nàìjíríà yóò ti tún máa yan àwọn adarí tuntun tí yóò tukọ̀ orílẹ̀ èdè yìí àti ìpínlẹ̀ kọ̀ọ̀kan fún ọdún mẹ́rin mìíràn, ẹgbẹ́ Afẹ́nifẹ́re ti kọminú lórí bí ìwà ìpáǹle ṣe ń gbilẹ̀ níbi ètò ìpolongo ìbò láàárín àwọn olóṣèlú.

Àtẹ̀jáde kan tí agbẹnusọ Afẹ́nifẹ́re, Jare Ajayi fi léde lọ́jọ́ Àìkú, Afẹ́nifẹ́re ní àwọn nǹkan tí àwọn olùdíje fẹ́ ṣe fún ará ìlú ló yẹ kí wọ́n gbájúmọ́ níbi àwọn ètò ìpolongo ìbò wọn dípò títàbùkù ara ẹni.

Afẹ́nifẹ́re ní ìpèníjà tó ń kojú orílẹ̀ èdè Nàìjíríà lọ́wọ́ yìí kọjá kí àwọn olùdíje kan máa tahùn síra wọn lásìkò tó yẹ kí wọ́n fi máa sọ ohun gbòógì tí wọ́n ní fún ìlú lọ.
Èèkàn ẹgbẹ́ ilẹ̀ Yorùbá yìí ní lẹ́nu ọjọ́ mẹ́ta yìí, àwọn olùdíje kàn ń sọ òkò ọ̀rọ̀ lu ara wọn ni tí wọ́n bá dé òde láti polongo ìbò àti pé ìgbésẹ̀ yìí ti ń fa ìjà láàárín àwọn olólùfẹ́ wọn.

Wọ́n ní níbi tí òṣèlú Nàìjíríà dé dúró lónìí, kò yẹ kí àwọn olóṣèlú pàápàá àwọn tó ń wá ipò kan tàbí òmíràn ṣì wà ní ìpele tó jẹ́ wí pé èébú ni wọ́n ń bu ara wọn dípò kí wọ́n máa sọ ohun táwọn ara ìlú fẹ́ gbọ́.

Ajayi nínú àtẹ̀jáde náà fi kun pé àwọn ọ̀rọ̀ kòbákùngbé tí àwọn olúdíje àti àwọn agbẹnusọ wọn ń sọ sí ara wọn ń fún àwọn alátìlẹyìn wọn ní ìgboyà láti máa ṣèkọlù síra wọn èyí tó le fa ìtàjẹ̀sílẹ̀.

Ó tẹ̀síwájú pé onírúurú àwọn fídíò tó ń ṣàfihàn ìwà ipá tí àwọn ènìyàn ń wù síra ló ti ń gbòde lẹ́nu ọjọ́ mẹ́ta yìí tó sì ní òpin gbọ́dọ̀ débá àwọn ìwà yìí tí ìdìbò gbogbogboò yóò bá lọ ní ìrọ̀wọ́rọsẹ̀.

Nígbà tó ń fi ìkọnilóminú rẹ̀ hàn lórí àwọn ìwà ìpáǹle yìí pẹ̀lú gbogbo ìwé àdéhùn àláfíà tí àwọn ẹgbẹ́ òṣèlú yìí tọwọ́bọ̀ pó kò ní sí làásìgbò lásìkò ìbò, Ajayi ní ìwádìí fi hàn pé kò dí ní ọmọ Nàìjíríà mẹ́tàdínlọ́gbọ̀n tó pàdánù ẹ̀mí rẹ̀ sọ́wọ́ láàsìgbò òṣèlú lọ́dún 2022 nìkan.

Bákan náà ló fi kun pé olùbádámọ̀ràn Ààrẹ Muhammadu Buhari lórí ètò ààbò, Babagana Monguno náà fìdí i rẹ̀ múlẹ̀ ìkọlù méjìléláàdọ́ta láàárín àwọn ẹgbẹ́ òṣèlú ló wáyé láàárín oṣù kan péré ìyẹn láàárín oṣù Kẹwàá sí oṣù Kọkànlá ọdún tó kọjá.

Afẹ́nifẹ́re wá pàrọwà sí àwọn olùdíje àtàwọn olóṣèlú láti jìnà síwà bóobá a o pá, kí wọ́n gbájúmọ́ ètò tí wọ́n ní fún ìlú láti tán ìṣẹ́ àti òṣì tó ń bá àwọn ọmọ Nàìjíríà fínra.